مشكلة فى الكليو يا خبراء الكليو

[haithamhasan38]

السلام عليكم
انا معايا كليو 1400 موديل 2004 اتوماتييك
مرة واحدة لاقيت العربية بترجرج على السلانسية
بمعنى انى فتحت الكبوت لاقيت الماتور بيترج فا بيرجرج العربية
ياترى اية السبب

[abdulkhaleq]

ممكن قواعد موتور
او كهرباء مش مظبوطه

[haithamhasan38]

طب لو فى خلل فى لوحة كنترول العربية ممكن تعمل كدة

[abdulkhaleq]

ما اعتقدش بصراحه
صدقني ان شاء الله هتطلع حاجه تافهه
لو حابب اكشف بسكانر الأول

[demonarundo]

ممكن يكون فى بوجيه بايظ , او حساس مش راكب كويس

[haithamhasan38]

الموضوع تطور و بقيت بسمع صوت غريب من الماتورر . لما بدوس بنزين كأن الشكمان مخروم

[abdulkhaleq]

طيب ممكن تحط العربيه على اسكانر الأول وبالمره تكشف عند ميكانيكي رينو ؟

[haithamhasan38]

رايح بكرة ان شاء الله لعماد البيضا ، لان الماتور صوتة عالى و الشكمان بيطلع بخار فيه ريحة بنزين

[abdulkhaleq]

خير ان شاء الله وابقى طمّنا

[ahmed9adel]

ده عيب موبينة. واضح إن فى بوجيه مش بيوصله كهرباء و بيخلى العربية تشتغل ب ٣ بساتم بس. و ده اللى بيعمل الرجة. و ده عيب منتشر فى الكليو عامة. و ريحة البنزيين اللى إنت بتشمه ده نتيجة إنه مش بيتحرق فى البستم بتاعه. تغيير الموبينة سهل قوى بس أنصحك متجبش الموبينة الصينى علشان بتبوظ بعد أقل من سنة. هات التركى أو الأوروبى بتكون فى حدود ٣٠٠ جنيه أكتر أو أقل.

[haithamhasan38]

الله ينور عليك يا باشا
بالفعل غيرت الكويل و العربية ظبطت معايا احسن من الاول
سعر الكويل 210 جنيها ، النوع بوجى كارد ، الصناعه فرنساوى ، الفبريكة بتاع العريية و اخو القديم بالظبط و هو نفس اللى بيركب فى التوكيل
بينفع للكليو 1400 و لوجان و ميجان 99
الف الف شكر على المتابعه منكم يا رجالة

[svneleven]

فين عماد الابيض ده؟و ممكن افحص عنده؟ و هل عنده سكانر؟