تقرير مفصل بعد عام من إمتلاك الميجان

[Islam Hany]

السلام عليكم أهل قسم رينو العظيم.....

من سنة ربنا قدر لي إني اشتري ميجان 2 و الموضوع جه بالصدفة اصلا , انا كنت رايح اتفرج علي لوجان 2011 و قولت اما اعدي اشوف الميجان ده عاملة ازاي بصراحة عجبتني جدا حسيت فيها بالفخامة و التمييز المهم دخلت علي المنتدي هنا و شوفت كل المواضيع و عرفت الدنيا كده بالتقريب بس مكنش فيه خبرة اوي.

ولكن اول غلطة عملتها إني مكشفتش في التوكيل و جبت ميكانيكي و روحت اشوف العربية بس ربنا سترها إن هيا مكنش فيها حاجة كبيرة و انا لبستها الحمد لله.

حالة السيارة و مواصفاتها عند الشراء::
الموديل : ميجان 2 2005 هاتشباك
اللون : فضي
ناقل الحركة: مانيوال
عدد الكيلو مترات : 121 الف كيلو متر.
حالة الدهان : فبريكا جوا و برا ماعدا اكصدام خلفي و طبيعي بها بعض الحكات و الخرابيش و اللذي منه .
حالة العفشة : جيدة ,, مساعدين خلفي جيبين زيت و مساعدين امامي خفاف شوية.
حالة الموتور: ممتازة
حالة العجل : سيئة تحتاج تغيير ال4 فرد علما اللي كانوا ركبين كانوا مشلين.
كان في صوت في الشكمان وحساس زيت بايظ.
تم شراء السيارة علي 58 الف جنيه.
بها الكتالوج الاصلي و الدواسات و الاستبن من 2004 و طبعا الفرش الاصلي و حالته جيدة.

ديه كدا حالة العربية لما جيت اشتريها ,, الحمد لله اشتريتها و رخصتها سنة و كان لسة فاضل 6 شهور فبقي معايا سنة ونص تقريبا.

بدأت اركب العربية بس بحذر جدا من كثرة الاشاعات إنها بتبوظ بسرعة و أعطالها كتير و تصليحها صعب و كدا يعني

و عشان اطمن زيادة روحت كشفت عليها بالكمبيوتر و كله كان زي الفل ز مفيش ايرورز او اي حاجة

المهم غيرت زيت اول حاجة و فلاتر و مساعدين ورا و سماعات ادام و كاوتش و بدأت امشي شوية و بدأت تظهر العيوب واحدة واحدة وده لسبب إني كنت بمشي بيها في اليوم متوسط ساعتين في اليوم في الزحام الشديد و الحر.

نبدأ نسرد الحاجات اللي حصلت ورا بعد ::

العيب :: أولا كان فيه تنتيشة في العربية علي RPM قليل و تحسها مخنوقة و بتفوق فجأة .

الحل :: تم تنضيف بوابة الانجكشن.

العيب :: و انا ماشي في مرة جنب البيت الساعة 11 بليل لقيت عداد الحرارة علي جامدة و العربية بتصفر طبعا وقفت علي طول و بطلتها بدل ماتجيب وش سليندر او حاجة طيب أعمل إيه ؟! المهم معرفناش حتي نقطرها ﻷن مكنتش ﻷي القاطرة فقضيناها زق و الميجان الجميلة ماتتوصاش في الوزن الصراحة و بعدين البطارية نامت عشان كنت فاتح الباور الكهرباء تاني يوم لقيت القاطرة ورا في الشنطة في مكانها متعرفش ازاي يعني زقينا كل ده علي الفاضي ماشي قطرناها للحرفيين.

الحل:: حساس حرارة كان بايظ و كنت ممكن امشي من غيره بس مكنتش اعرف.

العيب ::السحب قليل و حاسس إن الموتور بيتحرك جامد و رجرجة
الحل:: تغيير قلب طرمبة البنزين و قاعدة شداد الفتيس

العيب:: صوت خروشة في الصباح
الحل:: ترس الديفيزار

العيب:: مش بتدور علي طول و عداد الRPM علي 0 وهي بتحاول تدور
الحل :: حساس الكرنك بالفيشة و طلع كمان كان فيه حساس كامة

ده الحاجات اللي واجهتني خلال السنة طبعا مع حاجات إضافية زي مثلا تلميع الفوانيس الامامية من الداخل و الخارج عشان كانت مضلمة خالص و تنظيف خراطيم الفائض و تصليح فيشة الفوج كانت سايحة و تغيير سلك مكنة الزجاج الامامي يمين و تغيير مساعدين امامي عشان خفوا خالص بالبطاحة و تيش الميزان.

