مساعدة ضروري،،،الكارتيرة انكسرت

[moh158]

الحمد لله اخدت مطب من مطاباتنا الزبالة و العربية اتهبدت هبدة محترمة مشيت بعدها حوالي ٢ كيلو و فجأة سمعت صوت خبط في الموتور

ركنت علي جنب لقيت الزيت كله وقع و لقيت ريحة شياط ،،، أنا عارف كده أن الكارتيرة اتكسرت بس سؤال في حاجة تانية ممكن تكون باظت

[moh158]

و هل في عمرة للميجان

[AlGazar2]

صوت خبط فى الماتور حاجة ما تتطمنش بس ممكن تكون الطرمبه مثلا هيه خبطت فى الكارتيره او عمود الكرنك

غير كده يبقى الموتور رزع و لو ده حصل يبقى الافضل انه يترمى و تجيب شورت بلوك لو وش السلندر عندك سليم عشان توفر على قد ما تقدر

بس الاول غير الكارتيره و شوف الماتور هيشتغل كويس ولا لا

[alking_2006]

ربنا يستر
لكن كان واجب بعد الخبطة تقف تبص و تتطمن على كل حاجة
و طالما صوت خبط يبقى ربنا يستر على الموتور و على الكرنك
ابدأ بالكارتيره و حط زيت و جرب و ربنا يستر بقى

[shawkylotfy]

للاسف شوارع مصر بقت كلها مطبات ...... حصل معايا نفس موقفك وانا راجع من مارينا الصيف الى فات بالليل على طريق الساحل وقبل كدة مخش على ال 21 كان الاهالى عملين مطب علشان حادث حصل فى المكان دة ومطب خراسانى من الى .................... العربيات المهم انا كنت ماش حوالى 130 والطريق فاااااضى ومش مدى خوانة ولقيتلك المطب الحلو دة قدامى طبعا لبستة وقلت العربية دية خلاص مبقتش نافعة المهم نزلت على طول ابص على الخساير لقت حنفيتين زيت نازلين روحت جارى راكب العربية وطيران على الجراج فى الورديان خدت الدولى وعينى على لمبة الزيت لو كانت نورت كنت هقف على طول المهم وصلت الجراج بفضل الله طبعا وكان كل شىء طبيعى والحرارة فى النص روحت نازل وهى لسة دايرة اشم ريحة شياط او اسمع يكون صوت المكنة اخشن الحمد لله كان كلة تمام المهم طفيت العربية على طول بعد ما طفيتها مفيش 10 ثوانى كان الزيت كلة فى الارض وعملت بقعة كبيرة جدااااااااا نزلت حوالى 3 كيلو زيت يعنى فى السكة فقدت حوالى 2 كيلو والحمد للة الطريق كان فاضى لان طبعا لو كان فية زحمة ووقفت كانت فيصت ......... المهم قرفت من البلد ومن السواقة وسبت العربية مركونة فى الجراج حوالى اسبوعين وبعد كدة جبت ميكايكى ابن حلال معرفة حل الكرتير فى الجراج وروحت تانى يوم لحمتها لحام ارجون الومنيوم .... وبقت تمام ...... المفرقة الغربية فى الموضوع دة ( العغشة محصلش فيها حاجة ازاى مش عارف ) بجد عربية حمارة لو عربية تانية متهالى كانت ............* وقتى وكل عجلة طارت فى حتة وكلة طبعا بفضل الله وسترة ..... نصيحة بقى فى حالتك تقريبا هتحتاج موتور لو لا قدر اللة هتحتاج موتور ابقى ابعتلى على الخاص ادلك على واحد فى اسكندرية هنا بيبيع بالجملة وممكن نشترك فى نص .... نصيحة اخرى متصلحش الموتور القدييم علشان كلة فى الهجايص ........


