سؤال عن السياره فلوانس

[طارق مجاهد]

السلام عليكم ورحمة الله وبركاته .. عايز حد يفيدنى بجد وبأمانه عن السياره فلوانس من حيث قوة وأمكانية السياره والتكييف والصياته وقطع الغيار وأى حاجه عنها لأنى بصراحه حجزت السياره الفئه التالته اللى سعرها 150000 جنيه من الشركه والتسليم منتصف شهر ديسمبر ورغم أعجابى بالسياره إلا إنه كل ما حد يعرف انى حجزتها إلا ويلومنى على ذلك وده مضايقنى علشان كده ياريت حد يفيدنى بأمانه

[horas3000]

سيبك من كلام الناس يا باشا
العربيه زي الفل و مفيهاش اي عيوب كبيره و اثبتت نجاحها و منتشره بشكل كبير
و اكبر دليل انك مش هتستلم فوري يعني في اقبال عليها

و مش الموضوع ده لانه اكبر موسوعه عن الفلوينس و فيه كل مميزاتها و عيوبها

http://www.nilemotors.net/Nile/236780-3-2011-a.html

[Mohab.Nabil]

طيب الناس بتخوف حضرتك من ايه

اصل اللى بيقول ديه وحشة و خلاص يبقى كلام مش منطقى ولا ايه

يعنى حضرتك قولنا خايف من ايه بالظبط و احنا نرد عليك هل الكلام ده صح ولا لا

مينفعش اقول كلام مطلق كده العربية ديه وحشة او ديه احلى عربية دا كده كلام مش منطقى

ربنا يبارك لك فيها و تستلم على خير ان شاء الله

[Ahmed_selmy]

بص يا باشا انا حجبلك من الاخر , لانى كنت معجب بيها بصراحه وكنت حاططها الاختيار التانى لو ملقتش التيدا (انا لسه مستلم التيدا فى رمضان اللى فات)
المميزات:
بص فيها كل ما تعنيه الكلمه من رفاهيه فى التقفيل والخامات والوسع الداخلى والاوبشنز, و حتلاقى كلام كتير عن الامكانيات اللى فيها.

العيوب:
هنا بقى المهم ودا سبب اللى خلها اختيارى رقم 2 مش رقم 1
- الابعاد : الابعاد بتاعتها كبيره اوى , وطبعا فى مصرنا المحروسه كل اما العربيه حجما بقى اصغر كل اما كان افضل
- التسارع: فى بدايه الحركه يعنى على الاول و التانى بيكون التسارع مش قد كدا بس على السرعات بيكون افضل.
- التكنولوجيا: التكنولوجيا فيها عاليه جدا زى اى عربيه رينو ودا بيصعب عمليه الصيانه فى حاله الاعطال , لان محدش حيقدر يمد ايده فيها الا التوكيل وبصراحه لى واحد صاحبى معاه رينو كليو بيسب ويلعن فى موضوع التوكيل دا
- يوجد نتشه فى الغيارات بين الاول و التانى فى الاتوماتيك ( كان اختيارى اوتوماتيك تانى فئه ب 142 الف), وعرفت ان الاوربى كله كدا, بصراحه فى التيدا انا مبحسش ان العربيه نقلت الا من عداد ال rpm
- الجلد بتاع الطاره بيقشر وبيغاروه فى التوكيل على حسب ما قريت.
- كاوتشة المساحات بتيوظ علطول وسعرها غالى, بس تقريبا بيجيبوا حاجه بديله مش فاكر بصراحه

دى كل العيوب اللى انا قريتها من خلال تجارب الناس فى المنتدى واالى خلتها الاختيار البديل.

[zakizero]

سؤال صغير:هى الفئة التالتة دى اللى ب 150 ألف فيها سنسور بارك؟

[Ahmed_selmy]

شوف الموقع دا
Renault - HOME

[طارق مجاهد]

