ال esp ما له و ما عليه

[bukla]

بسم الله الرحيم الرحيم
تميز الموضوع يكمن في تجميع و ترتيب و طريقة سرد المعلومة و اللي بيحسسك باضافة جديدة حتى لو كنت تعرف او عندك المعلومات دي كلها من قبل كده
الف شكر على المجهود و الاضافة

[غزلة]

ESP - Electronic Stability Program - YouTube
شرح وافي في هذا الرابط

[abou-yahia]

بص الكلام في مجمله حلو

لاكن حسيت ان الهدف منه التقليل من اهميه وتواجد نظام ESP

لانه مش نظام امان

ادعو حضرتك لقراءه هذا الموضوع

http://www.nilemotors.net/Nile/375709-a.html

[hany63]

تسلم ايدك على الشرح الوافي
و فعلا النظام في ظروف القياده العاديه لايؤثر على زيادة الاحساس بالثبات نهائي
بس ده برضه ما يمنعنش انه مهم جدا لما تفقد التحكم لسبب ما و هيا ممكن تبقى مره كل كام سنه بس صدقني بتنقذ حياه
و انا عن نفسي النظام ده اشتغل معايا ٣ مرات في ٥ سنين و انقذني بعد ربنا من مواقف بالغة الصعوبه

[Bently]

ياريت الى بيتكلم عن esp يجربه الاول فى اى عربية و على كل السرعات.....و يعمل موضوع عليه كمان لو عايز

[Bently]

ياريت الى عايز يتكلم عن esp يجربه الاول فى اى عربية...وبعد كده يعمل موضوع كامل عليه لو عايز و هنسمعه

[airfox]

موضوع جميل شكرا علي المعلومات و تصحيح الخطأ

[Hany Saad]

بص الكلام في مجمله حلو

لاكن حسيت ان الهدف منه التقليل من اهميه وتواجد نظام esp

لانه مش نظام امان

ادعو حضرتك لقراءه هذا الموضوع

http://www.nilemotors.net/nile/375709-a.html

أبو يحيى باشا....

أولاً مشرفنا حضرتك
لم أقصد أطلاقاً التقليل من أهمية النظام و لم ألمح إلى هذا فى أى جزء من موضوعى و أن فهم من كلامى التقليل فأنا بأكد هنا مرة أخرى بأنه عامل أمان فى منتهى الأهمية و أصبح من متطلبات الأتحاد الأوروبى للسيارات الحديثة

هدف الموضوع كان فقط إزالة إلتباس بعض المفاهيم الخاطئة لدى البعض و قد عملت جاهداً على توضيحها فى ضوء معلوماتى

تحياتى

[Hany Saad]

تسلم ايدك على الشرح الوافي
و فعلا النظام في ظروف القياده العاديه لايؤثر على زيادة الاحساس بالثبات نهائي
بس ده برضه ما يمنعنش انه مهم جدا لما تفقد التحكم لسبب ما و هيا ممكن تبقى مره كل كام سنه بس صدقني بتنقذ حياه
و انا عن نفسي النظام ده اشتغل معايا ٣ مرات في ٥ سنين و انقذني بعد ربنا من مواقف بالغة الصعوبه

هانى بيه المحترم

أتفق مع سيادتك مليون فى الميه أن هذا النظام من عوامل الأمان الرائعة و لم أقصد بأى شكل من الأشكال التقليل أو التهوين من أهميته
أنا واحد من الناس أشتريت الهاى لاين فى الفلوانس علشان فيها 6 أيرباجز مش 2

النظام ده زى الأيرباجز بالظبط....ممكن ربنا يسترها معاك و تعد العربية طول الوقت معاك من غير ما النظام esp يتفعل أو الأيرباجز يفتح......لكن و ألف لكن لو لاقدر الله و حصل موقف زى ما حصل ما حضرتك و أنقذك ال esp ساعتها بتنزل تبوس العربية و تقول حلال كل قرش اتدفع فى هذا النظام.....

كل الهدف من الموضوع كان إزالة بعض المفاهيم الخاطئة عن هذا النظام و ليس أبداً التقليل من شأن هذا النظام...
و من أنا لأقلل ثن شأنه و هو أستاندرد فى أوروبا؟؟!!

تقبل تحياتى هانى بيه

[abou-yahia]

أبو يحيى باشا....

