عايز رأيكم .... اتصرف ازاي مع التوكيل

[Mohd_Adel_Amin]

السلام عليكم ورحمة الله .... ازيكم يا جماعة

انا كان عندي مشكلة في عربيتي كانت بتقطع وبتفصل مني كل شوية و كان الكلام النهائي من التوكيل ان الكويل اليمين محتاج يتغير قلت مفيش مشكلة نغيره ..قال مش عندي بس تدفع عربون وهبعث اجيبه طلبية وييجي بعد 10 ايام وهتصل بيك لما يييجي ,قلت ادفع عربون , سعره كام ؟؟ قال في حدود 700 دفعت 200 .
الكلام ده كان يوم 15 -9 بعدها بعشر ايام محدش اتصل ..انا اتصلت قبل العيد قال لسه مجاش اتصل بعد العيد , اتصلت بعد العيد باسبوع قاللي جه تعالى ركبه .
بس انا مفضيتش غير انبارح ورحت علشان اركبه وبعد ما العربية دخلت لقيت موظفة الاستقبال بتقولي العربية طلعت ثاني علشان الكويل اللي جه مش بتاعها رحت للراجل بتاع قطع الغيار قعد يعتذرلي ويقولي الكويل اللي جه علشان يركب عندك لازم تغير الكابلات وده هيكلفك 375 جنيه زيادة ...قلتله لا طبعا ومشيت من عنده على اساس انه هيبعث يجيب الطلب صحيح المره دهية ..
بس المشكلة ان العربية كانت جابت آخرها وبقت حالتها صعبة جدا وانا بتحرك بيها كثييير وبسافر بيها باستمرار ومهندس الصيانة قعد يحذرني اني امشي بيها على الحال ده .
مشيت من عندهم ورحت اشتريت كويل مستعمل بالكابلات بتاعته ب 350 جنيه علشان العربية تنطق .. والحمد لله العربية رجعت لحالتها الطبيعية تماما .

معلش طولت عليكم بس حبيت انقل الصورة صح .

محتاج رأيكم .. اتصرف ازاي مع التوكيل ؟؟؟
هل استنى لحد ما الكويل الجديد ييجي واركبه ؟؟
والا اشتغل على المستعمل وخلاص ؟؟
ولو اشتغلت على المستعمل .. هقدر استرد العربون؟؟
او على الأقل اشتري بثمنه اي حاجة ثانية من عند التوكيل ؟؟
يا ريت يا جماعة تفيدوني بجد انا مش عارف اتصرف ازاي

ولكم جزيل الشكر

[Ramy_Tantawi]

عليكم السلام ورحمة الله وبركاته يا استاذ محمد ......يا رب تكون بأحسن حال وعافيه ان شاء الله.

الأول لي استفسار عند حضرتك بخصوص تغيير الكويل بواحد مستعمل بكابلاته .......هل معنى كده ان حضرتك ركبت المستعمل كويل مش بتاعها وبالتالي اشتريته مستعمل بالكابلات ؟ ولا هو نفس الكويل بتاع العربيه .

عموماً بخصوص التوكيل وما تسبب فيه من عطله لحضرتك خصوصاً ان حضرتك مش من القاهره فا الحل يرجع لحضرتك في الأول والآخر .

لو عاوز يكون في نوع من العقاب للتوكيل وعتاب اطلب سحب العربون وده حقك لئن من 15-9 الى 15-10 بنتكلم في شهر كامل منتظر وفي الآخر جبتولي واحد تاني مش بتاع العربيه فا شكراً .........طبعاً في حالة ان مافيش رد الفلوس نقدي الحسابات بتكتب لحضرتك بالقيمه دي اي حاجه وتضاف في اي اعمال للسياره مستقبلاً يعني تخصم لحضرتك بعد كده في مرة صيانه وخلافه.
الحل ده زي ما قلت لحضرتك بس كانوع من التعويض الأدبي للتأخر من قبل التوكيل مش أكتر.....بس الفكره دي مع وجود الكويل المستعمل اللي حضرتك مركبه غير مضمونه لئن الله اعلم بحال الكويل الموجود حالياً وهايقعد قد ايه وبالتالي هايظهر لنا الحل التاني وهو الاقرب لي .

ان حضرتك تكمل عادي بس مع لفت نظر للتوكيل ان اللخبطه دي كلفتني مشاوير وبهدله ومايصحش الكلام ده يحصل من توكيل محترم ابداً ولما الكويل يوصل ان شاء الله تأكد ان هو المناسب والصحيح لعربية حضرتك وخلليهم يركبوه واحتفظ بالمستعمل مع حضرتك احتياطي برضه للمستقبل مش اكتر.

