هل من حل لرفع اداء تكييف الفلوينس!!

[mohamed_rhem]

السلام عليكم يا شباب

عندنا فلوينس 2010 مشكلتها التكييف ضعيف الصيف قرب

ومحتاج ارفع اداءه

وطبعا غلبنا مع التوكيل

هل في حل للموضوع ده يعني مثلا بيتغيير الكباس بتاع التكييف

حد عمل الموضوع

[Casio2000]

متابع و بشدة . . . .

[houseiny]

حضرتك ممكن تركب عازل حراري على زجاج السيارة من شركة ثري ام ده هيقلل درجة الحرارة في العربية وهيقلل من تسرب البرودة منها من غير تغيير التكييف ولا حاجة

[mohamed_rhem]

حضرتك ممكن تركب عازل حراري على زجاج السيارة من شركة ثري ام ده هيقلل درجة الحرارة في العربية وهيقلل من تسرب البرودة منها من غير تغيير التكييف ولا حاجة

حضرتك تقصد الفيلم اللي بيركب علي الزجاج !

التكييف في الظل برضه مش زي الياباني

اقترح جميل بس انا عايز حل جزري

لان بالفعل ده اهم سبب هيخلينا نغير العربية

[وائل الجندي]

اانا لسه انهاردة متفرج على واحدة استعمال 2011 تكيفها تلاجة بس دي هنا فالسعودية تكييفها نفس الشكل الجديد الي هينزل في مصر في 2013

[Ultramisho]

السربانتينا الداخلية - تكييف الفلونس الجديدة؟

اانا لسه انهاردة متفرج على واحدة استعمال 2011 تكيفها تلاجة بس دي هنا فالسعودية تكييفها نفس الشكل الجديد الي هينزل في مصر في 2013

الحقيقة انا دايما باقول الفلونس واسعة وفخمة وبها وسائل امان واوبشنز رائعة ومش فيها اعطال الميجان بس مشكلتها السحب والتكييف ولو السحب ممكن الواحد يصبر عليه التكييف صعب خاصة مع الصيف الحار

فكرة العازل رائعة عموما ومن غيرها تكييف الفلونس بيبقى هوايا في عز الظهر لو كانت في الشمس طبعا باتكلم على الصيف
انا سمعت ان فيه ناس بتغير السربانتينا الداخلية الثلاجة يعني أو بتزود عليها قطعة بتاعتها بس احنا مستنيين زميل كريم من ملاك العربية يعرف حاجة عن الموضوع ده يقولنا عليه
ولو اني سمعت برضه ان مواسير السخن بتمر قرب الساقع ودي مشكلة ثانية

أما بالنسبة الفلونس السعودي فدي قصة تانية هي متصنعة بالكامل في كوريا
صحيح الفلونس التركي الي بتنزل مصر نزلت في 2013 بموتور تيدا وفتيس سي في تي نيسان بس موضوع التكييف ده مش مؤكد وياريت لو حد عنده تأكيد هل التكييف مازال زي القديم اوروبي يهتم بالتدفئة جدا ولكن كسول في التبريد ولا تكييف نيسان زي الي في السعودية

في انتظار ملاك واخصائيين الفلونس

خالص تحياتي

[MohammedAladel]

افصل التكييف السخن هيزيد من كفاءة التبريد
أنفخ السربنتينة بالهواء المضغوط والمياه
ثانيا مفيش مروحة على السربنتينة ودا عشان التكييف بتاعها مواصفات أوروبية مش بتاع دول حارة

لذلك ددورة تكييف الفليوانس أو ميجان برغم انها متطورة بس بالنسبة لغيرها ضعيفة

[horas3000]

ثانيا مفيش مروحة على السربنتينة ودا عشان التكييف بتاعها مواصفات أوروبية مش بتاع دول حارة

دي خلاصه الموضوع
و الفرق الجوهري بين التركي و الكوري
و اعتقد ان اضافه المروحه دي الطريق لرفع اداء التكيف و الله اعلم
و معرفش مدي امكانية تركيبها في التركي من عدمة

[Rsarabia]

الموضوع دا قتل بحثا مع الميجان و حاولنا احنا ملاك الميجان قبل كدا نرفع من كفاءة التكييف لكن منجحناش
المشكلة ان مفيش مروحة تبريد للسربنتينة عكس الاسيوى بينزل بمروحة زيادة للسربنتينة و الحل هيكون فى تركيب مروحة لكن المشكلة فى تثبيت المروحة لان المكان ضيق جدا + الكهربا هتاخد منين ؟؟

كمان خراطيم الساخن و الافضل تفصلها تماما و طبعا دى مشكلة لو الجو فى الشتا برد و محتاج تدفى

فى واحد قالى معلومة بس انا مشفتهاش بعينى يعنى
ان تلاجة الميجان او الاوروبى عموما بتبقى اكبر من الاسيوى و بالتالى معدل تبريدها بيكون اقل من الاسيوى اللى لو حتى راكن العربية سبع ساعات فى النار اول ما بتشغل التكييف بتلاقى سقعة
عكس الاوروبى اللى بياخد وقت اطول
و طبعا دى ملهاش حل لو قلنا هتغير التلاجة بواحدة اصغر
مش هينفع

بالتالى الحل هو التعايش مع التكييف يعنى اول ما تركب تنزل كل الزجاج و تفتح فتحة السقف كمان و تشغل التكييف بأقصى قوة و على اقل درجة شوية بعدين تبتدى تقفل
او تغير و تجيب كورى او يابانى :)

[وائل الجندي]

في موضوع العازل الحراري وهنا فالسعودية في ناس بتقول بينزل حرارة السيارة للنص بس المهم يكون نوع عازل نضيف يعني حاجة امريكي مش التظليل العادي الي بنركبه بـ50 جنيه

[MohammedAladel]

العازل الحرارى غالى ممكن يعمل 1600 مثلا

[mohamed_rhem]

طيب انا معنديش مشكلة اني ابعت اجيب كمبريسور او ثلاجه او حتي مروحة من برا

المهم انا ايه اللي حشتريه!!

[Land_Cruiser]

اعتقد برضه ان العازل الحرارى يبقى الحل المناسب و ان كان غالى إنما هيغنيك عن اللعب فى تكييف العربيه او عمل تعديل عليه يعملك مشكله مع حاجه تانيه. الحل التانى هو موضوع تركيب كباس الفلوانس الخليجى ودة ممكن تسأل إذا كان ينفع يتركب و هيحتاج ايه و الكباس نفسه تدور عليه استيراد فى الحرفيين و تتأكد من حالته و تبدله مع بتاعك و تدفع فرق بس فى الاخر الموضوع هتلاقى مش رخيص و تجاوز مبلغ العازل الحرارى فى الاغلب وكمان النتائج مش مضمونه لانها لسه فكره جديده لكن مش هتخسر حاجه لو جمعت معلومات إذا كان ينفع الكباس يتركب و لا لأ و سعره

[MohammedAladel]

الخليجى أساسا موتورها مختلف فمتعرفشل وضعية دورة التكييف فيها عاملة ازاى

[تامر.محمد]

قياسا على اللي الناس عملته مع الميجان

فيه حل ميكانيكي عبارة عن تركيب مروحة للسربنتينة , هتلاقي موضوع بيه هنا في القسم
و فيه حل خارجي اللي هو العزل الحراري , عند شركة زي اتوسبا بحوالي 1600 جنيه