نصيحة لوجه الله محدش يشد عربية اكبر منه ابداً..

[ahmedfouad]

السلام عليكم ورحمة الله على احلى شباب
هخش فى الموضوع على طول علشان كل واحد يتعظ من اللى حصلى وما تجيش على عربيتك ابداً..

انا عربيتى رينو كليو وعربية والدى لانوس ..

فى مرة كنت راكب عربي والدى اللنوس وبطلت ومش عاوزة تدور .. المهم يمين شمال مفيش ..

روحت جبت عربيتى وطلعت على الميكانيكى جبته وطلعنا على المكان اللى فيه العربيه اللانوس

طلع العطل ان سير الكاتينة اتقطع
مع انه كان فاضل على ميعاده 2000 كيلو...
كان عامل 13.000 وهو المفروض يتغير على 15.000 زى ما الراجل اللى باعهولنا قال لوالدى ..
المهم مفيش حل انها تتحرك الا لما تتقطر ..
وطبعاً اتشمللت وروحت قايل يالا يا حاج هقطرك ... الراجل بصراحة ما قالش اى حاجة ..

المفروض الوير هيركب عندى من ورا ناحية اليمين
وفى اللانوس من قدام ناحية اليمين
اربط يا عم روحت مطلع الوصلة الحديد اللى بتتربط ورا يمين وركبت الحبل

شوف المشاكل بالترتيب ايه اللى حصل :

المشوار من بنزينة وطنية عند الوفاء والامل الى الحى العاشر ..

اول مشكلة ان الجزء اللى فيه هوك اللانوس مصدى والبارومة وكلاه ودايب الميكانيكى قالى مش هينفع ... قالى هركبه الناحية التانية ..

قولتلو انت كدة هتضلعلى العربية قالى هنمشى براحتنا .. حطيت ايدى على قلبى وقولت ربنا يستر
المهم ربط
(بقى من ورا يمين عندى لقدام شمال فى اللانوس )
وطلعنا وعينك ما تشوف الا النور ..
نتش نتش نتش كل ما اطلع العربية تمشى ويقوم ناتش .. البيه رجله على الفرامل .. قول كنا فى شارع واسع بليل فكنت ماشى قدامه وعلى الشمال بالنسباله ..
ابتدينا ندخل على الشوارع فى الزحمة وابتدا يبقى ورايا تخيلو المأساة طبعاً ...الواير بقى بميل بينه وبينى زاوية 45 درجة واحلى ترزيع ورا مع الغباوة والناس محدش بيقدر ولا بيرحم الا من رحم ربى
كل النتش ده مسمع فى الفتيس و شداد الفتيس و الكبالن والمقصات

وكوتشة الدنجل الخلفى اتقطعت والعربية دلوقتى عاملة زى الحصالة .. بقت تعوم

غيرت كل حاجة فى العفشة قدام (بلى عجل + مساعدين + مقصات ....كل حاجة عدا السوست ) ومفيش فايدة ..
غيرت الاربع فرد كاوتش مفيش فايدة..
روحت كشفت على الجنوط عند اشرفكوا فى المطرية مفيش ..
روحت رصصت عند الراجل اللى فى بنزينة شل بتاعة شارع دمشق اللى بيرصص الكاوتش والعجلة راكبة مكانها يعنى يرصص زى ما بيقولوا (على ابوه) علشان لو فى مشكلة فى العفشة بعد ما غيرتها مفيش ...
روحت لبريدجستون صلاح سالم عمارات العبور اظبط زوايا ..
كشف عليها قالى قالى العجلة اللى ورا يمين فيها زرجينة قافلة من قدام 0.3 درجة ومن فوق 1.25 درجة والعربية بتحد ف معاك شمال قلتله صح ..... قالى روح لواحد بيعمل زرجينة..
قولتلو رشحلى واحد قام مرشحلى حمادة اللى عند النادى الاهلى ... فك العجلة وقالى كاوتشة الدنجل ده مقطوعة ولو عملتلك الزرجينة دى هتدعى عليا لانها هتبوظ معاك اكتر .. لازم تغير الدنجل ده ... قلتله تركبهولى قالى ماشى .. قولتله يعمل كام قالى 300 جنيه استيراد طبعاً .. اتصلت على واحد فى الوكالة قالى موجود بس مرضيش يقولى السعر .. طلعت على زعتر فى جسر السويس .. هو شاب شكله ابن ناس قوى ومحترم جداً قالى موجود طب بكام.. قالى عندك ABS قلتله لاء قالى مش مشكلة هيبقى كامل (بالطنابير والتيل والبلى)
بدون المساعدين والسوست 1000 جنيه شكلى بقى طبعاً وقومت عامله كدة وروحت ماشى ...
ارجوكم ادفع 100 جنيه لعربية نص نقل وريح دماغك دى نصيحة من اخ ليكم عربيته اتدمرت والعياذ بالله ...
اوعى تشد اى عربية بعربيتك لاى سبب ان كان حتى لو اصغر منك واللى اتلسع من الشوربة ينفخ فى الزبادى

