أرجو الأفادة معروض عليا ميجان 2008

[medo_molto]

السلام عليكم ياجماعة اولا احب اشكر المنتدى دا لانة بصراحة جامدا جدا ومفيد لكل الناس..... ثانى حاجة يارت حد يفدنى عشان انا مليش فى الميجان خالص بس بصراحة عجبانى وطالبة معايا اركبها ومعروض عليا ميجان 2008 عاملة 230 ألف كيلو بـ 74 ألف رشة اكصدامين ورفرف شمال واحد وبيقلى مفيش ولا لمبة عطل منورة والعربية حالتها كويسة عن كلامة عشان بيسافر كتير بالنسة للعداد ياترى العداد الكتير دا يقلق من حاجة ثانى حاجة مفيش توكيل اكشف عليها فى الغردقة كان فاتح وقفل لو كشفت عند اى حد بتاع كمبويتر عادى واكون شاكر لرد حضرتكم ولو عوزنى ابعد عن العربية بردو عرفونى يارجالة

[airfox]

هي طبعا عدادها كبير بس ده مش معناه ان حالتها وحشه لو مفيش توكيل قريب اكشف كمبيوتر عند اي حد و بعدين ارفعها في البنزينه و شوف حالة العفشه ؟ اما بالنسبه للسعر فبسبب العداد لازم يقل يشويه و برده هي انهي فئه يعني لو الفئه الاولي اعتقد من 68 الي 70 يبقي سعر مناسب ليها وموضوع العداد ده فبصراحه في ناس مش بتحب العربيه اللي بعداد كبير و في ناس تانيه لو حالة العربيه كويسه هتكبر دماغها منه

[medo_molto]

اولا شكرا ياباشا لاهتمامك بجد.... تانى حاجة هى الفئة الثانية مثبت سرعة و8 ايرباك وجنوط نيكل واوكر نيكل وطارة فانكشن ومن غير فتحة سقف .... معلش ياباشا ابص على العفشة ازاى انا مش هفهم لو رفعت العربية ولا اوديها لحد بتاع عفشة

[airfox]

في البنزينه في واحد متخصص بتاع عفشه و بيرفع العربيه و هتشوفها كلها من تحت الاساس بتعها و العفشه يعني لو واخده خبطه من تحت هيبان كله لما يترفع و هما في البنزينه هيجربوا المقصات و الكابلم و كل الاساسيات المهمه و هيقولك عليها بس روح الصبح و خليك واقف مع الرجل و هو بيكشف علشان تشوف بعينك و اعتقد ان سعر يبقي بين 69 و 71 علشان الفئه التانيه بس العداد دايما هيقلل في سعر العربيه حتي لو حالتها حلوه و ربنا يوفقك ان شاء الله

[تامر.محمد]

مش هاعترف بصراحة الا بكشف التوكيل
حرصا على فلوسك

[karezzzma]

عدادها كتير اوووى

[lad]

شوف بنزينة شل بيبقى فيها فحص سيارات و ناس خبيرة ممتازين اوى بس مش عارف فيه عندك ولا لأ ونزل فى سعرها لأن عددها كتير اوى اوى

[abdo_2812]

ماتجيبهاش ياكبير :)
ولو طالبة معاك أوي ماتدفعش أكتر من 63000 مثلاً (وده علشان الأسعار عالية عامة اليومين دول)، وحط في حسابك انك هاتصرف عليها شوية
العداد العالي فعلا مش معناه إن العربية وحشة، ولكن معناه انتهاء العمر الافتراضي لأجزاء استهلاكية كتير في السيارة

معناه مثلا إنه حساسات هاتبدأ تبوظ وتحتاج تتغير وبعض الجوانات المعتاد تغييرها زي جوان كارتير الزيت وسويتش ضغط الزيت وحاجات من دي خفيفة بس لو تجمعت هاتبقى مكلفة كمان الله أعلم بحالة طلمبة البنزين وهل فيه تسريب زيت في الموتور ولا لأ (دي الحاجات اللي تصليحها مكلف وماتعيبش العربية)، يعني أنا بافترض معاك إن العربية نضيفة فعلاً

