انطباعي بعد تجرية فلوانس فيس ليفت

[wael-mohamed]

اصدقائي الاعزاء اعضاء المنتدى
بالامس سنحت لي فرصة تجربة الفلوانس الجديدة الفيس ليفت e3 بتاعت واحد صاحبي ومقارنتها بالشكل القديم بتاعتي وهقول لسيادتكم على الفروق والمميزات والعيوب من وجهة نظري المتواضعة وده رايي انا فقط ماشي :
1- بالنسبة للشكل الخارجي الفروق هي كالتالي :
* الاكصدام الامامي في الفيس ليفت شكله جميل جدا والضوء النهاري فيه جميل جدا و على فكرة هوه نفس القديم يعني ممكن يركب بدون تعديلات
* العربية من الجنب هيه هيه الشكل القديم استثناء الجنط مختلف
* العربية من الخلف لايوجد اي اختلاف نهائي
* سقف العربية لايوجد به الباكتات الجلد الخاصة بتركيب عوارض التحميل او الشبكة يعني الي موجودة بالعربية الشكل القديم
* المراية الشمال فيه على الطرف الكيرف المنقط الي بيفرق بين اخر منطقة في المراية الي مقعرة والمراية العادية ودي كانت موجودة في مرايات الميجان والكليو ومش موجود الكيرف ده في الفلوانس الشكل القديم

2- بالنسبة للشكل الداخلي :
* الفرش نص جلد ونص قماش مع وجود اطار جلد ابيض على داير الكرسي ( مش حلو خالص )
* الفتيس والعصى الفتيس نيكل لامع ( جميل بس بيبصم مع الاستعمال )
* الدركسيون هوه هوه القديم بس خياطة الجلد بيضاء و في اختلاف في الجلد في المنطقة الوسطى من الطارة مخرمة اكتر من باق الطارة ( لذيزة جدا بس الخياطة البيضة صعبة قوي وبتتوسخ بسرعة جد )
* فرمل اليد مكسوه بالجلد والخياطة بيضة رضوا وزرار اليد نيكل وحوله اطار نيكل ( جميل بس الخياطة مشحلوة برضو )
* القطعة الفضية الموجودة في الطالبلوا من الامام مستبدلة بواحدة سوداء لامعة مع خط نيكل في نهايتها وموجودة برضوا حول فتحات التكييف الجانبية ( لذيذة بس قفله لون الطابلو شوية )
* لايوجد بجوار المايك مكان للنظارة في السقف لانه مش موجود الجزء الفبر الابيض الي مغطي المنطقة دي ( الشكل القديم احسن بكتير )
* الباب الامامي يمين ويسار المقابض الفضية في الشكل القديم سوداء في الجديد ولا يوجد اطار فضي حول السماعات
* الكاسيت مختلف فيه فتحة يو اس بي و جميل جدا
* زرار الانتظار اسود مش احمر
* الابواب الخلفية فيها تويترات جنب الاكر ( حلوة جدا ) ودي مش موجودة في الشكل القديم
* العدادات مختلفة طبعا ديجيتال بس بصراحة خيالني موضوع ان في رقم عمال يتغير طول ما انا سايق ( دي وجهة نظري برضوا خصوصا انه كبير اقوي )
* الباقي من الداخل هوه هوه القديم
3- الشنطة :
من جوه هيه هيه الشكل القديم
4- الموتور
* طبعا الموتور مختلف موتور نيسان مع فتيس CVT وتلاحظ الاختلاف عن العربية القديمة بمجرد متبدا تدور العربية طبعا صوت المارش مختلف وصوت الماكينة مختلف
* مفيش غطاء للكنترول بتاع العربية ولا خرطوم التهوية المبطط الي قدام البطارة في الشكل القديم ودي حاجة غريبة جدا

5- القيادة
* العربية طلعتها مختلفة طبعا بفضل ال5 قدرات الزيادة في الموتور والفتيس الجديد وناعمة في المشي ومتحسش بالغبار طبعا بس صوتها مش اوطى كتير من الشكل القديم على عكس تخيلي
* مش عارف علشان انا واخد على صوت مواتير الرينو سواء في الكليو او في الميجان فمستغرب صوت الموتور النيسان على العربية ممكن اكون انا نمكي شوية بس هوه ده رايي

