تقرير بالتفصيل الممل عن الفلوانس 2014

[ramymechanics]

بسم الله الرحمن الرحيم
مبدئيا كدة نسمع الصلاة على النبى منكم يا رجالة ... الحمد لله عربيتى فلوانس 2014 اللون موكا عاملة 250 كيلو لسه ... هتلاقونى كتير فى التقرير بقارن بينها وبين عشرة العمر الصنى 2009 وكمان فى حاجات كتير لسة مكتشفتهاش فى العربية فلو اكتشفت حاجة جديدة هوافيكم بيها فورا

بسم الله نبدأ بالشكل الخارجى .. العربية طبعا الفيسليفت الجديد ودة شكلها




الشنطة ما شاء الله واسعة جدا بس مدخلها هو اللى ضيق شوية لكن هى كحجم كبيرة جدا

شكل الجنوط وباين فيها طول العربية

أول ما تركب العربية تحس فيها فعلا بفخامة التقفيل الأوروبى دة طبعا بلإضافة لريحة الفابريكة اللى لا يعادلها شئ الحمد لله

صورة جانبية

التابلوه
h
التابلوه اضاءته مبهرة فعلا وطبعا منور بالنهار وبالليل ومش مرتبط بالفوانيس .. التابلوه فيه لوحة عداد سرعة ديجيتال وعداد rpm عادى وشاشة الكمبيوتر اللى على اليمين دى ممكن تغير فيها كذا قايمة منها معاد تغيير الزيت الأقرب واستهلاك البنزين المتوسط لكل كيلو والمسافة المقطوعة من آخر reset واستهلاك البنزين من آخر تفويلة وكمان البنزين اللى معاك يمشيك اد ايه حسب متوسط الأستهلاك الحالى

الطارة Multi function بالنسبة لمحدد السرعة ومثبت السرعة وباين فيها الخياطة والجلد

قعدة السائق ما شاء الله مريحة جدا والكرسي بيتحرك لفوق وتحت بالإضافة لتعديل وضع ظهر السائق والكنبة ورا مريحة جدا وواسعة جدا


دى صورة الدراع اللى ورا الطارة وقدام دراع المساحات ودة اللى فيه تحكم الكاسيت والتليفون كله



دى صورة التابلوه اللى فيه التكييف والكاسيت


شاشة عرض الساعة ودرجة الحرارة الخارجية وهى نفسها شاشة عرض الكاسيت
شكل عصا الفتيس والهند بريك جلد بخياطة بردو

درج التابلوه واسع جدااااا بس الصراحة لسة مكتشفتش فيه ثلاجة ولا لأ


مسند يد السائق وفيه التحكم فى المرايات وضم المرايات وبالمناسبة هى ضم ذاتى مع الريموت وكمان غلق الزجاج والتحكم فى زجاج الأربع أبواب
الباب مطعم بالجلد فى اماكن كتيرة منه ودة بيديه طابع فخامة جميل جدا


فتحات التكييف مطعمة بحلية بتديها شكل شيك جدا وتحتها التحكم فى مستوى الإضاءة عشان لو العربية محملة ترفع الفوانيس شوية عشان تكسفلك الطريق



إضاءة الصالون ممتازة جدا ... إضاءة أمامية وخلفية وفى الشماستين بتشتغل مع غطا الشماسة

العربية بتيجى بستاير خلفية على البربريز الخلفى والزجاج الجانبى الخلفى من الناحيتين

