عملوها الوحوش ( الجزء التانى) !!

[Ahmed Selim]

:)

تمت المقابلة التانية على التوازى :) النهاردة بحمد الله بحضوركل من الوحوش الأتية:
1- الوحش الفنان عمرو
2- الوحش الرزين رامى
3- الوحش الجامد مومو
4- الوحش ( بس من غير ألقاب تانية ) اللى هو أنا
وقد تخلف عن الحضور السادة الأتى أسمائهم
1- أحمد على
2- فرحات
وبناءً عليه قررنا الأتى
سحب لقب وحش من كل منهم الى أن يحضروا المقابلة الجاية

لأ بجد كانت نقصاكم أنتو و شاركى و فهد بس أن شاء الله تتعوض
أنا أضريت أستأذن قبل الشباب عشان كان عندى ميعاد مع الحاج فى البيت عندى وفى الطريق جاتلى الفكرة النميسة دى :)
أكتب اللى حصل قبل ما هما يروحوا :):) وكمان عملتها جزء تانى :)

بجد المقابلة كانت ظريفة جداً و مومو جالنا مخصوص من الهرم وجابلنا معاه طبق حلويات شرقية كمان :)

وسنوافيكم بالصور بعد قليل ( مهمة الفنان عمرو بأه )

[momo10000]

بالصراحة انت كنت منور المقابلة يا احمد وانا كان ليا الشرف بمعرفتك انت وباقي الوحووووش

وخبرتك في الميجان تقيلة وخبرة حد فاهم كويس هو راكب اية وبيعمل اية.

فعلا ....رامي (الوحش الرزين) الكلام معاة متعة لا تنتهي

اما الوحش الفنان ( عمرو طبعا) لو اكلمت من دلوقتي لبكرة مش حخلص فية الكلام

كان فية ضفيين من اصدقاء الوحش احمد عبد المقصود وفعلا خلو للقعدة جو جميل جدا

شريف من رجالة الاوبترا

وعمرو من رجالة الاسترا

الحمد لله ....الجو كان فوق الرائع ..وإن شاء الله عالطول يا وحووووووووووش

[Ramy_Tantawi]

السلام عليكم يا حبايبي الوحوش .

الأول اشكر احمد باشا على الموضوع الجميل ده واللقب اللي تكرم علي به ويا رب اكون عند حسن الظن كده فعلاً وربنا يكرمك ياباشا انت بجد شخصيه محترمه وحبوبه جداً وكنت عامل انت ومومو دويتو هايل وبجد استفدت بكم المعلومات اللي عندك لانك بجد شخص على درايه بالامور الفنيه بقدر محترم جداً .

أما مومو باشا بقى فا هو شخص تحس انه نجم سينيمائي لامع واثق من نفسه ومن معلوماته ومن طريقة تعامله مع الغير ومع ذلك قمه في التواضع والتسامح .....(الراجل جه الاسبوع اللي فات من الهرم للرحاب وروح تاني من غير مايشوفنا ومع ذلك ماحرمش وجه تاني انهارده عشان يتعرف علينا والحمد لله ربنا كرمنا واتم المقابلهوتشرفت بمعرفته ).

ملحوظه /الكلام ده مالهوش علاقه بطبق الحلويات اللي جبته معاك يا مومو والله ده كلام صادق ولا يشوبه اي نقطة شربات قصدي شك .

خلليني اوضح بس ان المقابله انهارده كان ليها طعم مختلف بجد لتشريف احمدعبدالمقصود ومومو باشا وكان الدرس اليوم اقترح انه يكون .

How To Tune Your Renault Megane

الحقيقه احمد عبد المقصود ومومو كانوا بيحاضروا انهارده في الموضوع ده وكل واحد ماشاء الله مدرسه لوحده يعني على سبيل المثال مومو يقول :
Upgrade The ACU with ****KIT
فايقوم احمد عبدالمقصود يقول اوه تمام احنا كمان ممكن نجيب :
Acceleration Booster .
فايقوم مومو يقول والله فكره يا احمد انت عارف كمان ان فيه برنامج للموضوع ده ACU MANAGMENT ده هايل للحوارات دي ........

ده جزء من الكلام اللي كان داير في الحلقه انهارده قصدي المقابله وطبعاً انا كنت قاعد مستمع وعامل زي عبيط القريه مبتسم ومستمتع لكن ببلاهه ودون اضافه لأي منهم .

ده على المستوى الفني للمقابله على المستوى الانساني الحمد لله تشرفت بمعرفة شخصين مريحين نفسياً وعلى خلق وربنا يجمعنا دايما على خير وبركه ان شاء الله والى الامام يا وحوش يا حبايبي .

[momo10000]

دة كلة من ذوقك يا رامي العبد لله والله اللي فرحان جدا اني اتعرفت علي ناس محترمة زيكم ...

