محتاج نصيحه فى اصلاح فتيس الميجان

[El Gen]

انا قريت جدا عن الموضوع ده هنا فى المنتدى و بشكر كل الاعضاء الى بيشاركو لان لولا ده كنت اتدبست من زمان.
الموضوع بإختصار مشكله check gearbox مع هبده جامده .... المشكله بتحصل فى اول اليوم و العربيه بارده لسه (مش زى اغلب الناس لما العربيه تسخن) ... و بتحصل جوه البلد مش لازم على سرعه عاليه.

فرنش موتورز .... قالولى سلونيد فالف بس فى موديل 2005 و 2006 لما بيتغير و نغير الزيت ساعات الفيتيس مش بيلقط (مش عارف يعنى ايه) فحنحتاج فى الحاله دى نغير الفتيس ب 10000 جنيه.

توكيل ابو رواش .... قالولى عمره كامله للفتيس ب 10000 جنيه.

ميكانيكى شغال حر كده .... قالى على واحد عند الاتوستراد فى منطقه اسمها التونسى و اسمه كاظم العراقى .... (حد يعرف عنه اى حاجه ؟)

فكرت فى عادل زوايا بس صراحه قلقان .... المشكله انى مقدرش استغنى عن العربيه و مش عارف دلوقتى امشى عليها و لا لأ ؟

محتاج نصيحتكم فى ميكانيكى كويس (لأنى مش حقدر ادفع 10000 دلوقتى) ... و امشى على العربيه مده اسبوع كده و لا لأ ؟

[Ahmed Amin]

الوصف اللي بتوصفه دا بتاع هبدة الصبح وهوا الفتيس بارد ويطلع لك Check Gearbox أو Gearbox Fault
علاجو هوا تغير 2 سولونيد فالف وزيت الفتيس,
ولو كنت عند بيحد بيفهم هينضف لك الفالف بادي وهوا بيغير البلفين,
وبعدها إن شاء الله مش هيكون عندك أي مشاكل.

مش عارف فرينش موتورز أزاي قالولك "لما بيتغير و نغير الزيت ساعات الفيتيس مش بيلقط" ؟!!
فيه حاجة بس أنك لو عندك البلوف القديمة, بتعمل أبديت للسوفت وير معاها عشان البلوف الجديدة ليها سوفت وير غير القديمة,
بس مفيش حاجة أسمها مش بتلقط.!

كلام غريب الصراحة, والموضوع دا مش جديد علي الفتيس بتاع الرينو DP0 وبتاع البيجو وستروين Al4
وعلاجة هوا تغير ال 2 سولونيد فالف, وزيت الفتيس, وعملت أبديت للسوفت وير لو متاح ومش معمولك أخر أبديت ودمتم,

والموضوع لا هيتكلف 10 الأف ولا حاجة,!

[El Gen]

شكرا جدا على الرد و المعلومات .... يا ترى اصلحها فين ؟
هل ممكن امشى عليها لمده اسبوع ؟

[noursite]

الوصف اللي بتوصفه دا بتاع هبدة الصبح وهوا الفتيس بارد ويطلع لك check gearbox أو gearbox fault
علاجو هوا تغير 2 سولونيد فالف وزيت الفتيس,
ولو كنت عند بيحد بيفهم هينضف لك الفالف بادي وهوا بيغير البلفين,
وبعدها إن شاء الله مش هيكون عندك أي مشاكل.

مش عارف فرينش موتورز أزاي قالولك "لما بيتغير و نغير الزيت ساعات الفيتيس مش بيلقط" ؟!!
فيه حاجة بس أنك لو عندك البلوف القديمة, بتعمل أبديت للسوفت وير معاها عشان البلوف الجديدة ليها سوفت وير غير القديمة,
بس مفيش حاجة أسمها مش بتلقط.!

كلام غريب الصراحة, والموضوع دا مش جديد علي الفتيس بتاع الرينو dp0 وبتاع البيجو وستروين al4
وعلاجة هوا تغير ال 2 سولونيد فالف, وزيت الفتيس, وعملت أبديت للسوفت وير لو متاح ومش معمولك أخر أبديت ودمتم,

والموضوع لا هيتكلف 10 الأف ولا حاجة,!