دة دراع المساحات والزراير اللى فيه فى الجنب دى اللى بتتحكم منها فى كمبيوتر المعلومات اللى فى التابلوه

http://nileup.com/up/watermark.php?s...156031.png&p=c

الفرش جلد على قماش زى ماهو باين فى الصورة وتحس فيه فعلا بجودة الخامات والفخامة


http://nileup.com/up/watermark.php?s...560410.png&p=c

المميزات (فى نظرى لا تعد ولا تحصى مقارنة بحبيبة قلبى وعشرة العمر الصنى):
أولا : air bags طبعا و abs
ثانيا: جودة تقفيل وخامات تحفة وفخامة وحبة أوبشنز دلع زى البلوتوث ومحدد ومثبت السرعة وحساس المطر وتعديل وضع الكراسي وطى الكنب الخلفى وسمارت كى (هتلاقيه باين تحت الكاسيت ومش لازم تحطه فى المكان دة عشان العربية تشتغل يكفى يكون فى جيبك عشان العربية تدور بالضغط على زرار ستارت
ثالثا: الباور وانت واقف مكانك ملوش وصف غير ميييييييية يعنى تلف الطارة بصباعك الصغير اول ما بتجمع سرعة تحس انها تقيلة وفى مقاومة فيها
رابعا: استهلاك البنزين انا شايفه ممتاز حتى اللحظة مقدرش اقول رقم محدد بس العربية اتفولت فى البنزينة اللى جنب معرض الطارق فى اكتوبر وراحت الرحاب ورجعت المريوطية وراحت الرحاب تانى وبعدين مدينة السلام ورجعت الرحاب والتانك مجابش النصف تقريبا طبعا مشوار زى دة فى الصنى كنت فولت مرتين تقريبا
خامسا: العربية عالية عن الأرض وكمان مش بحس بمطبات نهاااااائى ما شاء الله ناعمة جدا جدا .. الصنى كانت بتهبد فى المطبات جامد

العيوب:
أولا: الشنطة وتانك البنزين مش بيفتحوا من الكابينة عيب رخم
ثانيا: الشنطة اما بتقفل لازم تهبدها شوية
ثالثا: الحتة اللى حوالين علامة الرينو قدام فبر مش صاج
رابعا: الاكصدامات دهانها مش حلو أوى لأن واحدة حكتنى فى الأكصدام الورانى حكة بسيطة جدا لقيت جزء بسيط من الدهان اتقشر

بس فى المجمل أنا سعيد جدا بيها ولله الحمد وحاسس انها تستاهل كل ربع جنيه أتدفع فيها ... شوفوا انتو بقا ال 172 ألف فيهم كام ربع جنيه

طلب صغير من كل واحد يقرا التقرير دة يدعيلى بالبركة والخير فيها وفى العموم كمان ولو فى اى استفسار عندى أجابته مش هتأخر ومعلش التقرير اتعمل على عجل

[ramymechanics]

نسيت أقول ان أحد أرخم العيوب من وجهة نظرى أن التابلوه فى أماكن كتير فبر خصوصا الحتة اللى فوق العدادات يعنى لو اتخربشت او حد اتعافى عليها ممكن يحصل لها عاهة مستديمة لكن العربية كصاج وأبواب محملة وممتازة جدا ما شاء الله ... وعيب كمان أن الستارة اللى على البرابريز الخلفى بالليل بتعوق الرؤية خصوصا ان مراية الصالون صغيرة حبتين ... كان ممكن يخلوهم فاميه بدل الستاير بس معلش نعديها المرة دى

[Silent~Dream]

الف مبروك يا باشا و ربنا يديلك خيرها و يكفيك شرها

[ALshahba]

تقرير جميل جدا
ربنا يباركلك فيها ...... الف الف مبروووووك

[m7mdwagih]

Congratulations great car and great review thanks

[m7mdwagih]

Does it have esc or esp

[Al-Farooq]

ربنا يبارك لك فيها ويعطيك خيرها ويكفيك شرها.