شكرا للجميع .. بصراحه انا سعيد جدا لأنضمامى لكم .. فعلا واضح انكم محترمين
بالنسبه لسؤال الأخ الصديق مهاب نبيل الناس ياسيدى بتخوفنى مثلا من ان السياره بتبقى بطيئه فى السير لما بتشغل التكييف وان التكييف مش قوى وصيانة رينو سيءه وأسعار قطع الغيار غاليه .. فما رأيك ...؟
أما الأخ الصديق احمد احب أقوله انى أساسا من عشاق نيسان من سنة 2006 اشتريت صنى وفى 2008 اشتريت صنى سوبر صالون ومعايا حتى الأن وفى نوفمبر 2010 اشتريت نيسان بلو بيرد سيلفى موديل 2011 وللأسف عملت بها حادثه كبيره والحمد لله والسياره تم أهلاكها (توتال لوس) ولذلك أحب أقولك أننى أعتز جدا بنيسان وصيانة نيسان ناس فوق الوصف أفضل معامله خاصة فرع مودرن موتورز فى الهايكستب ولى أصدقاء كتير هناك ولكن حبيت أطلع من نيسان من باب التغيير لأن هناك فرق كبير بين اليابانى والأوربى وبعد بحثى أخترت الرينو فلوانس وحاسس انها سياره محترمه بس زى ما قلت فى الأول كل واحد يقولك رينو ياساتر ليه كده عقدونى بجد بس أنا مقتنع بالسياره ولذلك حبيت أسألكم بصفة أنكم جربتم السيارة والتوكيل
اما سؤال الصديق ذكى أنا بصراحه مش عارف هى السياره اللى قيمتها 150000 هى الفئه التالته ولا ايه بس هى فيها سينسور بارك وفتحة سقف
أكرر شكرى لجميع الأعضاء المحترمين

[MohammedAladel]

طبعا رينو فليوانس عربية جميلة فى الفئة دى وشيك جدا وواسعة
محرك 110 حصان نفس محرك ميجان تقريبا والله أعلم ونفس فتيس ميجان لكن فيه تطوير

بالنسبة ليها كعربية بوجه عام الأعضاء قالوا بما فيه الكفاية وخاصة آرا ء الملاك

العربية كتوكيل كويس جدا

كانتشار العربية منتشرة


فى الفئة دى والسعر دا فى الهاى لاين برشح لانسر شارك 1600 مايفيك محرك أقوى وعفشة مالتى لنك

[yalahwy2010]

دى مشاركة لى سابقة واقرأ رأى فى الفلوانس
أنا عايز أعمل شكر خاص لمالكى الفلوانس وأحب أوضح شوية حاجات فى العربية مش موجودة فى أى عربية تانية
أنا هحكيلكم حكايتى مع العربيات من طأطأ لسلام عليكم
أنا كان معايا ميجان 2005......واشتريتها مستعمل سنة 2009 وقعدت معايا حوالى سنتين و 9 شهور
الميجان من العربيات المحترمة جدا وعربية ركوبة فعلا.........بس مشكلتها فعلا فى أعطالها الغير منطقية واللى مش موجودة فى عربيات تانية أقل منها فى المستوى......والقلق اللى جالى وانا بركبها نتيجة التجارب اللى مريت بيها ......
المهم.........بعتها وجبت سيفك 2009 مستعملة......وكانت عربية حالتها ممتازة........لكن للأسف .....ما استريحتش فيها خالص.......والسبب هى الميجان
الميجان عودتنى على حاجات ممتعة.........ومالقيتهاش فى السيفك
يعنى على سبيل المثال...........لما بروح افتح الشنطة بتاعة السيفك.......لازم أحط المفتاح او افتحها من الدراع اللى جوة..........لكن الميجان من الشنطة نفسها..........السنتر بتعها بيشمل فتحة تنك البنزين والشنطة وكله........
واللى خلانى أشترى السيفك...انى كنت فاكر ان الفلوانس بنفس أعطال الميجان...........لكن لما قريت ال 123 صفحة ( رابطة حائزى الفلوانس) وعرفت ان العربية ما شاء الله مافبهاش أعطال الميجان..........عزمت النية على شاء الفلوانس والحمد لله ربنا وفقنى واشتريتها (تانى فئة اوتوماتيك)
العربية لما ركبتها ......بس الله ما شاء الله.............حاجة تفرح وتفتح النفس فى سواقة العربية
العربية هقول على شوية مميزات للأخوة اللى ممكن يقروا اللى انا كاتبه وتساعدهم على الاختيار:
1. أولا العربية كراحة فى الركوب......حاجة فوق الوصف فى الراحة فى المناورة والكرسى المريح ..........
2. الباور الناعم اللى بيخلى الواحد وهو بيركن مش تعبان ولا بيفرق معاه فى الطلوع والرجوع
3. الارتفاع عن الأرض.......يعنى انسى المطبات والنقر والتكسير اللى تحس بيه وانت سايق......يعنى لو معاك 3 أفراد فى الكنبة الخلفية.......صعب جدا تحك فى مطب رخم
4. الشنطة الواسعة اللى تشيل شنط كتييير جدا .....
5. الصاج المحمل ومددى منظر للعربية بالقوة والصلابة.....لو واحد ركن عليها ماتلاقيش الصاج عروج
6. الكماليات اللى مالهاش حصر...........تحس انهم كانوا عايزينك تدخل وتسيب العربية تمشى لوحدها من غير ما تتعب نفسك وتدوس بنزين وفرامل........آه...........الفرامل بالصلاة على النبى.........مش قادر أوصف الفرامل........من الآخر (أحسن من السيفك والفانتازيا)
7. الكنبة الخلفية مريحة جدا للى بيقعد ورا..........واسعة جدا ومريحة جدا جدا
8. العزل ثم العزل ثم العزل ........حاجة تحفة......بس صوت الموتور بيطلع فوق ال 160 .......بس قبل كدة........ولا الهوا.....انسى صوت الظلط والأسفلت الوحش والهوا والكلام ده كله
7. أنا مش هتكلم عن الكماليات .......عشان بتختلف من فئة للتانية...........بس اللى عايز يشترى......ما يشتريش أقل من الفئة التانية أوتوماتيك
8. بالنسبة لإعادة البيع..............لو العربية إعادة البيع ما اتحسنتش.......عمرى ما هفكر أغير...........ولو حبيت أغير.......يبقى أكيد هفكر فى الفلوانس 2015...........لو غيرت لأحسن..........يعنى الميجان لو كانت بدون أعطال.........ماكنتش بعتها..........لأنى بصراحة ما لقيتش ركوبة أحسن منها....ماعدا الفلوانس

