صاعقة على راس الاستغلال:اصلاح شاشة السينيك2 ب20 جنيه بلا من 1000جنيه

[S O P H O S]

ما شاء الله
ربنا يباركلك علي نقل التجربة وافادة الناس ..

[tareksakr]

احييك علي المجهود الرائع

[وائل مختار]

انت راجل محترم وبصراحه انا اتعلمت فى المنتدى هنا من بقيه الاعضاء انى احاول اصلح حاجات كتير فى العربيه بنفسى قبل ما اروح لاى صانيعى على الفاضى والمليان

[samyyousef]

بالنسبة للسؤال الاول بصراحة مش عارف الموضوع عايز بحث .بس ممكن تكون حاجة قريبة من كده برضة.
وتقييمي للعربية
-واسعة وعائلية جدا .
-ثابتة جدا جداو الabs بتاعها بيتلكك عشان يشتغل يعني فراملها على الشعرةوفعاله جدا .
-فرش مريح جدا والكراسي الخلفية ثلاثة كل واحد لوحدة ممكن ينثني ويتقدم ويرجع على حده.
-اوبشن كتيرة وتابلوه كمبيوتر ديجيتال تحس انك قاعد في طيارة.
-الباور ستيرنج زي الملبن بتسوق بصباعك.
-امان واير باج وورفع ازاز مع السنتر لوك ورف في ضهر الكرسي عشان الاكل والشرب وكله.
-مساحة خلفيه ممتازة للتحميل والشنط لان العربية mpv وبتزيد مع طي الكراسي.
عيوب:
-اعطال كتير خصوصا حكايةالحساسات والمية(ممكن تراجع مواضيعي السابقة).
-بتاكل عفشة بسرعة خصوصا في الطرق المصرية المكسرة والحفر والبلاعات المعفنة واللعنة على وزير الطرق والمواصلات.لان عفشتها ناعمة جدا كانك على بساط الريح يعني عفشة حريمي خالص متستحملش
الطرق المنيلة دي.
-عزمها في الطلعة بطيء تحس انها عربية عواجيزي شوية ,لكن في السفر مالهاش حل بتسحب كويس ومتحسش بالمسافة كانك قاعد في الصالون في البيت,خصوصا ان عزل الصوت فوق الممتاز.
-طبعا قطع الغيار الغالية والمصنعية الغالية ومش اي حد يشتغل فيها لازم يكون شغال في الرينو
وعشان كده الاشتغالات فيها كتير حتى في توكيل المقطم الحرامي لانها بتصنف من العربيات الفاخرة
(جديدة 169000جنيه العادية )والبانوراما اغلى بس مش عارف سعرها.وخصوصا انها تقفيل فرنساوي مش تركي.
-اقصى سرعة عن تجربة 170ك\س,لانها عربية تقيلة 1475 ك يعني طن ونص.
-مفتاح العربية عبارة عن كارت الكتروني لو باظ او ضاع تشتريه ب1000 جنيه التركي و750 الصيني
ولازم يتشفر على العربية عند عزب في ش السودان او واحد في جسر السويس عند عمارات الفاروقية
وطبعا عند التوكيل الحرامي ب1500جنيه ويجيلك من فرنسا بعد 15 يوم برقم الشاسيه.
-لو السنتر لوك اللي في الكارت باظ ما تقدرش تقفل العربية .يعني لو حطيت السلاح في الباب وقفلت
يقفل باب السواق بس والباقي مفتوح.طبعا ده عيب خطير والفرنساوية كانو اغبياء في النقطة دي.
لاني كنت بسيب الازاز مفتوح سنة وادخل عصاية ادوس بها على زرار السنتر لوك جنب الفتيس عشان
اقفل العربية واعرف اطلع البيت بدل ما ابات جنبها.
-تكييفها مش قوي ,اظن عشان هي فرنساوي اوروبي مش مصممةللبلاد الحارة ,يعني لو بصيت على
بكرة التكييف حتلاقي شرطة واحدة بس ازرق للتبريد والباقي احمر للتدفئة,ولذلك لو فيه تلج بره متحسش بحاجة.
ده تقييمي العام للمميزات والعيوب.
وشكرا

الف شكر على اهتمامك و ردك
و تقييمك الموضوعي للعربية
تقبل تحياتي

[HOSSAM_GABRE]

الف شكر على الموضوع
وارجو من الادارة تثبيت الموضوع للاهمية

[alaa m]

ربنا يجازيك كل خير على كل التوضيح الشيق علشان اصحاب السينيك فى المنتدى يكونو على بينة ولكم جزيل الشكر

[Amr_Moh]

ربنا يبارك فيك ويجعله فى ميزان حسناتك

[ecybrarian]

الله عليك

[karkory]

