مشكلتين فى داستر 2015

[MohamedElRayes]

أنا عملت بالعربية حوالى 580 كيلو و لاحظت ان عند لف الدركسيون و العربية واقفة بتحصل رجه جامده في الكاوتش الامامى. برضو وجدت ان على الغيار الثالث اول ما عداد الار بى ام يعدى 2500 لفه بتحصل نتشة و كأن العربية كانت مخنوقة و فاقت و صوت مروحه التكيف بيعلى معاها حتى لو كنت موطى التكييف. هل ده طبيعى و حصل مع حد من الأعضاء الكرام في عربية داستر ولا في مشكلة؟ و التوكيل بيقول مفيش صيانة على 1000 كيلو فهل اطلب منهم اتغيير الزيت و الفلتر بردوه على 1000ك؟
أفيدونى يا اهل الخبره

[Land_Cruiser]

بص حضرتك لما تبقي العربيه واقفه و تكسر العجل بيبقي في رجه بس خفيفه و هتلاقي ال rpm ارتفع عن النصف شرطه اللي بيبقي واقف عندها شويه و بعدين بيرجع تاني فده هو الطبيعي بتاعها. موضوع النتشه ده احتمال يكون من البنزين لانه مش موجود في الطبيعي ولذلك اسهل حاجه تجرب تحط بنزين من بنزينه تانيه نضيفه و شوف هيفرق معاك و لا لأ و بعدها تقدر تقرر. اللي عايز أقوله لحضرتك ان العربيه بيتحسن أداؤها كتير من بعد ال ٣ الاف كيلومتر الاولي و هتحس انها كأنها خلصت تليين و بتحسن في السحب و استهلاك البنزين . حاجه كمان احب انصحك بيها و هي ضبط الهوا في الكاوتش لانه بيبقي زياده في الغالب و اخيراً لو كنت شاكك في اي حاجه كلم التوكيل و احجز ميعاد صيانه لو حاسس ان الموضوع زياده علشان تطمن لو مش هتقدر تستني صيانه ال ٥ الاف كيلومتر

[MohamedElRayes]

شكرا جزيلا, بس هل اغير الزيت و الفلتر بعد الالف ولا استنى صيانه ال 10,000

[city_ct]

أنا عملت بالعربية حوالى 580 كيلو و لاحظت ان عند لف الدركسيون و العربية واقفة بتحصل رجه جامده في الكاوتش الامامى. برضو وجدت ان على الغيار الثالث اول ما عداد الار بى ام يعدى 2500 لفه بتحصل نتشة و كأن العربية كانت مخنوقة و فاقت و صوت مروحه التكيف بيعلى معاها حتى لو كنت موطى التكييف. هل ده طبيعى و حصل مع حد من الأعضاء الكرام في عربية داستر ولا في مشكلة؟ و التوكيل بيقول مفيش صيانة على 1000 كيلو فهل اطلب منهم اتغيير الزيت و الفلتر بردوه على 1000ك؟
أفيدونى يا اهل الخبره

بما أن حضرتك معك داستر 2015. ربنا يبارك لك فيها و يكفيك شرها، ممكن تفيدنى فى الاتى:
هل صاج السيارة مجلفن و معالج ضد الصدأ؟
هل فيها حساس على ضغط الهواء فى الاطارات؟
هل يوجد مخارج للتكيف موجه للكنبة من أسفل الكراسى الأمامية؟

[Land_Cruiser]

شكرا جزيلا, بس هل اغير الزيت و الفلتر بعد الالف ولا استنى صيانه ال 10,000

لو التوكيل قال لحضرتك مفيش غيار زيت و فلتر بعد الالف يبقي مفيش داعي لتغييرهم بعد الالف و (ممكن تكلم التوكيل تتاكد تاني ) ولو كده يبقي اول صيانه تروحها تبقي بتاعه الخمسه الاف كيلومتر و دي تربيط عفشه و كشف علي سوائل السياره و دي مجانيه بعدها تأتي اول صيانه بجد و هي صيانه ال ١٠ الاف و دي فيها تغيير زيت و فلتر و بوجيهات و تربيط عفشه

