مشكلة يا رب تكون بسيطة

[تامر.محمد]

سلام عليكم

باختصار
فجأة البخاخات بتاعة الزجاج الامامي ما بتشتغلش (لكن المساحات بتتحرك عادي)

و الكاسيت لما بابطل العربية و اخرج الكارت و افتح الباب ما بيطفيش


يا رب تكون حاجة بسيطة

حد يعرف ده ايه ؟

[Hany Saad]

مش عارف ليه حاسس أن مفيش علاقه بين المشكلتين.....
البخاخات ده موتور موجود فى القربه و سمعت كتير قبل كده انه بيبوظ....الكاسيت صراحه معنديش فكره....
أن شاء الله تطلع بسيطه و تتحل على خير.....

[Land_Cruiser]

بالنسبة للبخاخات احتمال تكون القربه محتاجه تتزود مياه و شامبو زجاج او حتي مياه فقط فممكن تجرب حضرتك تملأها وتشوف ممكن يكون تراب و لا حاجه سادد الفتحات فجرب تملاها و تشغلها وربنا يسهل
بالنسبه لموضوع الكاسيت اعتقد انه ممكن يكون مشكله فيوز و هو اللي بيعمل كده و ان شاء الله بسيطه

[Ahmed Selim]

الرشاشات بتاعة الأزاز جرب تسلكها بسن دبوس

عملت معايا كده مرة و أفتكرت الموتور باظ......رحت لواحد أعمل صيانة و بقوله الرشاشات....و بص و بتاع....لقيتها أشتغلت :)

الكاسيت مش متأكد بصراحة.

[Hany Saad]

بالنسبة لموضوع الرشاشات انا استبعد بصراحه أن الاربعه يكونوا مسدودين تماماً فى نفس الوقت.....لكن لو عايز تقطع الشك باليقين و تعرف هو موتور و لا رشاشات.......افتح الكبوت هتلاقى خرطوم الرشاشات واصل ببعضه عن طريق حرف t أو وصله ماسوره بلاستيك موصله بين طرفين الخرطوم.......افصل الخرطوم فى هذه المنطقة و خلى حد يشغل الرشاشات و شوف لو الخرطوم نزل ميه يبقى الرشاشات مسدوده أما لو منزلش فده يبقى الموتور......برده بص على فيشه الموتور لو مهزوزة أو نازل عليها ميه و عامله عازل و فاصله الكهرباء......بالتوفيق أن شاء الله......

[dedo_ryo]

بص يا كبير انا شاكك في فيوز ال g
لان هو الحاجه الوحيده اللي بتجمع كل المشاكل اللي ظاهره لحضرتك
و ده مكتوب في وظايفه

[shawkylotfy]

بالنسبة لموضوع الرشاشات انا استبعد بصراحه أن الاربعه يكونوا مسدودين تماماً فى نفس الوقت.....لكن لو عايز تقطع الشك باليقين و تعرف هو موتور و لا رشاشات.......افتح الكبوت هتلاقى خرطوم الرشاشات واصل ببعضه عن طريق حرف t أو وصله ماسوره بلاستيك موصله بين طرفين الخرطوم.......افصل الخرطوم فى هذه المنطقة و خلى حد يشغل الرشاشات و شوف لو الخرطوم نزل ميه يبقى الرشاشات مسدوده أما لو منزلش فده يبقى الموتور......برده بص على فيشه الموتور لو مهزوزة أو نازل عليها ميه و عامله عازل و فاصله الكهرباء......بالتوفيق أن شاء الله......

الخرطوم دة نفسة كان مسدود قبل كدة كان الموتور شغال بس الخرطوم مش بيطلع مية روحت سلكتة بكمبروسر هواء رجع الوساخة للقربة تانى والبخاخات اشتغلت عنب ههههههههه

[تامر.محمد]

بالاضافة للحاجات اللي فاتت
اكتشفت النهارده كمان ان الكاسيت مرة واحدة كده و هو شغال راديو بيدي صفارة واحدة و يطفي !
و اكتشفت كمان ان لمبات الكومبريسور و السخان الخلفي مش بيشتغلوا , بس التكييف نفسه بيشتغل عادي

بكرة ان شاء الله اطلع على الكهربائي و انا راجع من الشغل

[dedo_ryo]

ده فيوز ال g راجع عليه الاول غيره بواحد من الاحتياطي قبل ماتروح يمكن يوفر عليك فتي الصنايعيه
و لو مصر تروح ياريت لو تسأله علي ان الانوار الخلفيه لوحده تحكم التكيف و الولاعه مش بتنور و ان شاء الله بسيطه

[kar!m]

متابع ...

[dedo_ryo]

أيه الاخبار يا كبير ياريت تطمنا علي ميجي

[تامر.محمد]

رحت النهارده للكهربائي و طلع فعلا الفيوز اللي وصفته بالظبط :)

انا مشتكر ليكم جدا جدا جدا :)

[kar!m]

الحمد لله انها جت في فيوز.

[dedo_ryo]

الف حمد لله علي سلامه ميجي و الحمد لله انها جت في هذا الفيوز
اوعي تقولي نسيت تسألهولي علي النور بتاع وحده التكيف
و خمسه جنيه للاستشاره ......... الدفع عند السكيرتيره اخر المنتدي شمال

[تامر.محمد]

نسيت للأسف :(
اسألهولك بكرة ان شاء الله

مع اني مش فاهم يعني ايه الانوار الخلفية بس ماشي