الحقيقه كان نفسي نكمل بالمستعمل لكن مش ضامنه وحضرتك بتقول بتسافر كتير وبالتالي المواضيع دي مقلقه جداً ومكلفه انها تقطع من حضرتك في الطريق بعد الشر ان الكويل يقرر ياخدله تعسيله ولا حاجه في طريق عودة حضرتك من سفريه فا بلاش افضل.........

النقطه التانيه هي لو قلنا ناخد الكويل الجديد ونعينه عندنا ؟ حل كويس برضه بس مشكلته انه مش هايشتغل دلوقتي وده برضه مش صح لئن مفروض قطعة الغيار تتركب في العربيه وتبدأ الضمان بتاعها غالباً 12 شهر من يوم التركيب لكن لو ماتركبتش يبقى كده خسرنا ضمان قطعة الغيار.

اتمنى تكون مداخلتي صابها جانب من الصواب ان شاء الله وتكون مفيده لحضرتك مع خالص تحياتي يا استاذ محمد

[Mohd_Adel_Amin]

استاذ رامي .. بجد مداخلتك أكثر من ممتازة
بالنسبة للكويل اللي اشتريته مستعمل ده نفس اللي التوكيل جابه بالخطأ .. وهو تقريبا بتاع موديل 2000 او 2001 مش بتاع 99 والفرق بينه وبين بتاعها الأصلي ان الكابل بيكون (دكر) والكويل (انتايه) في بتاع 99 اما في الثاني بيكون العكس علشان كده في التوكيل قالو يركب بس تغير الكابلات (وده اللي خلاني مطمئن للكويل المستعمل)

يعني من رأيك اشتري الجديد وأمري لله واخلي المستعمل للظروف ..
انا هستخير برضه ودعواتك ان ربنا يكتب الخير ,,

معلش انا عندي سؤال صغير ثاني ..
انا اضطريت آخد الطريق من طنطا الى العامرية كاملا ب 2 سلندر بس (لما كنت رايح علشان أركب الكويل الجديد ) وناس كثير قالتلي ان كده خطر جدا على الموتور,,,
انا عايز اعرف اذا كان ده كان خطر والا لأ .. ولو كان فعلا فهل فيه أي حل اقلل بيه تأثير الموضوع ده ؟

[Mohd_Adel_Amin]

بالمناسبة ..
اسلوبك في الكلام ذوق جدا جدا ,, بس انا اكيد اصغر منك سنا ووضعا (خريج حديث) فأتمنى منك انك تكلمني على اني اخوك الصغير .
وبكرر شكري ليك على التفاعل مع الموضوع .

[أبو عبدالله]

ربنا ييسرلك امرك والمشكلة تتحل على خير

بس انا مش شايف احمد شاركي فيين
لازم يشوف الموضوع ده

لأن مكنش معجب خالص بفكرة انك تدفع عربون علشان قطعة الغيار تتبعت وتجيلك

احمد بص النقاط دي ورد عليها :

1- معندهمش قطع غيار العربيه ميجان ومش حاجه تانية ومعندهوش لها قطع غيارها
والكويل اللي المعروف انه بيبوظ كمان
2- بتدفع عربون علشان يبعت يجيبه
3- جابه غلط وهو مش عارف بتاع العربيه وهما بيبعتوا ولا ايه
4- تأخير في طلب قطع الغيار


معلش اعذروني
ولكن احمد اعطى توكيل دايهاتسو 0 في التقييم الأخير
وقال لن اذهب له مره اخرى
علشان معندهمشي قطع غيار لميرا 2000
اللي هيا في الأساس مكنتش تبع التوكيل الجديد عبداللطيف الجميل

متهيألي كده تقييم رينو المفروض يتعدل
لأن نفس اللي احمد علق عليه هناك حصل هنا برضه
قطع غيار مش موجوده
قطع غيار جت غلط وهما عارفين عربياتهم كويس
بتدفع عربون علشان يبعت يجيب قطع الغيار مع ان احمد كان علق على الموضوع ده قوي هناك
التأخير في طلب قطع الغيار

ودي مشاركة احمد عندنا في دايهاتسو

أنا صوت بسئ لإنه معجنيش لما رحت بعربيتى أختى الميرا
لإنه مكان صغير قوى و مكان إستراحة العملاء برضه صغير و عدم توافر قطع الغيار .

