استفسار بخصوص فيتيس الميجان 2007

[kamantas]

انا لسه شاري ميجان 2007 اوتوماتيك و لاحظت حاجة غريبة عليا شوية
دلوقتي لو انا طالع مطلع جراج مثلا و الفتيس على d و مش دايس بنزين مش المفروض العربية تطلع لوحدها ؟

انا كنت سايق لانسر اوتوماتيك و جربت اطلع نفس المطلع بنفس الطريقة و العربية طلعت عادي !!!

هل دي مشكلة في الميجان ؟

[ahmed_hanafi]

لا مش مشكلة ،،.،،كل عربية غير التانية وكل عربية وزنها غير التانية المهم ان انت لما تكون علي ارض مستوية وتجيب ال d العربية تتحرك لوحدها

[تامر.محمد]

عندي نفس الكلام , السلانسيه على الارض المستوية بس , اظن ده العادي و الصح

[kamantas]

طب سؤال تاني في نفس الموضوع
لما باركن في مكان ضيق شوية طبيعي بابقى عايز اناور و اتحرك بالراحة بالعربية
و ده بيحصل عادي لما بابقى دايس d او r و العربية بتمشي على السلانسيه
لكن لو اي عائق تحت العجل او اي ارتفاع في مستوى الطريق او زلطة حتى العربية بتقف على السلانسيه و لازم ادوس بنزين عشان تتحرك
المشكلة ان اول ما بادوس بنزين و لو بالراحة العربية بتطلع بسرعة لدرجة اني ممكن اخبط في العربية اللي ورايا او قدامي اثناء الركنة
انا كمان متعود على اداء معين لاني كنت باسوق مانيوال قبل كده و كان السلانسيه اساسي عندي في الركنة حتى لو فيه عائق بسيط على الارض

فهل انتو عندكو نفس المشكلة و لا أنا اللي مش عارف اتحكم في العربية ؟

[Rsarabia]

هى ملهاش علاقة اوى بالفتيس
هى لو هنقول ان اصلا فى مشكلة لان ممكن الحكاية دى تختلف من عربية لعربية
هى لها علاقة اكتر بطرمبة البنزين و قلب الطرمبة لو ضعيف هيعمل فعلا كدا

[MohammedAladel]

دا الطبيعى

لو وقفت قدامك طوبة ع السلانسيه العربية هتقف ولو طوبة كبيرة ممكن تدوس بنزين حبة كدا وبرضه لسة العربية مش ماشية وصوت الموتور يعلى


هو طبيعة الأوتوماتيك كدا بسبب محول العزوم اللى فيها بيهدر قوة الموتور لما يلاقى عائق

[MohammedAladel]

وزى ما قال الأستاذ أحمد وزن العربية بيفرق يعنى نفس الفتيس بيركب على أكتر من عربية بأكثر من وزن

يعنى ميجان برضه عربية تقيلة دى 1250 كيلو غير اللى راكب جواها