وبالتوفيق لأى حد ناوى يشترى ويجيب فلوانس ........ومش هيعرف قيمة اللى انا بقوله الا لما يقران بينها وبين أى عربية تانية فى نفس فئتها السعرية أو أعلى منها لغاية 50 ألف جنيه

[mo7elmy]

اهلا بيك طارق بيه انا كنت زيك كدة محتار جدا وبدات افكر بالاوبترا ثم لاغيت فكرة ان ادفع 100000 من غير اى اوبشن وفاضية من جوه ثم قلت كروز لاقيتها عربية ثابتة وتحس انها قوية وصاجها غير الاوبترا اوقى يعنى بس لاقيت هدفع 124000 فى كورى وكمان مفيش عوامل امان زى abs مثلا غير كدة لما ركبتها حسيت ان الدركسيون والتابلوه فى حضنى حبة بس هى كصالون عام كبير مش صغير بس انت كسائق تحس محيط الدركسيون والتابلوه قريبين منك وكمان بطء طلعتها عن الكورى عشان عربية وزنها محترم زيها زى طلعة الاوروبى فطالما كدة لاغيت من دماغى فكرة الكورى بالسعر دة لحد ما لقيت قدامى الالنتر الجديدة فلاقيت برضو مبدأ 135000 فى كورى ..بس قلت لا العربية شكلها جبار وتستاهل بحثت عنها فلاقيت انها واطيه حبتين وهنا يطلع عفريت المطبات والحك وكدة كمان وانت جواها سايق انت تحس انك تحت حبتين ... السوك ( البروز ) الى فيها تحس انها واحد بيجر مشاكل اى خبطة فيها ولو بسيطة هتبان اوى وتوحش شكلها العام وانت عارف واحنا بنسق لو الشارع حارتين احنا بنخليه 3 وهنا حدودها هتبقى مقرفة قلت برضو مش مشكلة ....لحد ما لقيت ان صيانتها مش رخيصة ولاقيت واحد فى قسم هيونداى بيشتكى انه غير تيل الفرامل ب 650 جنيه فقلت لا بقى مينفعش...وكنت طبعا شفت الفلونس كذا مرة وعجبتنى طبعا بس الى وصلنى عن الميجان والفرنساوى وقطع غيار وصيانه خلانى مبحثش عليها فى البداية وفى ظل كل التفكير الى فات دة كانت هى معايا وكنت اعمل مقارنات حسستنى انها قريبة عنهم مش بعيد فبحثت بشكل مكثف وطبعا مقدرش انكر دور القسم هنا فى معرفتى بشكل كبير عن العربية وكمان على اليوتيوب فى فيديوهات فيها مقارنات بين عربيات وبعضها مثلا فى برنامج كا عامل حلقة عن الفلونس وكان بيدى فى اخره نمر تقييم هما مثبتين عناصر التقييم فجبت حلقى لبولو لاقيت تقييم الفلونس احسن وجبت حلقة لنيسان مش بتنزل عندنا هنا لاقيت الفلونس احسن واحسن هنا مش فارق يعنى هو نمرة او نمرتين.... ولاقيت ان صيانتها مش غاليه اوى وقطع غيارها نفس الكلام هو نسبة وتناسب انت بتجيب عربية ب 142000 او 150000 يعنى مش ينفع صيانه وقطع غيار عربية ب100000 تكون زيها ولا ايه..... لاقيتها عربية اوروبى ...وسائل امال ....عربية بتحترمك انت قبل ما انت تحترمها...... ثبات ....صاج محمل ...شكل داخلى وخارجى مفيش كلام .....وصليت استخارة وتوكلت على الله وحجزت العربية قدامى شهر او شهر ونص على الاستلام ............. فى نقطة هنا انا اجلتها للاخر وهى اعادة البيع بص يا فندم انا بالنسبالى الموضوع دة نسبة وتناسب انا هجيب الفلونس بأذن الله لو قعدت معايا 5 سنين مثلا هبيع بكام لو العربية مسكت نفسها هبيع قولت تقريبا 60% او 65 %من تمنها فسبيل اجدع عربية كورى بياعة فى اعادة البيع بعد خمس سنين هتبيع تقريبا 65% او 70% لو خدنا الد الادنى والحد الاقصى هنا هتلاقى الفرق 10% متهيأيلى ال 10% مش النسبة الى تخليك تحرم نفسك من متعة سواقة وامان و تكنولوجية وبرستيج الاوروبى ............................ ونصحتى الاخيرة ليك يا طارق متديش ودنك للناس كتير انت شايف اهو حالنا فى السياسة ناس موافقة على طول الخط وناس معارضة على طول الخط احنا لما بنكره حاجة والله لو عملوا ايه وبناخد بالسمع ونكسل ندور ونبحث عن صحة الى بنسمعه فستخيروتوكل

