إلى أستاذ هاني منسق القسم والإخوة الأفاضل، المساعدة

[m6r1282]

http://www.nilemotors.net/Nile/481417-1500-cc.html

ده لينك عملته كنت بقارن فيه بين السنترا والياريس، وفجأه لقيت ناس أخدت عيني وحطيتها على الجميلة فلوانس، ومن هنا بدأت التوهه.

المساعدة يا أهل الخير، ورجاءا مراجعة الرابط اللي في الأعلى أولا

أرجو متابعة المشاركة والمساعدة، أنا محتااااااااااااار بين الفلوانس والسنترا والشارك على الترتيب.

ودي الاختيارات النهائية اللي ناوي أجيب منها، مع العلم::

- فلوانس جميله شكلا وإمكانيات وجوده، سعرها عالي علي شويه
- سنترا جميله بس مش زي فلوانس طبعا، وبرده إمكانيات وجوده وتوافر قطع غيار وفي محافظتي توكيل لها، وسعرها الأفضل.

- الشارك عامله زي الفيرنا الآن كله راكبها، وكمان فيها مشاكل في المواصفات وفقيره في الآمان والامكانيات وكمان غاليه، بس شكلها جذاب.

من ناحية الشكل بالترتيب (فلوانس و شارك - سنترا).
من ناحية الجودة "تقفيل ودواخل" بالترتيب (فلوانس و سنترا - شارك).
من ناحية القيمة أمام المال (سنترا - فلوانس - شارك).

إيه اللي قالقني من الفلوانس وبكل صراحة، قطع الغيار غاليه أوي، يعني إيه صدام أمامي ب 5500 دي مش فاهمها صراحة وفانوس ب 2500 وفي روايه أخرى 3500 حسب بالقاعده ولا لأ "أسعار تقريبية"، لو فيه غير كده بس أكيد قولولي...

التوكيل وما علينا من دي لأن مافيش فيكي يامصر توكيل عدل، حتى الرينو اللي بيشكروا فيه بأه فيه شكوى من عدم الرد على التليفون اللي هي أسهل طريقة للوصول للمعلومة.
ثانيا: سعر إعادة البيع مازال سيء جدا فعلا، واحد بايعها بعد سنه ونصف عامله 24000 كم وخسر 31000 جنيه رقم فظيع برده.

المساعدة يا أهل الخير، ورجاءا مراجعة الرابط اللي في الأعلى أولا

[Hany Saad]

اسمحلى اجاوب حضرتك ب ٣ أسئلة، إجابتهم هتساعدنا كتير فى معرفة انه اكتر عربية مناسبة لحضرتك و ميزانيتك:
حضرتك قارنت بين ال٣ عربيات فلوانس و سنترا و شارك وواضح ان الكفه فى مصلحة الفلوانس
انا كمان و من خبرتى المتواضعة لا أثق فى التقفيل المصرى و خصوصاً عندما يتعلق الامر بسيارة فيها الكثير من الاجزاء الميكانيكية و الكهربية التى تتطلب اختبارات جودة خاصة غير متوافرة فى مصر، و طالما المبلغ عالى كده يبقى لا انصح بالمغامرة فى سيارة متقفلة فى مصر و الأمثلة على ذلك كثيرة لا تحصى

أسئلتى لحضرتك كالأتى:
١- اذا كان سعر اكصدام الفلوانس من التوكيل ٥٥٠٠ جنيه و الفانوس من ٢٢٠٠ الى ٣٥٠٠ جنيه برده سعر وكيل....ما هى اسعار هذه الاجزاء فى السنترا و الشارك سعر وكيل؟ و الاهم هل متوفرين ام لا؟
٢- انا معاك ان كول سنتر توكيل رينو بيقع كتير لكنه كتوكيل افضل الوحشين...طيب ايه اخبارالنيسان و ايه اخبار توكيل دايموند بتاع الشارك...ادخل حضرتك قسم نيسان و شوف الناس اللى احتاجت قطع غيار لعربياتها حصل فيهم ايه و امتى اتوفرت لو اصلاً كانت اتوفرت..قشقاى و جوك ملهمش قطع غيار، ده حتى الصنى اللى بيعمل بيها حادثة مش بيلاقى قطع غيار...دايموند طبعاً لا يقارن و هو عبارة عن ورشة فى صورة توكيل؟
٣- سعر اعادة البيع: يا ترى سنترا اللى بتتباع بعد سنة بتخسر كام؟ و شارك بتخسر كام؟
هنقول فى احسن الاحوال بيخسروا ١٥ الف فقط بعد سنة و ده مش صحيح و لكن هنفرض كده مجازاً...طيب يا ترى حضرتك هتركب عربية مش عجباك هتحط فيها كل استثمارك و هتفضل معاك ٥ سنين فى المتوسط بتركبها انت و اسرتك علشان تمتعك، هتحرم نفسك من كل ده و ترضى بعربية اقل و مش عجباك علشان بعد ٥ سنين من دلوقتى لو ربنا ادانا العمر سعر البيع هيقل ب ١٥ الف بفرض صحة المبلغ؟؟