كلام سليم
وانا كانت عندى نفس المشكله واتحلت فى التوكيل وتم تغير السولينايد فالف وبتكلفه حوالى من 1750 الى 2000 شامل المصنعيات

[noursite]

شكرا جدا على الرد و المعلومات .... يا ترى اصلحها فين ؟
هل ممكن امشى عليها لمده اسبوع ؟

ممكن تمشى عليها بس المهم كل ماتطلع الرساله اقف على جنب وبطل العربيه ودورها تانى وهاكاذا....

[lamada]

انا ماشى بالعربية بقالى سنتين و فيها نفس المشكلة و شغالة و عادى

[Ahmed Amin]

هوا مفيش مشكلة أنك تمشي عليها,, يعني مش غلط أووي ومش صح,
لأن المود اللي هيا فيه دلوقتي, هوا المود اللي بتدخل فيه عشان تمشي بيه لأقرب مركز خدمة,
وأنا أعرف ناس في غزة فضلت ماشية عليها كدا أسابيع لحد ما وصلت لهم البلوف والزيت من ناس هنا في مصر وغيروها ومكنش فيها مشكلة معاهم,,

السؤال هوا هتمشي عليها مسافة قد أيه في الأسبوع دا,,
حاول متكونش المسافة أكتر من 50 كيلو في اليوم الواحد.
وزي ما قالو الزملاء لو طلعت لك الرسالة أركن وبطل العربية وشوية ودور العربية وكمل ورجليك تبقي خفيفة علي دواسة البنزين,

لو خليت رجليك هادية علي دواسة البنزين ومتعديش 2000 لفة في الدقيقة لحد ما تعدي سرعة 50 جوا البلد مش هيبقي فيه ضرر كبير علي الفتيس,
يعني متقرصش علي الفتيس,

وبخصوص تصلحها فين,, أنصحك بالتوكيل,,
رينو العامرية في ناس كتير هنا عملت شغل فيه ومش بيطلع عندهم مشاكل,,
بالنسبة للقاهرة معرفش أنهي أفضل مركز عشان بتاع المقطم كان فيه ناس أشتكت منه,,

وبنصحك بالتوكيل عشان التكلفة هتكون قريبة فيه من برة وعشان تاخد ضمان علي التصليح,
وعشان عندهم العدة المناسبة والمكان نضيف وناس متمرسة,
علي عكس عند بعض الميكانيكة برة مفيش نضافة, وساعات مفيش عدة مناسبة,, وممكن تاخد قطع غيار مش أصلية,,
فمنصحكش بأنك تعمل الشغل دا برة.

[El Gen]

شكرا جدا جدا لكل الاعضاء .....
انا طبعا مقتنع ان التوكيل هو الافضل و ياريت اعملها عنده بس فى التوكيل فرع ابو رواش قالولى عمره فتيس كامله ب 10000 جنيه و عشان كده بدور على حد اعملها عنده بره .... اي اقتراحات ؟

و بالنسبه للمشى عليها ... انا بطفى و اولع فعلاً و هكذا و بحاول مقرصش على العربيه .... لكن فيه واحد قالى ان المشى عليها حيبوظ الفيتيس كله !!

فى ميكانيكى قالى ان لازم يبص هلى زيت الفتيس لو اتحرق يبقى الفتيس لازم يتعمله عمره

[Ahmed Amin]

الميكانيكي اللي قالك إن الزيت لو اتحرق يبقى الفتيس لازم يتعمله عمره, بيضحك عليك,,
وعايز يعمل شغل عليك والسلام,,

مفيش عربية أوتو في الدنيا بتنزل الزيت بتاعها مش أسود ومحروق لما تيجي تغيرة,,

ولو مشيت علي الفتيس هادي زي ما قلت لك مفيش مشاكل, بس متقرصش علي الفتيس وتحاول متغيبش الصيانة أكتر من أسبوع,,
ولو تقدر تنزل بالعربية لرينو أسكندرية العامرية هيبقي أفضل من القاهرة لأنهم عاملين أكتر من فتيس لناس هنا في المنتدي والنتايج كانت ممتازة علي عكس القاهرة,,

لو مفيش أمكانية تنزل كلم أي فرع تاني لرينو غير أبو رواش وقله عايز أغير بلفين الفتيس وزيت,,
والتكلفة مش هتعدي 2000 جنية زي ما الزملاء وضحو,
وهتكون حل لمشكلتك إن شاء الله لأنك محتاج تغير البلوف وتغير الزيت اللي عندك.

