السرعه القصوى للفلونس ٢٠١٤؟

[CosmicOne]

السلام عليكم يا اهل المنتدى الكرام

حد يعرف السرعه القصوى للفلونس الفيس لفت و هل هيا ليميتد فعلا عند سرعه معينه؟؟


ايضا حد يقولي اه اخبار عزل الهواء على السرعات بتاعت السفر يعنى ١٥٠ او ١٦٠ كم مثلا او اعلى لو حد جرب؟


انا بفكر اغير السيفيك بتاعتى ليها بس خايف بصراحه من فرق الموتور و الثبات.

انا جربت الفلونس حته صغيره جوه التوكيل في ابو رواش بس بصراحه صوت الموتور فى الطالعه معجبنيش
بيجعر جامد اوى مقارنة بالهوندا بس مجربتش على سرعات هيبقي عامل ايه و صوتوا ايه.

[ramyraby]

اسمحلي حضرتك اتابع معاك هذا الموضوع المهم وربنا يوفقنا ويوفقك وتقبل خالص تحياتي

[essam assem]

متابع للاهمية

[2alb]

انا جبت بيها 170 على الصحراوى وخفت الصراحة ازود اكتر من كدة ثبتها حلو مش وحش مقارتة بالاوكتافيا الى كانت معايا الطلعة تحس انها تقيلة فى الاول لكن كل حاجة طبيعى بعد كدة

[Hany Saad]

اعتقد كل العربيات الجديدة بتكون سرعتها مقفولة ( ليميتد) لحد معين عن طريق الكمبيوتر
فى أعتقادى الفلوانس تجيب لغاية ١٩٠ كم/ ساعة
صوت الموتور مش مسموع نهائى لأن على سرعة ١٢٠ كم/ساعة بيكون ال RPM عند حوالى ٢٠٠٠ لفة بسبب الفتيس ال CVT اللى بيطلع أعلى عزم للعربية عند RPM واطى جدا
صوت الموتور هيتسمع و يبقى ملحوظ لو بتقرص فى بداية الطلعة أو لو بتشد و تدوس جامد على الدواسة علشان تعلى ال RPM يعنى عند ٤٠٠٠ لفة فيما فوق
غير كده العربية دى فى ال cruising العادى على سرعات ١٢٠-١٣٠ كم/ساعة و لا كأنك سايق....ثبات رائع و هدوء موتور و عزل ممتاز و هى مصممة لكده و استهلاك بنزين متدنى جدا
طبعا فوق المنطقة دى يعنى ١٤٠ وانت طالع و اللى غالبية الناس مش هتحتاج تسوق عندها فى مصر او مش هتستخدم كتير غير كل حين و فين هتلاقى طبعا ال RPM بيعلى و بتسمع صوت الموتور و أكيد هيبقى فيه صوت للهواء و أحتكاكه بالعربية...عالى قد ايه اكيد الملاك هيفيدوك اكتر

بالنسبة للى زى حالاتى بيسافروا كتير على متوسط سرعة ١١٠-١٢٠ كم/ساعة العربية دى ملهاش حل سواء فى الهدؤ أو النعومة أو الثبات أو عزل الهواء مع أستهلاك بنزين متدنى يصل ل ٥.٥ لتر/ ١٠٠ كم

[Gamal.Eid]

السلام عليكم
انا معايا 2013 خليجى بحكم عملى اشتريتها من السعودية ومن حوالى 10 أيام ذهبت بها من الرياض للقصيم واعلى سرعة جبتها 200 كم ونزلت عنها بسرعة بصراحة كنت عايز اجرب العربية بالسرعات العالية والطريق كان ممتاز والعزل ممتاز لكن لما بتزود فى بداية الزيادة طبعا بتسمع صوت لكن لما الار بى ام بيكون على 2.5 او 3 بتبقى عزلها ممتاز

[mostafa magdy]

انا جبت بيها 140 مستريح جدا الثبات و العزل ممتاز مقارنه بالاوكتافيا و الكورولا
الفكره بس دوسه بنزينها فعلا تقيله خصوصا لو فضلت تقارنها بالياباني لانه مفروف بسحبه الممتاز
غير كده عربيه فخمه و شيك اوي و عاليه ع الارض و بتاعت سفر ... انا عملت تقرير عن سفريه صغيره للسخنه اتمني يفيدك
و زي ما زميلي العزيز ميجي بوي قالك ع ال 120 ال rpmكان 2 فعلا مش بتسمع لها صوت الا في الطلعه لحد ما الفتيس يظبط نفسه