اجابة حضرتك للأسئلة دى هيوضحلك نقط كتير قوى
لاحظ ان الشارك عربية موجودة فى السوق من ٧ سنين و اكتر، يعنى تكنولوجيا قديمة بمقاييس اليوم ده غير ان شركة ميتسوبيشى قررت عدم انتاج لانسر جديدة لعدم توافر الميزانية، يعنى دعم بيقل و عربية بتنتهى من تاريخ الشركة مع توكيل اقل من ضعيف

ما بين ال ٣ اختيارات دول تبقى الفلوانس هى الاختيار الافضل للكثير و الكثير من الاعتبارات

تحياتى

[m6r1282]

أسئلتى لحضرتك كالأتى:
١- اذا كان سعر اكصدام الفلوانس من التوكيل ٥٥٠٠ جنيه و الفانوس من ٢٢٠٠ الى ٣٥٠٠ جنيه برده سعر وكيل....ما هى اسعار هذه الاجزاء فى السنترا و الشارك سعر وكيل؟ و الاهم هل متوفرين ام لا؟

- بحسب منشور مصور في أحد مواضيع سنترا 2016 وبتاريخ 6/2015 كا الآتي نقلا:
الصدام الأمامي بـ 2100 والخلفي بـ 2450 والفانوس أمامي بـ 1520 والخلفي بـ 1500، مساعد أمامي بـ 1165 وطبعا ده مش رخيص بس صدام يكون بـ 5000 أو أعلى ده شي كبير صراحه.
- بالنسبة للتوافر فالتوكيل نفسه سألته وقال موجوده "شهادته مجروحة طبعا" والنيسانويه بيقولوا انها متوفره خاصتا إنها تجميع محلي.
- بس صحيح تجميع فلوانس إيه ؟؟؟؟ لأن ماحدش جاوبني على السؤال ده.
- وهل فعلا الاسعار اللي ذكرتها عن قطع غيار فلوانس دي صحيحة ؟؟ لو خطأ رجاء معرفة الصحيح من مصدر ثقه لأن ده عامل ممكن يخلي كفة فلوانس تطب عندي على طول.
- بالنسبة للشارك أنا مش مهتم ليها أوي أد حيرتي مابين الاتنين الآخرين.

٢- انا معاك ان كول سنتر توكيل رينو بيقع كتير لكنه كتوكيل افضل الوحشين...طيب ايه اخبارالنيسان و ايه اخبار توكيل دايموند بتاع الشارك...ادخل حضرتك قسم نيسان و شوف الناس اللى احتاجت قطع غيار لعربياتها حصل فيهم ايه و امتى اتوفرت لو اصلاً كانت اتوفرت..قشقاى و جوك ملهمش قطع غيار، ده حتى الصنى اللى بيعمل بيها حادثة مش بيلاقى قطع غيار...دايموند طبعاً لا يقارن و هو عبارة عن ورشة فى صورة توكيل؟

- بالنسبة لدايموند فا مش محتاج كلام ولا سمعت حد بيشكر فيه، وفعلا أنا معاك شارك إلى رحيل، وبالتالي دعمها هايقل.
- اللي في محافظتي نيسان مودرن موتورز بشبين الكوم وسمعته بين بين، لكن رينو، أقرب توكيل لي قريب من عملي "الدراسة" اللي هو في المقطم، ماعرفش دول تمام ولا إيه، بس يبدو إنه كبير عشان أنا لما دخلت على موقع رينو مصر لقيته بيدعم كل الخدمات من أول الشراء لغاية قطع الغيار، فهل حضرتك شايفه تمام ولا فيه شكوى لأنه ده أظنني اللي هاتعامل معاه ققط لأني مابحبش اللف ولا بعرف هههههه.

