تكييف الفلوانس

[wael-mohamed]

ممكن حد يفدني يا جماعة بخصوص موضوع تكييف الفلوانس , انا معايا فلوانس 2012 e3 والعربية من يوم ما استلمتها تكييفها ذي الفل , الشهر الي فات لقيت حاجة غريبة حصلت , الهواية الي في نص الطابلوه درجة الحرارة بتاعت الهوا الي طالع من الهواية اليمين اقل كثيرا من الشمال يعني الهواية الي في النص يمين بتطلع هوا بارد والي جنبها بتطلع هواء عادي ومفيهوش اي برودة رغم اني ضابط التكييف يمين وشمال على اقل درجة lo ( طبعا الكلام ده في التكييف التاتش )
ودرجة برودة التكييف بشكل عام بقت مش قد كده , حد حصل معاه الكلام ده قبل كده او يعرف سببها

[shake]

متا بع

[wael-mohamed]

النهارده رحت مركز خدمه رينو ،فرنش موتورز الي في الرحاب وبعد انتظار من ٩ ال١،٣٠ المهندس قالي ان العربية عايزه الكويل الداخلي ب١٣ الف جنيه ، قولتوا ليه العربية انا جايبها زيرو من تلات سنين والكويل يبوظ قالي اصل هيه دي الطريقة الي ممكن نعرف بيها لذا كان في تسريب والا لا والمصيبة ان العربية المفروض تقعد عندهم ٣ ايام علشان هيفك الطابلوا كله، فطبعا قولتله قفل العربية تاني وناوي اعملها بره ، ايه رايكوا

[fadymedhat]

انا نفس الموضوع كان عندى فى فلوانس 2012.... كان الجزء اليمين بارد و الشمال سخن.....و كشفت عليه و طلع كان ناقص فريون بس....عملته ب 150 جنيه..

[wael-mohamed]

الله يطمنك ، طيب معرفتش سبب نقص الفريون ايه، وهل رجع تاني والا لا

[koheya]

الله يطمنك ، طيب معرفتش سبب نقص الفريون ايه، وهل رجع تاني والا لا

فى عيب مشهور فى الفلوانس ان الكلاكس قدام سربانتينه التكييف وقريب جدا منها واحيانا بيرجع لوارا بسبب مش عارفه ممكن يكون الهوا مع السرعه ويخرم السربانتينه خرم صغير وغالبا بيعمل مشكله حضرتك فتره لغايه الفريون ما يتسرب كله وتبدا السخونه تزيد.اولا ما تشغلش التكييف علشان الكمبرسور ما يبوظش لانه حيضغط على الفاضى بعد تسريب كل الفريون.ثانيا فك السربانتينه عند حد كويس واكشف على خرم فى المكان الى جنب الكلكس .الحم الخرم وما تغيرش السربانتينه لان الخرم بيكون صغير اوى ولحمه سهل.اشحن فريون .كله 150-200 جنيه وانت راجع طلع صدقه حاجه من ال10 الاف الى التوكيل كان عايزهم.

[wael-mohamed]

رحت النهارده لواحد كويس بتاع تكييف وكشف على السربنتينه لقاها سليمة ومفيش تسريب، قالي ممكن الكمبيروسر يكون فيه هوه الي بيسرب، بصراحة اتقفلت جدا ومش عارف اعمل ايه رغم تأكيد كهربائي من التوكيل أن الكمبيروسر احتمال تلفه ضعيف جدا والأكثر منه الثلاجة الداخلية، فأنا احترت بصراحة، خايف افك الكمبيروسر يطلع حاجة تانية وابوظ الدنيا، افيدوني افادكم الله

[m_marmoush]

روح لكهربائي تكييفات في مربع رينو اللي في صقر قريش
الناس هناك محترفين