ليه انا جبت ميجان سيدان ؟ , تقرير عن تجربة شخصية

[تامر.محمد]

سلام عليكم
التقرير ده لمساعدة الناس اللي بتفكر تشتري ميجان2 سيدان , مش هاتكلم فيه عن مميزات و عيوب العربية اللي اتكلمنا عليها في تقارير و نقاشات سابقة , لكن هاتكلم فيه عن تجربتي بمقارنتها بعربيات تانية في نفس فئتها السعرية في المستعمل , اللي هي من 60-90 الف جنيه



في الفئة من 60 ل70 الف
بصيت على العربيات الموجودة و استبعدت فيرنا كسر زيرو , افيو 2008 , لانوس كسر زيرو لأنهم اصغر في الحجم و اقل في المستوى

و استبعدت كيا بيكانتو 2006, جيتز2003 , سيتروين C3 , ابيزا 2007 , فيات جراند بونتو 2007 لأنهم هاتشباك و انا محتاج سيدان لأنها هاتبقى عربية أسرة

و استبعدت كورولا تسعينات و اول الالفينات و سيفيك اواخر التسعينات لأني ما كنتش عايز اجيب حاجة قديمة لدرجة التسعينات

و استبعدت دايو ليجانزا 2000 و سبيرانزا A620 و بريليانس جالينا 2006-2007 لأنهم 2000 سي سي و مش طالباها معايا خراب بيوت

فضلت هنا المقارنة بين ميجان2 phase1



و العربيات التالية , و طبعا معروف حيث اني اشتريت فالميجان كسبت بالنسبة لظروفي و لطلباتي , و تعالوا نستعرض الاسباب

استرا موديل 2004
اسعار قطع الغيار قريبة من بعضها جدا , فرق التوكيل لصالح رينو , الانتشار لصالح الميجان , فرق الكماليات و اتساع العربية داخليا و وسائل الامان زي فرامل ABS (مش متأكد الصراحة هي موجودة في الاسترا دي ولا لأ , لكن كان فيه اكتر من عامل عموما) لصالح الميجان , لها بعض المشاكل زي الميجان بالظبط و ان كانت عربية كويسة برده



بروتون واجا 2007
فرق التوكيل لصالح رينو , الانتشار لصالح الميجان بفرق كبير , لها بعض المشاكل زي الميجان بالظبط



جين2
هنا كانت المقارنة صعبة , فرق الاداء كثبات و تسارع لصالح الجين2 , في الكماليات الاتنين ما يتخيروش عن بعض , التوكيل لصالح رينو , المساحة الداخلية لصالح الميجان , بالنسبة لي كسبت الميجان لأن عائلية العربية عندي اهم من ادائها و ان كنت باحب العربية يبقى ادائها حلو



بيجو 307
كانت المقارنة صعبة شوية برده , موتور احسن من الميجان , توكيل كان سيء جدا وقتها , فيها مشاكل فتيس اكتر من الميجان شوية , على حد علمي بقى لها حلول دلوقت



406 2002
عربية جميلة جدا بس التوكيل و فرق الموديل و عدم انتشارها حسموا الامر لصالح الميجان



[B]دايو نوبيرا [/B[
عربية عملية جدا لكن فرق المستوى بين العربيتين ككماليات و فخامة و وسائل امان كبير الصراحة



[B]فيكترا B [B/]
عربية جميلة برده , و رغم انتشارها الممتاز و قطع غيارها المتوفرة , لكن فرق الموديل و وسائل الامان و وجود مشاكل فيها برده و سوء توكيلها و كون فرق قطع الغيار كأسعار مش كبير حسموا الامر لصالح الميجان



اوبترا 2006
عملية و واسعة و منتشرة , و اعتمادية , لكن التوكيل سيء و مافيهاش كماليات ولا وسائل امان , حسموا الموقف



اوكتافيا A4 اول الالفينات
عربية محترمة و اعتمادية جدا , لكنها فقيرة جدا من حيث الفخامة الداخلية و الكماليات برده



[B]لانسر بومة 2007 [/B[
نفس قصة الA4 , عربية محترمة و اعتمادية جدا , لكنها فقيرة جدا من حيث الفخامة و وسائل الامان و الكماليات برده

يتبع

[ah-gawad]

تقرير ممتاز جدا و انا فعلا اشتريت ميجان 2006 بعد ما عملت مقارنة تقريبا بنفس طريقتك و لقيت الميجان تكسب فعلا اما بالنسبة للانسر 2007 هتكون غالبا 1300 سي سي او توماتيك و الموتور صغير اوي علي العربية فالسحب هيكون ضعيف خصوصا مع التكييف

[monamize4]

اراء

[Omar Mahmoud]

تقرير ممتاز

[omaranes77]