٣- سعر اعادة البيع: يا ترى سنترا اللى بتتباع بعد سنة بتخسر كام؟ و شارك بتخسر كام؟
هنقول فى احسن الاحوال بيخسروا ١٥ الف فقط بعد سنة و ده مش صحيح و لكن هنفرض كده مجازاً...طيب يا ترى حضرتك هتركب عربية مش عجباك هتحط فيها كل استثمارك و هتفضل معاك ٥ سنين فى المتوسط بتركبها انت و اسرتك علشان تمتعك، هتحرم نفسك من كل ده و ترضى بعربية اقل و مش عجباك علشان بعد ٥ سنين من دلوقتى لو ربنا ادانا العمر سعر البيع هيقل ب ١٥ الف بفرض صحة المبلغ؟؟

على كلام حضرتك كده، سنترا تجميع مصري أظن أول فوج هايكون كويس قدر المستطاع عشان تثبت نفسها في السوق، بالنسبة للشارك هي فعلا سعر إعادة البيع كويسه عامة لعقلية الشعب العريق اللي احنا منه إلا من رحم الله.
بالنسبة للبيع أنا أصلا مش ناوي أبيع، يعني لو جبت فلوانس مش ناوي أبيعها أصلا، بأمانه فيها كل اللي أنا محتاجه وزياده، يعني مش هابيع مثلا قبل 10 سنين للي يعيش وللي ربنا يباركله والعين تبعد عنه، أنا بصراحه بعشق فلوانس بس المال بيوجع عشان كده أنا محتااااااااار

وأنا عشان أجيب فلوانس مش هاجيب أقل من الفئة التانية أوتو E3 ودي الآن بـ 176000 زيادة عن أعلى فئة في السنترا اللي فيها حاجات زياده عن فلوانس زي كاسيت كاسكا تاتش ونافيجيشن وسنسور وبـ 165. أما السعر للسنترا فل أوبشن بـ 150 يعني فارق بينها وبين فلوانس 26 ألف.

اجابة حضرتك للأسئلة دى هيوضحلك نقط كتير قوى
لاحظ ان الشارك عربية موجودة فى السوق من ٧ سنين و اكتر، يعنى تكنولوجيا قديمة بمقاييس اليوم ده غير ان شركة ميتسوبيشى قررت عدم انتاج لانسر جديدة لعدم توافر الميزانية، يعنى دعم بيقل و عربية بتنتهى من تاريخ الشركة مع توكيل اقل من ضعيف


ما بين ال ٣ اختيارات دول تبقى الفلوانس هى الاختيار الافضل للكثير و الكثير من الاعتبارات

تحياتى

وبشكر حضرتك على الرد السريع والمنطقي والوافي، والمتابعة والذوق العالي، على فكره حضرتك ليك اسلوب بيرغب الناس في فلوانس أصلا.

بس أنا عندي أسئلة برده غريبة شويه

- وزن الفلوانس كم كيلو ؟؟ "سنترا 1218 كجم"
- ستيب ترونيك ازاي مع CVT في فلوانس ؟؟ يعني هاحس إنه مانيوال فعلا وأشد وكده ؟؟
- هل تتوقع مجرد توقع وخاصة بعد نزول الشكل الجديد لفلوانس 2017 هايقل سعر الشكل اللي قبلها بكتير، برده الواحد مش عارف الظروف إيه ممكن تكون جايب حاجه وربنا يضطرك تبيعها.
- هل فلوانس تتحمل البيئة اللي فيها أتربه كتير بالنسبة للحساسات والحاجات اللي فيها دي ولا التراب ده هايبوظ الدنيا سواء داخل أو خارج أو حساسات الفرامل والتقنة اللي في العربية الجميلة دي ؟؟

