كلمتين تقال على قلبي بس لازم يتقالوا

[تامر.محمد]

سلام عليكم يا جماعة
انا فيه كلمتين تقال على قلبي بس شايف اني ضروري اقولهم
و هي وجهة نظر شخصية برده في الاخر

بعض الاخوة اشتروا عربيات - و لنقل ميجان2 - و للاسف لسبب او لاخر ما كشفوش و هما بيشتروا كويس فجه نصيبهم في عربيات فيها مشاكل
طبعا ربنا يكون في عونهم يعني لان العربية دي لما تتهان بتبهدل صاحبها

لكن فيه مشكلة
كل واحد فيهم حط تقييم للميجان 2 كلها على اساس عربيته ، و بقى يحطها في مقارنة مع عربيات اقل منها و يبخسها قدام عربيات مش احسن منها ، و ده مش صح
ده غير انه قصاد عربيته اللي هانها المالك السابق بيبخس عربيات كتير ماشية و كويسة و ملاكها مش بيشتكوا منها

القصة ان كل واحد فيهم عربيته محتاجة شداية صح في مكان صح بقطع صح و ده مكلف بالمناسبة
او انه يبيعها و يدور على ميجان تانية حالتها حلوة ، و يحس الفرق بنفسه

انا باتمنى اي حد كلامي ده هايخبط فيه ما يزعلش مني و الله كلامي فني بحت
العربية مش احسن عربية في العالم خصوصا في التسارع و الاعتمادية ، لكنها مش ضايعة اوي كده


نفس القصة موجودة نوعا ما مع الفلوانس فيس ليفت
لينا زملا اشتروا عربيات و طلع فيها مشاكل و تعبوا معاها
هما اخوة لينا و فوق راسنا و معزتهم عندنا الحمد لله ما تتقدرش
بس مش كل الفلوانس هي عربية فلان و فلان
و مش كل الناس ماعندهاش استعداد تتعب شوية ورا التوكيل لحد ما يظبط لها المشاكل اللي في العربية , هانقول في اسوأ الظروف تغيير الموتور و قطمة الدركسيون زي ما حصل في عربية اخونا دكتور مصطفى
وارد يكون فيه حد بيحب العربية لدرجة انه عادي يستحمل كده

الصح في موقف زي ده ان الواحد يبلغ المقبل على الشرا بظروف العربية بالظبط و يسيب له هو بقى حق انه ياخد قراره


اخواننا ملاك فلوانس 2010-2013 .... اللهم لا حسد

كل سنة و انتوا طيبين :)

[kantofanto]

كلامك عين العقل فعلاً ( الواحد يبلغ المقبل على الشرا بظروف العربية بالظبط و يسيب له هو بقى حق انه ياخد قراره)
بارك الله فيك .

[yalahwy2010]

لو الميجان او الفلوانس عربيات وحشة ....ماكناش شفناها خالص في شوارع مصر......الناس فاهمة وعارفة انها عربيات ركوبة محترمة....بس اي عربية استعمال ومش متحافظ عليها اكيد هتتعب صاحبها واكيد كمان قطع غيارها الاصلية هتبقي غالية.....هي رينو هتخسر ايه لو رخصت قطع الغيار اوي.....بالعكس لو في ايديها ترخص كانت رخصت....لكن العربية فعلا بتبقي قطع غيارها مصروف عليها ومتكلفة خامات نضيفة....عشان كدة بتبقي غالية
فا كلام حضرتك مظبوط 100/100

[mk3]

كلام 100%

[monamize4]

متفق معاك يا باشا بخصوص الفلونس ,, لكن مش متفق معاك بخصوص ميجان 2

[ahmad--ezzat]

بصراحه ياباشا انا عارف ان الفرنساوي كله مجرد ما يتهان او يحس انه بيتهان بيفتح بوئه
وده مش عيب ف العربيه ولا حاجه

بالتالي لما بشوف اي اراء تزم ف العربيه مش بصدق او بمعني اصح ببقي عارف انها حاله فرديه حتي لو المشاكل كتير

انا ركبت الميجان 3 في معرض المصريه

حاجه بسم الله ماشاء الله فخمه لاقصي درجه وجميله جدا

الفرنساوي كله عايز صيانه اول باول وايدك تكون في العربيه غير كده متسالش عليه

قيس علي كده السيتروين بردك

والله اعلم...

