سؤال على الماشى بخصوص الفلوانس برجاء السرعة فى الرد

[ashrofa72]

الفلوانس الموجودة فى مصر تركى والخليجى كورى مجمعة فى مصانع سامسونج بكوريا صح كده وطبعا الشكل الخارجى مختلف شويه فى المقدمة غالبا!!!
السؤال بقى لو الواحد جاب فلوانس كورى هل هتبقى مشكلة بالنسبة لقطع الغيار وانتشارها رجاء المساعدة ضرورى لانى انا موجود فى الخليج ومحتار اجيبها ولا حيكون الوضع صعب فى مصر من حيث قطع الغيار وشكرا

[MohammedAladel]

معلومة جديدة بس هل حضرتك متأكد ؟؟

أنا شايف إن التجميع مش هيبقى مشكلة فى قطع الغيار

فيه حاجات مينفعش تتصنع غير فى بلد العربية الأم وبتبقى متوافقة فى أغلب العربيات بتنزل مصر أو فرنسا أو بلاد الخليج
زى المحرك

زى الكنترولات

حاجات كتير مهمة فى العربية هتلاقيها مصنوعة فى فرنسا بالرغم من أن عربيتى تجميع تركى

الحاجات اللى لاحظتها تركى فى العربية الفوانيس الخلفية

غير كدا مش ملاحظ حاجة

كل ما أفك حاجة ألاقيها صناعة فرنسية أو ألمانية حتى الزرارير بتاع الزجاج فرنسية

هو ممكن اللى يقلقك شوية الأكصدام إن شكله مختلف بس الفوانيس واحدة ولا لأ ؟"؟

وغالبا التوكيل هيوفرلك اللى إنت عايزه

بس أحنا عايزين نعرف مدى توافر القطع برا التوكيل عشان بتبقى أرخص عند الناس اللى بيبيعوا بضمير

[ashrofa72]

متأكد من ايه؟
يا استاذ محمد ان الخليجى كورى اه متأكد لانى شفتها بنفسى
انا كنت متخوف من موضوع قطع الغيار لان العربية كل واحدة فى بلد
وشكرا جدا لحضرتك على الرد
ورجاء باقى الاخوة يشاركونا فى الموضوع ده كل واحد برأيه

[M_SaadElDin]

اعتقد هايبقى عندك مشكلتين:
1- شكل المقدمة مختلف فى الكورى عن التركى ، لو لاقدر الله حصل خبطة فى العربية من الأمام ممكن ماتلاقيش القطع المطلوبة ... او ممكن تيجى عن طريق التوكيل بس بالطلب
2- الفتيس فى الكورى cvt وده مختلف عن النسخة التركى اللى موجوده فى مصر، الفتيس هو نفس موديل فتيس الميجان (يمكن مع بعض التطوير) - لازم تتأكد ان التوكيل ممكن يعمل صيانة للفتيس الكورى

[horas3000]

الاختلاف بين التركي و الكوري بيتمحور في
الاكصدام الامامي كله
المتور
الجير بوكس
النظام الصوتي

يعني تقدر تقول العربيه تقريبا مختلفة تماما
لكن الميزه ان الكوري بتنزل بمتور و فتيس النيسان تيدا
فبخلاف الاكصدام الامامي قطع الغيار الاستهلاكيه متوفرة في مصر

[MohammedAladel]

أيوة فعلا ناس كتير قالت إن محركها محرك نيسان تيدا بالفعل

بس الجماعة بتوع الاستيراد مش بيغلبوا فى حاجة

يعنى أعتقد دلوقتى المشكلة هتتركز فى الاكصدام الامامى والأعضاء قالوا إنه ممكن يجى بالطلب من التوكيل أو استيراد

وأعتقد كمان ممكن يركب عليها الاكصدام بتاع فليوانس وكيل

والفتيس ال cvt والفتيسات الأوتو بشكل عام الصنايعية فى مصر مش قد كدا

[ashrofa72]

هل موديل 2013 نزل وهل الشكل تغير فى المقدمة ولا هو نفس الشكل السابق وشكرا

[MohammedAladel]

تقريبا نفس الشكل ولكن مش متأكد

[ashrofa72]

طيب حد من الاعضاء شافها يأكد المعلومة؟
لان على اليوتيوب العديد من الاشكال للمقدمة فى الفلوانس والكل 2013 ومتعرفش من اللى نازلة منهم بالفعل 2013!!!!!

[MohammedAladel]

هما أكتر من واحد جابها هى نفس الشكل تقريبا

[Moratoz]

لو الموتور والفتيش تيدا أكيد احسن من التركي علشان ناس أعرفهم بتشكي من ضعف سحب الفتيس والموتور الموجود في مصر لما كنت عايز اشتريها وبسأل عليها

[ashrofa72]

هو نفس التوكيل واحد لنيسان ورينو والعربية مكتوب عليها الفتيس x-cvt نفس المكتوب على عربيات نيسان واكيد برضه متور تيدا ده اللى اعرفه

[dozo]

الاختلاف بين التركي و الكوري بيتمحور في
الاكصدام الامامي كله
المتور
الجير بوكس
النظام الصوتي

يعني تقدر تقول العربيه تقريبا مختلفة تماما
لكن الميزه ان الكوري بتنزل بمتور و فتيس النيسان تيدا
فبخلاف الاكصدام الامامي قطع الغيار الاستهلاكيه متوفرة في مصر

اعتقد يا باشا التكييف كمان نيسان فمش عارف لو حصل فى التكييف مشكله حيلاقى قطع غيار ليه و لا لأ

[Ahmed Selim]

حاول تسأل فى التوكيل اللى هتشتري منه على موضوع الصيانة و قطع الغيار.........و لو عرفت تجيب منهم ما يثبت أن التوكيل فى مصر بيعمل لها صيانة يبقى كويس.

و برضه اسألهم على موضوع الموتور و الفتيس و التكييف هل هما هما بتوع التيدا ولا لأ.

[MohammedAladel]

هو نفس التوكيل واحد لنيسان ورينو والعربية مكتوب عليها الفتيس x-cvt نفس المكتوب على عربيات نيسان واكيد برضه متور تيدا ده اللى اعرفه

تقريبا مش نفس التوكيل لكن كصناعة فيه شراكة بينهم