[mo7elmy]

ياسلام عليك يا فهمى بيه دايما سباق للنصيحة والخير يجعله فى ميزان حسناتك

[Land_Cruiser]

بص حضرتك هو فى الاغلب اللى بيلومك بيبقى قلقان من العربيات الفرنساوى بصفه عامه و رينو بصفه خاصه و مش قصده الفلوانس تحديدا على فكره و ده نتيجه لمجموعه أسباب :-
- التكنولوجيا المتقدمة اللى موجوده فى عربيات رينو اللى بتسهل حياه قائد السياره لكنها بتتعب اللى بيصلحوها و ده بيؤدى الى الصيانه و التصليح بيكون أما فى التوكيل او مراكز صيانه بتاخد مبالغ كبيره
- غياب الاعتماديه عن هذه السيارات لان ممكن عطل صغير يوقف العربيه فى مكانها و يبقى الحل الوحيد هو رفعها. عن طريق الونش و ملهاش حل تانى
- الوقوع تحت رحمه التوكيل و غلو اسعار قطع الغيار و احيانا ممكن يبقى هناك عدم توافر قطع الغيار فيضطروا يجيبوها من بره و ده طبعا مضيعه للوقت و الفلوس و الاسعار فى التوكيلات غاليه جدا
- انخفاض سعر اعاده البيع بشكل كبير لسيارات رينو و انها تقيله فى البيع لان مش اى حد بيشتريها و لازم يكون جربها قبل كده

هى دى الفكره الموجوده عن عربيات رينو و لذلك طبيعى جدا ان حضرتك تلاقى الناس بتلومك لما تعرف انك هتدفع فيها ١٥٠ الف جنيه و بيعتقدوا انك كده بترمى فلوسك على الارض و نادرا ما هتلاقى حد بيتكلم عن الفلوانس تحديدا او عن تجربه سيئه معاها على الرغم من انها بالنسبه لإمكانياتها و جوده خاماتها و أمانها تعتبر ممتازه .

