3 اسئلة عن الرينو كليو

[exelence]

الأخوة الأفاضل
بعد التحية,

كنت عاوز اسأل 3 اسئلة عن الرينو كليو :

1- ما هو أفضل موديل للرينو كليو لانى سمعت ناس بتقول 2002 و ناس تقول 2004 فحبيت اعرف من حضراتكم من واقع الخبرة.

2- لو حبيت أكشف على عربيه مستعمله رينو هل فيه حد متخصص أكشف عليها عنده ولا أخدها أى بنزينة و اكشف عليها عادى ؟

3- رأى حضراتكم ايه فى العربية كمجمل على أساس إنها هتكون اول عربية و لا يستحب الأعطال الكثيرة ؟

و شاكر لكم سعة صدركم

[wael-mohamed]

شوف حضرتك انا كان معايا عربية كليو موديل 2002 الشكل القديم و2003 الشكل الجديد والعربية جميلة جدا بس بشرط انه تكون مش متهانة .
بالنسبة للموديلات الاجود فهي من 2005 وانت طالع ويستحسن تكون 2008 لعدة اسباب
* علشان العربية تبقى لسة مبقلهاش كتير ماشية
* حالة العربية تبقى كويسة
* 2008 الموتور 1400 كاملة مانيول غير 2005 1200 وعادية
بالنسبة للعربية لما تكشف عليها اكشف على كفائة الموتور والشاسية من تحت واخبار العفشة ايه وعاملة كام كيلو العربية ويستحسن في التوكيل لو معندكش خبرة مسبقة في السيارات لان الكليو عربية حلوة وقطع غيارها معمرة بس تكون الاصلية هيه غالية شوية بس ممتازة
وربنا ييسرلك امرك وانا جاهز لاي سؤال في الكليو حاكم انا عشرة معاها 10 سنين

[exelence]

الف شكر حضرتك على الإجابة طب و موضوع تقفيل تركى ولا فرنساوى ؟
و بعدين السعر يترواح من كام لانى كان معروض عليا واحده 2003 و كانت ب 33 الف فهل ده رينج السعر ؟
هل بتستحمل السفر لمسافات 200 كيلو مثلا" و مش بإستمرار ؟

[Abo Yasso]

متابع

[abdulkhaleq]

اللي معروضه عليك دي رخيصه والله اعلم ليه ده مش رينج السعر للشكل الجديد
بالنسبه للكشف لو هتكشف في بنزينه يبقى على الزوايا بس عشان تتأكد ان الشاسيه سليم ومافيش عجله مرحله
لكن نصيحه اكشف عند حد عنده سكانر ده هيجيبلك من الاخر لو فيها مشكله
وطبعا سوق العربيه بنفسك حبه حلوين وانت مشغل التكييف وياريت لو الظهر مش بالليل

[ramy_gamal]

فى موديلات 2003 و4 و5 نازله 1400 كامله 16 صباب موتور فى منتهى القوة مع توفير فى البنزين
طبعا يستحسن تكشف فى التوكيل او حد متخصص فى الرينو
عربيه حموله وبتاعت شغل جامد بس اهم حاجه تكون بتعمل الصيانات فى الميعاد....بالتوفيق

[wael-mohamed]

الف شكر حضرتك على الإجابة طب و موضوع تقفيل تركى ولا فرنساوى ؟
و بعدين السعر يترواح من كام لانى كان معروض عليا واحده 2003 و كانت ب 33 الف فهل ده رينج السعر ؟
هل بتستحمل السفر لمسافات 200 كيلو مثلا" و مش بإستمرار ؟