بالنسبة لرد الاستاذ \MohammedAladel:
بالنسبة للكارت انا عندي اربع كروت ثلاثة بايظين (بيشغلوا العربية بس زراير السنتر لوك بايظة) وكارت شغال
يعني في عطلين رئيسيين في الكارت ممكن يحصلوا:
الاول: ان الكارت ميشغلش العربية اساسا يعني تدوس على زرار start\stop بعد ما تحط الكارت العربية ماتدورش .
الثاني : ان الكارت يدور العربية بس زراير السنتر لوك ماتشتغلش حتى بعد تغيير البطارية بجديدة.
و الفيلم اللي حضرتك جزاك الله خير لفت نظري ليه ,انا شفت الفيلم ده لما كنت بصلح الكروت القديمة من تقريبا سنة ,وهو تصليح بسيط عبارة عن اعادة لحام واحد من الثلاث رجول بتاعة الترانسمتور لو كانت مفصوله بفعل الصدمات والانثناء في الكارت لو حاطه في جيبك او مع مفاتيح.
ورحت لكذا واحد عشان اصلحه والغريب ان السنتر لوك كان بيشتغل ,لكن اول ما الراجل يقفل الوش البلاستيك بتاع الكارت ويبتدى يلحم عشان الكارت يبقى شكله كويس خصوصا ان الكارت متقفل كبس(يعني بالبلدي كدة مطبوخ مفيش مسامير ولا كلبسات) السنتر لوك مايشتغلش .طبعا ده حصل اكتر من خمس مرات لحد ما الراجل زهق وانا زهقت واستعوضت ربنا واشتريت كارت جديد عشان السنتر لوك .

اما بالنسبه لقفل الباب يدويا فدي فعلا معلومة مهمة مكنتش عارفها جزاك الله كل خير ولكن موضوع مرهقاني اعمله كل مرة في كل باب كمان الشنطة مش لاقي فبها المكان ده وطبعا حضرتك عارف ان العربية ستيشن يعني تفتح الشنطة وتدخل جوه العربية فقفل الاربع ابواب مالوش اهميه كبيرة,انا مع ان الفرنساويين كانوا اغبياء في النقطة دي , لان يعني لو حتطلب كارت جديد من التوكيل الرسمي في بلدك يجيلك بعد 15 يوم,تقعد تفتح كل باب وتحط المفتاح في الخرم ده وتلف عكس عقارب الساعة كل مرة تقفل عربيتك وتطلع بيتك او شغلك لمدة 15 يوم فده في رايي فشل ذريع.وكان اسهل بمليون مرة
انهم يعملوا زي اليابانيين والكوريين او حتى الصينيين في انهم يخلوا السنتر لوك مع قفل باب السواق
عادي جدا وسهل خالص,يعني مش دايما التعقيد بيبقى مفيد ممكن يكون فشل كبير وحمل على المستهلك.
لكن ما يمنعش انها مفيدة خصوصا في وسط البلد والاماكن العامة.
وشكرا جزيلا لاهتماك

[MohammedAladel]

يا باشا الموضوع مش بياخد دقيقة

وبعدين إنت ممكن قبل ما تنزل من العربية

تدوس شوية كتار على زرار القفل وإنت فاتح باب العربية بتقفل نفسها أوتو ودى بسيطة جدا

عشان بس متقولش كورى وصينى ههههههههههههه

[MohammedAladel]

يا باشا الموضوع مش بياخد دقيقة

وبعدين إنت ممكن قبل ما تنزل من العربية

تدوس شوية كتار على زرار القفل وإنت فاتح باب العربية بتقفل نفسها أوتو ودى بسيطة جدا

عشان بس متقولش كورى وصينى ههههههههههههه

والشنطة بتفتح كهرباء

والسلام عليكم هقفل عشان صلاة الجمعة

[karkory]

يا باشا الموضوع مش بياخد دقيقة

وبعدين إنت ممكن قبل ما تنزل من العربية

تدوس شوية كتار على زرار القفل وإنت فاتح باب العربية بتقفل نفسها أوتو ودى بسيطة جدا

عشان بس متقولش كورى وصينى ههههههههههههه

والشنطة بتفتح كهرباء

والسلام عليكم هقفل عشان صلاة الجمعة

هجرب الموضوع ده واقولك ايه اللي حصل , بس يعني ايه شوية كتار ,يعني افضل دايس على زرار القفل اللي جنب الفتيس كام ثانية ولا ادوس عليه كام مرة ,وبعدين اقفل باب السواق فالسنتر يقفل اوتو,لو كده شغال يبقى انا اسف مكنتش فاهم ,ولو مش شغال يبقى انا لسه على رايي لاني بعاني من الموضوع ده.
على العموم حنزل اجرب دلوقتي عشان سايب العربية مفتوحة عشان الكارت الجديد باظ هو كمان.
وشكرا على النصيحة يا باشا ربنا يكرمك

[karkory]

شكرا يا باشا فعلا فوق كل ذي علم عليم
جربت والعربية قفلت ,فضلت دايس على زرار القفل لمدة ثواني السنتر قفل العربية .
اشكرك شكرا جزيلا لان انا فعلا مكنتش اعرف المعلومة دي,وعشان كده انا بحب المنتدى العظيم ده.

[windofchange]

الف مبروك يا كركوري ")) لكن انت دست علي زرار القفل اللي فالتابلوه ولا اللي في الريموت؟

[karkory]

الف مبروك يا كركوري ")) لكن انت دست علي زرار القفل اللي فالتابلوه ولا اللي في الريموت؟

الله يبارك فيك ,زرار القفل اللي جنب الفتيس ,لان قلنا الزراير اللي في الريموت بايظة ,وده رابع كارت في مدة سنتين,سبحان الله والحمد لله.