ال cd فى الداستر استقل عن كونتكت العربية

[Land_Cruiser]

انا مركب أمامى و خلفى - بس من شارع شامبليون - مش من دمشق و عموما هى حلوة و بتحمى العربية - لسة واحد ماسك فرامل متأخر دخل فى العربية من ورا على سرعة خفيفة فى اشارة - هو خد كدمة صغيرة و انا ولا حاجة

شكرًا يا باشا على الرد. انا عارف فى شارع معروف هناك فى ناس كتير شغالين فيها بس الذهاب لوسط البلد الان قلق شويه . يا ترى حضرتك ركبت اى شكل لان الأشكال كتير قوى

[خالد]

بسم الله ماشاء الله
كان نفسي أعرف مكان علبة الفيوزات فين والحمد لله عرفت مكانها بفضلكم ..... شكراَ جزيلاً ليكم
أنا عندى مشكلتة فى الكاسيت والراديو :
مش بيشتغلوا ألا لو حركت زرار الزجاج بتاعى أو اللى جنبى أو لمبة الصالون !!!
كمان أنا فهمت منكم أنه لو الكونتاكت على تكة واحدة بيشغل الزجاج كمان زى الراديو والكاسيت ، بس أنا عندى بيشتغل الراديو والكاسيت بس ، الزجاج مابيشتغلش فى حالة التكة الواحدة دى !!!
كمان عندى دراع المالتى فنكشن الجزء اللى بيخفض الصوت بيعلق جامد لازم تدوس عليه خمس ست مرات علشان يستجيب معاك !!
كمان إستهلاك البنزين حاسس أنه عالى شوية تقريباً فوق الــ 15 لتر لكل 100 كم !! مع العلم أن مشاويرى كلها قصيرة اخل المدينة يعنى !
ياترى دى فعلاً مشاكل ولا ده طبيعى ، لحسن أنا رايح صيانة الــ 5 الاف بكرة إن شاء الله
مع خالص تحياتى

[خالد]

مفيش ردود خالص ولا أيه يارجالة الداستر !!
طيب كمان سؤالين زيادة يمكن حد يرد عليا
هو ينفع أشترى أنا الزيت والفلتر من بره وآخدهم معايا فى الصيانة وهما يغيروه ؟
ثانياً هوة كام تكلفة صيانة الــ 5 آلاف ؟

[خالد]

الحمد لله رحت النهاردة صيانة الــ5 آلاف فى فرع العبور
الإنطباع الأولى أنهم ناس محترمين ومقابلتهم حلوة ، كنت حاجز الساعة 11.30 ظهراً وصلت هناك قبلها بربع ساعة أستلموا العربية الساعة 12 زى بعضه مفيش مشكلة
المهندس أسمه إسلام قاللى هتستلمها الساعة 2 تقريباً
ولكن أستلمتها الساعة 4.15 ، لأن كان فيها شغل كتير خاصة الكاسيت وذراع المالتى فنكشن
النتيجة النهائية : هيتم تغيير ذراع المالتى فنكشن بس ماعندهمش دلوقتى !!
الكاسيت مش عارفين يصلحوه !! وهيبعتوه التوكيل !
فك الكاسيت وخدوه على وعد بتسليمه خلال 4 أيام على يوم الأحد ، ووعد بتغير ذراع المالتى فنكشن
والزيت طلع أنه بيتغير على 10 آلاف مش فى صيانة الخمسة آلاف
إستهلاك البنزين لسه طبعاً مش هيبان دلوقتى ألا بعد التجربة كام يوم
والحمد لله من قبل ومن بعد

[beeronasr]

يا باشا اسفين على التأخير - طبعا كل اللى قولتة عن عمل الكاسيت و دراع المالتى فنكشن كان غير اللى عندنا و كويس انة عرفوا المشكلة فين و هيعملوها حتى لو اتأخروا شوية.
ثانيا: صيانة ال 5 الاف مجانية و انا شخصيا عملتها فى خمس دقائق لانهم تقريبا معملوش حاجة.
ثالثا: اول لفة كونتكت بتشغل الراديو فقط - اللفة التانية بتنور لمبة البطارية و هى اللى بتشغل الزجاج بعد كدة تدوير عربية على طول.
رابعا: طول ما انت جوة المدينة و كبير نقلاتك اولانى - تانى يبقى الاستهلاك هيفضل عالى - علسان تعرف استهلاكها مظبوط و لا لأ جربها فى طريق مفتوح و امشى على سرعة من 80 الى 100 و شوف استهلاكها الحقيقى - بس طبعا ابقى صفر عداد كمبيوتر الرحلات الاول.
و اى سؤال تانى تحت امرك يا خالد باشا

[خالد]

ربنا يباركلك ياباشا ويحفظك من كل سوء
والله الأعطال دى ماكنتش فى بالى خاااااااااالص ومش مهتم بيها وماكنتش بتفرق معايا قوى أنى أشغل الرديو أو الكاسيت بالعيب ده وأعتبرته حاجة هايفة ، ولكن كان معايا أخويا صمم أنى أقول على العيب ده وقد كان !! ربنا يصلح الأحوال ويتصلح على خير
أنا كشفت على لوحة الفيوزات اللى جنب باب السائق وحسيت أن فيه فيوزات ناقصة ومش زى الخريطة المرسومة على الغطاء البلاستيك !! فياريت لو حضرتك تصور لى لوحة الفيوزات اللى عند حضرتك علشان أقارن بينها وبين اللى عندى لأنى حاسس أن فيه فيوزات ناقصة ، ومش بعرف أنزل الصور على الموقع
ربنا يبارك لحضرتك ، وتقبل تحياتى

[MohammedAladel]

عايز تنزل صور أدخل على مركز تحميل نايل موتورز

وأرفع الصور اللى أنت عايزها من على الكمبيوتر

هيظهرلك تحت الصورة أكتر من رابط تعالا عند رابط المنتدياتforums واعمل له نسخ وإلزقه هنا هتظهر الصورة إن شاء الله