العربية اجمالا جميلة جدا بس من وجهة نظري فيها بعض الحاجات مش عجباني كالتالي :
1- في جزئين بارزين في الاكصدام من الجناب تحت الفوجات شكلهم مش لطيف واظن انهم يتعرضوا للحك كثيرا اثناء الركن
2- الفروق من جوه مش عجباني حاسس ان الطابلو مقفول وغامق قوي مع العدادات ذات الاضائة المبهرة دائما
3- شكل الموتور وتقفيله مش كويس وحاسس ان في حاجة ناقصة اننا مش عارفها ( على فكرة ده موتور الفلوانس الخليجي من 2010 يعني مش جديد كليا والا حاجة هوه والطابلوه الديجيتال موجود بره مصر من 2010 وبعدة اشكال كمان

4- الشريط الجلد الي على السقف فارق في شكل العربية عدم وجوده

5- عندي احساس ان فيه توفير شوية في المواد الداخلية بالذات مش عارف ليه

في النهاية ده كان تقييم متواضع للعربية ولكل الافاضل ملاك الفلوانس الجديدة والقديمة علشان يعرفوا الفروق بس والعربيتن في منتها الجمال وربنا يدينا جميعا خيرها ويكفينا شرها

[M I D O]

تسلم يا باشا علي التقرير

[2alb]

تقرير جميل يا وائل تسلم اديك انا استلمت العربية اول امبارح نفس الفئة ومؤيدك فى ملاحظاتك وطبعا انا جربتها فى 400 كيلو سفر العربية ناعمة ثابتة مع انى مجرتش بيها كان اخرى 100 كيلو ثبتها جميل زى الاوكتافيا الى كانت معايا الكماليات حلوة طبعا على سعرها لان معمولى واجب فيها جامد لان ولاد عمامى معاهم توكيلها االعيب الى انا حسيتة فيها شوية هو سحبتها الاولانية ممكن علشان واخد على الاوكتافيا والمرسيدس بس فى المجمل عربية جميل عفشة لذيذة لانى بسافر كتير والنعومية .... واسف انى مش عارف انسق الموضوع

[S O P H O S]

تقيم جميل ..

[kar!m]

شكرا على التقرير المفصل ده.

[Amr_Moh]

* مش عارف علشان انا واخد على صوت مواتير الرينو سواء في الكليو او في الميجان فمستغرب صوت الموتور النيسان على العربية ممكن اكون انا نمكي شوية بس هوه ده رايي

شكرًا ... تقرير رائع

[horas3000]

تسلم ايدك
مقارنه مفيده

[ahmedabutaleb]

شكرا ياباشا على التقييم

[Hany Saad]

أستاذ وائل....مشكور جداً جداً على هذا التقرير الرائع....أنا فعلا محتاجه بشده لأنى بفكر أشترى الفلوانس الجديدة قريب إن شاء الله.....أسمحلى أعلق تعليقات بسيطه على تقريرك,,,,

اصدقائي الاعزاء اعضاء المنتدى
بالامس سنحت لي فرصة تجربة الفلوانس الجديدة الفيس ليفت e3 بتاعت واحد صاحبي ومقارنتها بالشكل القديم بتاعتي وهقول لسيادتكم على الفروق والمميزات والعيوب من وجهة نظري المتواضعة وده رايي انا فقط ماشي :
1- بالنسبة للشكل الخارجي الفروق هي كالتالي :
* الاكصدام الامامي في الفيس ليفت شكله جميل جدا والضوء النهاري فيه جميل جدا و على فكرة هوه نفس القديم يعني ممكن يركب بدون تعديلات

-يمكن بس يفرق فى توصيلة ضفيرة الكهرباء.
* العربية من الجنب هيه هيه الشكل القديم استثناء الجنط مختلف
-رأىى الشخصى أن الجنط الجديد شكله أحلى بكتير من القديم.....كنت بحس القديم مرخص منظر العربية قوى.
* العربية من الخلف لايوجد اي اختلاف نهائي
-كلام سليم
* سقف العربية لايوجد به الباكتات الجلد الخاصة بتركيب عوارض التحميل او الشبكة يعني الي موجودة بالعربية الشكل القديم
-تم إستبدالهم بأربع أخرام قلاووظ سوف تجدهم فى إطار الباب العلوى الداخلى لتثبيت الشبكة.
* المراية الشمال فيه على الطرف الكيرف المنقط الي بيفرق بين اخر منطقة في المراية الي مقعرة والمراية العادية ودي كانت موجودة في مرايات الميجان والكليو ومش موجود الكيرف ده في الفلوانس الشكل القديم
-تمام.

