عملت حادثه و عاوز ميكانيكى رينو

[eng_mmm2004]

السلام عليكم
انا عملت حادثه من يومين ب الكليو و بدور على ميكانيكى رينو كويس و امين علشان انا روحت لواحد قاللى حتتكلف اكتر من 20 الف و انا حاسس ان الموضوع اقل من كده بكتير خصوصا ان شكل العربيه من بره ميقولش كده خالص لان حتى مفيش ولا فانوس مكسور بس هى الخبطه من وسط العربيه بظبط من تحت
ارجو الافاده

[أبو عبدالله]

لا ان شاء الله تتكلف اقل من كده
بس ممكن تشرحلي الحادثة حصلت ازاي وعلى سرعة كام
يعني ياريت تفاصيل اكتر يمكن افيدك بإذن الله لأن ليا قريب حصل معاه نفس الكلام ده وانا اللي صلحتله العربيه

[eng_mmm2004]

الحادثه حصلت على سرعه حوالى 50 كنت بفادى عربيه جانبى و خبطت فى جزيره فى وش السياره و فى النص بضبط
الزجاج و الفوانيس و الكبوت كل ده سليم . اللى واضح بالنظر ان فيه مشاكل الوش اللى فى النص ده وقع و الردياتير برده و اظن حاجه برده تخص التكييف فى اول السياره كده. و برضه الشاسيه فيه مشاكل فى الاول و انا ملاحظ برده ان الموتور اتحرك من مكانه بس الموتور من فوق شكله سليم.ده غير ان الايرباج اتفتحت. اللى مش واضح ان الموتور من تحت حصل فى حاجه و المقصات برده غالبا اتكسرت و ده اللى قاله الميكانيكى ان فيه شغل كتير من تحت. المشكله انى خايف يكون بيستسهل و بيغير بدل ما يصلح علشان كده قاللى 20 الف خصوصا ان مش باين فيها الرقم ده خالص. المشكله انى مش قادر اتابع معاه اليومين دول علشان انا ايدى اتكسرت و محتاج عمليه و مشغول فى الموضوع ده و عاوز الاقى حد شاطر فى شغل الرينو .
عاوز اقولك برده ان انا وديتها التوكيل و قالولى حوالى 40 الف و انا عارف ان التوكيل مش بتاع تصليح و غالى و المفروض انى الاقى السعر بره الربع او بالكثير التلت يعنى 10 او 15 بالكتير اوى مش 20 الف و ده غير المصنعيه كمان يعنى كده انا معملتش حاجه تقريبا. انا هحاول اعرف المشاكل بالضبط اليومين الجايين ان شاء الله
شكرا للمساعده

[أبو عبدالله]

بس من الاول كده هيا الحادثة اللي بكلمك عليها نفس الموضوع ودخل في الرصيف على سرعة 60 برضه والأير باج فتح منه برضه

بس هو اتكلف بره 7 الف جنيه تقريبا
والتوكيل كان قايله 27 الف جنيه

عالعموم كده من الاول انت عاوز قنطرة امامية اللي شايله الماتور والعفشة من الأمام
وهيا دي المشكلة كلها فيها هتلاقيها اتقوست وهيا اللي حركت الماتور والعجل الأمامي وكل الكلام ده عليها

يعني دي لوحدها بتظبط حاجات كتير قوي
بس للأسف احنا اشتريناها تركي وبصراحه مكنش قوي يعني
يعني السمكري قالي انها مش زي بتاعت العربيه

وتقريبا كان تمنها لوحدها بحوالي 500 جنيه والأصلي الفرنساوي تقريبا الف وشوية

بس احنا معملناش الأير باج يعني لحمنا مكانها في الطارة ومركبناش واحده تانيه

السربنتينه بتاعت التكييف ممكن تكون اتخبطت وده اكيد بس ممكن تتظبط حسب حالتها

بس على فكره هتلاقي الكلام ده مخزن في التابلوه بتاع العربيه
يعني هتلاقي التابلوه بتاعك الفواصل بتاعته متحركه شويه ولازم هتتشد على زرجينه علشان السمكري يرجع كل الكلام ده تاني

بس أظن ان تكلفتك بالكتير مش هتعدي 15 الف ده لو اشتريت كل حاجه واصلي كمان

[eng_mmm2004]

اولا شكرا على مساعدتك يا ابو عبد الله
انا عاوز اعرف السعر اللى قلت عليه ده سواء ال 7 بتاعتك او ال 15 بتاعتى شامل المصنعيه كمان ولا ده تكلفه الحاجات بس.
و الاهم مين اللى اروح عنده علشان يعملى الشغلانه دىو يكون مضمون (يعنى يا ريت اسم السمكرى و تليفونه و الميكانيكى)
و يا ترى هل تعرف سعر الايرباج كام
شكرا

[أبو عبدالله]

ده كله بالمصنعيات ان شاء الله

بس المشكلة ان انا عاملها في المنصورة
وانا مش عارف حضرتك منين بالظبط

ولكن اكيد هتلاقي كل حاجه في المنصورة

اما الأير باج فمش فاكر تمنها بالظبط ولكن هو الطارة بألفين وشوية تقريبا
ولسه في حساسات كمان ومش عارف ايه
هو التوكيل كان بيقول كل السيستم بتاعها بــ حوالي 8 الاف جنيه

[didomotors]

فى ميكانيكى رينو ممتاز اسمة محمد الشرقاوى وعن تجربة

[kimo]

انا من ميت غمر ودلوقتى ساكن فى اكتوبر اظن حالة العربية كدة عايزة تروح لميكانيكية وسمكرية ميت غمر دول يصنعوا عربية من جديد وان شاء الله مش هتتكلف كتير كدة

[Sharky]

قدر الله و ماشاء فعل
إن شاء الله سيارتك تتصلح و ترجع زى الاول

[sherif_habeb]

انت من فين ؟؟؟؟؟؟؟؟؟؟؟؟؟
لو فى اسكندريه قلى فى واحد هنا شاطر جدا ومعرفه