ايه رايكم في الميجان 2008 دي

[Eng Yasser]

سؤال للساده عشاق الميجان معروض عليا عربيه ميجان 2008 فابريكه من الداخل ومن الخارج( عدا اكصدامين ورفرفين وباب ) عداد 82 الف كيلو لونها جراي غامق تحتاج بعض السمكره الخفيفه والرش للاكصدامات والاجناب مطلوب فيها 70 الف اتوماتيك طبعا
ياتري السعر دا معقول ولا عالي
وشكرا للجميع وعواتكم بالتوفيق

[mr_sese]

سؤال للساده عشاق الميجان معروض عليا عربيه ميجان 2008 فابريكه من الداخل ومن الخارج( عدا اكصدامين ورفرفين وباب ) عداد 82 الف كيلو لونها جراي غامق تحتاج بعض السمكره الخفيفه والرش للاكصدامات والاجناب مطلوب فيها 70 الف اتوماتيك طبعا
ياتري السعر دا معقول ولا عالي
وشكرا للجميع وعواتكم بالتوفيق

عرربيةتحفة المشكلة فى قطع الغيار

[Eng Yasser]

والله انا محتار في ناس بتقولي توكل علي الله عربيه كويسه وهتريحك خصوصا اني بسافر اسبوعيا
وناس بتقلقني وبتقولي ابعد عنها فمش عارف اخد قرار

[sameh fathi]

زيى بالظبط مش عارف اخد قرار عموما لو حد دلك على حاجة قولى انا كمان علشان عاوز اجيب عربيه ومش عارف اختارها ولا لا

[Mido Casper]

الميجان اللي اشتراها بيشكتي من كتر اعطال الكمبيوتر ف هي دي ف نظري مشكله الميجان بس

[Ahmed Selim]

مشكلة الميجان أن اللى أشتراها من الزيرو مش هو اللى راكبها دلوقتي

العربية سعرها نزل و فيه ناش أشتريتها بسعر قليل على إعتبار أنها فيرنا أو لانوس ( مع كامل الأحترام ليهم طبعاً) و أتعاملت معاها على الأساس ده......بينما هي زيها زي أي عربية أوروبي محتاجة صيانة و متابعة و قطع غيار كويسة بدون إسترخاص.

لو جبت ميجان متحافظ عليها هتتبسط بيها و لو جبتها متهانة هتطلع عينك.

و قطع غيارها عادية لو هتقارن بعربيات فى نفس الفئة زي الكورولا و السيراتو و الألنترا.

و أخيراً.......70 ألف قليل على 2008 ماشية 80 ألف و حالتها نضيفة.

ده النضيف من 2005 بيتباع من 60 ل 65 ألف جم.

[تامر.محمد]

السعر قليل
لو منك هاقلق
عموما لو قررت تشتري لااااااااااااازم تكشف في التوكيل الاول

بالنسبة لاجابة اسئلتك فأنصحك تقرا الكام موضوع دول

http://www.nilemotors.net/Nile/433746-a.html

http://www.nilemotors.net/Nile/385861-2.html

http://www.nilemotors.net/Nile/424796-a.html

http://www.nilemotors.net/Nile/399181-2.html

[Eng Yasser]

شكرا ليكم يا جماعه عالاراء اولا بالنسبه للسعر انا هاخدها من واحد صاحبي معاه تقريبا من اربع سنوات وهو فعلا كان محافظ عليها وكان عاوز يبعها ب75 الف
انا ان شاء الله ضامن حاله العربيه باعتبار انها مش من معرض او من حد غريب
انا بتكلم في المبدأ نفسه هل فعلا هتتعبني في السفر لانه كان كل مشاوريه جوا البلد وكمان كان بيعملها صيانه دوريه

[تامر.محمد]

لو حالتها كويسة يبقى زيها زي اي عربية

اللي فينا معاهم العربية بحالة كويسة بيسافروا بيها عادي

[Eng Yasser]

شكرا ا- تامر انا بجد استفدت كتير وانا صليت صلاة استخاره ومرتاح للموضوع وهتوكل علي الله واخلص دعواتكم جميعا بالتوفيق

[تامر.محمد]

اهم حاجة اكشف في التوكيل الاول حتى لو هي عربية صديق

ربنا يوفقك ان شاء الله , حضرتك مقيم في القاهرة او اسكندرية صحيح ؟
برده لو في محافظة غيرهم اسأل الاول فيه صنايعية رينو في محافظتك ولا لأ

[Eng Yasser]

انا موجود في القاهره في التجمع الخامس وعارف التوكيل اللي في الرحاب ان شاء الله هكشف عنده وربنا يكرم

[تامر.محمد]

اللي في الرحاب فرينش موتورز , مركز خدمة معتمد
عموما التوكيل (القطامية - العبور) كشفه اغلى و اكثر دقة , و لازم بالحجز