يا تري العربية مش عايزة تدور ليه

[New Soft]

السلام عليكم ورحمة الله

إخواني الأعزاء أنا بصراحة رغم حبي للميجان إلي إن أعطالها إلي بتحصل معايا دي تنرفز شوفوا بقي عملت فيا أيه أمس وأول أمس

زي ما أنتم عارفين الكارتيرة إتشرخت لحمتها وزي الفل ودورت العربية عند الميكانيكي وروحت بيها جيت تاني يوم أدور قرفتني مدارتش المهم ببص لقيت سلك حساس الكرنك كان ملحوم واللحام فك المهم أنا كنت مغير الحساس ده والجديد إتكسر وركبت القديم تاني أخذت الفيشة بتاعت الجديد وركبتها وتمام دور دارت لحد كده حلو بس في كويل مش شغال المهم بدلت كويل مكانه علشان أتأكد العيب من الكويل ولا مفيش كهرباء واصلة لما بدلت لقته هو هو العطلان برضو كده غالبا مفيش كهرباء واصله لأنو أنا منظف البوجيهات ومجربها بره علي الموتوسيكل بتاعي والشرارة زي الفل المهم فضلت ماشي وراء السلك لحد ما عرفت أوله لقيته طالع من الكمبيوتر بتاع العربية قولت خلاص نقفل ونروح لواحد متخصص يكشف بالكمبيوتر جيت أدور حلفت ماهي دايرة نهائي كده بقي تفتكروا العيب فين أنا زهقت من كثرة الأعطال دي بصراحة وللأسف إكتشافها صعب

[تامر.محمد]

في رايي مشكلة حضرتك انك بتخترع العجلة من اول و جديد
مش عيب انك تجرب بنفسك لكن طالما بتجرب بنفسك تبقى عامل حسابك انك هاتتعب لأنك بتستكشف من الاول

بصفة عامة كده
حضرتك بتتكلم في كويل بايظ , لو كلهم جايين مع بعض يبقى غيرهم كلهم , كده كده هايبوظوا ورا بعض بفروق بسيطة و كل شوية واحد منهم هايقرفك , و لما تغير هات الاسود في استانلس مش الفاليو
بالنسبة لحساس الكرنك

اولا حساسك القديم ممكن يكون بايظ , و الا غيرته ليه اصلا ؟ , و يخلي لك العربية ما تدورش او يخليها تبطل على السلانسيه بعد مشوار

ثانيا فيشة حساس الكرنك ظبطت مع بعض الناس لكن مع اغلب الناس و انا منهم هبلت بعد ما اتركبت بشهر , و كنت جايبها جديدة اصلي , فالحل هاتشتري حساس كرنك جديد اصلي و تروح لكهربائي (رامي بتاع صقر مثلا ) يلحم لك السلك فيه , و هاتنسى الموضوع ده خالص

[New Soft]

أهلا بيك يا هندسة

بالنسبة لأنو بجرب بنفسي فانا والله مضطر لده لكذا سبب أولهم أنا في المنوفية ومفيش هنا حد عايز يمد يده فيها خالص حتي إلي شغالين في عربيات حديثة كله أول ما يشوفها يقول لك لا يا عم دي فرنساوي ولما واحد تجرأ قعد يشتكي من إن حوضها ضيق وخنقني بصراحة كده أما السبب الثاني فهو التكلفة المبالغ فيها في الصنعة دا غير تكلفة النقل طبعا لأن الأصيلة بصراحة بتعطل قدام البيت عندي في البلد

بالنسبة للكويلات دول بتوعها الأصليين

أما حساس الكرنك أنا غيرته لأنو كان علق معايا كام مره كده وجبت الجديد والصنايعي إلي قولت لك عليه ده كسره من غير ما يأخذ باله وهو بيفك المارش معلش حمار بقي ومكنش فاهم هو بيعمل أيه أصلا تقريبا لأنو عمره ما شاف موتور شبه ده والحساس القديم خالص كان ملحوم فعلا واللحام هو إلي ساب فركبنا بداله فيشة الحساس إلي تكسر

عموما انا جبت واحد إستيراد هركبه كده وربنا يسهل وتنطق ونوديها يا ريس لحد من الصنايعية بتوعها يشوف لنا المشكلة أيه بالضبط أنو انا شاكك إنها مش الكويل علشان لما غيرته بإلي جنبه فضل نفس المكان هو إلي عطلان

وتسلم يا كبير

[New Soft]

أنا ركبت الحسساس الجديد وبرضو ال rpm مرفعش نظفت القديم تاني وركبته نفس الوضع حد يعرف حد من المنوفيه ييجي يشوفها؟

[تامر.محمد]

بدلت البوجيه كمان ولا لأ ؟
بصيت على البوجيهات شفت حالتها ايه ؟

[alizahran5]

السلام عليكم ورحمة الله وبركاته
شوف اسلاك الحساس تكون معكوسه
وشوف فى كهرباء فى الكويل والبخاخات ولا لا
انا شاكك فى الكويلات والله اعلم

[New Soft]

بالنسبة ببلوجيهات أنا نظفتها وجربها بره قبل ما أركبها
أسلاك الحساس مش معكوسة
أنا فعلا شاكك إن ال control مش باعت إشارة للكويلات

[alizahran5]

طيب شوف بيبعت ولا لاء على البخاخ

[New Soft]

إذاي أعرف الكلام ده