2- بالنسبة للشكل الداخلي :
* الفرش نص جلد ونص قماش مع وجود اطار جلد ابيض على داير الكرسي ( مش حلو خالص )
-عندك حق 100% شكل الشريط الأبيض رخم جداً و مش حلو خالص.
* الفتيس والعصى الفتيس نيكل لامع ( جميل بس بيبصم مع الاستعمال )
-عندك حق و شكل العربية قلب شوية على يابانى جاى من الخليج :) :)
* الدركسيون هوه هوه القديم بس خياطة الجلد بيضاء و في اختلاف في الجلد في المنطقة الوسطى من الطارة مخرمة اكتر من باق الطارة ( لذيزة جدا بس الخياطة البيضة صعبة قوي وبتتوسخ بسرعة جد )
-أنا معاك فى نقطة الوساخة بسرعة بس بصراحة حسيت الطارة رياضية جداً بالخياطة دى....
* فرمل اليد مكسوه بالجلد والخياطة بيضة رضوا وزرار اليد نيكل وحوله اطار نيكل ( جميل بس الخياطة مشحلوة برضو )
-أنا معاك فى نقطة الوساخة بسرعة بس بصراحة حسيت الشكل رياضى جداً بالخياطة دى....
* القطعة الفضية الموجودة في الطالبلوا من الامام مستبدلة بواحدة سوداء لامعة مع خط نيكل في نهايتها وموجودة برضوا حول فتحات التكييف الجانبية ( لذيذة بس قفله لون الطابلو شوية )
-برضوا نيسان حطه بصمتها و عمله شغل عربيات الخليج....تطعيمات أبانوس بس للأسف مش بيليق على العربيات الفرنساوى قوى بس ماشى....
* لايوجد بجوار المايك مكان للنظارة في السقف لانه مش موجود الجزء الفبر الابيض الي مغطي المنطقة دي ( الشكل القديم احسن بكتير )
-أنا بصراحة مخدتش بالى من دى بس يا خسارة أنهم شالو جراب النظارة لأنه عملى جدا بصراحة....
* الباب الامامي يمين ويسار المقابض الفضية في الشكل القديم سوداء في الجديد ولا يوجد اطار فضي حول السماعات
-السماعات أعتقد فعلا مفهمش.....لكن الفئة الهاى لاين اللى أنا شفتها....أكر الباب نيكل لامع زى الفتيس كده
* الكاسيت مختلف فيه فتحة يو اس بي و جميل جدا
-و كمان فتحة aux
* زرار الانتظار اسود مش احمر
-تمام....مع أن الأحمر أوقع علشان يبقى سهل الوصول إليه
* الابواب الخلفية فيها تويترات جنب الاكر ( حلوة جدا ) ودي مش موجودة في الشكل القديم
-فعلا لأن النظام الصوتى أصبح ثلاثى الأبعاد 3d من شركة arkamys
* العدادات مختلفة طبعا ديجيتال بس بصراحة خيالني موضوع ان في رقم عمال يتغير طول ما انا سايق ( دي وجهة نظري برضوا خصوصا انه كبير اقوي )
-أنا شايف أن العدادات القديمة أجمل و أشيك....فعلا مش مستظرف الديجيتال خالص.....
* الباقي من الداخل هوه هوه القديم
3- الشنطة :
من جوه هيه هيه الشكل القديم
4- الموتور
* طبعا الموتور مختلف موتور نيسان مع فتيس cvt وتلاحظ الاختلاف عن العربية القديمة بمجرد متبدا تدور العربية طبعا صوت المارش مختلف وصوت الماكينة مختلف
* مفيش غطاء للكنترول بتاع العربية ولا خرطوم التهوية المبطط الي قدام البطارة في الشكل القديم ودي حاجة غريبة جدا

