الميجان ومواقفها البايخه

[أسامه الحسيني]

النهارده كنت رايح اجيب طلبات للبيت من الحي العاشر مدينة نصر
وبعد ما جبت الحاجات الى محتاجها وجاء ادور العربيه العربيه تدى مارش ومش راديه تدور
رحت فاكك خرطوم البنزين الى داخل على الفلتر واجى ادور ما بيجبش ولا نقطه بنزين قلت خلاص طلمبه البنزين عملتها معايا
قلت اشيك على الفيشه بتاعتها – الصدمه للاسف نسيت شنطه العده فى البيت عندى – معرفتش افك الحديده الى فوق الطلمبه قلت اشيك على الفيوز بالنظر للاسف معرقتش اوصل لفيوز الطلمبه بس شيكت على الفيوز الى تحت الدركسيون شمال وما لقيتش حاجه تالفه
قلت اروح ادور على ميكانيكى فى منطقة صقر قريس الى فى الحي العاشر يجي يبصلي على الطلمبه واجي اقفل العربيه مش راديه تقفل (السنتر مش شغال اهوا دا الى كان ناقص ) وبقيت فى حيره اسيب العربيه مفتوحه ولا اقعد جانبها ولا اجيب ونش واطلع بيها على صقر قريش الى فى المعادي
المهم دعيت ربنا يحفظ العربيهوسيبتها ورحت اودر على ميكانيكي – الساعه كانت تقريبا 10.5 صباحا الكل كان قافل و لقيت محل قطع غيار بتاع رينو اسمه الفرسان سألته عن ميكانيكي رينو دلني على واحد اسمه ايمن الخواجه بعد ما وصلتله لقيت الصبي بتاعه هوا الى موجود وبحكيله ان الطلمبه مش مخرجه ولا نقطه بنزين قالى يبقي محتاجين طلمبه جديده قلتله ما يمكن المشكله فى الكهرباء لان كمان السنتر مش شغال راح قايلي طيب افصل كابل البطاريه بتاع 10 دقايق ووصله تانى هتلا قي العربيه اتبرمجت من تانى وكله بقي تمام ولو ماشتغلتش تعالالى وانا اجيب عده واطلع معاك
طبعا لما قالى الكلام دا قلت عليه كفتجي ما الطلمبه ومال البرمجه المهم قعدة ادو على محل بتاع عدد لغايه لما لقيت واحد بتاع عده وجبت منه الاتي
طقم الن نجمه 35 ج
بنسه 18 ج
مفتاح بلدى 10 بـ 5 ج
مفتاح بلدى 13 بـ 7 ج
مفك صليبه 7 ج
مفك عاده 7 ج
وطلعت على العربيه – الحمد لله لقيتها لسه موجوده هههههههههه - وفكيت الغطاء الحديد الى فوق الطلمبه وشيكت على الفيشه لقيتها راكبه كويس رحت فاكك خرطوم البنزين الى خارج من الطلمبه وادور الطلمبه ميته تماما
قلت اجرب كلام الميكانيكى يمكن يطلع صح مع انة مش مقتنع فكيت الطرف السالب بتاع البطاريه وقلت بالمره اشيك على الفيوز الى جنب البطاريه لكن للاسف لقيت كل حاجة مظبوطه رجعت كابل البطاريه بعد ما عدا اكتر من 10 دقائق وجربت ادور تانى الطلمبه برده ميته
اتصلت بصديق لقيا اخد رقيه قالى وصل سلك مباشرة من البطاريه للطلمبه لو طلعت بنزين يبقي مشكله كهرباء – وتجيب كهربائي يبصلك عليها - لو ما طلعتش يبقي مشكله في طلمبه – وتجيب ميكانيكي يبصلك عاليها كلام محترم
سيبت العربيه تانى ورحت جبت الاتى
5 متر سلك ترمو بلاستيك 2x 1 مم بـ 10 ج
لفة شكرتون 1.5 ج
ووصلت السلك من البطاريه وجيت عند الطلمبه لقية اربع اسلاك
2 تخان واحد اسود فى ابيض والتانى برتقالى فى ابيض
2 رفعيين مش فاكر الوانهم
رحت متصل بالاسطى عادل زوايا علشان اعرف فين السالب قالى الاسود هوا السالب
رحت موصل السالب بالاسود وملمس الموجب بالبرتقالى لقيت الطلمبه شغاله زى الفل وبتلع بترول ههههههه
قلت خالاص اروح ادور على كهربائي يجي يبص على الكهرباء لقيت صديقي بيتصل بيا وبيقولى ممكن يكون حساس الكرنك يكون باظ وهوا الى قاطع كهرباء عن الطلمبه (تخمين مش اكتر )فقلى انت ممكن تسيب التوصيله وتجرب تدور لو اشتغلت معاك امشي بيها وروح لكهربائي يبصلك عليها – بصراحه فكره فى الجون – الحمد لله جربت ادور دارت معايا ورحت طالع بيها على ناصر الكهربائي الى فى صقر قريش المعادى الراجل عجبته اوى الفكره انك موصل الطلمبه مباشرة من البطاريه وبالكشف لقي ان السلك الموجب الى رايح للبطاريه قاطع من جنب البطاريه راح مصلحه فى دقيقه وخد 20 ج مصنعيه
وبالنسبه للسنتر مشى شويه مع الفيوز لقي كلها سلميه قالى معلش بعد العيد علشان عنده زحمه قلتله لا انا بركن العربيه فى الشارع ومينفعش اسيبها مفتوحه
لا ولا يهمك وراح موارينى ازاى اقفل العربيه بالمفتاح الى موجود مع الكارت – اخ راحت الفركة دى ازاى عن بالى - مع انى عارفها سبحان الله وعلى فكره لما بدوس لك من الريموت الشنطه بس هي الى بتقفل
اسف على الاطاله بس قلت اشرح بالتفصيل علشان الكل يستفاد
بالمناسبه لما سألت اكلهربائي الى كان بيدور على فيوز السنتر فين فيوز الطلمبه قالى مالهاش وقعدت ادور فى السيرفس مانوال عن فيوز الطلمبه للاسف ما وصلتش لحاجه
ثانيا دا رقم تليفونى – 01001123862 اخوكم اسامه الحسيني - لانى بجد كنت محتاج اى حد يقلى اعمل ايه فى الموقف البايخ دا وخصوصا اننا داخلين على اجازة عيد وكل سنه وانتم طيبين وان شاء الله بعد العيد اقولكم عملت ايه فى موضوع السنتر