[Karim Ibiza]

ربنا يعوض عليك
فعلا موضوع القطر ده بينخع فى العربية وحمل جامد على الاسطوانة
لو هتكون مضطر يبقى لازم الاتنين اللى بيسوقوا يكونوا فاهمين بعض فى السواقة قوى

[aldesha989]

قدر الله وما شاء فعل معلش قضاء وقدر ربنا يعوض عليك

[monamize4]

مشكور ع النصيحة الغالية دى , و ربنا يكون ف عونك

[M.Elgergawy]

قدر الله ماشاء فعل
بس غريبة سير كاتينة يقطع بعد 13 الف والاغرب انه بيقولك يفضل ل 15 الف
المفروض اقل سير كاتينة لو مش اصلي يفضل 30 الف كم

[mohammedabdallh]

ربنا يعوض عليك يا كبير

[hossamalsadik]

ربنا يعوض عليك ومتزعلش نفسك كفايه انك اتعلمت وعلمت غيرك كمان
وفعلا موضوع القطر ده له أصول خلاصتها لازم كلا السائقين عارف بيعمل أيه وعشان الزحمه والناس انا قطرت قبل كده بس لازم اخويا يكون معايا لانه فهمنى فى الموضوع ده فمبيحصلش مشاكل نهائى والأفضل ان الواحد زى ماقلت يحملها على ونش

[ahmedfouad]

قدر الله ماشاء فعل
بس غريبة سير كاتينة يقطع بعد 13 الف والاغرب انه بيقولك يفضل ل 15 الف
المفروض اقل سير كاتينة لو مش اصلي يفضل 30 الف كم

بتاع قطع الغيار بيبقى عارف جودة الحاجة اللى عنده كويس وبصراحة انا بعتبر ان الراجل عنده ضمير بالرغم من ان السير اتقطع قبل ميعاده كفاية انه حذر والدى .. قدر الله وما شاء فعل وعلى فكرة الكلام ده من رمضان اللى فات ومن ساعتها وانا بجرب

[Batman372]

ربنا يعوض عليك و مشكووووور على النصيحه ...
المره الوحيده كان معايا اوكتافيا a4 و شديت دايو لانوس كانت عربيه واحد صاحبى ...
هو ما حصلش حاجه لان الاوكتافيا تقيله و متينه لكن وقتهت ناس كتير نصحتنى ان دا كان خطأ ... تحياتى ...

[Khaled Lanos]

معلش ياباشا قدر الله وماشاء فعل..محدش بيتعلم ببلاش وكان الأفضل تحملها على ونش او تجيب عربية نص نقل تقطرها.

[AlGazar2]

قدر الله و ما شاء فعل

بس هو ليه كل ده حصل فى العربيه - و ايه علاقه الدنجل بالموضوع برضه هو انت كنت رابط العربيه فى هوك القطر الى ورا ولا فى فى دنجل العجل الخلفى

القطر بيحمل على الاسطوانه - لو الاسطوانه ضعيفه ممكن تبوظ من القطر لكن الباقى ده جديد بصراحه ان الزوايا و الكاوتش و العومان و بوظان العفشة من القطر ده جديد و غريب

انا قاطر قبل كده عربيتى ال 27 مرتين او 3 بالنوبيرا و محصلش حاجة الحمد لله غير مره عشان كان الواير ناشف جدا انه عمل شرخ فى الاكصدام
و زاقق بيها لانوس من فتره اكصدام فى اكصدام و حته فيها مطلع و محصلش حاجة برضه الحمد لله

[S O P H O S]

ربنا يعوضك خير معلش

[Land_Cruiser]

قدر الله و ما شاء فعل. في الحالات اللي زي دي يا أما الميكانيكي يدورها يا أما الاتصال بالونش و خاصه ان المسافه مش كبيره. الموضوع غير المشاكل اللي بيعملها في العربيه كمان خطر خاصه لو بالليل و الدنيا ضلمه العربيات ممكن ما تاخدش بالها ان في عربيه مقطوره ده غير ان البلد فيها مشكله في الامن فلو لاقدر الله طلعلك حد و انت قاطر عربيه هيبقى الموضوع بتاع تثبيتك بالنسبه له في غايه السهوله

[windofchange]

اعتقد الغلطة اللي حصلت انك مربطتش في مكان القطرة اللي انت قلت ان واكله البارومة....شكرا للنصيحة وربنا ييسرللك تصليحها واعتقد انه بنسبة كبيرة تغيير القنطرة الامامية والله اعلم

[lanos2004]

على فكرة كل شويه فرامل للعربيه المقطورة هيه الى عملت كدة وكما ن ان الحبل واخد زاويه يتعب عربيتك اكتر
دة انا قطرت عربيه وزنها 1400 كيلو حوالى 30 كيلو