تغيير شداد موتور ميجان السفلى بالصور

[MohammedAladel]

السلام عليكم

عندنا الموتور متثبت فى جسم العربية بنقطتين أساسيتين اللى هما قاعدة الموتور العلوية اللى على اليمين ودى سهلة تتشاف بالنظر وانت واقف

وقاعدة الفتيس اللى هى تحت البطارية

ودول النقاط الرئيسية

فيه نقطة تالتة اللى هى شداد الموتور السفلى اللى هو ماسك الموتور فى جسم العربية بحيث إنه ميطعلش ورا وقدام

يعنى عايز تعرف شداد الموتور بايظ ولا لأ حرك الموتور بإيدك لورا وقدام لو لاحظت إنه بيتحرك معاك ورا وقدام بس مش من فوق من تحت يبقى الشداد عندك بايظ أو ابتدى يبوظ على حسب مدى الحركة اللى انت حاسسها

تانى حاجة لما تيجى ترجع لورا فى عربيتك الأوتو هتحس بخبطة لأن الشداد بقى فيه بوش الموتور بيخبط لورا جامد بتسمع انت الخبطة دى

نفس الكلام لو عملت كيك داون من على الغيار التانى للأول على سرعة بطيئة وحسيت زى خبطة جامدة برضه من الشداد

ولما تيجى تهدى بالعربية طبيعى انها بتنزل غيارات لوحدها برضه هتحس إنها مش طبيعية وان فيه نتشة خفيفة

دا شكل الشداد الجديد بيبقى فيه فتحتين زى ما أحنا شايفين هو عبارة عن mix بين المعدن والكاوتش عشان يمسك الموتور وفى نفس الوقت ييبقى عازل كويس .... يعنى ممكن حد يعمل حتة حديد بنفس الطول ويركبها و هتمسك الموتور فى جسم العربية بس هيبقى عزل سيئ جدا
Uploaded with ImageShack.us
عربيتى ماشية 120 ألف كيلو ودى أول مرة تغير شداد وهى موديل 2007 عمر الشداد الافتراضى بدون استخدام 5 سنين زيه زى كاوتش العربية بعدها الجلد بيفقد خواصه
يعنى هو عمل اللى عليه وزيادة قوى كمان
سعر الشداد الجديد الأصلى 125 جنيه بعد غلاء الأسعار
طيب نغيره إزاى ؟؟

انت ممكن تغيره بنفسك هتحتاج مفتاح 18 زى دا بالظبط ويكون طويل زى دا عشان تعرف تتحكم لأنه بيبقى متثبت ب 2 مسمار وفكيتهم بصعوبة جدا لأن دى أول مرة اغير فيها الشداد وممكن ترش wd40 وانت بتفك
Uploaded with ImageShack.us
هنرفع العربية وننزل تحتها
هنلاقى الشداد ماسك فى الموتور بمسمار وماسك فى جسم العربية بمسمار زيه بالظبط
هنفك المسمارين
دا المسمار اللى ماسك الشداد فى الموتور Uploaded with ImageShack.us
ودا المسمار اللى ماسك الشداد فى جسم العربية Uploaded with ImageShack.us
دول المسمارين حتى واحد منهم فيه جزء مصدى لأنه بقاله فترة جامدة متفكش Uploaded with ImageShack.us
بعدين نطلع الشداد نكاركله كدا هيطلع معانا
Uploaded with ImageShack.us
نركب الشداد الجديد وناخد بالنا هنحتاج نزق الموتور بأيدنا كدا عشان المسمار يدخل فى الفتحة بتاعته فى الموتور

بس نربط المسمار اللى راكب فى جسم العربية الأول وبعدها نركب المسمار بتاع الموتور

ونربط كويس جدا

بعدها أطلع فوق وهز الموتور كدا هتلاقيه ثابت جدا مكانه

تعالوا نشوف الشداد القديم واللى حصل فيه Uploaded with ImageShack.us
الجزء اللى بيركب ناحية الموتور الجزء الحديد مقطوع خالص أهو وطلع من الكاوتش وهو دا اللى بيعمل الخبطة
وفى نفس الوقت الجزء دا اللى هو بيركب فى جسم العربية هنلاقيه متشقق
Uploaded with ImageShack.us

أنا كان ممكن أصلح الشداد القديم وأرجعه زى ما كان إن شاء الله بس مش فاضى دلوقت

لكن أوعدكم أنى لما أصلحه هوريكم عملته ازاى وهيرجع يعمل بكفاءة إن شاء الله لأنى بحب أصلح أى حاجة طالما أعرف أصلحها