أنا أرجوك اصبر معي قليلا لأني خلاص ببيع عربيتي، ومن شهر وأنا بدور وعامل بحث مكثف لحد ما وصلت للإتنين دول (سنترا وفلوانس)


وتحياتي لحضرتك

[Hany Saad]

انا تحت امرك فى اى وقت
بداية، يجب ان نعلم ان فيه تحالف قوى و قائم ما بين رينو و نيسان و ان على الورق، الفلوانس و السنترا كموتور و فتيس نفس الشىء بالظبط الا بعض التعديلات البسيطة فى السوفت وير و لكن ميكانيكياً هما نفس الشىء بل نقدر نقول ان الفلوانس هى السنترا المقدمة من رينو و السنترا هى الفلوانس المقدمة من نيسان....زى بالظبط السيراتو و الالنترا هما عربيتين متقاربتين جداً لنفس الشركة بشكل خارجى مختلف
ثانياً، الفلوانس اللى بتنزل مصر هى تجميع تركى فى مصنع رينو فى بورصا فى تركيا، بينما الفلوانس الخليجى هى تجميع كوريا، فى مصنع سامسونج كوريا التابع لمجموعة رينو نيسان العالمية
لاحظ ان شاسيه الفلوانس و السنترا مبنى على قاعدة عجلات السامسونج sm3
بالنسبة لاستفسارات حضرتك:
- انا برده مش متأكد من اسعار قطع الغيار لانها فى زيادة كل يوم، لكن سعر اكصدام الفلوانس ٥٥٠٠ ده كان شامل الدهان و مصنعيات التركيب، هل يا ترى سعر اكصدام السنترا شامل الضريبة (١٥٪ + الدهان + مصنعيات التركيب) و دى قيمة مش قليلة
- الفلوانس قطع غيارها مش رخيصة و لكنها لا تفرق عن اى سيارة اخرى فى فئتها و ده شىء انا بأكده لحضرتك، توكيل رينو هو نفسه توكيل كيا و فاهم كويس سعر قطع الغيار فى السوق لانه معاه اتنين من اكتر الماركات انتشاراً
- الدعم الفنى لتوكيل رينو افضل بكتير من نيسان الى مؤخراً انضم لقائمة التوكيلات السيئة فيما يختص بالضمان و توافر قطع الغيار حتى لو العربية متقفلة فى مصر، هحاول اجيب لحضرتك مشاكل و معاناة ملاك الصنى المجمعة فى مصر و قارن ده بمشاكل ملاك اللوجان على سبيل المثال....لا وجه للمقارنة من الأساس
- وزن الفلوانس ١٢٦٥~١٣٣٥ كجم
- الفتيس ال xtronic cvt مريح لابعد حد فى السواقة و ناعم لابعد الحدود و موفر جداً للبنزين و مريح للموتور لانه بيطلع عزمه عند عدد لفات منخفض و لكنه مش بتاع شد و حرق و غرز...
- مفيش عربيات بترخص فى مصر، على العكس: توقعى ان استيراد السيارات هيقل و هيقنن الفترة القادمة و هيشجعوا المنتج المحلى لعدم توافر الدولار و ممكن يوصل الامر الى رفع جزافى للضرائب على السيارات المستوردة للحد من استيرادها، كل الشواهد بتقول انك تلحق انهاردة قبل بكره تشترى و تخلص لان الموضوع ده هيرفع الاسعار بجنون
- شكل الفلوانس ٢٠١٧ هيبقى خرافى و ده مبنى على نزول الشكل الجديد للميجان iiii اللى شكلها و خامتها الداخلية اصبحت تنافس به ملكة هذه الفئة و هى الجولف و لكن، الموتور نازل تربو طبعاً و الفتيس dual clutch فأكيد السعر هيبقى مبالغ فيه جداً و لكن مش هينزل ابداً سعر الموديل الحالى، على العكس هيرفعه لشدة الطلب عليه
- لا توجد اى مشاكل معروفة للفلوانس موديل 2016، عربية ثابتة و موزونة و فخمة وواسعة و افضل قيمة مقابل السعر، ملاك ليها كتير من الغربية و الغردقة و المنوفية و منتشرة فى كل محافظات مصر و الحمد لله لم يظهر اى مشاكل منتشرة لحساسات او اعطال متكررة او فرامل او ما شابه، الحمد لله الكل بيشكر فيها و بنعمل الصيانة الدورية فقط و لا شىء اكثر من هذا و تيل الفرامل عمره جيد جداً و انا عملت موضوع خاص عنه
- اخيراً الصيانة الدورية كل ١٠ الاف كم و بتكلف حوالى ١١٠٠ جم و ده فقط لتغيير الزيت و الفلاتر و مصنعيات الصيانة و غير شامل تغيير اى قطع غيار زى تيل فرامل مثلاً او خلافه
اتمنى لك التوفيق فى الاختيار
تحياتى