[kokowasfy]

كلامك مظبوت جدا جدا و العربييات حالات و خصوصا الميجان بتنزل تقريبا من 2007 شوف كام سنة فى الشارع المصرى فا طبيعيى كتييير منها متهان و طالع عينو مع ذالك لسة بتمشى و مبتقولش لا بس عموما الفرنساوى محتاج مراعية دائما و صيانة على علطول لازم اديك تبقا فيها على طول و صراحة احنا كا مصرين بنعامل العربية انا اسف فى الفظ زى الحمارة عاوزين تشتغل 24 ساعة و تعد الف الكيلوهات من غير ما ندفع حاجة صيانة او اى حاجة !

[tarek_asem]

الميجان من 2004

[minicooper20]

معروف يا باشا ان العربيات الفرنسيه و خصوصا رينو
ليست بالاعتماديه العاليه خصوصا فى الاجواء الحاره و دول الغير ممهده زى مصر
العيب مش فى العربيه العيب فى زاكره الراكب فرنساوى كان راكب ايه قبل كده
ميجان من اقل العربيات اعتماديه الركبتها فى حياتى
و شوفت الويل مع الجنوط الالمنويوم و العفشه الهشه و الكويلات و مش عارف ٨ بوبينه و ترس الدفرنس و الفتيس و النتشه
القصه ان هى عربيه قليله العتماديه مع احترامى لكل ملكها
على فكره انا امتلك بيجو يعنى بنقد حاجه انا دارسها كويس جدااا
و ميجان موديل ٢٠٠٥ علمتنى الادب و كانت زيرو
كل عربيه فيها الحلو و المتهان بس الميجان لو زيرو و عطل فيها حساس فا بتقف
تحياتى

[تامر.محمد]

متفق معاك يا باشا بخصوص الفلونس ,, لكن مش متفق معاك بخصوص ميجان 2

ايه وجه الاختلاف ؟

معروف يا باشا ان العربيات الفرنسيه و خصوصا رينو
ليست بالاعتماديه العاليه خصوصا فى الاجواء الحاره و دول الغير ممهده زى مصر
العيب مش فى العربيه العيب فى زاكره الراكب فرنساوى كان راكب ايه قبل كده
ميجان من اقل العربيات اعتماديه الركبتها فى حياتى
و شوفت الويل مع الجنوط الالمنويوم و العفشه الهشه و الكويلات و مش عارف ٨ بوبينه و ترس الدفرنس و الفتيس و النتشه
القصه ان هى عربيه قليله العتماديه مع احترامى لكل ملكها
على فكره انا امتلك بيجو يعنى بنقد حاجه انا دارسها كويس جدااا
و ميجان موديل ٢٠٠٥ علمتنى الادب و كانت زيرو
كل عربيه فيها الحلو و المتهان بس الميجان لو زيرو و عطل فيها حساس فا بتقف
تحياتى

انا فعلا مش بادعي انها ذات اعتمادية عالية لما باقول كده , كلامي عموما منصب في فكرة الناس اللي وقعوا في عربيات متهانة عن العربية ككل
والحقيقة ان فيه نسبة كبيرة منها ماشية كويس و مش مبهدلة اصحابها
و عايز اقول لك برغم ان فيه نسبة كبيرة خصوصا من ملاك شكل 2005-2006 بيشتكوا منها جامد و عشان كده انا مش هاختلف معاك في الحتة دي , و هاصدقك كمان لو قلت لي انها تعبتك قبل ما تقدم , بس النهارده هي عربية عمرها 10 سنين و طبيعي تفتح بقها في حاجات خصوصا انها مرت بظروف غير طبيعية

ملاك الشكل القديم مع ذلك فيهم برده ناس و اعضاء معانا العربية كانت ماشية معاهم كويس
و العكس بقى لو بصيت على شكل 2007-2010 هتلاقيه الحمد لله ماسك نفسه جدا و حتى في السوق ماسك سعر احسن من الشكل الاقدم , الميجان عموما من العربيات اللي بتبقى مع حد نضيفة ما بيفرطش فيها لأنه ما بيعرفش يركب حاجة بعدها بسهولة

[tito32]

من المعروف ان العربيات الفرنسيه بها تكونولوجيا كتير وانها بتهتم بالرفاهيه اكتر من الاعتماديه فكل ملاك الفرنسى عليهم المحافظه على الصيانه الدوريه لان ببساطه مينفعش انك تهين العربيه وتاخد منها رفاهيه

[أسامه الحسيني]

