حقيقة رينو لوجان أتوماتك 2016

[Elsanady]

السلام عليكم

من زمان و أنا بسمع أن الرينو عموما سوقة مش ماشى فمصر و صيانة صعبة و قطع غيار غالية و مش متوفرة و ضعيف على شوارع مصر ميستحملهاش و عشان كدة مش ماشى أوى فمصر.

و بعدين مرة وااااحدة هووووب بقيت أشوف الرينو لوجان الشكل الجديد ماشية فالشارع أكتر من الفيرنا ... هوا فى أية؟؟؟؟

لدرجة أنى فكرت أشتريها بس متخوف من المشاكل اللى كتبتها دى ... أرجو من اهل الخبرة أن ينصحونى مع سرد عيوب و مميزات اللوجان أتوماتيك 2016 و تصليح معلوماتى عن الرينو أذا كانت خاطئة لأنها واضح فعلا أنها مش مظبوطة أوى بعد بالأنتشار السريع اللى أنا شايفة للعربية دى فمصر.

و شكرا

[scientist9508]

بسم الله الرحمن الرحيم

أخى الفاضل

ما ذكرته غير دقيق بالمره.

تتوافر اللوجان بمحركين

1 - مانيوال بقوة 90 حصان

2 - أوتوماتيك بقوة 110 حصان (محرك الفلوينس)

السياره ممتعه فى كل شىء و سعرها منافس جدآ. ربما تكون تكنولوجيا معقده بعض الشىء لكنها أبسط من كثير من السيارات المنافسه لها.

عيوب هذه السياره

1 - إستهلاك الوقود العالى

2 - (المانيوال) أقصى سرعه له 160 كم/ساعه

3 - (المانيوال و الأوتوماتيك) ثباتهم متواضع

4 - (المانيوال) صوت المحرك عالى

5 - (المانيوال و الأوتوماتيك) يكلفان ثروة عند تعرضهما لحادث

هداك الله لأرشد أمرك و أقومه

السلام عليكم و رحمة الله و بركاته

[Elsanady]

حضرتك قصدك أية بتكنولوجيا معقدة؟؟ و ماذا عن سرعة و قوة موتور الأوتوماتك؟

[scientist9508]

حضرتك قصدك أية بتكنولوجيا معقدة؟؟

أقصد أن تصليحها ليس متاح خارج الوكيل فلا يزال كثير من أسرار المحرك خفيه و عصيه على الميكانيكيه. ستجد من يخبرك بالعكس و من يخبرك بذلك ليس كاذب و لكن تأكد أنه يقصد الفك و التركيب (فك و تركيب العفشه مثلآ أو البوجيهات أو أى شىء لا يحتاج سوى فك مسامير و ربطها مره ثانيه) و لكن تشخيص الأعطال لا يقدر عليه سوى وكيلها فقط.

و ماذا عن سرعة و قوة موتور الأوتوماتك؟

نفس سرعة و قوة محرك الفلوينس إلا أن بنية و وزن و عفشة الفلوينس تستطيع الثبات على الطريق عندما يدفعها محرك بهذه القوه. و لكن اللوجان ليست فى وزن الفلوينس و لا فى حجمها و لذلك أقل ثبات منها و من هنا كان وصف ثبات اللوجان بالمتواضع. كما أن إرتفاع اللوجان عن الأرض سبب رئيسى فى تواضع ثباتها.

بصفه عامه فإن الأوتوماتيك أفضل بكثير من المانيوال. و سيارات الرينو سيارات ممتعه جدآ و لكن إبعدها عن:

1 - الصدمات (لإرتفاع أرقام التصليح بشكل يصيبك بصدمه)

2 - قطع الغيار غير الأصليه (لأنك لن تحصل على آداء رينو بل تحصل على آداء أى سياره أخرى)

3 - الصيانات أو التصليح فى الورش الخارجيه ( لأن السياره مليئه بالأسرار . . و عمومآ كل السيارات الفرنسيه كذلك)

أرحب بكل إستفساراتك و فى أى وقت

السلام عليكم و رحمة الله و بركاته

[tameem2010]