[Hany Saad]

ده موضوع فيه اسعار الصنى المصرى مش السنترا، و سعر قديم من اغسطس ٢٠١٥ قبل زيادة الدولار، شوف و احكم :

http://www.nilemotors.net/Nile/475448-2015.html

تحياتى

[Hany Saad]

و ده موضوع اخر عن توافر قطع غيار السنترا:

http://www.nilemotors.net/Nile/464062-2015.html

تحياتى

[m6r1282]

انا تحت امرك فى اى وقت
بداية، يجب ان نعلم ان فيه تحالف قوى و قائم ما بين رينو و نيسان و ان على الورق، الفلوانس و السنترا كموتور و فتيس نفس الشىء بالظبط الا بعض التعديلات البسيطة فى السوفت وير و لكن ميكانيكياً هما نفس الشىء بل نقدر نقول ان الفلوانس هى السنترا المقدمة من رينو و السنترا هى الفلوانس المقدمة من نيسان....زى بالظبط السيراتو و الالنترا هما عربيتين متقاربتين جداً لنفس الشركة بشكل خارجى مختلف
ثانياً، الفلوانس اللى بتنزل مصر هى تجميع تركى فى مصنع رينو فى بورصا فى تركيا، بينما الفلوانس الخليجى هى تجميع كوريا، فى مصنع سامسونج كوريا التابع لمجموعة رينو نيسان العالمية
لاحظ ان شاسيه الفلوانس و السنترا مبنى على قاعدة عجلات السامسونج sm3
بالنسبة لاستفسارات حضرتك:
- انا برده مش متأكد من اسعار قطع الغيار لانها فى زيادة كل يوم، لكن سعر اكصدام الفلوانس ٥٥٠٠ ده كان شامل الدهان و مصنعيات التركيب، هل يا ترى سعر اكصدام السنترا شامل الضريبة (١٥٪ + الدهان + مصنعيات التركيب) و دى قيمة مش قليلة
- الفلوانس قطع غيارها مش رخيصة و لكنها لا تفرق عن اى سيارة اخرى فى فئتها و ده شىء انا بأكده لحضرتك، توكيل رينو هو نفسه توكيل كيا و فاهم كويس سعر قطع الغيار فى السوق لانه معاه اتنين من اكتر الماركات انتشاراً
- الدعم الفنى لتوكيل رينو افضل بكتير من نيسان الى مؤخراً انضم لقائمة التوكيلات السيئة فيما يختص بالضمان و توافر قطع الغيار حتى لو العربية متقفلة فى مصر، هحاول اجيب لحضرتك مشاكل و معاناة ملاك الصنى المجمعة فى مصر و قارن ده بمشاكل ملاك اللوجان على سبيل المثال....لا وجه للمقارنة من الأساس
- وزن الفلوانس ١٢٦٥~١٣٣٥ كجم
- الفتيس ال xtronic cvt مريح لابعد حد فى السواقة و ناعم لابعد الحدود و موفر جداً للبنزين و مريح للموتور لانه بيطلع عزمه عند عدد لفات منخفض و لكنه مش بتاع شد و حرق و غرز...
- مفيش عربيات بترخص فى مصر، على العكس: توقعى ان استيراد السيارات هيقل و هيقنن الفترة القادمة و هيشجعوا المنتج المحلى لعدم توافر الدولار و ممكن يوصل الامر الى رفع جزافى للضرائب على السيارات المستوردة للحد من استيرادها، كل الشواهد بتقول انك تلحق انهاردة قبل بكره تشترى و تخلص لان الموضوع ده هيرفع الاسعار بجنون
- شكل الفلوانس ٢٠١٧ هيبقى خرافى و ده مبنى على نزول الشكل الجديد للميجان iiii اللى شكلها و خامتها الداخلية اصبحت تنافس به ملكة هذه الفئة و هى الجولف و لكن، الموتور نازل تربو طبعاً و الفتيس dual clutch فأكيد السعر هيبقى مبالغ فيه جداً و لكن مش هينزل ابداً سعر الموديل الحالى، على العكس هيرفعه لشدة الطلب عليه
- لا توجد اى مشاكل معروفة للفلوانس موديل 2016، عربية ثابتة و موزونة و فخمة وواسعة و افضل قيمة مقابل السعر، ملاك ليها كتير من الغربية و الغردقة و المنوفية و منتشرة فى كل محافظات مصر و الحمد لله لم يظهر اى مشاكل منتشرة لحساسات او اعطال متكررة او فرامل او ما شابه، الحمد لله الكل بيشكر فيها و بنعمل الصيانة الدورية فقط و لا شىء اكثر من هذا و تيل الفرامل عمره جيد جداً و انا عملت موضوع خاص عنه
- اخيراً الصيانة الدورية كل ١٠ الاف كم و بتكلف حوالى ١١٠٠ جم و ده فقط لتغيير الزيت و الفلاتر و مصنعيات الصيانة و غير شامل تغيير اى قطع غيار زى تيل فرامل مثلاً او خلافه
اتمنى لك التوفيق فى الاختيار
تحياتى