في انتظار عمرو الفنان ...ويارب يكون بخير بعد طبق الحلويات

وإن شاء الله تدوم المودة بين الوحوش

والي الامام يا وحووووووووش

[ESO_POP]

ايه اللى بيحصل يا وحوش هو محدش بيحضر المقابلات دى غير الميجان بس؟؟؟؟

[Ramy_Tantawi]

ايه اللى بيحصل يا وحوش هو محدش بيحضر المقابلات دى غير الميجان بس؟؟؟؟

لأ طبعاً يا باشا المقابلات دي عامه لكل الناس اللي نفسها تتعرف علينا ونتشرف باننا نتعرف عليها والله.

[Sharky]

واضح إنها كانت مقابلة جميلة
بصراحة كان نفسى أشوف أحمد و مومو لكن إن شاء الله تتعوض فى المقابلة القادمة

[momo10000]

كان نفسي برضة اشوفك واتشرف بيك يا شاركي ...لكن إن شاء الله السبت الجاي !!!

[Ahmed Selim]

ليه الأحراج ده بس يا شباب :)

لأ بجد صُحبة هايلة و بأذن الله تتكرر المقابلات دى تانى فى وجود شاركى و أحمد على و فرحات بأذن الله

فين الصور يا فنان ؟؟؟؟؟؟

[عمرو عمارة]

السلام عليكم

والله يا جماعة الي محضرش المقابلة دي فاته نص عمره.....أحمد عبد المقصود ومومو كانوا تقريباً بيشدو مع بعض...بس مش بعربياتهم لأ...بكلامهم.....أنا ورامي باشا كنا قاعدين فعلاً مستمتعين بالحوار (هو تقريباً بعد كدا في أي مقابلة رامي هايبقى المخرج وأنا المصور )

مومو باشا كان متألق في كلامه والله مش مجاملة...عنده مخزون من المعلومات القيمة جداً في الرينو (الميجان والكليو) دة غير بقى شخصيته المتواضعة جداً والحبوبة جداً (كان عايز يخدنا بالحضن أول ما شافني أنا ورامي) ومن حبه فينا جاب معاه طبق حلويات شرقية لزيز جداً...حتى هو كيسهولي في أخر القاعدة وقالي لازم تروح بي

أحمد عبد المقصود باشا راجل تقيل وثابت..معلوماته دقيقة جداً خبير في عفشة العربية...بمجرد إنه يبتدي يتكلم نقعد كلنا مستمعين بتركيز وبعدين نبتدي نسأل...شخصية في غاية الإحترام

أستاذ فرحات إحنا فعلاً إفتقدناك في هذه المقابلة...كانت هاتكمل الرينوKit بمعلوماتك القوية....إحنا قاعدنا مستنينك لحد 6:15 بأمر من أستاذ مومو باشا عشان هو مجرب وملسوع من الزبادي

طيب دلوقتي أسبكم مع الصور

خده بالكو من أول صورة...دة كان رامي ماشي ورايا وعربيته جات بالصدفة تحت شعار نايل موتورز وأنا باخد الصورة

[عمرو عمارة]

لسة كمان........

[عمرو عمارة]

أخر حبة.......

1-مومو باشا طبعاً الي ماشي وشايل طبق الحلويات
2-أحمد باشا الي لابش تيشرت مخططة

[Ramy_Tantawi]

تسليم ايدك يا استاذنا الكبير عمرو باشا بجد الصور هايله وبجد للمره التانيه مجهود محترم يا رب دايماً ان شاء الله وتكون كل لقائتنا حبوبه كده ودمها خفيف والمكان نفسه مع اني عمري ما رحت الرحاب ولا فكرت اروحها مش عارف ليه بس المقابلات لئنها تمت فيه ومرتين على التوالي الحمد لله وبنجاح ساحق وتوفيق من الله سبحانه وتعالى قبل كل شيء ابتديت احب الرحاب والله والمكان اللي بنقعد فيه ويا رب نتجمع على خير دايماً كده ان شاء الله وجزيل الشكر مره اخرى نايل موتورز وجزيل الشكل لأعضاء الاسره الرينوهاويه اللي الحمد لله بتزيد جمال وحلاوه يوم عن يوم ويارب يخليلنا استاذ عمرو الموثق للمقابلات بالصور والاخراج المحترم ده وربنا يجعله في ميزان حسناتك ان شاء الله يا استاذ عمرو.

ملحوظه / استاذ فرحات فيييييييييييييييييين ولا جه المقابله ولا رد مع انه كان مأكد على الميعاد قبل المقابله بسويعات قليله لعل المانع خير ان شاء الله وحاول تطمننا عليك يا استاذ فرحات .

استاذ احمد علي كان ممكن نتصل بحضرتك واغتت عليك :) بس انا قلت اسيبك براحتك افضل ممكن تكون راجع تعبان او الجو عجبك وقلت تمد يومين تلاته فا قلنا بلاش ازعاج وكده ومنتظرين تطمننا عليك يا باشا في اقرب فرصه ان شاء الله.

كل مقابله وانتم طيبييييييييييييييييييين يا اسرتي العزيزه ويا رب مايقطع لينا عاده ابداً ويديمها علينا ناعمه يا رب.

[Amr_Moh]

mabrook el mo2abla el tani
wensha2alah
nshofko fel talta wel rab3a wel..........

[د.محمود صلاح]

كان نفسى أحضر ..............