مشكلة فى تكييف الميجان

[abdelshafy85]

انا عندي 2005 بانوراما وفى مشكلة فى التكييف
انا لما بشغل التكييف (على 15 ) وفى أقل من نص ساعه حرارة العربيه بترتفع جدا وبتوصل لأول شرطه في الثلاث شرط الأخارى (مع ان الوضع الطبيعي انه بيبقى قبل نص العداد) والتكييف بيقلب ساخن جدا بعد كده. وبقفله عشان حراره الجو بره ارحم، بعد 5 دقائق بترجع درجة حرارة المحرك لوضعها المعتاد،
وال rpm بيعلى ويوطى بصورة متكررة , تقريباً الكمبرسور بيشتغل ويفصل

هل من نصيحة

[aldesha989]

شغل التكيف وبص على المروحتين او المروحه شغاله بالسرعه التانيه ولا لا

[shawkylotfy]

خلى باللك كدة العربية تجيب وش سلندر اتاكد ان السرعة الثانية بتاعت المروحة شغالة ونضف السربنينة الى قدام الراديتير ممكن تلاقى عليها طين سادد الهوا وتاكد ان مستوى المية فى القربة سليم وبعد كدة وانت مشغل التكيف لو لقيت الحرارة عليت عن النص سنة صغيرة اطفية على طول علشان وش السلندر خلى باللك

[tefa_adf]

انا كان عندي نفس المشكلة ، اول حاجة اتاكد من السرعة التانية للمروحة اللي بتشتغل مع التكييف، لو شغالة روح لبتاع ريداتيرات نظف الريداتير كويس، انا كانت بتعمل كعايا كده واما نظفت الريداتير ودارة التبريد بالكامل المشكلة اختفت

[odod]

كان عندى نفس المشكلة وفعلا لقيت ان المروحة مش بتشتغل مع التكييف لازم كهربائى يشوفها وانشاء الله خير

[medori]

اعتقد انك لازم تنضف السربنتينة كويس عشان لو كانت السرعة التانية بتاعت المروحة مش شغالة كانت هتسخن معاك فى المشى العادى فى الحر اللى احنا فية دة من غير تكييف

[abdelshafy85]

يا جماعة ربنا يجزيكم خير جميعاً ومتشكر عالردود.

انا نويت بعد شوية بحث فى المنتدى انى أعمل موضوع الغاء الساخن من التكييف وهعمل تنظيف كامل لدورة التكييف ودورة التبريد وأنضف الردياتير ومياه الردياتير . وكمان كان عندى تسريب فى الكوعة بتاعة مية التبريد وكنت عند أحمد المصرى فى صقر قريش قالى ان الكوعة كلها عاوزة تتغير وكان عنده واحدة استيراد قالى هتتكلف حوالى 500 بالمصنعية , بس أنا لما بصيت فى المانوال لقيت ان فى سيل جواها وقلت ممكن يكون عاوز يتغير عشان بصراحة مستخسر ال500 جنيه فى الكوعة ,

انا كلمت فرنش موتوز لما عرفت انهم بيعملوا موضوع الغاء الساخن فقالى انه هيتكلف حوالى 200 أو 250 جنيه بالتنضيف شحن الفريون لو شحنة كاملة 400 لو نص شحنة 200.


مش عارف الاسعار دى كويسة ولا غالية وهل ممكن أروح لواحد بتاع تكييف يظبطلى قصة التكييف دى كلها ولا ممكن يبوظلى حاجة . وبرضه فكرت أروح لواحد بتاع ردياتير يظبطلى الدنيا بس قلقت شوية برضه انه ميكونش فاهم فى الميجان, ولا هيا زيها زى اى عربية مش محتاجة ؟

[gawad_ahmed]

انا عندىمشكلة العربية بتسحن مع التكيف بس
ازاى اعرف ان السرعة الثانية شغاله
وكمان لو فى ميكانيكى كويس ممكن رقمه واسمه
شاكر جدا