حوادث رينو فلونس و عيوب الصناعة

[mnour]

حدث لي حادثه نعدما كنت أركن السيارة امام البيت و كان معي زوجتي والأطفال
فجاة قفزت السيارة فوق الرصيف و لا يمكن التحكم فيها لا فرامل ولا عجله قيادة!!!!
و صدمت سيارة جار و اخيراً وقفت بعد ما اصطدمت بالسور الكمبوند
انا شاكك يكون مثبت السرعة اشتغل لوحده
السياره الان في التوكيل في انتظار التقرير بتاع سلامه السيارة
انا كنت ببحث علي النت و في كلام علي اعطال و تهنيج مثبت السرعة
Please check this site which discuss the sudden acceleration and cruise control faults Sudden Acceleration

http://www.suddenacceleration.com/

[hugan]

كان في موضوع زي ده عن هيونداي اكسنت تقريبا نفس الكلام

[mnour]

رجاء اي حد عمل حدثة مماثلة برجاء المشاركة حتي نتمكن من إثبات المشكلة مع التوكيل

[Hany Saad]

فى كل سيارات رينو....مثبت السرعة مش بيشتغل قبل سرعة 32 كم/ساعة....قبل كده و لا المثبت و لا المحدد بيشتغلوا حتى لو دست على الزراير
معتقدش حضرتك كنت بتركن و سرعتك اعلى من 32 كم/ساعة
ان شاء الله تجد السبب سريعاً و اسف على اللى حصل لحضرتك

تحياتى

[م/أحمد عبد الفتاح]

إللى حصل معاك أعتقد إنه فى الغالب وضع للبوابة إسمه WOT ويعنى Widely Open Throttle وده معناه إن البوابة فتحت للأخر بسبب إشارة غلط جاتلها من الكمبيوتر - وعمر الشركة ماحاتعترف بكده وده مش فى مصر بس لكن فى كل انحاء العالم مافيش شركة إعترفت بكده مع إنها حصلت فى ماركات كتير وأخرها فى عربية فى الإمارات وعلشان تعرف إن الشركات مسيطرة على الميديا محدش قال ماركة العربية

[mnour]

الحادث حصل وانا بركن و في حد من السكان شاف ده بعينه
في عيب صناعه في الرينو

[م/أحمد عبد الفتاح]

أنا متأكد من كلام حضرتك ١٠٠٪ والموضوع ده حصل لماركات كتير - بس إللى أنا عاوزه من حضرتك إنك تكون مستعد لقرار الشركة واللى انا بارجح إنها مش حاتعترف بحصول أى غلطة من الكمبيوتر وحايقولولك "الكمبيوتر مش مسجل أى خطأ (إيرور) لو كان حصل حاجه كان الكمبيوتر سجل الإيرور إللى حصل "
والرد عليهم "هو لما الكمبيوتر بيحصل فيه شورت ولا بيبوظ فى أى عربية بيسجل أى إيرور على نفسه؟ عمرها ماحصلت إن فيه كود لإيرور فى أى عربية فى الدنيا بإن الكمبيوتر فيه شورت أو باظ سواء عطل مؤقت أو عطل دائم ولو عندهم رقم لكود بكده يقولوه" وتقولهم كمان إن إللى حصل أكيد هو الـ wot إللى أنا قولتهولك فى الأول.
كمان حايقولولك " طيب مبطلتش العربية ليه؟" تقولهم إن العربية لوبطلت لاحايبقى فيه فرامل ولادركسيون والعملية حاتتنيل أكتر - ده بالإضافة للوضع إللى حضرتك كنت محطوط فيه والمفاجأه إللى إتعرضتلها لأنه عمرك ماتعرضلته قبل كده.
أنا بس بأحاول أساعد حضرتك على قدر إستطاعتى وإن شاء الله حابحث فى الموضوع ده وأقولك وحضرتك برضه ياريت تتابع فى المنتدى بالمستجدات علشان نرفع من شأن منتديات السيارات فى مصر وتبقى ليها ثقل تقدر تساعد بيه الحالات إللى زى حالة حضرتك ـ زى المنتديات الأجنبية كده. وحمدلله على سلامة حضرتك والأسرة وربنا يوفقك ويقويك.

[Hany Saad]

الحادث حصل وانا بركن و في حد من السكان شاف ده بعينه
في عيب صناعه في الرينو

احنا كلنا مع حضرتك و لو فيه حاجة نقدر نساعدك بيها احنا تحت امرك
طبعاً احنا بنحاول بس نحلل مع حضرتك ايه اللى ممكن يكون حصل ووارد جداً طبعاً انه يكون عيب صناعة
لكن لما قريت الموضوع مرة تانية لقيت كمان ان حضرتك بتقول فقدت السيطرة على الفرامل و على عجلة القيادة
طبعاً زى ما البشمهندس أحمد أفاد أن ممكن أشارة غلط خلت البوابة مفتوحة او كأنك دايس بنزين و انت فعلياً مش دايس
لكن ما زاد الأمر سوء ان كمان العربية مبتستجبش للفرامل و ده كنترول مختلف و عجلة القيادة و ده أيضاً كنترول مختلف
و كأن حصل عطل عام فى جميع أنظمة السيارة فى نفس اللحظة.....
يا ترى حضرتك معاك الفيس ليفت و لا القديمة ؟ و عامله كام الف كم ؟ و هل يا ترى عملت اى اصلاح خارج التوكيل؟

على فكرة احنا بنحاول نفكر مع حضرتك علشان موقفك يبقى اقوى مع التوكيل مش اكتر....و ان شاء الله تحصل على حقك كاملاً و الف سلامة عليك و على العائلة الكريمة

تحياتى

[mnour]

شكرًا علي ألمساعده

[amr elsisi]

هيا البوابة كهربا ولا واير

[Hany Saad]

هيا البوابة كهربا ولا واير

كهربا وبدال البنزين على حساس

تحياتى

[م/أحمد عبد الفتاح]

أعتقد إن لما العربية تكون فول ثروتل للأخر الفرامل مش بتقدر توقف العربية لحظى زى ماتكون بتدوس بنزين وفرامل فى نفس الوقت بس موضوع الدركسيون ده فعلاً يابشمهندش هانى لابد من إن ليه سبب وعاوزين نفكر فيه شوية

[mnour]

السيارة رينو فلونس ٢٠١٢ عمله ٤٥٠٠٠ كم
كل الصيانه تمت في التوكيل

Please check this site which discuss the sudden acceleration and cruise control faults
Sudden Acceleration

[م/أحمد عبد الفتاح]

كهربا وبدال البنزين على حساس

تحياتى

أنا فكرت على فكرة فى موضوع حساس بدال البنزين فى الأول بس إللى أعرفه إن لو حصل شورت فيه العربية بتتحول للـ safe mode أو Home على حسب ماركة العربية ( يعنى بتقل سرعتها كتير علشان تقدر توصلك للبيت أو لمركز الصيانة) علشان كده فكرت فى موضوع البوابة

[mnour]

ان فكر وقت الحادث كان rpm 6000 و انا بكل قوتي دايس فرامل و لكن دون جدواي