[byada10]

بص اى حد هيقولك انه سولونويد فالف و هنحاول نغير الزيت و ممكن العمليه تفشل

انا عملت الموضوع و صلحته عند فرينش موتورز و اتكلف 700 جنيه

بس هما لازم يهولولك الموقف و يخوفوك علشان لو حصل حاجه لا قدر الله تبقى عارف من قبلها :d

[proff]

بص اى حد هيقولك انه سولونويد فالف و هنحاول نغير الزيت و ممكن العمليه تفشل

انا عملت الموضوع و صلحته عند فرينش موتورز و اتكلف 700 جنيه

بس هما لازم يهولولك الموقف و يخوفوك علشان لو حصل حاجه لا قدر الله تبقى عارف من قبلها :d

و المشكله ان لما ينزلوا الزيت احتمال الفلتر يتسد و العربيه مش هتلقط بس تغير الفلتر و هتلاقي كل حاجه تمام
انصحك بعادل زوايا العربيه عندي كانت نفس المشكله و كلمت التوكيل و عرفوا ان العربيه ماشيه اكتر من 100000 قالولي كده هنغير الفتيس المهم غيرنا السلونيد و ركبا و العربيه بقت جثه هامده و الكلام كده علي تغيير فتيس
بالعقل و المنطق العربيه ماشيه بس فيها عيب عشان اصلح العيب لازم ينزلوا الزيت وطبعا هنغيروا مع تركيب القطع الجديده لما نغير القطع و نحط زيت نظيف الفتيس يتحرق طب ما نفكر مع بعض ايه اللي ممكن يتسد ما فيش غيره الفلتر طب عاوزين نحرك العربيه المهم خدتها علي عادل 4 ساعات حل الفتيس و الموتور و تركيبه وتغيير فلتر زيت الفتيس و بالمره باند و طوق وكله بقي زي الفل العربيه هتطلع معاك تمام تيجي تاني يوم الصبح تروح طالالك بتشيك جير بوكس خالي قلبك جامد بقي انبوبه اسبراي تنظيف و خش علي كل الفيش اللي ليها علاقه بالفتيس و نظف و جرب الحمد لله كله تمام يبقي كل اللي اتعمل في الاول مالوش لزمه و مصاريف علي الفاضي الحسنه الوحيده تغيير فلتر زيت الفتيس و الزيت و اويل سي الكرنك بالمره التوكيل هايل في اي حاجه لاكن في الفتيس كوفته لانهم بيخافوا من الفتيس

[Ahmed Amin]

هوا عادل غير البريك باند والأطواق ليه ؟

[proff]

هوا عادل غير البريك باند والأطواق ليه ؟

هو واحد بس لان البريك باندو الطوق كانوا مسلخين وكان في صوت غريب في الفتيس من قيل ما يفتح وهو عارف هيعمل ايه و بصراحه راجل فاهم وخبره بس المهم توصفله الحاله مظبوط و تسيبه يجرب العربيه براحته هتاخد منه احلي شغل و علي فكره اهم ما يميز عادل الامانه و جبناهم جداد

[mishmishy]

فى ميكانيكى كويس هو مهندس من التوكيل وفاتح ورشة فى صقر قريش بس بصراحة عفريت لو تحب اديلك عنوانه

[سمسم 74]

يا ريت تقول علي اسمه وتليفونه وعنوانه لان انا عندي رينو كليو و كان عندي مشاكل في الفتيس وحلتها الحمد لله بس الواحد بيحب يأخذ نمر ميكانيكي شاطر علشان لو ظهرت مشكله تانيه