محتاج رائيكم يا رجاله

[وائل مختار]

معروض على رينو ميجان موديل 2005 ولكنها ترخيص سنه 2007 اول يد وعامله 44000 فقط هاى لاين فابريكه بالكامل فيما عدا باب يمين واكصدامين وتم رشهم بالتوكيل وبالفواتير وصيانه العربيه فى التوكيل بانتظام وبالفواتير ،،،، العربيه بكل معنى الكلمه زيرو حتى ريحه الزيرو لسه فيها ولكن المطلوب فيها نهائى نهائى 72000 جم ,,, ايه رأيكم اخلص فيها ولا السعر عالى مع العلم ان اول استخدام فيها فى 2007

[haissam24h]

بتوع الميجان يلا انتشرى خالى الراجل ينضم ليكو ههه بس اعتقد السعر عالى شويه لكن خصوصا ان فى حالات شاذه فى الرينو مش بتبقى راشه خالص بس ممكن 65

[dedo_ryo]

بيتهيألي عالي شويه على Phase1 و 2005 و برضه انتظر رأي الاعضاء العمالقة في القسم

[waeel_bdr]

غالية طبعا كبيرة 65الف جتية

[وائل مختار]

هى العربيه كمان على فكره كوتش جديد وفيها رخصه سنتين ومغير طقم الكاتينه عند 30 الف كيلو اظن كل ده يفرق فى سعرها ,,,, ايه رأيكم بلاش منها ولا اخلص فيها

[Ahmed Selim]

و الله يا كبير أنت بتتكلم فى حالة شاذة

الحالات الشاذة بتفرق فى سعر العربية.........تفرق قد أيه بترجع للمشتري.

يعني أنا لو مكانك...........هشوف عربية موديل 2005 حالتها كويسة و ماشية كليومتر معقول هتعمل كام.

هنفترض أنها هتعمل 60 ألف مجازاً

طيب دى الحالة الكويسة و الكيلومتر المعقول
اللى معروضة عليك حالة ممتازة و كيلومتر قليل........هنقول هتفرق 5000 كمان........تبقى فى حدود 65

شوف بقى كمان فرق الرش بين العربيتين.....و شوف فرق الصيانة اللى ممكن تعملها فى الحالة الكويسة

هنقول 3000 كمان.........يبقى بنتكلم فى 68 ألف.

لو عرفت تخلصها على 68 ألف أو حتى 70 الف تبقى صفقة كويسة لأنك مش بسهولة هتلاقي عربية ميجان بتتباع حالتها كويسة فى الأساس.

ده رأيي و الله أعلم.

و طبعاً لا بديل عن الكشف على العربية فى التوكيل أو مراكز الخدمة.

[وائل مختار]

طب يا استاذ احمد طبيعى ان العربيه تبقى موديل 2005 وتتباع فى 2007 ؟؟؟

[mody_halawa]

كان الطارق بتاع السيارات عندة مخزون كبير للميجان وكان بيبيع العربية فى 2007 زيروووو ولاكنها موديل 2005
عادى يا باشا
يعنى هيا كانت موجودة عندة مثلا موديل 2007 ب 140 الف مثلا و موجود عندة برضة 2005 ب 130 الف مثلا والاثنين زيروووو

[وائل مختار]

طب يا جماعه صاحب العربيه مش هينزل جنيه عن 72 الف ايه رأيكم اخلص فيها ولا اشوف غيرها

[Ahmed Selim]

طب يا استاذ احمد طبيعى ان العربيه تبقى موديل 2005 وتتباع فى 2007 ؟؟؟

ممكن عادي...........بتحصل بس قليل.

أنا قبل كده أشتريت عربية موديل 2009 فى أواخر 2010 و كان فيه 2011 بتتباع ( مش فى مصر)

[Land_Cruiser]

موضوع سنه الإنتاج يا فندم من العوامل المؤثرة جامد فى حاله العربيه لان كل قطعه غيار ليها عمر افتراضى و اللى بيبدأ يتناقص من اول يوم من إنتاج العربيه و ليس من تاريخ اول استخدام للعربيه يعنى فى حالتنا العمر الافتراضى بدأ يتناقص من ٢٠٠٥ و ليس. من ٢٠٠٧ . موضوع الاستخدام اكيد له تأثير طبعا لكنه مش لوحده و النهارده يبقى العربيه داخله على السنه الثامنه و احتمال بعد ما تشتريها تبدأ تظهر فيها مشاكل نتيجه للزمن . انا بصراحه لو مكانك هادور على حاجه موديل اعلى شويه و حالتها كويسه و السعر مش هيبقى فارق كتير عن السعر اللى حضرتك ذكرته

[وائل مختار]

طب مش الافضل انى ابعد عن العربيه دى واركز انى اجيب حاجه موديل 2008 واعتقد ان 80 الف يجيبوا عربيه موديل 2008 بحاله كويسه ؟؟؟

[Ahmed Selim]

طب مش الافضل انى ابعد عن العربيه دى واركز انى اجيب حاجه موديل 2008 واعتقد ان 80 الف يجيبوا عربيه موديل 2008 بحاله كويسه ؟؟؟

بص يا صديقي

أنا عن نفسي مقتنع بحاجة.....أنك ممكن تلاقي موديل 2008 ب 80 أو أقل..........و ممكن تلاقي 2008 بما يقارب ال 90.

لما تكون معاك عربية كويسة و مفيهاش مشاكل و حالتها حلوة و بتبيع هتمسك فى سعر عالي.

و لو العربية تعباك لسبب أو لأخر هتبيع و مش هتدق فى السعر قوي.

هل أنت تقدر تجيب 2008 بنفس حالة 2005 اللى أنت بتحكي عليها بسعر 80 أو 85 ؟

لو الأجابة نعم يبقى أصبر و شوف 2008 طبعاً.

بس مما لاشك فيه أنه موضوع صعب مش سهل.

[وائل مختار]

تصديقاً على كلام حضرتك صعب فعلا الاقى موديل 2008 بحاله العربيه وخصوصاً ان موديل 2008 مش بنص انتشار موديل 2005

[Land_Cruiser]

دور كويس يا فندم و خد وقتك فى البحث و ان شاء الله تلاقى حاجه كويسه . التسرع هو اللى مش هيبقى كويس لان لو حضرتك اقتنعت بحاله موديل ٢٠٠٥ دى و تغاضيت عن سنه الصنع اشك ان حضرتك هتلاقى حد يشترى منك بالسعر ده