رينو نفسها طوال تاريخها كثيرا ما تعرضت للاخفاقات والفشل ده في اوربا مش هنا
اما هنا مفيش غير رينو 9 ورينو ميجان ولوجان وفلوانس هما اللى باعوا في مصر
مشاكل الرينو كتير جدا ومقرفة لابعد مدى
عربيات غير ملائمة لمصر ابدا
سوقنا هواه ياباني او كوري
غير كده انسى
عموما اللى غاوى مرازية يشتري عربية فرنسيه

[Elsanady]

شكرا للمعلومات القيمة أستاذ scientist <
أنا معاك أن صيانتها برة التوكيل صعبة عشان كدة حتى كنت بقول فى عيوبها صعوبة الصيانة و دة فعلا عيب فرنساوى عموما.
لاكن دة يجرنا لنقطة أهم ... حيث أن صيانتها يعنى التوكيل فقط طب أية أخبار التوكيل بقا من حيث التعامل و الجودة فى الصيانة؟؟
كمان هل قطع غيرها متوفرة فى التوكيل؟؟ و هل لا يوجد لها خارج التوكيل قطع غيار أصلى؟

شكرااا

[Elsanady]

ههههههه شكرا أستاذ Tameem

طب ممكن حضرتك تقولى رأيك فى اللوجان الجديد خصوصا أنة منتشر أوووى ... و ممكن توضيح أكتر للعيوب للعربية دى بذات من وجهة نظرك؟

نفسى فجديد بس كلة ألا المرازية :D

[tameem2010]

رايي الشخصي ان الناس زهقت من الفيرنا والافيو
الرينو اشيك وامكانيات وحركات اكتر من الفيرنا والافيو
وبيقولوا انها عربية فرنسيه يعني اقوى واشيك وحمالة اسية
خاصة ان الفيرنا والافيو من العربيات اللى بتتهان بسرعة وعاوزة استعمال شوكة وسكينة
مع ان لوجان مالهاش علاقة اساسا بفرنسا غير علامة رينو
لان اللوجان والسانديرو والستيب واي هما اصلا عربية داتشيا
رينو استحوذت على الداتشيا
وبقت تحط علاماتها على عربيات داتشيا وتسميها رينو
ده غير التاتش الفرنساوي اللى هو كله دوائر كهربائيه تطلع عينك
ولو سلك عمل قفلة او لمس في كشاف ممكن يطفي لك العربية كلها وتحلف ما تدور
زي الكهربائي اللى صمم الميجان مثلا
كان كهربائي حيوان والعربية كلها مشاكل
نفس الكلام ده في البيجو
فيها دوائر كهربائيه قمة في الغباوة والتناحه
ومشاكل الكهرباء عموما انهما ملموسه وغير محسوسة
يعني العفشجي بيبص ويشوف لو فيه جلب مهريه فيه مساعد مكسور كل حاجة بتبقى واضحه ادامه
زي الميكانيكي بيفتح الكبوت ويشوف بعينه
بعكس الكهربائي مش شايف حاجة
كلها حاجات تعتمد على الخبرة والابداع
وعندنا ابداعات الكهراباية في مصر لا حصر لها لان محدش فيهم متعلم او فاهم
كلهم ورثوا المهنة او اتعلموها بالفهلوة بدون علم حقيقي
واللى معاه عربية فرنسيه تحديدا بعد 10-15 سنة تلاقي معظم الكهرباء عنده كباري
الكهربائي لما بيغلب بياخد من الضفيرة دايركت ويعمل كوبري كهربي لمكان العطل ويريح نفسه
ده طبعا بعد ما يحرق كام دائرة كهربائيه سليمة بالاساس وبعد ما يخليك تغير قطع كتير سليمة اصلا

عشان كده ابعد عن المرازيه
خليك في الياباني
هين لين
سهل مفيهوش تعقيدات
وعربيات اعتماديه لاعلى درجة
بس فقيرة داخليا ومفيهاش الحركات بتاع الفرنساوي
بس عمرها ما تقل معاك ابدا
اصيلة وبنت ناس
انما الفرنساوي يبيعك في اي لحظة صحراوي دائري محور في اي مكان ولا يفرق معاه

يلا كفايه كده

[tameem2010]