[Super_Star_h]

مافيش داعى تغير زيت دلوقتى خليه شغال
واصبر لغايت ميعاد الصيانه وان شاء الله العربيه ادائها هيتحسن

[stonecoldmido5]

زي ما قال لحضرتك الاستاذ land cruiser مع ان العربية في مرحلة التليين و العربية ادائها بيختلف تماما بعد 3000 كم

[MohamedElRayes]

بما أن حضرتك معك داستر 2015. ربنا يبارك لك فيها و يكفيك شرها، ممكن تفيدنى فى الاتى:
هل صاج السيارة مجلفن و معالج ضد الصدأ؟
هل فيها حساس على ضغط الهواء فى الاطارات؟
هل يوجد مخارج للتكيف موجه للكنبة من أسفل الكراسى الأمامية؟

- انا معرفش بصراحه اذا كان الصاج مجلفن ولا لأ بس هو طبعا معالج ضد الصدأ بطريقة ما لان العربيه دى مصممه اصلا للطرق الوعرة اللى فيها طينه و مية او جليد
- العربية مافيهاش حساس لضغط الهواء بس لو حضرتك جبت العربية دفع رباعى هينور لمبة ال 4wd لو اختلف الضغط الامامى عن الخلفى (من كتالوج العربية)
- بالنسبة لفتحات التكييف هى امامية فقط و تحت الكراسى فاضى بس حضرتك مش هتحتاج فتحات اضافيه لان التكيف بيحس بيه الركاب فى الكنبة الخلفيه بدرجه جيده و معروف قوه تكييف الداستر

و لو فى اى استفسار ان تحت امرك

[MohamedElRayes]

شكرا لكم جميعا, انا غيرت البنزينة بس النتشة ما زالت موجوده مع زياده صوت الهواء من فتحات التكييف لما ال rpm بيعدى 2500 على الغيار الثانى و الثالث، أنا حجزت فى فرع ابو رواش علشان اتطمن ان مفيش مشكله بس الغريب انه مرضيش يحجزلى فى المقطم بداعى انه للصيانات الدوريه فقط بس انا حاسس ان السبب هو الزحمة.

[MohamedElRayes]

أنا روحت التوكيل اللى فى ابو رواش و قولتلهم على المشاكل اللى فى العربية و النتيجه كانت كالأتى:
- مشكله الرجه فى الدركسيون حلوها و المهندس قالى انهم فكوا علبة الدركسيون و ظبطوا ضغوط الزيت
- مشكله النتشه على الغيار الثانى و الثالث لم تحل و كل اللى عملوه انهم خلوا البنزين مينخفضش عن الموتور بسرعه لو رفعت رجلى من على دواسه البنزين يعنى الاقى عداد ال rpm بيرجع من 3000 لفة ل 800 لفه ببطئ لما ارفع رجلى من على دواسة البنزين. و النتشه دى مش بتظهر الا و انا دايس على دواسه البنزين جامد بس مش لدرجة القرص على الموتور
- مش عارفين صوت الصفارة اللى بتطلع من هوايات التكييف لما ال rpm يوصل تقريبا ل 3000 ده ايه و بيظهر على كل النقلات و اللى بيصاحب النتشه على الغيار التانى و الثالث
- انا قعدت هناك من الساعه 8:15 ص الى الساعة 3 عصرا و كل شويه اشوفهم طالعين بالعربية يجربوها و يرجعوا على الورشه تانى و انا حسيت انهم مش فاهمين حاجه و خصوصا انى قابلت واحد محترم كان عنده مشكله فى التكييف و لما صلحوه فضل بردو يطلع نفس صوت الصفاره على rpm 3000 و قالوله مش عارفين ده ايه

[Land_Cruiser]

حضرتك انتظر علي موضوع النتشه ده لحد ما العربيه تكمل ال ٣ الاف كيلومتر الاولي و بعد كده هتحس ان شاء الله باختلاف في الاداء و بعدين في طريق السواقه نفسها ما تكبسش بنزين مره واحده و خللي النقله بين rpm 3 و 3.5