وساعتها رديت عليه وقولتله

متهيألي يا احمد لو انت بتتعامل بنفس المنطق ده مع توكيل رينو كان بقه هو كمان سئ جدا

لأن الحاجت دي كلها موجوده في مصر
الفرق اللي اتكلم عليه في التوكيلات دي اللي يتميز بعضهم عن بعض

القصد اني لا انسى الأعمال الجيده جدا جدا لوكيل وامسكله على حاجه انا مش فاهم طبيعتها ماشيه ازاي وظروفها ازاي

[Sharky]

أولا من الاخر طبعا خطأ من التوكيل و حرجة مش مظبوطة منه
ثانيا دى حالة فردية لعربية موديل 99 يا أبو عبدالله مش عربية موديل السنة و قطع غيارها مش موجودة و و أظن الموقف دا حصل مع واحدة معاه سيريون و برضه راحت إشتريت قطعة الغيار المطلوبة من منفذ قطع الغيار و لما راحت التوكيل تركبها طلعت مش بتاعة السيريون أصلا
فلما التوكيل يبقى معندوش قطع غيار موديل السنة و 95% من موديل إللى قبليه يبقى توكيل سئ طبعا و خاصة لما تبقى شكوى جماعية مش فردية

على فكرة تعليقلى إنت جبته مكنش على دى فقط كان على حاجات تانية

[أبو عبدالله]

جماعيه ولا فرديه

واحد معاه ميجان اهه 99 وراح ملقاش اللي هو عاوزه مع ان مشكلة الكويل دي معروفه ولما جابوه جاوله واحد غلط مع انهم ادرى بعربيتهم واتأخر في الطلب

ايه بقه الجماعيه والفرديه في الموضوع
يعني لو كان راح 20 واحد كانو لقوا اللي هما عاوزينه
وموديل مش قديم يعني 99 الموديل اللي قبل الشكل الحالي

على فكرة تعليقلى إنت جبته مكنش على دى فقط كان على حاجات تانية

تعليقك ده كان تقييم توكيل دايهاتسو

ومكنش فيه حاجه تانيه
والتعليق واضح
تحب اكملك باقي الكلام كله

[Sharky]

بص يا أبو عبدالله أنا قلت رأى وواضح إنها حالة فردية
و مش أعيد تانى الكلام

على العموم دا كلام إللى كنت بقييم بيه توكيل دايهاتسو

يا أبو عبدالله مهمة التوكيل الأولى هى :
1- توفير قطع الغيار بإستمرار و بنسبة لا تقل عن 90% لجميع قطع غيار السيارة.
2- إنتشار مراكز الصيانة التى تستوعب أعداد المبيعات إلتى حققها التوكيل .
3- حل مشاكل العملاء فى عيوب السيارة فى أسرع وقت.
4- عمل الصيانة الدورية للسيارة.

أين توكيل دايهاتسو فى المهام الرسمية للتوكيل !!!!!

مش علشان بيعملى الصيانة الدورية إللى أى مركز صيانة أو مياكانيكى ممكن يعملها فقط يبقى توكيل محترم

و الحمد لله ملاك الميجان II شايفين التوكيل محقق كل النقاط دى فعلشان كده حتلاقى أعلى نسبة رضا من التوكيل لملاكها حتلاقيها من ملاك رينو

[Ramy_Tantawi]

اسلوبك في الكلام ذوق جدا جدا ,, بس انا اكيد اصغر منك سنا ووضعا (خريج حديث) فأتمنى منك انك تكلمني على اني اخوك الصغير .
وبكرر شكري ليك على التفاعل مع الموضوع .

يا استاذ محمد انا شاكر جداً لحضرتك انا والله العظيم اقل بكتير من اللي حضرتك قلته وبخصوص العمر فا أنا كمان عمري مش كبير ابداً ومقام حضرتك ووضعك محفوظ لاحترامك لشخصك واخلاقك الكريمه والله مش ذوق مني ابداً ولا حاجه ..............وجزيل الشكر لاطراء حضرتك ويا رب اكون فعلاً اخ لحضرتك بدون اكبر واصغر دي .