[yasso2008]

انا جدا بيها ١٦٥ علي طريق الكريمات...و الثبات كان تمام..طبعا صوت مقاومة الهوا كان مسموع بس مش لدرجة الازعاج علي السرعة دي

[CosmicOne]

اولا جزاكم الله خيرا جميعا على المعلومات دي

على فكره انا مش بتكلم على قوة الطلعه لان السيفيك فيها delay فى الدواسه فى الطلعه انا بتكلم بس على الصوت بتاع الموتور

بالنسبه للسحب و التسارع بتكلم على قوته اثناء النقله يعني لو شديت على التالت مثلا التجميع عامل ازاي و صوت الموتور ايه بالنسبه للسيفيك

السرعه القصوى كنت بشوف هل بتعدى ال٢٠٠ عادي ولا ليمتد و هل مثلا فى العزل و الصوت ممكن تمشي شويه على ١٩٠ كم مثلا يمثبت السرعه ولا الازعاج لا يحتمل ؟!

اخيرا من حكم ركوبي كتير للميجان ٢ زمان من قريب ليا عارف ان العفشه فى الراحه احسن من السيفيك بكتير جدا لكن هل الغرز المفجاة و الملفات على سرعات عاليه نفس الثبات ولا لا ؟

انا تعبتكو معايا بكتر الاسئله معلش :)

[mostafa magdy]

أنا كنت باخد ملفات خطره جدا علي طريق الزعفرانه .. علي ال 120 عادي و الغرز الخطره برده اخدت بيها كام غرزه غصب عني .. الحمد لله نجدتني ..
صوت الموتور لو حضرتك عملت Kick down اول ما طلعت هتحس الموتور صوته بيطلع أوي لأنك هتخلي ال Rpm يجيب 5 مثلا .. بعدها الفيتيس اللي عدد لفاته لا نهائيه هيتكيف مع دوسه حضرتك و السرعه اللي انت عايز تمشي بيها و الصوت يختفي
و لحد ال 50 العربيه هتحس سحبها مش حلو .. بس بعد كده العربيه فعلا هتحسها سريعه و كويسه
و حضرتك مش بتحس بأي نقلات .. أنا بتكلم عن الاوتوماتيك ..
أخيرا و ليس أخرا العفشه ممتازه بس حضرتك تظبط ضغط الهوا و تستمتع بيها في شوارع مصرنا الحبيبه ..
بالتوفيق

[CosmicOne]

ربنا يباركلكم جميعاً على الردود يا رجاله

[ALshahba]

اذا كنت انا بعربيتي اسبيرانزا 620 جبت بيها 200 وثابت عليه فى طريق شرم ......... يبقي مش حتقدر تثبت علي الفوانس!!
ماتقلقش من الحته دي

[Hany Saad]

اذا كنت انا بعربيتي اسبيرانزا 620 جبت بيها 200 وثابت عليه فى طريق شرم ......... يبقي مش حتقدر تثبت علي الفوانس!!
ماتقلقش من الحته دي

ربنا يباركلك فيها يا فندم.....

[ALshahba]

ربنا يباركلك فيها يا فندم.....

اشكرك جدا
منتظرين تقريرك لما تستلم عن قريب ان شاء الله
لسه ماستلمتش !!!

[ramymechanics]

الفلوانس فى الأداء الطبيعى بعيد عن الحرق والشد والكلام دة أدائها مبهر جدا واستهلاك البنزين عندى فى الشتا بقا بيقرا عالكمبيوتر عالأقل من 11 ل 12.8 كيلو فى اللتر كان فالصيف من 10 ل 11 كيلو فاللتر
الثبات ممتاز بس لو حاولت تاخد غرزة على سرعة العربية بتجنح منك شوية انا حاولت فى طريق المطار قرصت الفجر على 130 وحاولت أثبت عالسرعة دى فى نفس الحارة فى ملف شديد شوية العربية عامت من ورا وكذا حد قاللى الكلام دة من ملاك العربية
الغريب جدا بقى عندى انى من ساعة ما حطيت نيتروجين وظبطت الكاوتش بنفس الأرقام اللى فالقايم والثبات بقا سئ جدا ازاى معرفش لدرجة انى بفكر ارجعه هوا تانى

العفشة لا أروع ولا أجمل وأحسن من الكورولا الشكل القديم بمرااااااااااحل بحكم انى بسافر بالكورولا فالشغل كتير جدا
خلاصة القول العربية عائلية جدا وواسعة وممتازة من كل النواحى