أولاً مشرفنا حضرتك
لم أقصد أطلاقاً التقليل من أهمية النظام و لم ألمح إلى هذا فى أى جزء من موضوعى و أن فهم من كلامى التقليل فأنا بأكد هنا مرة أخرى بأنه عامل أمان فى منتهى الأهمية و أصبح من متطلبات الأتحاد الأوروبى للسيارات الحديثة

هدف الموضوع كان فقط إزالة إلتباس بعض المفاهيم الخاطئة لدى البعض و قد عملت جاهداً على توضيحها فى ضوء معلوماتى

تحياتى

القسم بقه ليه روح جميله بوجودك

يمكن الانطباع خاطئ

لاكن ده لايقلل من المجهود اللي في الموضوع

تحياتي

[Hany Saad]

ياريت الى عايز يتكلم عن esp يجربه الاول فى اى عربية...وبعد كده يعمل موضوع كامل عليه لو عايز و هنسمعه

أنا بالنسبة لى حضرتك جربته قبل كده .....حضرتك شايف حاجة غلط فى الكلام يا ريت توضحها لنا بناء عن تجربتك للنظام علشان الكل يستفاد....و أنا أولهم و أصلح معلوماتى....

علشان حضرتك تعلق تعليق زى كده معنى كده أن فيه أخطاء فاضحة فى الموضوع فكان من الأولى التصحيح كنوع من مراعاة الزمالة على الأقل بناء على تجربة حضرتك للنظام علشان تفدنا أولاً و بعدين تعلق و تقولنا:

" ياريت الى عايز يتكلم عن esp يجربه الاول فى اى عربية...وبعد كده يعمل موضوع كامل عليه لو عايز و هنسمعه "

الهدف من الموضوع الأفادة، لو فاد حضرتك يبقى حقق المطلوب منه أما لو مفدش حضرتك يبقى كان من الواجب تصحيح الأخطاء فيه و هذا هو الهدف من المنتدى فى المقام الأول....أو لو معجبكش و حسيته ليس له قيمة مضافة تتجاهله

أنما تعليق حضرتك أعتقد جانبه الصواب و خصوصاً انك متعرفش إذا كنت أنا جربته قبل كده و لا لأ....

تحياتى لحضرتك

[amgomaa]

النظام ده موجود عندى فى الهوندا والعربية بقالها معايا سنتين ومشتغلش الا لما نزلت فردة فى الرمل لقيت اللمبة بتنور فى التابلوه والعربية بسم الله ما شاء الله محدفتش بتاتا وانا كنت ماشي على سرعة عالية شوية فاعتقد انه مهم انه يكون موجود فى العربيه مع وجود الحذر فى القيادة و التحسب لاخطاء الغير و شكرا على الموضوع المميز

Sent from my GT-S5282 using Forum Runner

[Hany Saad]

النظام ده موجود عندى فى الهوندا والعربية بقالها معايا سنتين ومشتغلش الا لما نزلت فردة فى الرمل لقيت اللمبة بتنور فى التابلوه والعربية بسم الله ما شاء الله محدفتش بتاتا وانا كنت ماشي على سرعة عالية شوية فاعتقد انه مهم انه يكون موجود فى العربيه مع وجود الحذر فى القيادة و التحسب لاخطاء الغير و شكرا على الموضوع المميز

sent from my gt-s5282 using forum runner

فعلاً يا فندم....نزول عجلة فى الرمل من أهم المواقف اللى ال esp بيتميز فيها... و أسمحلى بعد أذنك أوضح دور النظام داخلياً
نزول عجلة فى الرمل معناه أن سرعتها أصبحت مختلفة عن الباقى (أسرع نتيجة ضعف الأحتكاك) و هنا على طول الكنترول يونيت اللى بيقرا قراءات الحساسات اللى على العجل بأستمرار بيلاحظ أختلاف فى قيمة سرعة العجلة الأمامية يمين (مثلاً) عن باقى العجل....

