حادث بسيط أدى لصوت في شكمان الفلوانس

[marsguy]

السلام عليكم ورحمة الله وبركاته،،،

عربيتي الفلوانس عامله 450 كيلو. النهارده وأنا ماشي على الدائري لقيت سباطة موز كامله واقعه قدامي! للأسف ما لحقتش أفاديها وخدتها في نص العربيه بالظبط :(

أنا كنت فاكر إن ما فيش أي حاجه حصلت ... بس لما مشيت بالراحه إكتشفت إن في صوت كده

لما ركنت لقيته طالع من الشكمان. لما مسكت الشكمان بإيدي الصوت تقريباً راح. أعتقد إن في كلبسه ولا حاجه كانت ماسكه الشكمان وإتكسرت


أعمل إيه؟ أنا كلمت التوكيل وحجزت معاد يوم الحد

ممكن أمشي بيها عادي لحد يوم الحد؟

[marsguy]

سؤال تاني

أنا مأمن تابع شركة طوكيو مارين (نايل تكافل سابقاً). لو لا قدر الله إحتجت أغير حاجه؟ التأمين هو اللي هايدفع؟

شكراً

[noursite]

السلام عليكم ورحمة الله وبركاته،،،

عربيتي الفلوانس عامله 450 كيلو. النهارده وأنا ماشي على الدائري لقيت سباطة موز كامله واقعه قدامي! للأسف ما لحقتش أفاديها وخدتها في نص العربيه بالظبط :(

أنا كنت فاكر إن ما فيش أي حاجه حصلت ... بس لما مشيت بالراحه إكتشفت إن في صوت كده

لما ركنت لقيته طالع من الشكمان. لما مسكت الشكمان بإيدي الصوت تقريباً راح. أعتقد إن في كلبسه ولا حاجه كانت ماسكه الشكمان وإتكسرت


أعمل إيه؟ أنا كلمت التوكيل وحجزت معاد يوم الحد

ممكن أمشي بيها عادي لحد يوم الحد؟

بالنسبه لموضوع التأمين مش عارف الصراحه
بس على شرحك كده انك لما مسكت الشكمان الصوت سكت احتمال كبير يكون واحده من قواعد الشكمان ودى فى حدود 350 جنيه الواحد مش اكتر من كده ممكم تشوف التوكيل يكشف على قاعدتين الشكمان

وشكلها بسيطه ان شاء الله

[marsguy]

ألف شكر على الرد

دعواتكم بكره التوكيل ما يصدمنيش ويقولي إن في حاجه كبيره :(

[Hany Saad]

ممكن يكون حصل التواء بسيط للشكمان لأعلى و ده خلاه بيلمس فى بطن العربية من أسفل
أعتقد هيحتاج عدله بسيطة بالأيد تبعده عن بطن العربية من أسفل علشان يمنع الصوت

بسيطة ان شاء الله

تحياتى

[marsguy]

ألف شكرا يا جماعه

التوكيل قال لي إن كان في صفيحه محتاجه استعدال وهم عملوها ببلاش

بس بصراحه صوت العربيه لسه أعلى من الأول وده مضايقني منها. أنا حاسس إني سايق شارك مش فلوانس

وكمان في صوت كده طالع من الكبوت زي زنه مستمره بتزيد مع دوسة البنزين. عامله زي زنة العربيات المرسيدي القديمه.

بصراحه أنا مش متأكد إذا كانت موجوده من قبل الحادثه ولا لأ! ونفسي أقارن صوت عربيتي مع أي حد معاه فلوانس زيرو برضو.

بصراحه لما باسوق وأحس إن صوت العربيه مش زي الأول باتضايق. غالباً هاروح التوكيل تاني ويا رب يفهموني.

على فكره أداء العربيه مافهوش أي مشكله بسبب الحادثه. هو الصوت بس

شكراً

[m_marmoush]

في 3 جروبات علي الفيس بوك خاصين بالفلوانس، و بيحصل مقابلات كتير في التدمع و أكتوبر
ممكن تقابلهم في مرة وتجرب أي عربية من اللي وجودين عشان تقارن الصوت

[marsguy]

في 3 جروبات علي الفيس بوك خاصين بالفلوانس، و بيحصل مقابلات كتير في التدمع و أكتوبر
ممكن تقابلهم في مرة وتجرب أي عربية من اللي وجودين عشان تقارن الصوت

ألف شكر

أنا حاولت الإنضمام لواحده منهم بس حتى الآن لم يتم قبول طلب الإنضمام

ممكن حضرتك تبعتلي روابط الجروب دي هلى الخاص؟

شكراً