[lanos2004]

ماشاء الله
ايه الموضوع الجامد دة
بس انته هتصلح الشداد القديم ازاى وهوة معظمه كاوتش

[MohammedAladel]

مهو عشان معظمه كاوتش أنا هصلحه بكاوتش زيه

هستعمل سلك نحاسى رفيع وفتلة وأبرة خياطة وسيليكون حرارى وهضبط الكلام زىما عملت قاعدة الشكمان بس لما أفضى و هعمله بمزاج

ممكن تشوف الموضوع دا عملت فيه قاعدة الشكمان البايظة بالطريقة دى وبقت زى الأول

http://www.nilemotors.net/Nile/336959-a.html

[MohammedAladel]

عايز أقول لكم حاجة أنا معملتهاش تعملوها أنتو إن شاء الله لما تيجوا تغيروه

من المعروف طبعا ان الكاوتش بيتأثر بعوامل الجو من رطوبة و سخونة

طيب نعمل إيه ؟؟

هنجيب سيليكون عادى

ونغطى الشداد كله بطبقة خفيفة جدا

هتحميه وهتطول عمره والكلام دا مع قواعد الموتور كلها ومع بطاحات المساعدين ومع قواعد الشكمان

[shawkylotfy]

الله يفتح عليك تمام انت راجل فاهم

[Ahmed Selim]

عود احمد يا حاج محمد :-)


انت راجل ١٠٠/١٠٠

[dedo_ryo]

الف مبروك يا كبير عقبال البطااااااااااااااااااحااااااااات
شغل 100-100 معلم

[ecybrarian]

شغل 100 100...بس انا باسجل اعتراضي على العدة :-) العدة البلدي دي راحت عليها يا كبير، خليك في الجديد بقى

[MohammedAladel]

قصدك إيه يا هندسة ؟

يعنى أجيب الجهاز الشغال بضغط الهواء دا واشتريلى كمبرسور زى اللى عند بتوع الكاوتش مثلا ولا أعمل إيه بالظبط هههههههههه

المفتاح دا استحمل عزم عالى لو اشتريت عدة جديدة اللى مالية السوق عندنا مش هيقدر يلف أساسا هيتكسر أو سنونه هتهرش

[MohammedAladel]

الف مبروك يا كبير عقبال البطااااااااااااااااااحااااااااات
شغل 100-100 معلم

تسلم يا دكتور

بالنسبة للبطاحة ....إن شاء الله هعمل تقرير مفصل عنها هى وبلى البطاحة والسوستة والمساعد وال tie rod والمقص

[ecybrarian]

دا يعمل معاك عزم احسن وشغل اسهل

[windofchange]

الله ينور يامحمد باشا...ويابراريان ب ك اسمه ايه الطقم ده واقول للبائع ايه وانا بشتريه؟ ويعمل حوالي كام؟

[MohammedAladel]

الجهاز اللى شغال بضغط الهواء دا والكمبرسور هيبقوا غاليين طبعا ومفيش مستهلك عادى بيجيبهم ولا حتى ورشة عادية بتجيبهم

أما فيه حاجة أرخص شوية اللى هى يد السستم ودى أنا شفت فى أكتر من محل فى القاهرة أكتر من حجم بالقطع بتاعتها

الكبيرة تقريبا كانت عاملة 350 جنيه بس مش ألمانى برضه بس الراجل قال لى إتحاد أوروبى ومش عارف إيه

يد السستم لو مكنتش أصلية يبقى بلاش منها بس هى أكيد أفضل وبتدى عزم أعلى

المفتاح اللى أنا استخدمته تعبت جامد قوى عشان أفك لدرجة إنى كنت فاقد الأمل إن المسمار يتفك ولكن أول ما سمعت صوت طقطقة وأنا بلف تنفست الصعداء وعرفت إن ميغلبش الأنسان إلا الموت

[MohammedAladel]

دا يعمل معاك عزم احسن وشغل اسهل

wind of change : دا اسمه يد لقم أو يد سستم ممكن تجيب اليد لوحده اللى هواليد بتاعته بلاستيك لوحده وممكن تجيب الشنطة دى كلها زى ما انت شايف كدا دى شفت زيها ب 350 تقريبا أو أكتر مش فاكر قوى .... ودا الحجم الكبير وفيه أكبر من كدا طبعا بس دا أحنا عمرنا ما هنحتاجة وفيه أصغر من كدا برضه فى شنطة صغيرة
جبته بكام ومنين ونوعه إيه يا هندسة ؟

[hamaka]

و الله باشا ،تسلم الأيادى :)