يعلن الكنترول يونيت الطوارىء و يرسل أشارة أستغاثة فى لمح البصر إلى نظام الabs/ebd الذى يستطيع التحكم فى فرملة كل عجلة على حده و يطلب منه فرملة أو إبطاء سرعة دوران العجلة الأمامية يمين حتى إعطاء أوامر أخرى منه

بالفعل ينفذ ال abs/ebd الأمر فوراً بتقليل سرعة العجلة الأمامية يمين تدريجياً و فى هذا الوقت بيكون ال esp و عن طريق حسساته بيقيس قيمة القراءات فى الأربع عجلات....أول ما سرعة العجلة الأمامية يمين ترجع لقيمتها المظبوطة زى باقى العجلات.....يصدر أمر سريع من ال esp إلى ال abs/ebd بالتوقف عن فرملة العجلة الأمامية يمين

ده تلخيص للحوار الشيق داخل المنظومة الرائعة لل esp وقت تفعيلها

ما يشعر به السائق هو لمبة ال esp تضىء فى التابلوه ثم تهديه للسرعة فى ناحية واحدة من السيارة ثم العربية بتعدل اتجاهها حسب اتجاه الدريكسيون و كل هذا فى أقل من ثوانى

ثم تعود السيارة لحالتها الطبيعية......بأكد من جديد أنه نظام أمان رائع جداً جداً و لكن نفهم دوره و بيشتغل أمتى و أهميته أمتى

أشكر مشاركة حضرتك لإستفادة الجميع

تحياتى

[bassem.naguib]

للأسف و نتيجة الأسم فهمها الكثير على انها لها دخل بأتزان السيارة على السرعات او مد تماسكها على السرعات او مدى التحكم فى السيارة على السرعات و هى من كل هذا براء

* تعالوا نشوف ايه هى العوامل اللى بتأثر فى ثبات و اتزان السيارة:
- وزن السيارة
- توزيع وزن السيارة على الجسم
- مركز ثقل السيارة و مدى ارتفاعه عن الأرض
- ارتفاع السيارة عن الأرض
- عرض الكاوتش و نقشته
- اسبويلرات امامية و جانبية و خلفية
- نوع العفشة
- وجود استابيليزر بار
- ايروديناميكس جسم السيارة
و عوامل اخرى
زي أيه .. مش زي ال esp مثلاً

* يا ترى فكرة ال esp قايمة على ايه :

تقوم فكرة عمله على استغلال منظومة ال abs اللى موجودة فى السيارة antilock braking system و تركيب حساس على كل عجلة و قراءات هذه الحساسات تغذى كنترول يونيت علشان تطمن ان كل العجل بيلف بنفس السرعة و ان مبيحصلش ظاهرة oversteeer او understeer و هو انه فى حالة الدوران على سرعات عالية فى ملفات متبقاش العربية بتلف معاك فى الملف و على هذه السرعة العالية أزيد من اللازم oversteer او اقل من اللازم understeer

فى هذه الحالة يتدخل ال esp عن طريق فرملة العجلات و بكرر فرملة عجلة او اتنين لظبط اتجاه السيارة فى الملف و فى بعض السيارات ممكن كمان يقلل من قوة الموتور لضبط الاتجاه
هو مش ضبط الاتجاه يندرج تحت الاتزان والثبات برضه يا هاني باشا .


* لاحظ الاتى:
لا يؤثر ال esp نهائياً فى احساسك كسائق باتزان السيارة و مدى تحكمك فيها و مدى ثباتها او امانها....او مدى ثقتك فى نفسك و انت تقود لان ببساطة لن تفعل خاصية ال esp الا فى حالة خروج السيارة عن مسارها نتيجة السرعة العالية فى الملفات او المناورات او مشابه
تمام .. وحتى في السرعات المتوسطة في الملفات أو تفادي أي عوائق مفاجأة في الطريق .. وما أكثرها في بلدنا الجميلة وخاصة على الدائري ... وبناء عليه يعطيني ثقة أكثر في السيارة وأنها حتسد معايا ويعتمد عليها بالإضافة طبعاً لمهارة السائق

هذا النظام يصحح اخطاؤك كسائق و لكن لا يصحح من ثبات او اتزان السيارة
ما اخطائي كسائق ممكن تنعكس على اتزان السيارة وخروجها عن مسارها أو أنها تلف بيا

عايز ادى مثال على ذلك علشان الناس تفهم:
لو فرضنا الهيونداى النترا على سبيل المثال و ليس الحصر و مع كامل احترامى لملاكها عربية غير ثابتة بعد سرعة 120 كم/ساعة
هل لو فيها خاصية esp و ده فعلاً بينزل فى الخليج اصبحت سيارة قمة فى الاتزان و نقارنها مثلاً باتزان الباسات؟؟!!!