يعني مثلا ميكانيكيه الرينو عندهم فتوى غريبه
اي عربية رينو تروح لهم بسبب مشاكل شخونة او حرارة
اول حاجة يعملها يقول لك افصل السخن بتاع التكييف
ويغير شجرة التكييف ويخلي التكييف بارد بس
ده كثيرا ما بيحل المشكلة
بس ده مش حل
ماهو اما ده عيب تصميم في تكييف الرينو او غباء صنايعي مش عارف يحل او بيفتي
قيس على كده حاجات كتير

طبعا في الاجواء شديدة الحرارة بتلاقي الفرنساوي يهنج ويطفي ويركن على جنب
عربيات مش مصممة للاجواء الحارة
عشان كده عمرك ما تلاقيها في الخليج

[Elsanady]

ههههههه يانهار أسود ... طب ما اليابانى غالى أوى عن الrange اللى بتكلم فية.
رأيك اصرف نظر عن اللوجان 2016 زيرو و أفكر فاليابانى مستعمل؟؟ ولا أية

[tameem2010]

لا طبعا
الزيرو له طعم تاني
بلاش المستعمل نصيحه مني
الزيرو طعم لا يقاوم
بس لما تفكر في عربية فكر في عربية قطع غيارها في كل حته وعند البقال واللبان واي حد يعرف يشتغل لك فيها لو اتزنقت
الكلام ده محدش بيعرف قيمته الا لما العربية تعجز شوية وتقدم
وكله بيقول ياريت

[tameem2010]

بص يا سيدي اسال كويس وفكر واتقل
روح معرض اوتوماك فورميلا هيبقى بعد شهرين
هيبقى فيه كل حاجة وكل الموديلات اللى لسه هيتم طرحها
اتفرج بنفسك وشوف كل العربيات
اوعى تستعجل
اهدى خالص واصبر
اللى يصبر ينول

[Elsanady]

تمام ... أنا شكلى هسمع بالنصيحة فعلا و هستنى المعرض

[Mohamed Desoky]

السلام عليكم ورحمة الله وبركاته احترامى للجميع هيا الرينو مش فرنساوى زى البيجو والسيتروين نفس التكنولوجيا والقوة كويس السؤال المهم لية الرينو ارخص من البيجو والسيتروين انا راى اليسيط الرينو فاشلة فى بلدنا وبيلمو تمنها مرة تانية من قطع غيار غير معمرة وغير اعتمادية خالص فعلا اليابانى الاول والكورى التانى والصينى التالت فى مصر دة اللى ماشى فى بلدنا حاليا وربنا يوفقك

[scientist9508]

شكرا للمعلومات القيمة أستاذ scientist <
أنا معاك أن صيانتها برة التوكيل صعبة عشان كدة حتى كنت بقول فى عيوبها صعوبة الصيانة و دة فعلا عيب فرنساوى عموما.
لاكن دة يجرنا لنقطة أهم ... حيث أن صيانتها يعنى التوكيل فقط طب أية أخبار التوكيل بقا من حيث التعامل و الجودة فى الصيانة؟؟

حقيقة أن سياسات و جودة توكيل رينو كانت السبب الأول و الرئيسى فى تسويق سيارات رينو فى مصر كما أنه يقدم ضمان صادق و حقيقى للسياره . . إلا إنه إرتكب الخطأ الذى يقع فيه كل الوكلاء فى مصر تقريبآ . . رفع سقف المبيعات بما يفوق القدرة الإنتاجيه لكل مراكز الصيانه مجتمعه مما أدى لتدهور جودة الصيانه . . و لكن الأمر لم يدم طويلآ فسرعان ما إستوعب الوكيل الموقف عندما كثرت الشكاوى من ملاك رينو فسارع إلى إتخاذ قرار أغضب كل ملاك رينو إلا إننى أراه فى صالح الجميع . . فقد ألغى وكيل رينو صيانات ال 5000 كم لكل السيارات حتى يخفف الضغط على كل مراكز الصيانه و من ثم يرفع كفاءة و جودة الصيانه لكل السيارات.

كمان هل قطع غيرها متوفرة فى التوكيل؟؟ و هل لا يوجد لها خارج التوكيل قطع غيار أصلى؟

قطع الغيار الأصليه متوفره عند الوكيل أو مراكز الخدمه المعتمده فقط لا غير. و جميع قطع الغيار الموجوده خلاف هذه الأماكن هى غير أصليه و أفضلها تكون تقليد و لكن نسخه أولى.

شكرااا