تقييمي للرينو عمتا :: السيارة ممتازة في الكماليات و الراحة و الثبات في المناورات ,, التسارع مرضي جدا في السرعات العالية لكن في السرعات المنخفضة مش قوي بتحتاج عنايا و الناس الي شغالة فيها تكون فاهمة مش اي حد حتي لو كانت تافهة.
تقييمي لسيارتي :: العربية مش متهانة بس في حاجات كتيير عمرها الافتراضي خلص في الوقت ده و ده اللي سبب الحاجات ده كلها و المصاريف الكتير.

اجمالي المصاريف :: 10 الاف جنيه و ده يتضمن سعر كاوتش كونتينتال جديد فرنساوي 2000 جنيه و كل الاصلاحات من اكبر حاجة لتغيير الزيت و الفلتر و ربنا يستر و نبدأ نركب بقي من غير مصاريف لحسن الواحد تعب .

معلش لو طولت عليكم بس انا حبيت اشارك تجربتي مع عزيزتي ميجي في المنتدي هنا و لو حد عنده استفسار في حاجة انا موجود

و السلام ختام ....

[adeltito]

ربنا يبركلك فيها ويكفيك شرها

[mhmd_farouq]

ربنا يباركلك فيها ويكفيك شرها

[Islam Hany]

ربنا يبركلك فيها ويكفيك شرها

امين يارب و شكرا علي مشاركتك

[Islam Hany]

ربنا يباركلك فيها ويكفيك شرها

امين و شكرا لوجودك

[تامر.محمد]

العربية مش متهانة بس في حاجات كتيير عمرها الافتراضي خلص في الوقت ده

اصعب فترة الفترة اللي بتبقى العربية فيها عايزة تتشد دي :)

[fepsceasar]

ربنا يبارك فيها ويديك خيرها ويكفيك شرها

[Islam Hany]

اصعب فترة الفترة اللي بتبقى العربية فيها عايزة تتشد دي :)

ده حقيقي بس اهي عديت وربنا يسهل مايطلعش حاجات تانية إن شاء الله

[تامر.محمد]

ده حقيقي بس اهي عديت وربنا يسهل مايطلعش حاجات تانية إن شاء الله

هو انا حاليا فيها
اللي عملته بنضافة عدى و اللي استرخصت فيه مش عايز يعدي

[mkah21]

من احلى العربيات

[ringo9500]

ربنا يباركلك فيها ويكفيك شرها . وكلامك خلانى اتشجع اكتر انى افكر فى شراها جديا لانى بقالى سنتين محتار . بس ناوى على اوتوماتيك . وموديل 2006ك او 2007 . بس انا شايف ان سعر ال 58 كان كتير شويه خاصة انها مانوال .

[Islam Hany]

هو انا حاليا فيها
اللي عملته بنضافة عدى و اللي استرخصت فيه مش عايز يعدي

ربنا معاك و يقويك

[Islam Hany]

ربنا يبارك فيها ويديك خيرها ويكفيك شرها

يارب و مشكور علي مشاركتك

[Islam Hany]

[QUOTE=mkah21;3876005853]من احلى العربيات[/QUOTE
ده حقيقي و سعرها مرضي جدا بالنسبة للأمكانيات

[Islam Hany]

ربنا يباركلك فيها ويكفيك شرها . وكلامك خلانى اتشجع اكتر انى افكر فى شراها جديا لانى بقالى سنتين محتار . بس ناوى على اوتوماتيك . وموديل 2006ك او 2007 . بس انا شايف ان سعر ال 58 كان كتير شويه خاصة انها مانوال .

هي الفكرة كلها الحالة إللي قدامك هي اللي بتحدد السعر و بالنسبة لي المانوال ده ميزة مش عيب ﻷني بمشي في زحمة كتير و مش قد وجع دماغ الاوتوماتيك لو مكنش حالة نضيفة و غير كدا العربية هاتشباك وده مش بتلاقي منها كتيير فديه ميزة اخري,, هاتشباك و مانوال و مش متهانة اعتقد صفقة رابحة ولا إيه ؟!