يا باشا العفو
على فكرة السعر ده قليل لو العربية كويسة ممكن تزيد عن كده بتاع 5 الاف جنيه وتبقى كويسة مش راشة لا بره والا جوه فبريكة ولا يوجد بها مشاكل في الموتور او العافشة او التكييف كله فبريكة يعني وصحبها محافظ عليها يعني وبالنسبة للسفر حدث ولا حرج انا كنت بروح بيها مرسى مطروح والغردقة واحمل فيها شنط وكلنا راكبين فيه وكنت بمشي 150 والا في مشكلة بس خد بالك انها كانت معايا من الزيرو ومحافظ عليها ولوالعربية الي هتشوفها سليمة وكشفت عليه في التوكيل وجدتها سليمة هتعمل بيها الي انت عايزه من غير مشاكل وبعدين تقفيل تركي او فرنساوي مش فارق لان كل حاجة تقريبا في العربية فرنساوي بس تمتجميعها في مصنع رينو في تركيا لاسباب عديدة زي رخص الايدي العاملة سهولة الشحن انخفاض الضرائب وهكذا وده لا يقلل من قيمة العربية . وبعدين احنا عندنا مرسيدس بتتجمع في مصر و bmw كمان هل معناه انها عربيات مش كويسه ابدا لانهم يتبعوا نفس اسلوب ومواد المصنع في التصنيع وبالتالي مفيش مشكلة من الموضوع بتاع تركيا نهائيا وخصوصا ان تركيا تتبع المواصفات الاوروبية في التصنيع

[MohammedAladel]

أولا شيل نقطة تجميع تركى وتجميع فرنساوى من حساباتك

بالنسبة للكشف أى عربية مش رينو بس لو عايز تكشف يفضل فى التوكيل نظرا لأنهم فاهمين شغلهم وأمانة عكس برا

لو إنت فاهم فى العربيات قبل ماتكشف فى التوكيل هتاخد فكرة عامة عن العربية بنفسك

لو ملكش فى العربيات وفحصها وكدا يبقى مش قدام حضرتك غير التوكيل أو مركز معتمد ( الكلام دا لأى ماركة عربيات فى ال دنيا مش رينو بس )

وأى عربية فى الدنيا مظبوطة موتور وكهرباء وفتيس ودورة تبريد بالأخص تسافر الصين ودى عربية مش قديمة يعنى

بإذن الله تستحمل معاك السفر لو حالتها كويسة


مش مهم ماشية كام كيلو الأهم حالتها بعد ما مشت الكيلو مترات دى

[exelence]

الف الف شكر ليكم يا جماعه
هو ده المنتظر من أعضاء المنتدى المحترمين

[mina971]

انا معايا 2008 1400cc كاملة مانيول عربية فوق الممتازة و استابل علي الطريق جدا

[nemo2000x]

نصيحة لوجه الله
لو العربية متبهدلة أديها دهرك و أجري حتي لو ببلاش

[johzef2000]

ممكن اعرف موديل كليو
2008 تعمل كام النهارده

[ismaelmohamed]

السلام عليكم حد عنده عربيه كليو 1400 عايز يبيعها

[rrgrrg]

بص يا باشا احنا العيله كلها كليوهات عندنا 2003 مانيوال 1200 و 2001/2002 الشكل القديم 1200 و 2006 اوتوماتيك 1400 .... مع اختلاف الحالات و التجارب احسن واحده موديل لانه تقفيل بره مش زي 2007/2008 و فيها اجدد الoptions 2006 سواء مانيوال او اوتوماتيك ... او 2003 لو مش لاقي ... الفرق في فلتر الزيت في 2003 حشو و هتعاني لازم حد شاطر يركب و يفك مش اي حد فبنزينه و طبعا الكلام الجي مش هتقطنع بيه بس ال1200 جرايه اكتر من ال1400 و استهلاك اقل 20 لتر للصفيحه و التكيف مش بيتقل عليها خالص !!! و ال1400 حلوه طبعا و التكيف اتقل علي الموتور بس طبعا عشان اقوي .... الشرط الوحيد هوا الحاله !!!!! اياك تجيب ايا فيهم و صوت الموتور مش ناعم ! اهم حاجه الموتور و الشاسيه و خلي حد متخصص يكشف بدقه و ربنا يرتبلك اللي فيه الخير

[movaiss]

من الساده المحترمين المهتمين بالكليوارغب بشراء واحده ولكني سألت وجدت 1200 cc
1400cc ماهو الافضل عند الشراء ولماذا وشكرا