الأجابة القطعية طبعاً لأ
هتفضل برده النترا زى ما هى و بتلعب على سرعات فوق ال 120 كم/ساعة و فى مطبات الهوا و فى فواصل الكبارى...اومال ايه اللى زاد عليها؟ كل اللى زاد عليها ان نسبة حوادثها نتيجة فقد السيطرة عليها هتقل نتيجة وجود هذا النظام فيها
و لكن احساسك بيها كسيارة غير متزنة و غير امينة و غير ممتعة على السرعات كما هو لن يتغير
يعنى هتفضل تسوقها على السرعات و انت خايف برده و لكن نسبة حوادثك هتقل

طب ليه هنا أغفلنا العوامل التانية بتاعة الاتزان اللي ذكرتها في أول الموضوع وحصرناها أن ال esp فقط حيعطيها الاتزان .. كل عوامل الاتزان دي بتلعب دور في منظومة واحدة .. يعني مثلاُ مقدرش أركز على جزئية وأغفل الباقي .. بمعنى ميبقاش الأيرودينامك أو توزيع الوزن في الضياع وأركب esp وأقول حتبقى ثابتة .. إنما لو راعيت المعايير دي كلها بالإضافة "للعوامل الأخرى" اللي منها ال esp أكيد حتبقى عربية متزنة بشكل كبير .. والكمال لله وحده والحارس والحامي هو الله في المقام الأول .

* هل يناسب نظام ال esp السواقة الشبابى و الغرز و الشمال يمين السريع؟

الأجابة طبعاً لأ لأنه لو لا قدر الله اشتغل معاك النظام و انت بتاخد غرزة ضيقة و نتيجة انه بيعتمد على الفرامل لضبط اتجاه السيارة يبقى حضرتك وارد جداً تلبس و انت بتاخد غرزة لانك عايز تجرى و هو بيفرمل العجل

في وجهة نظري من الناحية العملية صعب شوية الكلام ده .. وقد تكون وجهة نظري صحيحة أو خاطئة .

* هل ال esp يندرج تحت نظام اتزان ام نظام أمان؟
ال esp هو نظام امان يساعد السائق فقط فى حالة فقد السيطرة على اتجاه السيارة و ليس له اى دخل بأتزان السيارة فى القيادة العادية اليومية
ماشي القيادة العادية .. ولكن ماذا عن الحالات الطارئة أثناء القيادة العادية ؟! .. أعتقد أنه حيأثر على الاتزان

* ينصح البعض بشراء السيارة اللى فيها نظام esp لأنها اكثر اتزاناً و ثباتاً من غيرها

طبعاً هذا خطأ شائع جداً لانه لايوجد اى علاقة ما بين ال esp و اتزان السيارة او ثباتها
ال esp هو من العوامل الأخرى التي تحسن من ثبات العربية كما ذكرتها في أول الموضوع .

الصح هو : السيارة اللى فيها esp اكثر اماناً من غيرها
تمام قوي .. ودي نقطة اتفق معاك فيها تماماً .. زي العربية اللي الأيرودينامكس فيها أحسن .. أكيد حتبقى أفضل من غيرها .


* الخلاصة ان ال esp من عوامل الأمان المهمة زيها زى الايرباجز كلها موجودة لحماية السائق فى حالة الحوادث و لكن كلا النظامين لن تشعر بوجوده فى القيادة اليومية للسيارة و لا يحسنوا من ثبات او اتزان السيارة او من متعة قيادتها

تحياتى

وبرضه الفلوانس سيارة جميلة حتى لو مفيهاش esp لأنها تراعي عوامل الثبات .. وأكيد برضه كانت حتبقى أحسن وأفضل لو فيها esp .

خالص تحياتي يا هاني باشا .. وأرجو تقبل كلامي بصدر رحب .

[Hany Saad]

وبرضه الفلوانس سيارة جميلة حتى لو مفيهاش esp لأنها تراعي عوامل الثبات .. وأكيد برضه كانت حتبقى أحسن وأفضل لو فيها esp .

خالص تحياتي يا هاني باشا .. وأرجو تقبل كلامي بصدر رحب .

باسم باشا الكبير....أشكرك جداً على مشاركتى و مناقشتى الحوار و برحب جداً بالنقاش أو حتى النقد و ذلك لإستفادة الجميع و حضرتك من الشخصيات المحترمة الفاهمة اللى بحب أتناقش معاها....