انا من الناس الى اشترت العربيه من غير ما تكشف عليها فى التوكيل غلطه وندمان عليها لغايه دلوقتي
السؤال بقي للى زى حالاتي وعاوز يشد العربيه بس الميزانيه مش مساعده ان يروح التوكيل ممكن تنصحوه يعمل ايه
لانى بجد بحب العربيه دى والحمد لله بقالها 4 شهور معايا مكسفتنيش بس حاسس ان صابرها قرب ينفذ ومحتاجه زياره لميكانيكي وعفشجي يشدوها
وكل سنه وانتم طيبيين

[تامر.محمد]

انا من الناس الى اشترت العربيه من غير ما تكشف عليها فى التوكيل غلطه وندمان عليها لغايه دلوقتي
السؤال بقي للى زى حالاتي وعاوز يشد العربيه بس الميزانيه مش مساعده ان يروح التوكيل ممكن تنصحوه يعمل ايه
لانى بجد بحب العربيه دى والحمد لله بقالها 4 شهور معايا مكسفتنيش بس حاسس ان صابرها قرب ينفذ ومحتاجه زياره لميكانيكي وعفشجي يشدوها
وكل سنه وانتم طيبيين

لو ناوي ان شاء الله تشدها هاقترح عليك فكرة نجربها فيك و نشوف هاتفيد ولا لأ

افتح موضوع يبقى هو الملف بتاع عربيتك
ترص فيه المشاكل اللي في عربيتك في نقط , و اخر صيانة عملتها امتى و غيرت فيها ايه
و نبدأ نفكر فيها معاك

[Moratoz]

اولاً لا خاب من أستشار
لما كنت عاوز اشتري الميجان بدأت بقراءة معظم المواضيع المثبته بالقسم والتي استفدت منها كثيرا لتكوين فكرة عامة عن مميزات وعيوب السيارة وفعلا أشكر مشرفي ومنسقي القسم علي هذا الكم الهائل من المواضيع المثبته التي تتناول معظم المشاكل ثم بدأت بعد ذلك الأسئله بالقسم لمعرفة ما لم أفهمه من المواضيع ولزيادة الوعي الخاص بهذا السيارة .ووجدت تفاعل ما شاء الله من الأعضاء والمشرفين والمنسقين للرد عل كافة اسئلتي لتكوين عقيدتي الشخصيه .
خلاصة الموضوع اني لقيت أن الغالي ثمنه فيه اشتري حاجة نضيفة وما تستخصرش فلوش الشراء هتستريح جدا جدا جدا وبعدين لازم تبقي عارف انك بتشتري عربيه بنت ناس ولها أصل بعني لازم تحافظ عليها كويس ومتهملش في صيانتها والله فعلا هتصونك ومش هتكسفك .
وعلي فكرة أنا أشتريت العربيه عن قناعه تامة بها حيث أني وجدت أغلب عيوب موديلات 2007 فيما فوق قليله جدا جدا وتكاد تكون في حساس الكرنك والذي يتم تغيرة علي كيلوهات كبيرة نسبيا حوالي 100.000 ك فهو ليس بالعيب المتكرر الذي يؤخذ عليها ويعاب عنها ضعف التكيف بشكل عام بعد حرارة جو تتجاوز ال 40 درجة وكذلك كما اخبرني السيد/ تامر مساعد منسق القسم عن هاتين المشكلتين اما مشاكل العفشة فجميع السيارات التي تعمل في مصر والحمد لله فيها تلك المشاكل نظرا لسوء الطرق المصريه .
وعلي فكرة انا بعت العربيه بعد 3 ايام من شرائها لعدم قناعه زوجتي بحجمها الكبير ( الذي لن يساعدها في التعامل في الركنات والدخول الي الأسواق والخوف من التوكتوك ) وهو الأمر الذي ابتديت أندم عليه لنظافة السيارة الذائدت عن الحد وفعلا بعد ما ركبتها شويه مش عارف اجيبلها حاجة تانيه ,.

المهم الكشف الجيد علي السيارة والصيانه الجيدة لها فأنت تركب سيارة علشان تشوف أقران لها يبقي في حدود 150000 جم فمتستخصرش الصيانه الجيدة فيها
تحياتي

[تامر.محمد]

يا رااااااااااااجل بعتها ؟

طب كنت قول كنت هتلاقي هنا الف من يشتريها بحالتها دي !

انا عايز اقول لك معلومة بس شخصية , انا باركن الميجان بتاعتي احسن ما كنت باركن اللانوس اللي قبلها , بغض النظر عن نقطة الحجم , لأن مافيهاش بومبيهات , و خصوصا بعد ما ركبت باركينج سينسور