انا حيران موت بين الفئتين فلوانس

[ama3d]

انا عايز اعرف الفرق بين الفلوانس الي ب 179 والتانية 189 وهل يستحق ادفع الفرق ده 10 جنيه
وكمان انا قريت كتير مقارنات في المنتدى بين العربيات اه انا استقريت على الفوانس
انا كنت بقارن بينها وبين السيفك و الكورولا و الاوبل استرا
كل مقول للناس على الفلوانس و بين العربيات التانيه الى كتبتها يقولي بتهرج ايش جاب الفلوانس الي كورولا ولا سيفك دول احسن بكتير
فبجد انا قرفت من كتر الحيرة بقيلي على الحال ده اكتر بقيلي شهور

[ama3d]

يجماعة 39 مشاهد ولا واحد رد عليا ارجوكم حد يرد عشان انا هنفذ الاسبوع ده

[mostafa3000]

قبل ما تفكر في الفئة لازم تكون مقتنع الاول بالماركة نفسها
الاول قرر انت مقتنع بالفلوينس والا دماغك رايحة الهوندا او التويوتا

[heeshooheeshoo]

أخى الفاضل .. هذا رابط مشاركة أرجو أن تجد بها ما تريده

http://www.nilemotors.net/Nile/403673-2014.html#post3875408244

مع ملاحظة أن الفئة الهاى لاين بــ 189 ألف ليست special order ويزيد عن ماورد بالمشاركة رشاشات ماء للكشافات الأمامية .
وفى رأيى الشخصى أن فرق 10 آلاف جنيه يساوى المميزات المضافة وأهمها 6 إيرباج بدلاً من 2 (أمان أكثر) - مصابيح أمامية زينون بعدسات مزودة بضبط تلقائى للإرتفاع ورشاشات ماء ( يعنى لست مضطرا لتركيبها بمعرفتك وتلعب فى الكهرباء) - فرش جلد محترم جداً
وفى النهاية موضوع المميزات ده بيفرق من شخص لآخر طبقاً لإهتماماته وإحتياجاته والقرار لك أولاً وأخيراً
لا تتعجل وإدرس الموضوع جيداً وقارن بين الفئات سواء داخل الماركة الواحدة أو بين الماركات المختلفة طبقا لإحتياجاتك وميزانيتك خصوصاً أن ماذكرته من ماركات من أفضل السيارات فى هذه الفئة ولاغبار عليها فنياً وربنا يوفقك لما فيه الخير
وتقبل تحياتى ،،،

[haisam ali]

من رأيي باذن الله واعتقادى الشخصى ان اللى مايجيبش العربيه كامله كله حاجه يبقى غلطان ... تحس ان العربيات الكاملة بتبقى غير العربيات النص كماليات حتى فى التقفيل ... أتكل على الله ولا تتردد وباذن الله خير

[mfraig]

بص يسيدي نقسم الموضوع نصين:
1- انت هتجيب ماركة ايه اصلا
رأيي الشخصي لو السيفيك عاجباك شكلا من بره وجوه هاتها خصوصا ان السيفيك الشكل ده من بره مش حلوه وفي اجماع على ان الديزاين سيء للغايه بس لو عجباك شكلا اتكل على الله عربيه ثبات رائع موتور i-vtec سحب لايضاهيه احد
ولو زي حالاتي مش عجبك شكل السيفيك يبقى انصحك بالفلوانس موتور وفتيس وتكيف من نيسان اعتماديه بشكل كبير وتقفيل اوروبي رائع

2- اذا استقريت عالفلوانس هتجيب انهي فئه
انا شخصيا ممكن ادفه 10000 زياده عشان اجيب فئة ال 180 بدل فئه 170 عشان فتحة السقف لكن مش هدفع 10000 عشان قرش جلد وزينون لكن لو الفلوس مش فارقه هات ان شاالله حتى تجيب اللي ب 200

[ama3d]

اولا متشكر ليكو بجد
دلوقتي في الفئة بتاعت 188 دي فيه
1- زياده فرش جلد كامل
2- زنيون
3 - 6 اير باج
صح كده

اولا عايز اعرف حاجه هوا موضوع زينون ده بيفرق وايه هوا الفرق بينه وبين الفوج ليت انا اسف مش فاهم اوي
اما موضوع الفرش الجلد مش فارق خالص
بس فكرة 6 اير باج دي فعلا تفرق اوي ??