نرجع لموضوعنا ......انا الحقيقه مش هاعرف اوضح اسباب فنيه بحته لموضوع ان حضرتك تمشي فترات ومسافات طويله بي 2 سلندر اكيد ليها اضرار على المحرك لئنها حاجه مش طبيعيه ..........الميكانيكيه دايما بيسموا الحاله دي العربيه (متلته) يعني ماشيه بربع او نص وكان على طول بيقولوا لازم تغير بوجيهات او طقم بوجيهات بسلوكه........ده كان مع الشاهين الله يرحمها.

وبعدين بعيداً عن الميكانيكا والكلام العلمي ليه نمشي بالعربيه 2 سلندر اللي عمالين يحرقوا في بوجيهاتهم والاتنين التانيين مريحين :D اضمن منين ان ال 2 اللي صاحيين دول مايغيروش ويعندوا ويقوموا مريحين هما كمان ويبقى كده معندناش ولا سلدنر نزق بيه العربيه حتى .................انا بهزر مع حضرتك والله تلطيفاً للجو مش اكتر وارجو تقبل المزاح ............

[Sharky]

رأى الشخصى لحضرتك إنك تجيب الجديد بتاع التوكيل كمان و خليه إحتياطى علشان لو كويل باظ
لكن لو عايز تسترد فلوسك أكيد مش حيمنعوا أو حتى حيطوها لك كريدت عندهم

[Mohd_Adel_Amin]

[/color]

يا استاذ محمد انا شاكر جداً لحضرتك انا والله العظيم اقل بكتير من اللي حضرتك قلته وبخصوص العمر فا أنا كمان عمري مش كبير ابداً ومقام حضرتك ووضعك محفوظ لاحترامك لشخصك واخلاقك الكريمه والله مش ذوق مني ابداً ولا حاجه ..............وجزيل الشكر لاطراء حضرتك ويا رب اكون فعلاً اخ لحضرتك بدون اكبر واصغر دي .

نرجع لموضوعنا ......انا الحقيقه مش هاعرف اوضح اسباب فنيه بحته لموضوع ان حضرتك تمشي فترات ومسافات طويله بي 2 سلندر اكيد ليها اضرار على المحرك لئنها حاجه مش طبيعيه ..........الميكانيكيه دايما بيسموا الحاله دي العربيه (متلته) يعني ماشيه بربع او نص وكان على طول بيقولوا لازم تغير بوجيهات او طقم بوجيهات بسلوكه........ده كان مع الشاهين الله يرحمها.

وبعدين بعيداً عن الميكانيكا والكلام العلمي ليه نمشي بالعربيه 2 سلندر اللي عمالين يحرقوا في بوجيهاتهم والاتنين التانيين مريحين :D اضمن منين ان ال 2 اللي صاحيين دول مايغيروش ويعندوا ويقوموا مريحين هما كمان ويبقى كده معندناش ولا سلدنر نزق بيه العربيه حتى .................انا بهزر مع حضرتك والله تلطيفاً للجو مش اكتر وارجو تقبل المزاح ............

اخي العزيز رامي .. انا لي الشرف والله بمعرفتك وربنا يديم المحبة لوجهه الكريم ..
وبتمنى لو عرفت من أي حد مدى خطورة الموضوع ده على العربية تبلغني بيه لأني طول ما أنا ماشي بيها وانا خايف ان يكون جرى حاجة للموتور وانا مش عارف ..

[Mohd_Adel_Amin]

رأى الشخصى لحضرتك إنك تجيب الجديد بتاع التوكيل كمان و خليه إحتياطى علشان لو كويل باظ
لكن لو عايز تسترد فلوسك أكيد مش حيمنعوا أو حتى حيطوها لك كريدت عندهم

أنا هتوكل على الله واجيب الكويل الجديد بس هركبه واشتغل بيه واخلي المستعمل احتياطي زي ما تفضل وأشار عليه أستاذ رامي ..

[farahat]

مع احترامي لجميع الأراء ، أنا عندي سؤال لحضرتك .. كام مرة حضرتك غيرت الكويل دة خلال عمر العربية ؟ ، و العربية إلي قبلها كام مرة غيرت فيها بوبينة تكرير ؟ الإجابة إن دي حاجة مش عادية ، و الكويل دة عمره الإفتراضي طويل و بعدين دة مش حاجة بتستهلك مع الوقت يعني يوم كفائتها ١٠٠٪ و بعدين ٨٠٪ و هكذا ، لأ دي حاجة بتفضل شغالة 100% لحد ما فجأة جزء يضرب (غالباً بيكون الدايرة الإلكترونية إلي جواها )، و ساعتها لزم تتغير لأن إصلاحها صعب .