أنا مش عارف أشكرك غير بـ جزاك الله خيرا، فقد قال رسول الله صلى الله عليه وسلم، ما معناه "من قال لأخيه جزاك الله خيرا فقد أعظم له المثوبة".

طيب أخبار مركز رينو اللي في المقطم ؟؟
وتفضللي الفئة الأولى ولا التاني في فلوانس ؟؟

وآسف للإطاله على حضرتك

[m6r1282]

ده موضوع فيه اسعار الصنى المصرى مش السنترا، و سعر قديم من اغسطس ٢٠١٥ قبل زيادة الدولار، شوف و احكم :

http://www.nilemotors.net/nile/475448-2015.html

تحياتى

على رأي حضرتك دا كله غالي، وبالنسبة للموضوع إن الصدام بالدهان أو لا طبعا لأ.

بس أنا عايز أعرف أسعار الحاجات المعرضة للتغير ضروري "فلوانس 2016". يعني محتاج أعرف أرقام فعلا.

زي صدام أمامي وخلفي فوانيس أمامي وخلفي فوجات تيل وطنابير ومساعدين الحاجات دي سواء الاستهلاكيه أو في حالة وقوع حادثه، أكتر حاجات بنحتاج نعرف سعرها.

فلو تساعدني فيها رجاءأ.

[m6r1282]

و ده موضوع اخر عن توافر قطع غيار السنترا:

http://www.nilemotors.net/nile/464062-2015.html

تحياتى

أنا قرأت التجربه دي قبل كده، وفعلا مأساة ...

أنا عشان تكون عارف يا أستاذ هاني أصلا أنا كان معي نيسان صني 2003 أوتو 1300 سي سي وياباني بالكامل، وكانت ممتازه، بس سحبها كان طين في أول غيارين، بعد كده طور على الطريق.

لكن فعلا التوكيل هو سبب بيعي ليها بخسارة 13000 بعد سنة فقط، تخيل آخر مره روحت بيها التوكيل يونايتيد جروب في الدراسة جنبي، كسرلي درج الطابلوه الأوسط وماخذتش بالي منه إلا وأنا برفع الفرش وبنضف، وسمعت مؤخرا إنه بيبيع قطع مضروبه على أنها ياباني. حسبنا الله ونعم الوكيل.

كان ليه حق الرسول لما كرر ألا وقول الزور 3 مرات، خطير التزوير ده والله.

وأنا خايف من رينو كماركة أول مره هاركبها وهاشطح جامد لأن فلوانس فئه عليا فيها.
بس أنا خوفي بدأ يزول بسبب حاجات كتير من اللي قرأته هنا ده.

