فرامل اللوجان ! ! !

[alfa_we]

يا جماعة انا كنت عايز اعرف من اصحاب اللوجان ايه اخبار الفرامل ؟ ؟ ؟
انا عندى حاسسها ضعيفة مش عارف ليه عندى احساس انها مش هاتسترنى لو فى موقف محرج لا قدر الله

[SAMER_ENGINES]

للأسف انا مسقتش لوجان قبل كدة بس مش معني كدة اني ممكن حد يقولك هي فراملها كدة تبقي كدة فعلا ممكن تكون الفرامل عندك فيها حاجة يعني مثلا عايزة تغير تيل او الزيت نقص يعني برده التيل ابتدي يتاكل او مثلا في تسريب زيت او الفرامل عايزة يتاخد لها هو و هكذا حاول تعدي علي متخصص فرامل و هو يشيك عليها افضل و كمان عشان تتطمن و ياريت لو حد عنده فكرة من اصحاب اللوجان او اللي ساقوا لوجان قبل كدة لا يبخل علينا بالمعلومات.

[alfa_we]

شكرا لردك
وانا كنت قريت قبل كدة انك تمتلك ورشة فرامل و دبرياج انت وصاحبك وعايز اسالك هى فرامل اليد ليها علاقة بالفرامل العادية اصل انا بتعامل مع فرامل اليد بقسوة شوية
ممكن دا يكون ليه علاقة بكدة ؟ ؟ ؟

[hesham_tawfiq]

السلام عليكم جميعا وكل عام وانتم بخير
على فكره انا عندى نفس الاحساس وحاسس ان فراملها ضعيفه بس دا لما بكون ماشى بسرعه شويه بلائى العربيه زحفت عالارض خصوصا لما بكون نازل منزل انما عالمشى الطبيعى الفرامل شغاله كويس
بس انا مش فاهم يعنى ايه بتتعامل مع فرامل اليد بقسوه !!
فرامل اليد مفروض متستخدمهاش غير لما تركن العربيه او فى الطوارئ فقط وبحدود معينه والا العربيه هتللف منك ومش هتسيطر عليها

[amr123]

انا عندى الفرامل كويسة يا جماعة ...عادية يعنى
.. بس هو فى سوال مهم لحضرتك ...انت عامل كام كيلو دلوقتى ؟ يمكن معاد تغير التيل قرب

لو فى صيانة قريبة قولهم فى التوكيل يكشفو على التيل عشان تطمن
انا نفسى اعرف التيل بتاعها بيتغير كل قد ايه

[alfa_we]

فرامل اليد مفروض متستخدمهاش غير لما تركن العربيه او فى الطوارئ فقط وبحدود معينه والا العربيه هتللف منك ومش هتسيطر عليها

متفق معاك فى كدة بالتاكيد
انا اقصد انى بشد الفرامل والعربية بتكون لسة موقفتش تماما
وبرضوا مش بخلى الكاوتش يعمل صوت فى الارض

[alfa_we]

.. بس هو فى سوال مهم لحضرتك ...انت عامل كام كيلو دلوقتى ؟ يمكن معاد تغير التيل قرب

لا انا العربية تعتبر مش بتمشى عاملة 2800 كيلو بس

[SAMER_ENGINES]

شكرا لردك
وانا كنت قريت قبل كدة انك تمتلك ورشة فرامل و دبرياج انت وصاحبك وعايز اسالك هى فرامل اليد ليها علاقة بالفرامل العادية اصل انا بتعامل مع فرامل اليد بقسوة شوية
ممكن دا يكون ليه علاقة بكدة ؟ ؟ ؟

اكيد يا استاذي فرامل اليد ليها علاقة بالفرامل العادية او فرامل الرجل بس ده بالنسبة للفرامل الخلفية فقط..
لأني فرامل اليد بتكون عبارة عن اليد اللي جنب ايدك في صالون العربية اليد دي بتكون موصلة بسلكين او ويرين 2 Wires صلب, السلكين الصلب دول موصلين للعجلتين الخلفيتين للسيارة يعني بيتفرعوا فرعين فرع لكل عجلة و بكدة يبقوا موصلين للقباقيب او للتيل الخلفي بصفة عامة و لما حضرتك بتشد الهاند بريك بتقوم بقفل التيل الخلفي علي الطنابير و كأنك دايس فرامل بس بدون ما تتأثر الفرامل الأمامية و بدون ما تقفل علي الطنابير الأمامية و عشان كدة فرامل اليد لها تأثير فقط علي التيل الخلفي.
و لو كان قصد حضرتك في معاملتها بعنف انك بتشدها أثناء المشي فممكن يكون طبعا ده يكون احد الأسباب لخفة الفرامل و لو قصد حضرتك شدها بعنف و العربية واقفة فده لا يؤثر علي قوة السيارة الفرملية و هي تتحرك و لكن بيأثر علي السلك الصلب الخاص بالهاند بريك.

[alfa_we]

ميرسى يا باشا على المعلومات القيمة
وانا فعلا بشدها والعربية فى وضع الحركة يعنى قبل ما اقف بثانية او اتنين كدة

[SAMER_ENGINES]

لا يا استاذ حضرتك شدها لما العربية تقف تماما ده الافضل و تقدر تروح تطمن عند اي متخصص فرامل ممكن يفتح لحضرتك الرجلاش شوية و يعلي لك الفرامل.

[alfa_we]

بصراحة هوا دا الى كنت عايز اوصلوا
كنت بعملها ايام اللادا عند الميكانيكى