اول هات وخد مع الميجان 2

[محمدصلاح]

عربيتي موديل 2005 اوتوماتيك ومش بانوراما
اشتريتها غالية شوية (تلاتة وستين الف) بس علشان خيشت فى دماغي - ماشية 50000 كم فيها رخصة 3 سنين ومرور إسماعيلية (مكاني) ولونها فضي :)

لما اشتريتها صاحبها قاللي فيها قاعدة موتور وكنت بألاحظ صوت خروشة لما بأرفع رجلي من على البنزين واسيبها تمشي بقوة الدفع فقولت دي شكلها قاعدة فتيس

خبطت مشوار 300كم رايح جاي للمصطفى فى صقر قريش - المعادي وبصراحة شاب محترم جداً

قاعدة الموتور 300 جم
قاعدة الفتيس 150 جم

وعملت صيانة العشرة الاف بالمرة طبقاً لمواصفاتكم طبعاً تغيير فلاتر هوا (70 جم) وبنزين (50 جم) وتغيير زيت بالفلتر(340+35 جم) وتغيير بوجيهات (80 جم) .. متهيألي الأسعار معقولة جدا

اهه انا اشتريتها وناوي احترمها لأن اختها الصغيرة (كليو) بصراحة ما بوختش معايا خالص

ربنا يهديها عليا ان شاء الله

[محمدصلاح]

بس انا لاحظت اني بعد ما ظبطت الدنيا دي .. التسارع بتاع العربية بقى بطيئ شوية يعني العربية بقت تاخد وقت على بال ما توصل من ال 90 للـ 120 .. مش عارف ده ممكن يكون من ايه؟

[hossam_elwani]

بروك عليك الصيانه بس نت جبت قطع الغيار الموصى بها من بوجيهات وفلتر هوا ؟؟

[وائل مختار]

السعر انا شايفه مش غالى وخصوصا انها ماشيه قليل اوى

[محمدصلاح]

تعتقد انه هايديني قطع غيار تعبانه !!!

الزيت -- سوبر شل اربعة لتر ونص
فلتر الزيت -- لونه ازرق ومكتوب عليه رينو
فلتر البنزين -- مكتوب عليه رينو
بوجيهات -- بوش
فلتر الهوا -- مش فاكر اسمه بس هو قاللي انه الأصلي بتاعها
.....................
هو ال rpm بيبقى 3500 والعربية ماشية 130 كم
هل بيتهيألي ان السحب قل مثلاً
.....................
انا اتصلت بمصطفى وقالي انه ممكن تكون طنبورة الكرنك .. بس متهيألي لأ
.....................
فيه عضو كان بيقول ان فلتر البنزين لو راكب بالقلوب بيخنق العربية وسحبها بيقل .. صحيح ده؟

[MohammedAladel]

فلتر البنزين يركب غلط معلش دى غلطة ميعملهاش اللى لسة بيتعلم ميكانيكا لو متركب غلط ممكن يعمل كدا فعلا ومتعرفش ممكن يعمل إيه تانى

قطع الغيار دى متآمنش لحد فيها أبدأ لازم تمسك القطعة فى إيدك كدا وتبصلها كويس وتقرأ اللى مكتوب عليها ومصنوعة فين وعلبتها وهل عليها والشركة المصنعة ولازم تاخدها علبة مقفولة بالعلامة المائية بتاعتها

إنت لو رحت اشتريت فلتر من أى حد وقلتله أصلى يقولك أيوا يا باشا لو مش أصلى رجعهولى وهو ممكن يكون بينصب عليك وممكن يكون أساسا ميعرفش الفرق بين أصلى ولأ متستبعدش حاجة عشان منظلمش حد


بعدين فيه أكتر من شركة محترمة بتصنع فلاتر

ممكن حضرتك تقولنا اسم الشركة اللى مصنعة فلتر الهواء بالذات لأنه ليه علاقة وثيقة بالسحب

والشركة اللى صانعة فلتر البنزين ؟؟؟


الأسعار دى فيه أٌقل منها بتختلف من محل لمحل يعنى فلتر الهواء التركى ممكن تلاقيه فى محل ب 45 ومحل تانى بيقش قش ب 60 كلمة يا بيه عند ناس كتير بتتضاف كضرايب على سعر البضاعة المباعة خد بالك

