نقص مية الريدياتير

[mtsaber]

السلام عليكم
من أسبوع كده بقى بيحصل معايا مشكلة غريبة في الميجان بتاعتي 2006 اتوماتيك ، بقى تقريبا كل يوم بزود قربة المية بتاعت الريدياتير حوالي لتر مياه ونزلت بصيت تحت العربية لقيت تحتيها ناشف ومش بتنقط من اي حته وكمان الريدياتير جديد انا مغيره من حوالي 6 شهور و كمان بصيت على الزيت الحمد لله مفيش اي ميه فيه وبصيت حوالين غطاء القربة والعربية سخنة ملقتش أي تسريب نفسي أعرف الميه بتروح فيييييين؟؟؟
ملحوظة المية بتنقص لما بتكون العربية شغالة لكن لما بتكون راكنها تحت البيت مش بتنقص لاني لما رجعت من مشوار ولقيت الميه ناقصه بعد العربية ما بردت زودتها وسيبت العربية مركونة لليوم التالي ملقتش في اي نقص.

[Shady Hafez]

ممكن يكون فى خلل فى دورة التبريد ....بس الاول غير غطاء الردياتير .....لو استمر الموضوع توجة لورشة تصليح ردياتير

[sammor_28]

ممكن يكون في مشكله في قربه المياه او القربه نفسها مخرومه او مشروخه من الأجناب او من تحت وانت مش شايفها وطبعا الميه بتتبخر اثناء عمليه السير بالسياره والسخونه


وان شاء الله بسيطه..ربنا معاك

[Ahmed Selim]

على الأغلب التسريب جاي من حتة قريبة من الموتور و بتتبخر بسرعة من حرارة الموتور.

فيه حاجة أسمها كبس دورة التبريد حاول تعملها.....بس أنا مش عارف مين بيعملها بالظبط.

[MITSUKERO]

زي ما الاخ افادك الحل الوحيد و السريع و المضمون هو كبس دورة التبريد

للاسف الصناعيعية مش كلهم عارفينه

بص لو احترت خالص هتبطل العربية و تسيبها ربع ساعة تبرد

تجيب منفاخ يدوي و تركب خرطوم في اخرة و تحكم الخرطوم كويس ب قفيز حديد

تثبت الخرطوم مكان وصلة الفايص اللي في الريادياتير لو عندك لاني معرفشي اي حاجة في الرينو بس دور

انفخ بحذر شديد حتي لا يرتفع الضغط اكثر من المطلوب فحاجات سليمة تضرب

اول ما تنفخ مكان التسريب هيبان فورا

و ربنا يطمنك

و متستخدمشي مياة حنفية مرة اخري

[Ahmed_BYD_F0]

بسم الله الرحمن الرحيم
افهم من كاتب الموضوع إن السيارة فيها عيوب ممكن تقول رأيك فيها بصراحة لانى ناوي اشتري عربية ومحتار اشترى إيه

[solly1979]

على الأغلب التسريب جاي من حتة قريبة من الموتور و بتتبخر بسرعة من حرارة الموتور.

فيه حاجة أسمها كبس دورة التبريد حاول تعملها.....بس أنا مش عارف مين بيعملها بالظبط.

فرنش موتورز فى الرحاب بيعمل كبس لدورة التبريد
كنت هناك الاسبوع الى فات وكانت فى عربيه هناك بتعمله بس متبعتش بعد كدة

[mtsaber]

ممكن يكون فى خلل فى دورة التبريد ....بس الاول غير غطاء الردياتير .....لو استمر الموضوع توجة لورشة تصليح ردياتير

في الميجان مفيش غطاء الردياتير اللي موجود بس القربة وغطاها وشكلهم كويس وراقبت العربية وهي باردة وكمان وهي سخنة ومفيش تسريب.

ممكن يكون في مشكله في قربه المياه او القربه نفسها مخرومه او مشروخه من الأجناب او من تحت وانت مش شايفها وطبعا الميه بتتبخر اثناء عمليه السير بالسياره والسخونه
بصيت عليها كويس بس مفيش حاجة.

وان شاء الله بسيطه..ربنا معاك

يا رب يسمع من بقك ربنا.

على الأغلب التسريب جاي من حتة قريبة من الموتور و بتتبخر بسرعة من حرارة الموتور.
ده احتمال وارد جدا.

فيه حاجة أسمها كبس دورة التبريد حاول تعملها.....بس أنا مش عارف مين بيعملها بالظبط.

هدور على حد بيعملها وربنا يسهل يكون حد فاهم لاني في السعودية مش في مصر.

زي ما الاخ افادك الحل الوحيد و السريع و المضمون هو كبس دورة التبريد

للاسف الصناعيعية مش كلهم عارفينه

بص لو احترت خالص هتبطل العربية و تسيبها ربع ساعة تبرد

تجيب منفاخ يدوي و تركب خرطوم في اخرة و تحكم الخرطوم كويس ب قفيز حديد

تثبت الخرطوم مكان وصلة الفايص اللي في الريادياتير لو عندك لاني معرفشي اي حاجة في الرينو بس دور

انفخ بحذر شديد حتي لا يرتفع الضغط اكثر من المطلوب فحاجات سليمة تضرب

اول ما تنفخ مكان التسريب هيبان فورا

و ربنا يطمنك

و متستخدمشي مياة حنفية مرة اخري

شكرا على الطريقة دي هجرب لو موصلتش لحل.