5- القيادة
* العربية طلعتها مختلفة طبعا بفضل ال5 قدرات الزيادة في الموتور والفتيس الجديد وناعمة في المشي ومتحسش بالغبار طبعا بس صوتها مش اوطى كتير من الشكل القديم على عكس تخيلي
-كلامك سليم....الغيار سلس جدا و مفهوش تروس و ده سبب عدم الشعور بالنقله خالص....أنا مبسوط جداً أنك بتقول أن الطلعه كويسه علشان ده كان موضوع مخوفنى جدا.....بالنسبة للصوت كويس جدا أنه أوطى من القديم و ده نجاح ساحق للموتور الجديد لأن للأسف على سير كاتينه معدن مش سير تقسيم كاوتش و ده كان المفروض يخلى صوته أعلى من القديم شويه...كمان الموضوع ده بيجاوب على نقطة حضرتك اللى تحت...
* مش عارف علشان انا واخد على صوت مواتير الرينو سواء في الكليو او في الميجان فمستغرب صوت الموتور النيسان على العربية ممكن اكون انا نمكي شوية بس هوه ده رايي
-سير كاتينه معدن و ليس سير تقسيم و ده اللى مخلى الصوت مختلف....حضرتك عندك كل الحق و شكلك ركيب رينو قديم......

العربية اجمالا جميلة جدا بس من وجهة نظري فيها بعض الحاجات مش عجباني كالتالي :
1- في جزئين بارزين في الاكصدام من الجناب تحت الفوجات شكلهم مش لطيف واظن انهم يتعرضوا للحك كثيرا اثناء الركن
-مظبوط
2- الفروق من جوه مش عجباني حاسس ان الطابلو مقفول وغامق قوي مع العدادات ذات الاضائة المبهرة دائما
-مظبوط
3- شكل الموتور وتقفيله مش كويس وحاسس ان في حاجة ناقصة اننا مش عارفها ( على فكرة ده موتور الفلوانس الخليجي من 2010 يعني مش جديد كليا والا حاجة هوه والطابلوه الديجيتال موجود بره مصر من 2010 وبعدة اشكال كمان
-تمام

4- الشريط الجلد الي على السقف فارق في شكل العربية عدم وجوده


5- عندي احساس ان فيه توفير شوية في المواد الداخلية بالذات مش عارف ليه
-طبعا أنا بصيت على الهاى لاين و محستش قوى الصراحة....يمكن فى الفئات الأقل الموضوع ده ظاهر أكتر....

في النهاية ده كان تقييم متواضع للعربية ولكل الافاضل ملاك الفلوانس الجديدة والقديمة علشان يعرفوا الفروق بس والعربيتن في منتها الجمال وربنا يدينا جميعا خيرها ويكفينا شرها

مشكور جدا على هذا التقرير الدقيق اللى كلنا أستمتعنا بيه.......

[Invensys2011]

و اخبار التكييف ايه؟؟؟نفس الشكل القديم

[Waleed_Fathy]

تسلم يا باشا علي التقرير
بس التكييف اخباره ايه ده مهم جدا؟؟؟؟؟؟؟؟؟؟؟؟؟؟؟

[aly_elhawary]

* المراية الشمال فيه على الطرف الكيرف المنقط الي بيفرق بين اخر منطقة في المراية الي مقعرة والمراية العادية ودي كانت موجودة في مرايات الميجان والكليو ومش موجود الكيرف ده في الفلوانس الشكل القديم

الكيرف المنقط موجود عندى فى الشكل القديم 2013

* زرار الانتظار اسود مش احمر
برده عندى إسود فى الشكل القديم 2013

ومشكور جداً على هذا التقرير المفيد

[wael-mohamed]

الف شكر للاخوة الاعزاء وده تقرير بسيط احاول افادة المنتدى المحترم الذي استفت منه كثيرا
بالنسبة للتكييف فتقريبا هوه هوه القديم محستش بفرق .
ونسيت حاجة اقولها لكم هي ان الفانوس الامامي اسود من الداخل من تحت وليس فضي كما ان الفئة e3 بها عدسات في الفوانيس وهذا غير موجود في الشكل القديم
الف شكر على تعليقاتكم مرة اخرى

[Ahmed Selim]

شكرًا عل نقل التجربة

دلوقتي انتوا بتقولو ان سير الكاتينة معدن بس على صفحة الصيانة على الفيس بوك هما كاتبين في صيانة ال 60 طقم الكاتينة و كاتبين السعر 740 جم.....ده نفس سعر الطقم بتاع الميجان اللي فيه سير الكاتينة الكاوتش

هل دي محطوطة غلط و لا ايه ؟

[MohammedAladel]

جايز يكون معملوش تحديث للبيانات بتاع الموقع .... تلاقيهم يقصدوا الشكل القديم بمحرك رينو