منتظر حضرتك
اضافة لمعلومات حضرتك
الاوبترا الي في الصورة دي الفئة بتاعت موديل 2009 الي كانت 2 ايرباج abs يعني كدة توافر وسائل الامان
وبخصوص a4 معاك في كل كلمة قلتها
بس حضرتك فكرت في سعر اعادة بيع الميجان
ودة لاسف كان سبب من اسباب ابتعادنا عنها وكمان
تكنولجيا الموتور متطورة وقطع غيار غالية وصيانتها صعبة
تحياتي ياباشا ومنتظر باقي الموضوع

[hossam_elwani]

سيبك انت مهما تعددت اﻻسباب انت كنت غاوى ميجان زيى انا العربيه دى بحترمها جدا

[Ahmed Koller]

مفيش ولا عربية من ال قولتهم ينفع تقارنهم بالميجان ..... فرق شاسع للميجان في كل حاجه . ممكن تقارن ميجان بفيكترا c او اوكتافيا a5 او جيتا او سيفك ...... لأن فعلادي. اكتر عربيات فيها اوبشن زي الميجان وخصوصا لو جيت تحسب سعر العربيات دي مثلا في 2006 هتلاقيها كلها في نفس السعر تقريبا˝

[تامر.محمد]

اراء

بجانب التقييم الفني و تقييم السوق فيه طبعا آراء و فيه احتياجات شخصية و فيه اولويات شخصية برده , عشان كده انا كاتب ان التقييم شخصي لأن ببساطة ممكن حد تاني ما عندوش مشكلة مع الموتور ال2000 سي سي مثلا يجيب a620 و يبقى مبسوط جدا

منتظر حضرتك
اضافة لمعلومات حضرتك
الاوبترا الي في الصورة دي الفئة بتاعت موديل 2009 الي كانت 2 ايرباج abs يعني كدة توافر وسائل الامان
وبخصوص a4 معاك في كل كلمة قلتها
بس حضرتك فكرت في سعر اعادة بيع الميجان
ودة لاسف كان سبب من اسباب ابتعادنا عنها وكمان
تكنولجيا الموتور متطورة وقطع غيار غالية وصيانتها صعبة
تحياتي ياباشا ومنتظر باقي الموضوع

بالنسبة للاوبترا فبصراحة المعلومة اول مرة اعرفها , في العموم هي هاتخليني ارجع للاوبترا تاني لما اتكلم على سعر فوق 70 الف (بصيت عليها دلوقت لقيت الاوبترا 2009 سعرها بين 70 و 80 الف)
بالنسبة للميجان , كلام حضرتك صحيح جدا لحد من كام سنة , لكن بقى لها 3 سنين مثلا ماسكة سعرها بنسبة تقريبا زي باقي العربيات الحمد لله
بس على فكرة قطع الغيار مش غالية زي ما حضرتك متخيل , المقص التجاري ب200 جنيه و قواعد الموتور التجارية ب110 و ب275 او 375 مش فاكر بالظبط
بالنسبة لتكنولوجيا الموتور هي اعلى شوية من فئة عربيات 60-70 الف , لكن لو قارناها بفئات اعلى , السيراتو 2010 على سبيل المثال , هنلاقيها عادية خالص , و الصنايعية بتوعها دلوقت عموما حفظوها

سيبك انت مهما تعددت اﻻسباب انت كنت غاوى ميجان زيى انا العربيه دى بحترمها جدا

ما انت لحقتني لما كنت عملت المقارنة و اخدت القرار خلاص , كنت خلاص غويت العربية :-d

مفيش ولا عربية من ال قولتهم ينفع تقارنهم بالميجان ..... فرق شاسع للميجان في كل حاجه . ممكن تقارن ميجان بفيكترا c او اوكتافيا a5 او جيتا او سيفك ...... لأن فعلادي. اكتر عربيات فيها اوبشن زي الميجان وخصوصا لو جيت تحسب سعر العربيات دي مثلا في 2006 هتلاقيها كلها في نفس السعر تقريبا˝

مفروض ان شاء الله لما المقارنة تطلع لفئة سعرية اعلى هانخش فعلا في عربيات اعلى لكن مش هاتبان الميجان متفوقة زي ما هي باينة هنا طبعا

[Ahmed Koller]

السوق المصري الفاشل هو ال بيتحكم في سعر العربية ....... وده طبعا مصلحة لينا كميجانويه

لاكن لو قارنت العربيات ال انا قولت عليها بالميجان . هتلاقي الميجان اعلي من بعض العربيات كمان . كوسائل الامان وتكنولوجيا الموتور والبانوراما و مساحة العربية من الداخل وكمبيوتر العربية الذكي جداً . حجات كتير

[أسامه الحسيني]

بصراحه سعر اعادة البيع الى الميجان مظلومه فيه كان من الاسباب الى خلتني اشتري 2006 مستعمله - 63000 جم ودا سعر قليل جدا مقارنة بامكانيتها و بجد عربيه تحفه بس عاوز محافظه واهتمام

[تامر.محمد]

ندخل في الفئة الاعلى منها , من 70-80 ألف , الكلام هنا بالنسبة للميجان يبقى دخلنا في موديلات 2007-2008 , مشاكل الفتيس قلت كتير و مشاكل الكهربا قلت كتير

