بين تجديد الميجان و شراء الفلوينس - موضوع للمناقشه

[ابو فاطمة]

والله انا هقول لحضراتكم علي حاجة عشان اكون صريح معاكم
مبدئيا انا كنت راكب دبانة 1992 مفيش اختها في مصر قبل ما ابيع العربية كانت مانوال
و1600 يعني تسارعها عادي اه هو البي ام لما بتتسارع من 0 الي 100 بتتسارع بنفس القدر من 100 الي 200 وطبعا ثبات وتقل فوق الوصف

بس عربية سواقتها بتجيب اجهاد اه والله يعني كنت انزل منها اركب مع صاحبي الميجان احس براحة ووسع وسلاسة في السواقة اما البي ام عايزة واحد متحفز علطول
يعني مثلا كنت بمشي بعربية صاحبي ع الغيار الرابع مثلا ع سرعة 60 مبتقولش لا مع ان السرعة بطيئة ع الغيار الرابع
البي ام بقي لأ لازم تشبع الغيار للاخر سرعة التالت لازم تجيب اخرها وبعدين تنقل وهكذا غير كده مينفعش

البي ام عربية غبية جدا وبعد ال120 بتتحول فعلا وتحس انك راكب علي موتور بس بالرغم من اني كنت راكب اضعف موتور في البي ام 1600 m40. بس طبعا مجرد انك تمشي بيها 180 ولمدة ربع ساعة او نص ساعة لو الطريق ساعدك متواصل دون ادني قلق ده في حد ذاته نجاح
وانا كنت راكب قبلها موديل 88 بس موتور 2500 cc طبعا بنزين عالي بس اداء خرافي ينسيك تمن البنزين
العربية لما كنت بدوس شوية زيادة وانا طالع بيها كانت بتحفر في الارض
بس بردو اجهاد وارهاق ف السواقة وبتنزل منها كانك كنت في موقعة:)
هي البي ام كده ومحدش بيركبها مبيجريش ومبيقرصش ليها استايل سواقة معين ....اما طبعا البي ام الشكل الجديد اللي بعد التسعينات وانت طالع ده قصة تانية ومريح وبتسوقه زي مانت عايز
الميجان بالذات لما بركبها بعد ما بكون في مشوار بعربيتي بحس انها عربية ترتاح وانت سايقها
وبالمناسبة تسارعها مش وحش
والله زي البي ام ال316 الm40 اللي هي تقريبا 105 حصان اللي هو اضعف موتور ،bm طبعا متقدرش تنافس تسارع في مواتير bm اعلي من كده حتي لو كانت 1600 بردو فتسارع الميجان زي تسارع الموتور ده ويمكن اعلي شوية
انما هي القصة ان الميجان مش هتسد لو السرعة وصلت ل180 او 190 مع البي ام لان الثبات فرق شاسع بين الاتنين
وخلي بالكم انا بقارن بي ام من 91 الي 97 مواتير 1600 بالميجان
انما اي موديل اعلي او اي موتور تاني تاني غير ال1600 مفيش وجه مقارنة مطلقا

انما بالرغم من اني اللي معايا للعربيات بيبقي فب رنج ال70 او 75 الف بس لو في ميجان زيرو بس نفس الشكل بتاع ال2 او لو فيه ال2 زيرو هتصرف واشتريها علطول
انا ركبت كذا عربية
فيات وهوندا وبورا وبي ام والميجان بتاعت صاحبي دي
بصراحة عربية حكاية
بس حلها انك تجيبها زيرو وتصينها في التوكيل عشان ترتاح او بقي تدور ع حالة شاذة بفواتير التوكيل وكيلو متر قليل

ده رد من واحد ركب البي ام ال1600 والميجان

[dreslam]

حالتي انا كانت مقاربه لحالتك لكن مع اختلافات جوهريه
اشتريت ميجان من 2011 كانت موديل 2009 وعامله 100 الف كيلو حالتها فوق الممتازه رغم الكيلومتر العالي اشتريتها على 75 الف..جيت السنادي لقيت اني محتاج اغير علبه البيئه وجوز مساعدين على طنابير على مش عارف ايه رغم ان مازالت العربيه حالتها كويسه جدا...كنت حصرف 6000-7000 جنيه قريبا لاني كنت محتاج اغير كباس التكييف كمان.. العربيه جابتلي 75000 جنيه برضو وقلت لو صرفت المبلغ ده عليها وركبتها سنتين مش حتجيبلي مبلغ كويس...بالاضتفه الى الشكوى الاسريه الحاده من انعدام التكييف اللي حتى لو صلحته حيظل تكييف دون المستوى..دوست على نفسي واشتريت الكروز زيرو والحمد لله مش ندمان وحاسس اني اتصرفت صح اخذا بالاعتبار مصلحه الاسره العليا :)

[El Gen2]

يا نهار ابيض يا جدعان
والله كان معايا bmw e36 ولسه بايعها انهاردة وكنت بفكر اووووي في الميجان

كده خلاااااااااص مش هجيب بسبب وخاصة جملة انكم بتبقوا ماشيين قلقانين تعملها معاكم في السفر

عدم الاعتماديه الى انا بحكى عليها دى جايه بعد 8 سنين من سواقه العربيه.
العربيه من 2006 الى 2010 كنت بدور الصبح و اطلع على شارم الشيخ من غير قلق.

[El Gen2]

حالتي انا كانت مقاربه لحالتك لكن مع اختلافات جوهريه
اشتريت ميجان من 2011 كانت موديل 2009 وعامله 100 الف كيلو حالتها فوق الممتازه رغم الكيلومتر العالي اشتريتها على 75 الف..جيت السنادي لقيت اني محتاج اغير علبه البيئه وجوز مساعدين على طنابير على مش عارف ايه رغم ان مازالت العربيه حالتها كويسه جدا...كنت حصرف 6000-7000 جنيه قريبا لاني كنت محتاج اغير كباس التكييف كمان.. العربيه جابتلي 75000 جنيه برضو وقلت لو صرفت المبلغ ده عليها وركبتها سنتين مش حتجيبلي مبلغ كويس...بالاضتفه الى الشكوى الاسريه الحاده من انعدام التكييف اللي حتى لو صلحته حيظل تكييف دون المستوى..دوست على نفسي واشتريت الكروز زيرو والحمد لله مش ندمان وحاسس اني اتصرفت صح اخذا بالاعتبار مصلحه الاسره العليا :)

اول مره اشوف حد مش بيخسر فى الميجان .... مبروك عليك و يباركلك فى العربيه الجديده باذن الله

[ahmedelfeky]

هو طبعا الموضوع ف الاول والاخر يرجع لامكانياتك وطبعا الزيرو لا يضاهيه اي شيئ + العربيه معاك من 2006 يعني 8 سنين
أكيد التغيير هيكون مفيد وهتقدر تعتمد ع العربيه وماتقلقش منها لو رحت مشوار طويل