تخبيط في دركسيون الفلوانس

[Tarek1]

السلام عليكم يا شباب,

أنا معايا فلوانس 2013 عامله 7500 كم. و بحس بتخبيط بسيط في الدركسيون مع بعض المطبات خصوصا المدقات.زي ما يكون الدركسيون مش ثابت مع اني اتأكدت انا ال lock بتاع الدركسيون مقفول كويس. رحت التوكيل بتاع القطامية و المهندس قالي مفيش حاجه زي ما كنت متوقع. و طلبت انه يجرب العربية معايا و ساقها كتير و كنت حاسس بالخبطة و لكن بردو قالي مش باين حاجه.

يا تري يا شباب حد عنده فكرة عن المشكلة دي؟ و ممكن تكون ليه؟ و ايه العمل مع التوكيل ده؟ ازاي أخذ حقي؟

و لكم جزيل الشكر.

[jojojojo]

ان شاء الله بسيطه ممكن بس تكون محتاج تربيط لعلبه الدريكسيون او رجلاش ليها ان شاء الله بسيطه وعامه بتبقي في العربيات الزيرو الحاجت ديه والتوكيل بيظبطها في الصيانت الدوريه ابقي بلغ بس المهندس يربط علبه الدريكسيون ولو محتاجه رجلاش يعمله والف مبروك

[fahd_628]

اى عربية حتى لو جديدة بتعمل صوت خبطة او هبدة لو اخدت مطب جامد بسرعة

و عادى جدا ان الدريكسيون يجى شوية يمين و شمال بحركة بسيطة فى المطبات

[Tarek1]

شكرا للردود.

أن شاء الله هاطلب موضوع الرجلاش والتربيط ده في الصيانه الجايه.

لكن بالنسبه للصوت هو مش مع المطبات الجامده بس. هو مع المطبات الحاده حتي لو صغيره. زي مثلا لو في تكسير في الاسفات بعرض الشارع.

[dr_ahmed80]

استاذ طارق
كنت حابب اسأل حضرتك عن تقسمك للعربية عامة انا حاجز واحدة 2013 الشكل الجديد الفيس ليفت

[Tarek1]

استاذ طارق
كنت حابب اسأل حضرتك عن تقسمك للعربية عامة انا حاجز واحدة 2013 الشكل الجديد الفيس ليفت

العربية عموما كويسه. ملاحظاتي عليها أن تكيفها مش قوي زي الياباني اللي كانت معايا. بس ده أمر نسبي لان أنا بحب التكييف القوي و في ناس مش بيفرق معاها الموضوع ده أوي. ثانيا الموتور كان محتاج يكون أقوي شويه و أعتقد الفيس ليفت هتكون ان شاء الله مافيهاش المشكله دي علشان الموتور الجديد. في صوت عندي في التابلوه بيظهر مع المطبات بس دي مش حاجه مهمه عند كل الناس.

في معادا ذلك العربيه ناعمه جدا وعاليا عن الأرض و واسعه فعلا و صاجها ثقيل (غير الياباني) فاخمه من جوه و فيها أوبشنز كتير جدا. تحس بشياكه الفرنساوي.

بالتوفيق أن شاء الله.

[kar!m]

اتأكد برضه من ضغط الهوا في الكاوتش و يفضل انك تحط نيتروجين.

[mbisar]

استاذ طارق
كنت حابب اسأل حضرتك عن تقسمك للعربية عامة انا حاجز واحدة 2013 الشكل الجديد الفيس ليفت

هو حضرتك تستلم امتى .. انا كمان حاجز و المفروض الأستلام على اول شهر 9 .. يا ريت لو حضرتك استلمت ابقا قولنا ايه رأيك يعنى ابقا طمنى ..

[hugan]

اللي عند حضرتك ده اسمه نقر في الدركسيون
والعيب بيكون من عمود الدركسيون فيه بوش
ياريت تبلغهم في التوكيل با لمعني ده

[Tarek1]

اللي عند حضرتك ده اسمه نقر في الدركسيون
والعيب بيكون من عمود الدركسيون فيه بوش
ياريت تبلغهم في التوكيل با لمعني ده

اولا شكرا على مرورك،

هو العيب ده معروف؟ و ياترى التوكيل المفروض يعملى ايه علشان يعالجه؟ اقصد مثلا يغير القطعه اللى بايظه ولا ممكن يستهبل و يخرطها مثلا او يحشيها!

انا بروح توكيل القطامية، ايه رأى حضرتك فيه؟ فى ناس قالوا ان فرينش موتورز الرحاب كويسين.

شكرا و عذرا على الاطاله،

[hugan]

اولا شكرا على مرورك،

هو العيب ده معروف؟ و ياترى التوكيل المفروض يعملى ايه علشان يعالجه؟ اقصد مثلا يغير القطعه اللى بايظه ولا ممكن يستهبل و يخرطها مثلا او يحشيها!