[m6r1282]

على فكره في أحد الناس هنا كان بيقول التجميع المصري والتركي والمغربي مش كويسين، فما رأي حضرتك

[Hany Saad]

بالنسبة لفرع المقطم و لأنى من اسكندرية فمش هقدر افيدك قوى و هسيب الاخوة الاعضاء اللى بيتعاملوا مع فرع المقطم يفيدوا حضرتك عن مستوى الخدمة

بالنسبة للفئة، طبعاً التانية هى الحصان الأسود للفلوانس اللى فيها كل ما تتمناه من الكماليات و التكنولوجيا الحديثة، كفيلة انها تمتعك بشكل يومى طول فترة امتلاكك للسيارة و حتى لا تمل من سيارتك بعد فترة قصيرة....و لكن طبعاً يخضع الأمر لميزانية حضرتك
اذا توافرت يبقى نصحتى الفئة التانية دون ادنى تردد لانها من افضل فئات الفلوانس و اكثرهم مبيعاً على الاطلاق للقيمة مقابل السعر

تحياتى

[m6r1282]

بالنسبة ل الفتيس ال cvt هو سحبه هادي ولا سحب عادي بس مش أسابق بيه

أنا أحب العربية تكون صاحيه معاي مش وأنا بطلع من زحمه اللي ورايا يزمروا عشان العربية مش بتستجيب

فهل فلوانس هاديه في الطلعة زي صني 2003 اللي كانت معي ؟؟ أظن لأ ، أو أنا مش فاهم حضرتك في حتة الحرق دي، مش هي عربية جراية وكويسه، ولا هاديه ؟؟

أنا أثقلت وأطلت على حضرتك عارف والله، بس ده طمع في كرمك
وكمان أنا عارف إن حضرتك مقدر الحيرة اللي بنكون فيها في الموقف ده.

فبكرر الشكر والله لحضرتك.

[m6r1282]

بالنسبة لفرع المقطم و لأنى من اسكندرية فمش هقدر افيدك قوى و هسيب الاخوة الاعضاء اللى بيتعاملوا مع فرع المقطم يفيدوا حضرتك عن مستوى الخدمة

بالنسبة للفئة، طبعاً التانية هى الحصان الأسود للفلوانس اللى فيها كل ما تتمناه من الكماليات و التكنولوجيا الحديثة، كفيلة انها تمتعك بشكل يومى طول فترة امتلاكك للسيارة و حتى لا تمل من سيارتك بعد فترة قصيرة....و لكن طبعاً يخضع الأمر لميزانية حضرتك
اذا توافرت يبقى نصحتى الفئة التانية دون ادنى تردد لانها من افضل فئات الفلوانس و اكثرهم مبيعاً على الاطلاق للقيمة مقابل السعر

تحياتى

معك حق فعلا وبشكرك على المتابع السريعة والله.

[aelsayed74]

اولا احب اشكر م/ هانى على سرعة استجابته ومساعدة المتواصلة لاعضاء رينو وشرحه الوافى لكل اللى بيقرأ ردوده
ثانيا اتمنالك م / محمد التوفيق فى اختيارك وان كنت شايفك ميال للفلوانس
بالنسبة لمركز رينو المقطم ومن خبرة تعامل زميلى بالعمل معه انه مركز كبير وناس محترمة وصريحة وفعلا توكيل رينو من اكثر التوكيلات المحترمة فى مصر زيه زى توكيل تويوتا

[m6r1282]

اولا احب اشكر م/ هانى على سرعة استجابته ومساعدة المتواصلة لاعضاء رينو وشرحه الوافى لكل اللى بيقرأ ردوده
ثانيا اتمنالك م / محمد التوفيق فى اختيارك وان كنت شايفك ميال للفلوانس
بالنسبة لمركز رينو المقطم ومن خبرة تعامل زميلى بالعمل معه انه مركز كبير وناس محترمة وصريحة وفعلا توكيل رينو من اكثر التوكيلات المحترمة فى مصر زيه زى توكيل تويوتا

أنا بشكر حضرتك على الرد والمتابعة، وأنا الآن بستخير وربنا يقسم الخير يارب