[محمد سيدو]

الف مبروك يا باشا بس انا مش فاهم موضوع تنك البنزين يعني انت لازم تنزل تفتحه بالمفتاح اصل انا قريت قبل كده انه بيفتح مع السنتر
هي العربيه تقفيل ايه ؟

[ahmedelfeky]

ألف مليون مبروك يا بشمهندس رامي وربنا يمليهالك بركه ويباركلك فيها ويكفيك شرها وان شاء الله هتستمتع بيها بس بقولك ايه دي لازملها طلعه شرم او الغردقه بعد ماتعدي 1000 كيلو عشان تستمتع بالاوبشنز بتاعتها

العيوب:
أولا: الشنطة وتانك البنزين مش بيفتحوا من الكابينة عيب رخم

بص يا سيدي تانك البنزين مش مهم يفتح من جوه العربيه لانه مع السنتر فانت ببساطه اول مابتقف تفول تبطل العربيه وتضغط علي الزرار اللي تحت زرار الانتظار هيفتح السنتر ومعاه غطا التانك الشنطه عندك حق هي رخمه

ثانيا: الشنطة اما بتقفل لازم تهبدها شوية
ثالثا: الحتة اللى حوالين علامة الرينو قدام فبر مش صاج
رابعا: الاكصدامات دهانها مش حلو أوى لأن واحدة حكتنى فى الأكصدام الورانى حكة بسيطة جدا لقيت جزء بسيط من الدهان اتقشر

دي برده عندك حق فيها اقل حكه في الاكصدام بتطلع الدهان وش والموضوع ده كان مزهقني بس يارب البودي بتاع العربيه مايكونش زيه

بس فى المجمل أنا سعيد جدا بيها ولله الحمد وحاسس انها تستاهل كل ربع جنيه أتدفع فيها ... شوفوا انتو بقا ال 172 ألف فيهم كام ربع جنيه

طلب صغير من كل واحد يقرا التقرير دة يدعيلى بالبركة والخير فيها وفى العموم كمان ولو فى اى استفسار عندى أجابته مش هتأخر ومعلش التقرير اتعمل على عجل

[/B][/SIZE][/COLOR][/QUOTE]

[ahmedelfeky]

نسيت أقول ان أحد أرخم العيوب من وجهة نظرى أن التابلوه فى أماكن كتير فبر خصوصا الحتة اللى فوق العدادات يعنى لو اتخربشت او حد اتعافى عليها ممكن يحصل لها عاهة مستديمة لكن العربية كصاج وأبواب محملة وممتازة جدا ما شاء الله ... وعيب كمان أن الستارة اللى على البرابريز الخلفى بالليل بتعوق الرؤية خصوصا ان مراية الصالون صغيرة حبتين ... كان ممكن يخلوهم فاميه بدل الستاير بس معلش نعديها المرة دى

عشان كده حاول ترجع الكرسي اللي جنبك شويه لورا عن كرسيك لان درج التابلوه بارز لبره شويه انا شنطه المدام علمت عليه خد بالك بقي ومشكله الرؤيه الخلفيه دي مش الستاره علي قد ماهي زاويه ميل الازاز الوراني بايخه جدا مرايه الصالون حجمها كويس لكن الشنطه عاليه مع ميل الازاز الرجوع لورا ممل بس نفسي اركب باركنج سينسور حتي لما رحت التوكيل بعد الحادثه وانا بغير الاكصدام قالولي ماينفعش نركب اللي بباركنج سينسور

[amigo_magdos]

الف مبروك يا باشا.
سؤال صغير, هوا الفتيس 6 نقلات ولا 4 زي القديمة ؟

[wella3330]

1000 مبروك و ربنا يبارك لك فيها .

[batour]

الف مبروك وربنا يكفيك شرها ويباركلك فيها
سؤال صغير .. هو مفيش رسمه العربيه فى العدادات تبين لو فى ابواب مفتوحه زى القديمه ؟

[محمد سيدو]

الف مبروك وربنا يكفيك شرها ويباركلك فيها
سؤال صغير .. هو مفيش رسمه العربيه فى العدادات تبين لو فى ابواب مفتوحه زى القديمه ؟

http://nileup.com/up/watermark.php?s...156031.png&p=c شكل صورة العربيه باين في الصورة دي هي بتظر لما يكون في باب مفتوح و تختفي لما يكون كل الابواب مقفوله
ممكن نتاكدمن صاحب الموضوع

[Haitham Basha]

بسم الله ما شاء الله ربنا يباركلك يا باشا في العروسة و يديك خيرها و يكفيك شرها و يبعد عنك العين آمين