كولر الفتيس و زيت الفتيس و التوكيل ...

[تامر.محمد]

سلام عليكم جميعا
مؤخرا حصل حوار كده مع احد ملاك بيجو 508 , المهم بمتابعة الحوار عرفت الآتي

- ان العربية دي كان الوكيل بينزلها على اساس ان زيت الفتيس sealed for life و ما بيغيرش زيت فيتس لحد , زي الميجان2 اللي انا راكبها و معرفش ايه النظام مع باقي عربيات رينو دلوقت

- و ان وكيل بيجو كان , زي ما بيعمل وكيل رينو لحد دلوقت , بيحط قدام اي مالك يعمل اي حاجة في الفتيس احتمال بوظان الفتيس نتيجة للشغل ده

- و ان وكيل بيجو غير السياسة دي مؤخرا و بقى خلاص بيغير زيت الفتيس لل508 دوريا بعد ما اكتشفوا ان ده غلط (و دي نقطة مهمة رقم 1 )

- معلومة للي ما يعرفش , النقطة دي هي سبب بوظان فتيسات ميجان2 , الناس اللي لبست في تغيير فتيس , بسبب تعليمات التوكيل بعدم تغييره , و جابت فتيسات استيراد و داومت على تغيير زيتها ... الدنيا مشيت معاها كويس على حد علمي

- المشكلة الحقيقية هنا لو التوكيل لسه بيعمل كده مع الفلوانس فيز2 , و طبعا اللوجان الاتوماتيك و فلوانس فيز1 , لأنهم هايلقوا نفس المصير في الآخر , و هنا في رأيي ملاك الفلوانس فيز2 بقى واجب عليهم يشوفوا توكيل نيسان بيعمل ايه في القاشقاي و الجوك و السنترا مثلا , و ملاك اللوجان و فلوانس فيز1 يشوفوا بقى هايخالفوا تعليمات التوكيل و يغيروا زيت الفتيس على 60 الف بناءً على التجارب السابقة , ولا هايخلوهم مع التوكيل .... معلومة مهمة رقم 2

- كولر فتيس ال508 باظ في عربيات قليلة و لسه ما اتعرفش السبب , و هنا لازم نقول ان كولر فتيس ميجان 2 بيبوظ لما تحط بدل مياة التبريد المخصوصة مياه حنفية لأن الكولر بيصدي بسبب كده و بيتآكل و بيخلط مياة التبريد بزيت الفتيس و بتلاقي في القربة مياه (نفس الشيء بيحصل لكولر الموتور) , و مش عارف لحد دلوقت هل ده بيسبب ان الفتيس او الموتور يدخل لهم مياه كمان مع الزيت ولا لأ , معلوماتي تتوقف عند النقطة دي ............. و دي نقطة مهمة رقم 3


ارجو من الملاك خصوصا لوجان اتوماتيك و فلوانس فيز1 افادتنا بتجاربهم ان وجد

[mkaram84]

وعليكم السلام
شكراً جداً للمعلومات
بالنسبة لرينو لوجان اوتوماتيك - حضرتك تقصد كل الموديلات ولا الشكل الجديد ولا القديم؟؟

[تامر.محمد]

وعليكم السلام
شكراً جداً للمعلومات
بالنسبة لرينو لوجان اوتوماتيك - حضرتك تقصد كل الموديلات ولا الشكل الجديد ولا القديم؟؟

اللي فيها موتور وفيتس ميجان2 , اظن الاتنين

عموما الفيصل , هل التوكيل حاطط في جدول الصيانة تغيير زيت الفتيس عند كيلومتر معين ولا بيقول للعملا ده sealed for life و الكلام اللي لبس الناس ده , ايا كانت العربية

[M.Radwan]

ياما قولنا من زمان للناس تغير الزيت ومحدش كان بيسمع الكلام!

[fepsceasar]

انا معايا ميجان
ورايي ضرورة تغيير زيت الفتيس والله اعلم
ولو حد قعد فترة طويلة بدون تغيير وجه يغير هنا بقى بتبقى انت ونصيبك

[M.Radwan]

إضافة لما سبق وزي ما قولت قبل كده كتير
فعلا دليل الصيانة بتاع الميجان بيقول ان الزيت Sealed for life
بس الفكرة إن هو كده فعلا لو فضل في حدود درجة الحرارة المسموح بيها عشان الخواص بتاعته متتأثرش! افرض مثلا حصلك حاجة في دورة التبريد؟ أكيد الزيت هيسخن زيادة عن اللزوم ويفقد خواصه وبالتالي الفتيس يبدأ يتاكل من جوا
وعشان كده مذكور في دليل الصيانة طريقة تغيير الزيت والكمية والمواصفة كمان، مع إنهم كاتبين في الأول انه Sealed for life
فأنا مش عارف ليه الناس قلقانة أصلا من تغيير الزيت!!!