[hamo81]

الحمد لله أنك عرفت تطلع من الموقف البايخ ده والواحد مع الوقت بيتعلم من المواقف
وقدر الله وماشا فعل

[ahmedfouad]

الله ينور والف شكر على التجربة

[midooo_119]

شكرا لنقل التجربه .. انا واحد صاحبى لسه بايع الميجان بتاعته و جاب لوجان عشان مشاكلها

[أسامه الحسيني]

المشكله دلوقتى اني شغال بالمفتاح و الباب الخلفى مش راضي يفتح ولا من بره ولا من جوه من بعد ما قفلته حد عنده فكره افتحه ازاى ؟

[Moratoz]

الحمد لله ان ربنا وفقك ومداخلتي في موال قطر العربيه او رفعها علي ونش واهو استفدت من العده

[dodylife]

المشكله دلوقتى اني شغال بالمفتاح و الباب الخلفى مش راضي يفتح ولا من بره ولا من جوه من بعد ما قفلته حد عنده فكره افتحه ازاى ؟

ممكن تفتح القفل الخلفي للأبواب من مفتاح قفل امان الأطفال اللي في باب السواق اللي بعد مفاتيح رفع الزجاج الاربعة ، يعني تقفل وتفتح منه وبعدها هايفتح معاك

[broadband]

الموضوع ده منتشر فى النوبيرا و الفيرنا و الاوبل
اى عربية فيها طرمبة كهرباء احتمال انها تضرب منك وارد و حتنام جنبها