أولاً دعنا ننحى نوع السيارة جانباً و بأكد مرة أخرى الموضوع ليس له أى علاقة من قريب أو بعيد بالفلوانس و ووجود النظام فيها من عدمه.....

ثانياً و بمنتهى الصراحة أنا شخصياً و بكل تأكيد كنت أفضل نزول السيارة بهذه الخاصية الرائعة و لا أنكر أو أخفى هذا الشىء تماماً و مفيش عربية كاملة لأن الكمال لله وحده

ثالثاً بأكد تماماً أن هذا النظام ممتاز و فى غاية الأهمية و قد أصبح أستاندرد فى دول الأتحاد الأوروربى و من فترة طويلة....فمن أنا لأقول هو كويس و لا لأ و أن كنت بأكد أنه من أنظمة الأمان الرائعة......

نيجى بقى للهدف من الموضوع الذى يتلخص فى كلمتين كنت حابب أوضحهم و هركز عليهم تانى بإعطاء مثال أخر....

كل ملاك النيسان تيدا سيدان بيشتكو جداً أن العربية بعد سرعة 120 كم/ساعة و لو كان فيه شوية هوا على الطريق بيكون عندهم إحساس أن العربية زى المرجيحة و بتعوم و لازم يتبت أيده فى الدريكسيون علشان العربية متلعبش و بيكون سايق على هذه السرعة و هو مش مطمن و مش مبسوط....أنا بتكلم على handling
للعربية و فى الطوالى مش حتى فى ملفات.....

هل فى رأى حضرتك لو صاحب النيسان ركب منظومة ال esp فى عربيته، سوف يتحكم فى سيارته و تبطل تعويم و يسوق على سرعة 180 كم/ساعة و هو ساند الدريكسيون بأيده زى مثلاً كأنه سايق أوكتافيا و لا باسات؟

الأجابة و أعتقد حضرتك هتشاركنى الرأى لن يضيف ال esp أى درجة ثبات أو شعور بالأمان للسيارة و لكن لو لا قدر الله العربية أنحرفت فعلياً (خطأ تقدير سائق) سوف يقوم النظام بالتدخل و التعديل

السؤال هل أنت كسائق لهذه السيارة و مع وجود النظام أصبحت مستمتع بالسيارة و بال handling و بالشعور بالتحكم التام؟؟؟ هنا مربط الفرس

هدفى من الموضوع كان: لكل مشترى جديد...من فضلك تأكد من الثبات الأساسى للسيارة عن طريق العوامل اللى ذكرتها فى الموضوع و فيه زملاء كتير أجدر منى كتبوا فيها من قبلى.. و سوقها و أطمن أن العربية ثابتة فعلياً كأساس ثم بعد ذلك أستميت فى الحصول على ال esp كعامل هام جداً فى سيارتك.....و العكس ليس صحيحاً....لن يعطى ال esp لعربية مش ثابتة و لا هو من عوامل الثبات...مش المفروض فى الطبيعى و القيادة العادية أن العربية/esp تعدلى أتجاهى و لكن فى الطوارىء فقط و هو ده الهدف من النظام....نظام أمان فى حالة خطأ السائق أو وجود مشكلة على الطريق....

بمعنى أوضح الكاوتش العريض نظام ثبات دائم للسيارة فى كل الأوقات أما ال esp هو نظام طوارىء فى المواقف الصعبة....ثبات الكاوتش هيأثر على متعتك فى القيادة و ثقتك فى سيارتك على السرعات ال esp مش هيعمل كده لأنك ممكن قوى تبيع العربية قبل ما تجربه و لو مرة......

بالنسبة للغرز يا باسم بيه و أوعى تكون سواقتك غرز على الضيق أكاد أجزم و بناء على طريقة عمل النظام أنه هيهدى العربية علشان يعدلها لو غرزة سريعة على العاصى....و طبعاً لاحظ أن فيه عربيات أخرى النظام بيهدى الموتور مش بس فرامل
حضرتك عندك النظام ده فى الكورولا....جرب فى طريق مفتوح على سرعة و خد شمال يمين على ضيق و تأكد أن النظام أشتغل و شوف هيهدى معاك العربية و لا لأ مع أنك هتكون عايز كل عزمها فى حالة الغرزة....

منتظر ردك باسم بيه

تحياتى ليك