استفسار قبل شراء فلوانس

[foxy_moody]

السلام عليكم يا رجالة الفلوانس
انا بدور علي فلوانس كسر زيروو 2011 ..كنت عايز اسال كام سؤال كده

عن مكان التوكيل للكشف علي السيارة وكنت عايز اعرف اية المهم الي اركز علية في الكشف وهل هما في التوكيل بيكشفوا بضمير ولا هيطلعلي فيها القطط الفاطسة عشان اغير الاجزاء الي هيقول عليها وانفعهم

وياريت اعرف الضمان بالنسبة لموديل 2011 ينتهي امتي ولو بالكيلو متر لحد كام ...وازاي اعرف فئة السيارة E3 E3s ؟

ولو ضمان السيارة منتهي وظهرت عيوب زي الي سمعت عنها بتاعة طرمبة البنزين والتارة الي بتقشر وتغير الريداتير والكلام ده هل هغيرو علي حسابي (وطبعا سعرة عالي )

وبصراحة انا قلقان من الحاجات البتبوظ فجئة المفروض ان العربية فرنساوي يعني الحاجات دي معمرة عمرها متبوظ

ارجوكي حد يطمني !! وسعر الفلوانس 2011 E3 بكام دلوقتي ..وكت عايز اسئل علي قطع الغيار هل مقابل انها غالية معمرة و لا كل شوية اغير التيل والكلام ده

افيدونيي رجالة الفلوانس

[hamaka]

اللى أسمعه عن العربية انها ممتازة بكل ما تحمله الكلمة من معنى و بتاخد مميزات بكل قرش بتدفعه فيها ، مشوفتش حد معاه العربية الا و مبسوط بيها جداً حتى العيوب اللى فيها (و لازم كل حاجة يكون فيها عيب ، الكمال لله وحده) بسيطة و مش بتظهر مع كل الناس...

[mbisar]

1- بالنسبه لمكان التوكيل انا من اسكندريه فالتوكيل فى العامريه على الطريق الصحراوى بالنسبه للقاهره معرفش اكيد حد حيفيدك
2- بالنسبه للكشف نوعين نوع على الميكانيكا و نوع على الميكانيكا و السمكره و الدوكو وده اغلى حاجه بسيطه و من ناحيه الضمير فهما عندهم ضمير متقلقش من توكيل رينو كل الناس بتشكر فيه
3- بالنسبه للضمان معرفش بس تقريبا 3 سنين او 100 الف كيلو متر ايهما اقرب
4- الفئه الثانيه اتوماتيك e3 و الثالثه اتوماتيك e3s تزيد فتحه سقف
5- لو ضمان السياره منتهى اكيد اى حاجه هتكون على حسابك بس عامه متقلقش نفسك يعنى العربيه مش مسمعه ان فيها عيوب خطيره
6- سعر الفلونس 2011 e3 هيكون فى حدود 115 الف الى 120 الف حسب الحاله و حسب المسافه المقطوعه
7- الرينو ميضحكش عليه .. تحط قطعه الغيار الأصليه تعيش معاك تجيب حاجات متقلده هتعذبك و كل الأوروبى على نفس الوضع و قطع غيارها بالنسبه للعربيات اللى فى نفس الفئه تعتبر سعرها كويس و معقول
8- عامه انا مش معايا فلونس انا حاجز فلونس الجديده و مستنى بس زى ما تقول كده انا مهتم بالعربيه دى من زمان فاعرف عنها شويه فقولت افيدك بالى اعرفه .. و ربنا يرزقك العربيه اللى نفسك فيها عن قريب ان شاء الله

[foxy_moody]

شكرا للعضو mbisar و hamaka

بس ياريت ملاك الفلوانس يطمنوني اكتر ورابطة حائزي الفلوانس بقيادة استاذ bukla

[shadyawad]

على فكره التوكيل بيبيع عربيات مستعمله بتبقى اغلى شويه بس اعتقد هتبقى اضمن
ودي نمره مدير المستعمل هناك أستاذ / أحمــــد طعيمه 01001675136

[Hany Saad]

أماكن الكشف فى القاهرة هى أبو رواش و المقطم و فيه كمان ورش معتمدة زى فرنش موتورز فى الرحاب
الأسكندرية فى العامرية و سموحة

طبعا التوكيل علشان يخلى مسؤلية لازم يكتب كل حاجة شايفها أو شاكك فيها فى الكشف مش علشان حضرتك هتغيرها عنده و لكن علشان يخلى مسؤولية من الشارى

ضمان السيارة ٣ سنين أو ١٠٠ ألف كيلو أيهما أقرب....بعد هذه المدة و لو حضرتك كنت عامل صياناتك الدورية فى التوكيل بيعملوا فى المشاكل المعروفة زى طارة الدريكسيون مثلا حاجة أسمها good will و هى أن العميل بيتحمل جزء و هما بيتحملوا جزء.

هذا الموديل بالذات مبنى على السيارة السامسونج ال S3 لذا به الكتير من القطع الكورية و كمان شراكة نيسان مخليه فيه كتير من القطع اليابانية و علشان كده بيمتاز بالأعتمادية العالية......أعطال بسيطة جداً و غير متكررة إلا بعض المشاكل نتيجة عيوب موردين زى طارة الدريكسيون و عوامة البنزين و أكيد سوف يتم تفاديهم فى اللوطات القادمة.

قطع الغيار سعرها زى أى عربية فى نفس الفئة السعرية أقل أو أعلى حسب القطعة و هى إعتمادية جداً و لكن أسعار المصنعيات مبالغ فيها بعض الشيء لذا وجب فحص الفاتورة بدقة و مناقشتهم فى أى سعر مبالغ فيه

أختيار جيد و ربنا يوفقك فى سيارة حالتها نظيفة

[حسام فتحى]

ال E3s تزيد عن E3 فتحه سقف و سنسور للركن خلفى