فلتر البنزين التقليد ب 20 جنيه وفيه ناس بتبيعه على إنه أصلى ب 40 زى واحد فى عين شمس اسمه جورج
فلتر البنزين التركى ب 35 أو 40 جنيه فيه أغلى من كدا لحد 60 جنيه الإنجليزى تقريبا

فلتر الزيت الأصلى بيبقى من 25 ل 30 طبعا العلب متبرشمة والفلتر نفسه عليه حتة بلاستيك مغطياه من فوق


السحب عندك ممكن يكون بسبب فلتر البنزين أو فلتر الهواء


إنزل تحت العربية شوف فلتر البنزين فيه سهم المفروض السهم دا يكون اتجاهه كدا ----------> بداية السهم دا الخرطوم اللى خارج من تانك البنزين من ورا والسهم نفسه فى اتجاه الخرطوم اللى رايح للعربية

نسيت تقولنا حضرتك فلتر البنزين لونه إيه

واسم المحل اللى اشتريت منه

[محمدصلاح]

اشكرك جدا يا استاذ محمد

هو فلتر البنزين نفسه لونه اسود ومحفور عليه كلمة renault والعلبة بتاعته كان لونها اصفر فى فضي بس للأسف انا مااحتفظتش لا بالعلبة ولا بالفلتر القديم

وفلتر الهوا برضه للأسف مش فاكر اسمه بس علبته كان لونها برتقالي فى ازرق

غلطة غبية مع اني قبل كده كنت باخد كل حاجه تطلع معايا من العربية واعينها فى الجراج

[محمدصلاح]

السحب عندك ممكن يكون بسبب فلتر البنزين أو فلتر الهواء

طيب هاقول لحضرتك الأعراض بالظبط انا اتأكدت منها النهارده

1- الــ RPM بيبقى 3500 والعربية ثابته على 130 كم/ساعه (متهيألي معقول)
2- العربية علشان توصل من الـ 70 للـ 100 بأحس انها بتاخد وقت
3- اول ما توصل ال140 او ال 150 بأحس ان العربية صوتها على وال RPM واقف على 4500 بس بيبقى صعب اني ازود عن كده
4- انا بصيت على فلتر البنزين ولاقيته راكب كويس
5- حطيت النهارده Injector cleaner مع التفويلة
6- وطبعا التكييف لما بيشتغل صوت العربية بيعلى اكتر وبتبقى متكتفة اكتر

متابع بإهتمام

[MohammedAladel]

والله مش عارف بقى يا أستاذ محمد :) أنا قلت يمكن يكون فلتر الهواء مش قد كدا للعلم فلتر الهواء بيبقى مكتوب عليه نوعه وتاريخ انتاجه والشركة المصنعة

بالنسبة للزيت حضرتك غيرت زيت نوعه إيه وحطيت كام لتر ؟؟

[dr.hazem]

زيت الفتيس الاوتو بيتغير عندكم ولا لا لانه ممكن يكون محتاج يتغير...
وأخبار الدواره ايه؟ ممكن تكون البوجيهات وحشه او مرطبه شوية...
الزيت اللي حطيته لزوجته كام؟
وانت جربتها والرياح كانت عكسك ولا معاك؟
ومتنساش ان ممكن كل المشكلة تكون في بنزين اليومين دول لو عبيت من محطة متعرفهاش...
تحياتي

Sent from my SE Arc S using Forum Runner

[محمدصلاح]

والله مش عارف بقى يا أستاذ محمد :)

والله انا عارف انا تعبتك معايا يا استاذ محمد

بس انا مكسووووووف جدا جدا جدا مع اني عرفت ايه هيا المشكلة

مشكلة هايفة بس ما كنتش متوقع يبقى تأثيرها كبير اوى كده واحنا عمالين ندور فى التقايل

مستعد تعرف المشكلة

ضغط الهوا فى الكاوتش كان 28 رحت زودته 33 وجربت العربية ولاقيت الموضوع اتظبط كتييير

اعمل ايه فى نفسي انا دلوقتي هههههههههههههه

تعبتكم معايا والله وحقكم عليا ههههههه

[MohammedAladel]

الحمد لله إنك عرفت المشكلة وهى فعلا مشكلة بسيطة بس ضغط الهواء لما بيقل فى الأطار عن الحد المسموح

الكاوتش بيزيد عرضه واحتكاكه مع الأرض بيعمل مقاومة أعلى غير بقى إن الكاوتش بيسخن وبيبوظ


وشكرا على المعلومة دى لأن ممكن كتير مياخدش باله منها