انا ما اعتقدتش ان الميجان بس فيها العيب ده

انا لسه امبارح جى من السخنة و كنا 3 عربيات و فيهم فيرنا و راحت قاطعة طرمبة عند مدخل طريق القطامية و اضطررنا نقطرها و لغاية دلوقتى لسة متصلحتش

عموما العدة مفيدة

[medo_molto]

نفس الموقف العربية وانا ماشى لقيتها وقفت لوحدها وطلعت ماسج اختار لك بارك وركنت ودورت تانى دارت وبتعملها كل فترة تقف لوحدها وانا ماشى بس بيبقى على السلانسية مع العلم مغير البوجيهات والفلاتر كلها من كام يوم وكاشف كمبيوتر وكلة الحمد لله تمام ...بس امبارح عملتها ومش راضية تدور مش عارف اعمل اية بقى انظف طلمبة البنزين ولا بلاش افكها والعب فيها يا وحوش ولا دى مشكلة كهرباء ؟

[medo_molto]

جبت كهربائي وطلع حساس كرنك ودور العربية وكلة تمام الحمد لله بس العربية بتفصل لوحدها أما دورتها وسبتها ربع ساعة قالي في مشكلة في الضفيرة عندك السلوك كلها سايحة تقريبا :( مش عارف شغل الضفيرة دا صعب ولا اغيرها ولا اية؟

[أسامه الحسيني]

ممكن تفتح القفل الخلفي للأبواب من مفتاح قفل امان الأطفال اللي في باب السواق اللي بعد مفاتيح رفع الزجاج الاربعة ، يعني تقفل وتفتح منه وبعدها هايفتح معاك

المشكله يا اخي ان السنتر لا يعمل على الاطلاق سواء من الريموت او من قفل امان الاطفال او زرار القفل الداخلى بس الحمد لله طلع العيب من فيوز السنتر وكله بقي تمام

[تامر.محمد]

بصراحة الله ينور عليك :)
عجبني اوي انك شمرت دراعك و غطست و بصيت على كل حاجة بنفسك و وقت ما تقف معاك تروح مستعين بصديق و دااااااايس
بجد الله ينور
اما فكرة سلك من البطارية للطرمبة دي تحفة لأبعد حد , و انا عن نفسي بعد تجربتك دي بانصح الناس ان السلك ده يتعمل و يتحط سويتش مثلا في نصه , او يتساب مفصول حتى , عشان ساعة الزنقة لا قدر الله الواحد يوصله و يدور و يطلع

استفدت من تجربتك جدا جدا جدا و الله :)

[أسامه الحسيني]

بصراحة الله ينور عليك :)
عجبني اوي انك شمرت دراعك و غطست و بصيت على كل حاجة بنفسك و وقت ما تقف معاك تروح مستعين بصديق و دااااااايس
بجد الله ينور
اما فكرة سلك من البطارية للطرمبة دي تحفة لأبعد حد , و انا عن نفسي بعد تجربتك دي بانصح الناس ان السلك ده يتعمل و يتحط سويتش مثلا في نصه , او يتساب مفصول حتى , عشان ساعة الزنقة لا قدر الله الواحد يوصله و يدور و يطلع

استفدت من تجربتك جدا جدا جدا و الله :)

متشكر جدا على مشاركتك
و بصراحه سلك كهرباء بـ 10 ج وفر على بهدله الونش وفى الاول والاخر كلنا بنتعلم من بعض والتوفيق من عند الله

[تامر.محمد]

بالمناسبة انا برده مقيم في مدينة نصر فوقت الزنقة لا قدر الله قول غالبا هابقى قريب ان شاء الله

[أسامه الحسيني]

بالمناسبة انا برده مقيم في مدينة نصر فوقت الزنقة لا قدر الله قول غالبا هابقى قريب ان شاء الله

ان شاء الله نتقابل من غير زنقه انا سامن فى شارع العياده زهراء العاشر ويشرفنى مقابلتك