فرنش موتورز فى الرحاب بيعمل كبس لدورة التبريد
كنت هناك الاسبوع الى فات وكانت فى عربيه هناك بتعمله بس متبعتش بعد كدة

للاسف اني مش في مصر

[mtsaber]

بسم الله الرحمن الرحيم
افهم من كاتب الموضوع إن السيارة فيها عيوب ممكن تقول رأيك فيها بصراحة لانى ناوي اشتري عربية ومحتار اشترى إيه

بالنسبة للعربية عربية محترمة جدا ، وبصراحة الاخوة في المنتدى مقصروش ابدا وفتحوا نفسي على العربية دي، أهم حاجة لوهتشتريها افحصها كويس وحاول تكون عربية مش متهانه بالنسبة ليا العربية بقالها معايا سنتين مشيت بيها حوالي 80 ألف كيلو والعربية دلوقتي عاملة معايا 170 ألف كيلو كفاية اني اقولك اني في السعودية ودرجة الحرارة بتبقى فوق 50 لدرجة اني عندي صورة على الموبايل العربية كانت قارية 57 درجة مئوية ومع ذلك مؤشر الحرارة يبقى اقل من النص وسافرت بيها من السعودية الى الامارات مسافة اكتر من 5000 كيلو وكانت زي الفل أهم حاجة انك تروح بيها لما تحتاج تصلحها لواحد متخصص او التوكيل لان دي المشكلة اللي مواجهاني في السعودية قلة الناس اللي بيفهموا فيها ومع ذلك لو رجع بيا الزمن هشتريها تاني وهقولك على المشاكل اللي واجهتني فيها
1) فيشة في علبة الفيوزات.
2) ترس الديفيزر.
3) شريط الايرباج.
بالنسبة ليا انا ومع استهلاكي المقرف للعربية شايف انها كفيت ووفيت وبزيادة كمان.
يا رب يكون ردي مناسب ولو في أي سؤال أسال يا باشا.

[MohammedAladel]

الأستاذ اللى بيقول أفهم من كدا إن ميجان فيها عيوب ...... عشان عربية حصل فيها خلل فى دورة التبريد زى أى عربية فى الدنيا كلها ... هاهاهاهاهاها

بالنسبة للعيب دا ممكن يكون الخراطيم الكاوتش اللى داخلة للموتور والل طالعة من القربة ياريت تحوش الغطاء الفبر الأسود اللى على القربة

وتدور العربية لحد ما تسخن والسرعة التانية تشتغل وخلى حد يركب ويدوس بنزين وشوف هل الخراطيم دي بتنقط مياه

أصل لتر دا كتير بصراحة يعنى ممكن تلاحظ بنفسك ومممكن الرادياتير نفسه يكون مخروم


أنا بستبعد غطاء الرادياتير لأنه ممتاز جدا فى ميجان ولو فيه تسريب منه معتقدش إنه يبقى لتر فى اليوم صعب جدا بس إنت فكه وشوف الجلدة اللى فيه كدا للتأكيد برضه

بس بالنسبة لدورة التبريد عندنا من الواضح إنها مغلقة يعنى مفيش غير غطاء القربة وبس


وإن شاء الله بسيطة


سمعت برضه إن ممكن يكون تسريب عند ثرموثتات الكوعة

وياريت بعد ما تصلح العطل إن شاء الله تغير المياه كلها لمياه خضراء بعد ما تنظف دورة التبريد دا ضرورى جدا جدا وتقولنا كمان نظام الدورة إزاى

[karezzzma]

يا طرمبه المياه باديه تبووظ يأما غطاء الاربه من الضغط بيطلع بخار المايه منه

[solly1979]

بسم الله الرحمن الرحيم
افهم من كاتب الموضوع إن السيارة فيها عيوب ممكن تقول رأيك فيها بصراحة لانى ناوي اشتري عربية ومحتار اشترى إيه

ياباشا دية مشكله بسيطه جدا وفعلا بتحصل فى اى عربيه فى الدنيا
انا كان معايا اوكتافيا ومرة خرطوم فرقع ومرة كوعة اتقطمت معنى كدة ان العربيه وحشه وكل حاجه فيها كانت اصلى بس عمر أفتراضى لأى حاجه فى الدنيا عادى

[mtsaber]

الحمد لله طلع الموضوع بسيط وفعلا طلع في تسريب بسيط من شرخ صغير في القربة من تحت مكنش باين وتم تغيير القربة
ألف شكر لكل من شارك في الموضوع ده يا وحوش الميجان

[Ahmed Selim]

طيب الحمد لله بسيطة و ألف مبروك يا باشا

[dr.hazem]

ألف مبروك تصليح العربية...

Sent from my SE Arc S using Forum Runner