طيب تعالى بقى نتكلم عن أسباب الخوف منها
العربيه الفلوانس فيها تكنولوجيا ايوه بس الاعتماديه فيها كمان عاليه و مشاكلها محدوده جدا وده بشهاده المالكين لها و موضوع التقفيل التركى ده ضبط الدنيا فيها و خلاها فيها تكنولوجيا ايوه بس مش لوغاريتمات يعنى و بتتصلح عادى و قطع غيارها موجوده. غاليه شويه صحيح انما شأنها شأن الاوروبى غاليه بس معمره فدى مش حاجه تؤخذ عليها يعنى و حتى مش هتلاقى فلوانس عطلانه فى نص الطريق و لا مرفوعة على الونش زى ما كنا بنشوف زمان لعربيات تانيه
- بالنسبه للتوكيل اتحسن كتير عن الاول ، طبعا ممكن يبقى فى حالات فرديه زيه زى اى توكيل انما مش ظاهره و رينو عامله مجهود جامد و نازله بموديلات كتير منتشره فى الشوارع و ده مفيد انه هيزود خبره الفنيين فى التوكيل و كمان بيساعد على انتشار قطع الغيار و طبعا العربيات المنتشره دى اقصد بيها اللوجان و الساندريو و الميجان القديمه و الفلوانس العربيات دى موجوده فى الشوارع و تمثل نسبه لا بأس بها من نسبه العربيات الموجوده فى الشوارع وده زى ما قلت هيساعد على توافر قطع الغيار و بالتالى المراكز اللى بتشتغل فيها.
- بالنسبه بقى لسعر اعاده البيع ده بقى النقطه الوجيهه فى الموضوع لانه بحكم السوق قليل حتى الآن و لا يقارن بالكورى مثلا و ان كان الموضوع ده فى تحسن مستمر لانه مرتبط بالانتشار و لكن التجار مثلا بيلعبوا على النقطه دى جامد و بيخفسوا بسعر العربيه الارض بدعوى انها عربيه فرنساوى و الأسباب اللى انا ذكرتها فى اول المشاركه و لذلك الحل فى الموضوع ده ان حضرتك لو قررت الشراء لازم تبقى حاطط فى دماغك انك مش هتبيع بعد سنه او اتنين لان الخساره بتبقى ساعتها اكبر ما يمكن وده فى العربيات الزيرو بصفه عامه و لكنها زياده حبتين فى الرينو و طالما حضرتك مش هتبيع بدرى و العربيه هتقعد معاك فتره يبقى مش هتلاقى منها مشاكل ان شاء الله لان العيوب اللى فى العربيه بسيطه و ممكن حتى لا تعتبر عيوب قوى زى ان التكييف ضعيف شويه او ان تيل الفرامل بيصفر شويه بسيطه مثلا و بالتوفيق

[Mohab.Nabil]

شكرا للجميع .. بصراحه انا سعيد جدا لأنضمامى لكم .. فعلا واضح انكم محترمين
بالنسبه لسؤال الأخ الصديق مهاب نبيل الناس ياسيدى بتخوفنى مثلا من ان السياره بتبقى بطيئه فى السير لما بتشغل التكييف وان التكييف مش قوى وصيانة رينو سيءه وأسعار قطع الغيار غاليه .. فما رأيك ...؟
أما الأخ الصديق احمد احب أقوله انى أساسا من عشاق نيسان من سنة 2006 اشتريت صنى وفى 2008 اشتريت صنى سوبر صالون ومعايا حتى الأن وفى نوفمبر 2010 اشتريت نيسان بلو بيرد سيلفى موديل 2011 وللأسف عملت بها حادثه كبيره والحمد لله والسياره تم أهلاكها (توتال لوس) ولذلك أحب أقولك أننى أعتز جدا بنيسان وصيانة نيسان ناس فوق الوصف أفضل معامله خاصة فرع مودرن موتورز فى الهايكستب ولى أصدقاء كتير هناك ولكن حبيت أطلع من نيسان من باب التغيير لأن هناك فرق كبير بين اليابانى والأوربى وبعد بحثى أخترت الرينو فلوانس وحاسس انها سياره محترمه بس زى ما قلت فى الأول كل واحد يقولك رينو ياساتر ليه كده عقدونى بجد بس أنا مقتنع بالسياره ولذلك حبيت أسألكم بصفة أنكم جربتم السيارة والتوكيل
اما سؤال الصديق ذكى أنا بصراحه مش عارف هى السياره اللى قيمتها 150000 هى الفئه التالته ولا ايه بس هى فيها سينسور بارك وفتحة سقف
أكرر شكرى لجميع الأعضاء المحترمين

لا مش بطيئة مع التكييف ، كل الحكاية ان العربية طلعتها بطيئة شوية عشان العربية تقيلة كوزن بس بعد ما تعدى الـ 20 خلاص الدنيا بقت تمام و بتسحب كويس و مفيش تأثير للتكييف ، التكييف بتاعها كويس و احلى من بتاع الميجان بس عامة الكورى و اليابانى بيبقوا افضل فى موضوع التكييف دا شوية لأن فى اوروبا مش بيهتموا بالتكييف اوى .. الصيانة مش سيئة خالص بالعكس التوكيل من افضل التوكيلات فى مصر و بيحاولوا يريحوا العميل قدر الامكان .. بالنسبة لاسعار قطع الغيار فهى طبيعية فى فئة العربية ديه يعنى مش هتلاقيها زيادة عن اسعار قطع غيار الالنترا الجديدة فى التوكيل مثلا و ممكن تراجع اسعار قطع الغيار فى القسم بالتوفيق ان شاء الله