تنبيه بمراعاة آداب الحوار
م ع 3

[ahmed_hanafi]

روح عند ميكانيكي كويس واكشف وربنا يستر وابقي طمنا

[moh158]

اولا شكرا على المساعدة :)
ثانيا انا رحت لميكانيكي و هجرب ابدل الكارتيره
بس سؤال هو ايه الشورت بلوك و يكلف كام و هل الموتور بيرجع زي الاول و لا بيدخن و يبقي عالي

اخيرا لو هجيب موتور استيراد هل في اجراءات معينة علشان اتاكد انه سليم و هل له ورق بيخلص و لا ﻻ

اسف علي الاطالة بس ربنا ما يحطكم في موقفي ده

شكرا

[AlGazar2]

الشورت بلوك ده ماتور من غير ادوات التغزيه و وش السلندر يعنى البلوكه بالابساتم بعمود الكرنك النص التحتانى من الماتور و لو الشورت بلوك سليم و التركيب صح مش هيبقى فى ولا دخنه ولا صوت عالى ولا حاجة

لو هتجيب ماتور استيراد فى ورق طبعا افراج جمركى و بتروح تثبت الماتور فى المرور و الشورت بلوك كده برضه عشان انت بتغير بلوكه الماتور

الماتور انت بتشتريه على التجربه لفتره معينه بتشوف الماتور ايه ظروفه فى الفتره دى و لو فى حاجة بترجعه و ممكن تتفق مع التاجر ان لو الماتور فيه حاجة فالمصنعيات او النقل عليه

[moh158]

شكرًا تاني علي الرد ،،،، الحمد لله الموتور عندي باظ فقررت اشتري واحد استيراد أن شاء الله

الفكرة اعرف أزاي أن الموتور ده كويس و أجيب الإفراج الجمركي أزاي

شكرًا كمان مرة

[MohammedAladel]

قدر الله وماشاء فعل .... طيب معرفتش إيه اللى باظ فيه بالظبط ؟؟

وموتورك ماشى كام كيلو ؟؟؟


بالنسبة للموتور الاستيراد لازم تاخده على التجربة تقريبا بيبقى فيه شغل برمجة مع الكنترول يونت للموتور الجديد

بس معرفش هل بتعرف هو ماشى كام ألف كيلو ولا لأ

حالة الموتور هتقف عليها لما تجربه إن شاء الله

بس لازم تدقق النظر على الموتور من برا عشان التسريبات وكدا حتى لو كان مغسول بص برضه فى أماكن التجميع بتاعته

[anwer2010]

هيا بكام كارتيره الزيت لاني عايز اجيب واحده وهل في منها انواع ويريت لو حد يعرف مكان محترم وسعر كويس يقولنا عليه

[moh158]

قدر الله وماشاء فعل .... طيب معرفتش إيه اللى باظ فيه بالظبط ؟؟

وموتورك ماشى كام كيلو ؟؟؟


بالنسبة للموتور الاستيراد لازم تاخده على التجربة تقريبا بيبقى فيه شغل برمجة مع الكنترول يونت للموتور الجديد

بس معرفش هل بتعرف هو ماشى كام ألف كيلو ولا لأ

حالة الموتور هتقف عليها لما تجربه إن شاء الله

بس لازم تدقق النظر على الموتور من برا عشان التسريبات وكدا حتى لو كان مغسول بص برضه فى أماكن التجميع بتاعته

هي إيه معاش أماكن التجميع ده... معاش أخوك مستجد

[moh158]

هيا بكام كارتيره الزيت لاني عايز اجيب واحده وهل في منها انواع ويريت لو حد يعرف مكان محترم وسعر كويس يقولنا عليه

حوالي ٨٠٠ جنيه من صقر

[MohammedAladel]

قصدى أماكن الربط بص بين وش السلندر والبلوك كدا يعنى أى أماكن فيها حاجات

وأنت هتاخده على التجربة أن شاء الله

وأبقى قول لنا السعر

وياريت برضه تقول إيه اللى حصل فى موتورك القديم