بنسبه للسيفك فعلا انا مضايق من شكلها جدا الخارجي بس الفكرة انها هوندا وكمان انا مش بتاع شد خالص
و قريت عن الكورولا كتير و ركبتها بس معجبتنيش من جوه

[mfraig]

الزينون هو اضاءة الزينون المعروفه :))))
الاضاءه البيضه القويه وده موجوده في نور الفوانيس نفسها مالهاش علاقه بالفوج لايت لان الفوج لايت باللليدات موجود في الفئتين دول
ال6 اير باج زيده اوي وانا شايف ان عربيات كتير فيها 2 ايرباج وكفايه جدا ده فيه عربيات الايرباج التانيه اصلا بتنزل في الهاي لاين بتاعها
لو مش عجباك السيفيك صعب الواحد يركب عربيه شكلها مش عاجبه هيفضل دايما حاسس انه متضايق كل مايشوفها اتكل على الله وهات الفلوانس اي فئه فيهم الاتنين هايلين

[yasser100]

انا عايز اعرف الفرق بين الفلوانس الي ب 179 والتانية 189 وهل يستحق ادفع الفرق ده 10 جنيه
وكمان انا قريت كتير مقارنات في المنتدى بين العربيات اه انا استقريت على الفوانس
انا كنت بقارن بينها وبين السيفك و الكورولا و الاوبل استرا
كل مقول للناس على الفلوانس و بين العربيات التانيه الى كتبتها يقولي بتهرج ايش جاب الفلوانس الي كورولا ولا سيفك دول احسن بكتير
فبجد انا قرفت من كتر الحيرة بقيلي على الحال ده اكتر بقيلي شهور

اللى يقولك كده اسأله ببساطه الفرق فى ايه و يفيدك بعلمه و خبرته :) و لو قلتلهم هاشترى السيفيك هايقولولك برضه انت بتهرج ؟ ايه اللى جابها للفلوينس و الكورورلا و الاسترا . ههههه . طبيعة شعب ﻻزم يحط بصمته

[Land_Cruiser]

بالنسبه للفلوانس و لا ماركه تانيه ده يتوقف علي احتياجات حضرتك و هي موجوده فين اما السعر فمش هيفرق كتير بين الاختيارات اللي حضرتك قولتها. طبعا كويس جدا ان حضرتك تاخد رأي الآخرين بس اللي بيقول الماركه دي كويسه و لا وحشه يبقي بناء علي أسباب منطقيه خاصه بالموديل اللي حضرتك ناوي تشتريه و مش بناء علي الاكليشيهات المحفوظة إياها اللي هي الياباني كله ممتاز اما الفرنساوي فكله مشاكل و ملوش قطع غيار مثلا :) الكلام ده ما بقاش صحيح لانه كلام قديم و بعدين مثلا الكورولا و الفلوانس واحده اصلها ياباني و التانيه فرنسي إنما الموديلات الحاليه الاتنين تقفيل تركي و عامه دلوقتي هتلاقي عربيّات قليله قوي هي اللي بتيجي فعلا من مصانع بلادها و بتبقي غاليه قوي او فاضيه. يعني باختصار يجب ان تسمع جميع النصائح من الناس بس يبقي معاها تبرير للاختيار بالنسبه للموديل اللي انتاج السنه دي مش مثلا يقولك الكورولا و هو بيتكلم عن موديل قديم مثلا او كلام عام الكلام ده بيبقي مضلل في احيان كتير.
انا مثلا لو هارشح لحضرتك الفلوانس هيبقي علشان سياره اعتماديه قليله الأعطال و بما ان الشكل الحال فيس ليفت فهي زي الموديلات اللي قبلها و في نفس الوقت واسعه و كمالياتها كتير ووسائل الأمان فيها عالي و تقفيلها جيد. لو استقريت عليها و كانت ميزانيتك تسمح يبقي خليك في الهاي لاين أكيد و أستفيد من موضوع ال ٦ ايرباجز لانه اهم فرق و يأتي بعده الكماليات الزياده اللي تمنهم أغلي من الفرق ده و في الاخر لو ركبتهم اذا كان ينفع اصلا مش هيبقوا بتوع الفابريكه لو ركبتهم بره و اغلي زي ما قلتلك و بالمناسبه الفروق بين الفئات مش هتحس بيه اول ما تجيب العربيه لأنك هتبقي فرحان بيها بشكل عام إنما هنبدأ تحس بالمشكله بعد ما تتعود عليها و تقول يا ريتني كنت جبت الفئه الاعلي و تبدأ تنسي مزايا العربيه و ما تشوفش غير الكماليات اللي ناقصه و بعدين في نقطه مهمه و هي ان الفلوس دي مش هتترمي في الارض لأنك هتاخد بيهم حاجات اضافيه و كمان ساعه البيع فرق الكماليات ده بيفرق في سعر البيع و بيخليه اعلي من الفئه الأقل يعني مش كانك مش هتدفع العشره كلهم و الموضوع نسبه و تناسب يعني

[S O P H O S]

شايف الفئة الاعلي لو الميزانية سامحة
كده كده بتشتري عربية علي فترات بعيدة

[mfraig]

اللي يقولك خليك في الياباني قوله هجيب سوزوكي ياباني :)