انا بروح توكيل القطامية، ايه رأى حضرتك فيه؟ فى ناس قالوا ان فرينش موتورز الرحاب كويسين.

شكرا و عذرا على الاطاله،

ياباشا انا مش من ملاك فلونس
لكن انا باوضح العيب الموجود عندك
هو عيب موجود في بعض موديلات اسبرانزا
اعراضه بالضبط
عند السير علي المدقات والطرق المكسره الغير متسفلته والارض الغير ممهده مليانه زلط يعني
بتحس بنقر او تخبيط اسفل الدركسيون
العيب ده موجود زي ماقولت في بعض موديلات سبرانزا
وتوضيحه ان عمود الدركسيون بيكون فيه صليبه زي بتاعت الكردان في عربيات الجر الخلفي
الصليبه دي لو فيها بوش بتعمل النقر اللي حضرتك بتسمعه
علاجه بيكون اما باستبدال العمود
ده حقك لان العربيه تعتبر زيرو
او العفشجي بيعمل كبس للصلايب لمنع البوش
وطبعا الكلام ده ما ينفعش مع عربيه جديده
علشان كده حبيت اوضح لما تروح التوكيل يكون كلامك محدد ليهم
علشان ما يتوهكش
وفي الاخر العيب ما يتصلحش

[ahmed salah zi]

انا عندي نفس المشكله ...رحت العبور و ابو رواش و كلهم بيحاولوا يقنعوني ان ده طبيعي .......جربت لانسر و نيسان ملقتهمش كده .... (انا عربيتي الشكل الجديد ) في الارض المكسره بحس بخبط في الدركسيون و لما بكون علي ماشي بسرعه في اسفلت مش مستوي بحس برنه في الدركسيون و التابلوه قدامي .....بفكر الجأ لحمايه المستهلك بس خايف يكون دي طبيعه العربيه ....المشكله دي اما عمود الدركسيون او الاسكاتره في العليه

[Hany Saad]

أنا هحاول أفكر معاكم بصوت عالى....
أولا أتأكد أن الكاوتش عندى ضغطه مضبوط
ثانيا أستبعد إحتمالية أن الصوت ده يكون جاى من تفعيل الabs أو ال ebd لأن تأثيرهم عبارة عن ضربات متتالية فى بدال الفرامل و الدريكسيون

لو تم إستبعاد أولا و ثانيا يبقى مش فاضل غير ثالثا و هو تغيير عمود دريكسيون.
طبعا المشكلة دى كانت موجودة فى ميجان ii و مسمعتش عنها فى الفلوانس لكن كل شىء جايز
التوكيل كويس و بيصلح فى الضمان و بغير و لكن:::::::::::::

لازم تبقى عارف كويس الصوت جاى منين......أوعى تروح تقولوا انا سامع صوت من الناحية الفلانية أو من الحتة دى لأنه فى جميع الأحوال مش مممممممكن هيعرف الصوت جاى منين و عن تجربة سنين.....لازم تروح ومعاك العيب و خصوصا موضوع الأصوات.......
طبعا هيحاول لو لقاك مش فاهم أو أن العيب كان مكلف و مش منتشر فى عربيات كتير زى العيب بتاع حضراتكم ده انه يقولك الدنيا تمام و عادى.....أثبت مكانك و فهمه أنك فاهم انت بتقول ايه بكل ذوق

طيب نتأكد إزاى.....وحجز ميعاد و نطلع على التوكيل و نقول ده عمود دريكسيون فيه مشكلة و عايز تغيير.... و لمزيد من التأكيد نطلب نجرب عربية أخرى جديدة و أنا سامع أن فيه لوط جديد وصل يعنى هتلاقوا عربيات تجربوها.....قالك مفيش عربيات ....يبقى تستأذن حد من العملاء اللى جايين يعملوا صيانة و تجرب عربيته.....طلع مفيش صوت و هو متوقع هتلاقى التوكيل غير العمود فى ثواني .......

موفقين و طمنونا بالجديد و إن شاء الله الصوت يتخفى بعد التغيير......

[ahmed salah zi]

انا عايز اعرف بس هو ده عيب في صناعه الموديل ده ...بمعني انه لو غير العمود هيرجع العيب تاني ...(.زي الاسبيرانزا )و في الحاله دي مفيش داعي اهلك نفسي مع التوكيل لان مش هيبقي في ايديهم حاجه و لا ده عيب في عربيتي بس و ممكن اصلاحه بتغيير عمود الدركسيون

[Hany Saad]

لأ يا أفندم مش عيب شائع فى العربية بدليل عدم ظهوره عند أغلب ملاكها......لو فعلا كان هو ده العيب لأن حتى الأن مش متأكدين..... بمجرد تغييره سوف يتخفى العيب تماماً و لن يعود مره أخرى.