نصيحتي تفضل بالكويل المستعمل يعدله كام سنة و لم يعطل لا قدر الله هات واحد تاني كام سنة و هكذا (و ممكن ساعتها تجيب الكويل إلي موجود دلوقتي في التوكيل لأنك مش هتحتاج تغير الكابلات ;) ;) )
و بالنسبة للفلوس لو اعترضت عشان التأخير و الخطأ أكيد هيرجعولك فلوسك إن شاء الله أو ذي ما الإخوة قالوا هتتحط في حسابك عندهم و خلاص على أسوأ تقدير .

ربنا يوفقك للصواب

اه على فكرة بخصوص المشي بالعربية باتنين سيلندر بس هي مش خطر خطر ، يعني مش هتدر الاتنين إلي مش شغالين ، هي بس حمل على الاتنين التانيين لأن حضرتك محمل كل وزن العربية دة بيشده اتنين سيلندر في حين إن المفروض يشده أربعة ، و كدة طبعاً هتسخن و بيكون فيه حمل مكانيكي عالي على الأجزاء بتعة الموتور ، و يفضل في الحالة دي انك متسحبش بالعربية على سرعات علي عشان متعملش حمل زيادة على الموتور و حول بلاش تقف و تطلع كتير عشان دة بيحتاج عزم زيادة يعني ضغط زيادة على ٢ سيلندر فقط (و لو سخن الموتور زيادة هتحصل مشاكل لا داعي للدخول في تفاصيلها )

تحياتي

[limo]

طب انت مكلمتش التوكيل الى فى القاهره (العبور او المطقم تسألهم عليه )؟

[Mohd_Adel_Amin]

مع احترامي لجميع الأراء ، أنا عندي سؤال لحضرتك .. كام مرة حضرتك غيرت الكويل دة خلال عمر العربية ؟ ، و العربية إلي قبلها كام مرة غيرت فيها بوبينة تكرير ؟ الإجابة إن دي حاجة مش عادية ، و الكويل دة عمره الإفتراضي طويل و بعدين دة مش حاجة بتستهلك مع الوقت يعني يوم كفائتها ١٠٠٪ و بعدين ٨٠٪ و هكذا ، لأ دي حاجة بتفضل شغالة 100% لحد ما فجأة جزء يضرب (غالباً بيكون الدايرة الإلكترونية إلي جواها )، و ساعتها لزم تتغير لأن إصلاحها صعب .

نصيحتي تفضل بالكويل المستعمل يعدله كام سنة و لم يعطل لا قدر الله هات واحد تاني كام سنة و هكذا (و ممكن ساعتها تجيب الكويل إلي موجود دلوقتي في التوكيل لأنك مش هتحتاج تغير الكابلات ;) ;) )
و بالنسبة للفلوس لو اعترضت عشان التأخير و الخطأ أكيد هيرجعولك فلوسك إن شاء الله أو ذي ما الإخوة قالوا هتتحط في حسابك عندهم و خلاص على أسوأ تقدير .

ربنا يوفقك للصواب

اه على فكرة بخصوص المشي بالعربية باتنين سيلندر بس هي مش خطر خطر ، يعني مش هتدر الاتنين إلي مش شغالين ، هي بس حمل على الاتنين التانيين لأن حضرتك محمل كل وزن العربية دة بيشده اتنين سيلندر في حين إن المفروض يشده أربعة ، و كدة طبعاً هتسخن و بيكون فيه حمل مكانيكي عالي على الأجزاء بتعة الموتور ، و يفضل في الحالة دي انك متسحبش بالعربية على سرعات علي عشان متعملش حمل زيادة على الموتور و حول بلاش تقف و تطلع كتير عشان دة بيحتاج عزم زيادة يعني ضغط زيادة على ٢ سيلندر فقط (و لو سخن الموتور زيادة هتحصل مشاكل لا داعي للدخول في تفاصيلها )

تحياتي

والله وجهة نظرك سليمة فعلا ... الوضع محير شوية بالنسبة لي
دعواتك اني اتصرف صح , وعموما الحمد لله المشكلة اتحلت ومش بتمشي على 2 سلندر ثاني انا بس كنت بسأل لو كان حصل ضرر اصلحه ازاي بس واضح من كلام حضرتك ان مفيش ضرر حصل لأن الحمد لله مكانتش بتسخن مني ساعتها(الغريب ان عداد الحرارة كان أقل من لما بتشتغل ب 4 سلندر ) مش عارف ده تفسيره ايه!!