سينيك3 و كليو2 و 3 , فين العربيات دي ؟

[تامر.محمد]

سينيك2 ممكن نقول انها ما نجحتش في مصر لأن الفئة نفسها ما كانتش معروفة اوي , او نزلت لما كانت سمعة الميجان دمرت الميجان , او لأن شكل العربية مش اوي
المهم انها ما مشيتش
لكن النهارده فئة العربيات دي خصوصا بعد الكيا كارينز بقت معروفة و لها زبونها , حرام عربية زي دي ما تنزلش هنا , العربية تحفة بصراحة

ده شكلها من 2010








و ده شكلها بعد الفيس ليفت بتاع 2014

[تامر.محمد]

الكليو نفس القصة تقريبا
التوكيل جاب السيمبول اللي كانت في رأيي اختيار فاشل , و فعلا فشل


و ساب الكليو دي



دي كانت بتاعة 2009

دي بقى بتاعة 2013 اللي برده ما جتش




حاجات خسارة ما نشوفهاش في الشارع و الله و سهل اوي انها تنافس

[dreslam]

هل عدم وجود موديلات ليس لها منافسين كثر في السوق مثل الكليو 2 سياسه تسويقيه؟؟ ولا ليها علاقه بوجود البيكانتو ؟

[تامر.محمد]

الكليو دي اظن تنافس الريو مش البيكانتو

[abdulkhaleq]

اعتقد والله اعلم بالنسبه للكليو سياسه تسعيريه حسب رأس المال العامل
بالنسبه للسينيك طبعا بدون نقاش ماعرفوش يسوقوها
ولو هنتكلم بانصاف جزء بسبب ثقافة الشعب
الجزء اللي عليهم بقى انهم يغيروا من ده بالدعايه المناسبه

[تامر.محمد]

بس مفترض ان الثقافة دي اتغيرت خلاص
الكارينز مثلا قطعت الدنيا , و اهي نفس فئة السينيك

اما الكليو فمش فاهم ليه مقضيينها عربيات اقتصادية بس و مش سائلين في عربية زي الكليو , مع ان الريو مثلا بتبيع

[Hany Saad]

أنا شفت الكليو iv فى فرنسا من شهرين فى معرض رينو هناك....طبعا وهم الوهم و بقت رياضية بطريقة بشعة...

مشكلتها أنها تصنيع فرنساوى و مواتيرها 1.2l فقط...هو ده الموتور المتوفر منها....سعرها بالنسبة للمنافسين بقى أوفر قوى قوى و موتورها 1.2l ...و قدرته 75 حصان فقط

نفس الشىء بالنسبة للسينيك بقت أسمها scenic rx4 و بموتور 2000 سى سى فطبعا سافرت بعيد من المنافسة علشان الجمارك و بلد المنشأ فرنسا

[تامر.محمد]

حتة بلد المنشأ نقطة مهمة في السعر فعلا

بس هل معنى الكلام ده ان الكليو ممكن لو جت نلاقيها بقت بسعر الفلوينس مثلا ؟؟

بالنسبة للسينيك , مش هاتبقى مثلا بنفس سعر الكارينز الحالية ؟

[Hany Saad]

حتة بلد المنشأ نقطة مهمة في السعر فعلا

ده اللى خلا رينو تصنع فى تركيا علشان تمسك العصاية من النص....منشأ نظيف بسعر كويس
التصنيع فى فرنسا بقى مكلف جدا و قريب أكيد هيغيروه و يقفلوا المصانع هناك تماما لو عايزين يكملوا ينافسوا

بس هل معنى الكلام ده ان الكليو ممكن لو جت نلاقيها بقت بسعر الفلوينس مثلا ؟؟

أنا فاكر سألت عليها من كام سنة و كان سعرها معدى...أعتقد ممكن نتكلم دلوقتى فى 140~150 ألف تقريبا...طبعا على موتور 1200 سى سى 75 حصان...يبقى أحنا مش فى الصورة أصلا....المنافسة شرسة جدا و هى لازم تكون فى رينج سعر السيمبول أختها الكبيرة....يعنى 110~120 ألف كبيرها.....

بالنسبة للسينيك , مش هاتبقى مثلا بنفس سعر الكارينز الحالية ؟

سيبك من الكماليات و التكنولوجيا و التطوير و بلد المنشأ....كفاية بس الموتور ال2000 سى سى...ده لوحده هيرفعها فى السما...أعتقد هتتكلم فى أسعار 285 ألف فما فوق...مع أصلا قلة مبيعاتها لما كانت 1600 سى سى...أعتقد ملهاش لازمة

[Karim_Monir]

كليوم فعلا شكلها تحفة بس لو نزلت 1200 ب 130 الف حد هايشتريها ؟ ولا هايشتري الريو وال rb
البولو السيدان نزلت ب 160 الف مانيوال ماعتقدش باعو 10 عربيات علي بعض خلال السنادي

[تامر.محمد]

مبدئيا السينيك فعلا يا 1600 يا بلاش و مش هاتنفع , ايا كان سعرها اصلا

بالنسبة للكليو هي كده نفس فكرة البونتو ال1400 77 حصان , اظنها كان ممكن تبيع شوية بسبب شكلها لو سعرها اتظبط سنة و بقى 120 130 مثلا