ايه العربيات اللي عندنا ؟ هانلاحظ عربيات معانا من سعر الستين لسبعين الف , و هانلاحظ عربيات تانية دخلت معانا , و هانلاحظ ان المقارنة بقت اصعب و بقى ممكن اوي اللي اكون فضلت الميجان عشانه نقطة واحدة هي بالنسبة لي اهم من غيرها مثلا

العربية اللي بس هازود معلومة عنها هي شيفروليه اوبترا من اول موديل 2009 اللي اخبرني العضو الكريم omaranes77 انها من اول 2009 بقى فيها ABS و 2 ايرباج , طبعا كده اللي هايفضل الميجان على الاوبترا لأن الاوبترا مافيهاش عوامل امان خالص , نظرته ممكن اوي تتغير , بالنسبة لي انا فما تزال الميجان احسن , عشان الكماليات و التوكيل و الفخامة الداخلية , حتة ان عوامل الامان في الميجان اكتر شوية (6 ايرباج) ممكن هنا ما تفرقش كتير

العربيات اللي استجدت

استبعدت منها شيفروليه آفيو و سيات كوردوبا لأنها عربيات مستواها اقل
و استبعدت هيونداي I10 , فيات جراند بونتو لأنها عربيات اصغر و هاتشباك , ما تنفعش عربيات اسرة
و استبعدت سبيرانزا تيجو 2009 لأني مش باحب الSUV و مش باحب الصيني (الموضوع تجربة شخصية ماحدش ينسى)
و استبعدت الماتريكس لأني مش باحب الMPV

و فيه عربيتين بصراحة رغم اني استبعدتهم على عيني و فقط لان الاتنين هاتشباك الا انهم يستحقوا يدخلوا المقارنة بجدارة

سيتروين c4 2006



استرا 2008


و الصراحة ما كنتش هاجيب السي4 لعدم انتشارها و الاسترا بسبب توكيلها , بس بصراحة عربيتين في رأيي ما يتعيبوش

و بعدين ييجي عندنا

هوندا سيتي (اقدم شكل)


رغم عشقي للهوندا , بس الموديل ده شكله ما كانش عاجبني خالص , و كان الشكل اللي بعده نزل وقتها و سألت على قطع غياره اتخضيت

نيسان صني 2008


اول ما نزلت العربية دي كنت باحبها جدا , لكن وقت ما جيت اشتري , و كنت بافكر اجيبها سوبر صالون زيرو , كانت مشكلتي معاها انها ضيقة جدا من جوة و ما ارتحتش في قعدتها , غير ان عفشتها الناشفة برده ما ظبطتش معايا , غير كده هي جميلة كموتور و كثبات و السوبر صالون فيها بعض الكماليات لكن ناقصها كمبيوتر الرحلات اللي باعتبره حاجة مهمة , يعيبها كمان طلعتها التقيلة زي الميجان بالظبط

سيراتو 2005-2008


من العربيات الرائعة اللي كل اللي بيمتلكها بيشكر فيها جدا , موتور تسارعه جميل جدا , ماعرفش نظام ثباتها ايه , و فكرت فيها لفترة , لكن بالمقارنة بكماليات الميجان و فخامتها من جوة و وسائل امانها الاكتر , الميجان كسبت معايا

النترا 2005


مع اني باحب شكلها , لكن حسيت انها انقرضت و اختفت مش عارف ليه, ما فكرتش فيها خالص

يتبع مع مرحلة 80-90 الف

[Omar Mahmoud]

اخويا وقت ما اشترا الجين 2 قارنا بالصني سوبر صالون و اللي قولناه كان نفس الانطباع بتاعك
بالنسبة للاوبترا اللي العضو omaranes77 قال عليها كانت فعلا موجودة في بس مقعدتش كتير كانت وقتها ب105000 وكان فيها فتحة سقف و العادية كانت في اوائل التسعينات و حتي لو كانت لسة موجودة مفيش مقارنة لانها محسومة للميجان.

[yasser100]

مرجع جميل و مفيد لكل من يفكر يشترى مستعمل فى الفئه السعريه دى . مجهود مشكور

[ashouhdy]

موضوع ممتاز ...

[mishmishy]

الميجان عربية كويسة بس للاسف الشديد لا تستطيع ان تأمنها لان حركات الندالة بتاعتها كتير وفجأة . يعنى لا تصلح لان تكون سيارة عائلية ولا تصلح كذلك للسفر والدليل عاوز اى حد يقولى كدة وهو مسافر اسكندرية مثلا شاف عربية ميجان واحدة فى الطريق ؟ انا سافرت بيها وكنت الميجان الوحيدة طول الطريق . انا كانت معايا هاى لاين بانوراما وكنت بفضل مشغل قرآن وادعى واستغفر طول الطريق وعيونى على العدادات وشاشة الكمبيوتر طول الطريق علشان قلة الاصل. بصراحة عربية تجيبلك قلق ولا تثق فيها ابدا للاسف