تنبيه أخير لمبات الأعطال لا تدل بالضرورة إن كل الحساسات شغالة أو مفيش أي مشاكل ... لازم تكشف كشف كامل بالجهاز وتصفر رسائل الأعطال اللي فيه وتكشف تاني علشان يظهرلك ايه الأعطال اللي لسه مستمرة أو حالتها (Active)
ولازم كشف جيد جداً على حالة الموتور مع الكيلو متر العالي ده ... يا ريت تقدر تعمل اختبار الكبس وتكشف جيداً على تسريب الزيت وحالة العفشة بالكامل ... يفضل التوكيل لكن مش شرط أوي يعني لو تعرف حد شاطر جدا وبيفهم في العربية

وزي ما قلتلك فوق، بشكل عام لا ينصح بشراء السيارة لو كنت ناوي تخليها معاك مدة طويلة لأنها ببساطة أصبحت مستهلكة بنسبة كبيرة زي ما وضحتلك
وأي مساعدة احنا تحت أمرك

[medori]

السلام عليكم ياجماعة اولا احب اشكر المنتدى دا لانة بصراحة جامدا جدا ومفيد لكل الناس..... ثانى حاجة يارت حد يفدنى عشان انا مليش فى الميجان خالص بس بصراحة عجبانى وطالبة معايا اركبها ومعروض عليا ميجان 2008 عاملة 230 ألف كيلو بـ 74 ألف رشة اكصدامين ورفرف شمال واحد وبيقلى مفيش ولا لمبة عطل منورة والعربية حالتها كويسة عن كلامة عشان بيسافر كتير بالنسة للعداد ياترى العداد الكتير دا يقلق من حاجة ثانى حاجة مفيش توكيل اكشف عليها فى الغردقة كان فاتح وقفل لو كشفت عند اى حد بتاع كمبويتر عادى واكون شاكر لرد حضرتكم ولو عوزنى ابعد عن العربية بردو عرفونى يارجالة

العربية ماشية كتير اوى الحقيقة، حتى لو سفر، بس دة كلة استهلاك للعربية!!! و كمان 74 الف كتير على العداد دة، انا شايف من تدويرى ان اخرها 65-67 و تبقى كارموة فيها كمان

الكشف لازم يكون فى التوكيل او مركز خدمة، حوار البنزينه دة ميكلش مع الميجان او مع العربيات اللى فى الcategory دة عموما، و دة عن تجربة عشان انا اشتريت كدة و كان فى حاجات فى العربية معرفتهاش و لما جيت بعت اللى هيشترى كشف عليها عند ميكانيكى ميجان جامد فى الحرفيين، المفروض عارف الميجان كويس، و معرفش الحاجات اللى فى العربية و انا اللى قولتلة عليها، الكمبيوتر بس مش كفاية برضة عشان ممكن تشيل الerror log بكل بساطة

الملخص التوكيل او مراكز الخدمة عشان تبقى فى الامان، اللى اعرفة ان فى مركز خدمة فى الغردقة

[medori]

فى مركز خدمة فى الغردقة موجود على الموقع بتاع renault egypt

El Gameel Cars Center Airport Road - El Hegaz st., El Dahhar Service 065 355 40 10 /20
Renault Network

[وائل مختار]

بلاش منها خالص يا باشا لان عدادها كتير اوى يعنى مش هتخدم معاك كتير وكل شويه هتحتاج تغير حاجه فيها اصبر شويه وهات حاجه عدادها قليل افضل

[Ahmed Amin]

بلاش منها خالص يا باشا لان عدادها كتير اوى يعنى مش هتخدم معاك كتير وكل شويه هتحتاج تغير حاجه فيها اصبر شويه وهات حاجه عدادها قليل افضل

+111
متفق مع الكلام دا ١٠٠٪
كمان انت بالسعر دا تجيب حاجة عداد اقل ومش هتحتاج شغل كتير قريب. ولا تلاقي حاجة مستخبية بعد ما تشتري.

[medo_molto]

انا بصراحة بعد كلام الرجالة دا انا صرفت نظر عن العربية وهشوف واحدة تانية يكون عددها صغير وبجد شكرا يارجالة لردكم وافادتكم وان شاء الله نستفاد اكتر واكتر منكم :)