الى مالكى اللوجان

[aladinmehanny]

الاخوة الأفاضل رواد المنتدى , أرجو افادتى بشكل مفصل عن السيارة اللوجان من حيث :
1- هل السيارة مناسبة للطرق المصرية .
2- هل السيارة ذات تصميم مريح و فخم ؟
3- هل اسعر اللوجان غالية ام مناسبة ؟
4- من قاموا بشراء السيارة , ما المشاكل التى و اجهتهم ؟
5- هل التوكيل محترم ام لا ؟
6- من افضل معرض بيع للسيارة و ما سعرها النهائى ؟
شاكر جدا لكل من يرد على

[aladinmehanny]

ملحوظة : انا اسأل عن السيارة 7 راكب

[momom]

السلام عليكم ورحمة الله وبركاتة

عامل اية يااا ريس
اة نسيت اعرفك بنفسي انا محمد لسة مشترك انهرة في المنتدي

انا يااا عمي معايا رينو لوجان
وبصراحة انا مبسوط منها اوي لان فيها مميزات خاصة جدا ومناسبة للطرق المصرية
والمميزات الخاصة دي هية :

1- تعتبر من اعلي العربيات ارتفاع عن الارض يعني مش بتحك في اي مطب
2- المساحة الداخلية ملهاش حل يعني هية اوسع من الدايو لانوس والانسر والنوبيرا كمان
3- الشنطة بتاعة العربية بردو وسعة جدا اوسع من الانوس
4_ سحبها علي الطريق جميل اوي
5 - سعرها جميل بالنسبة للكماليات الي فيها ( 70.000 ) الفل ابشن بتاعتها
وفيها ( تكيف . بور . سنتر بريموت . كمبيوتر الرحلة . جنوط 15 . وسادة هوائية للسائق . نور شبورة قدام وورا .كاسيت cd . )
الماتور بتعها 1600 س س وحوالي 90 حصان
الماتور بيشتغل علي بنزين 91 . 92. 95 .
بتوصل ل100 في حوالي 12 ثانية

اهم حاجة فيها بأة وعجباني اوي وضعية الجلوس داخل السيارة مريحة جدا
والكراسي والكنبة الي ورا في مستوي مرتفع يعني مريحة جدا للاشخاس طوال القامة

عيوب
1-صوت المحرك مرتفع نوعا ما بس مقبول لان جوة العربية في عزل صوتي حلو
2- اتزان الربية مقبول جدا بس مش في مستوي اتزان الدايو لانوس
بس انا جبت بيها ال 180 وكنت متحكم فيها كويس .
يعني بنسبة لية انا اتزان العربية مقبول جدا .

العربية عملت معاية دلوقتي حوالي 3000 كيلو
ورحت صيانة ال 1000 كيلو والناس كانو محترمين اوي في التوكيل
وطبعا صيانة ال 1000 كيلو مجانا والمعاملة جيدة في الصيانة

ولو عندك اي سؤال عن السيارة اسأل وانا ان شاء الله هجوبك

[elnopy]

السلام عليكم بالنسبه لاستهلاك البنزين عامل ايه وهل جربت تحطلها 80

[lastsamurai98]

2- اتزان الربية مقبول جدا بس مش في مستوي اتزان الدايو لانوس
بس انا جبت بيها ال 180 وكنت متحكم فيها كويس .
يعني بنسبة لية انا اتزان العربية مقبول جدا .

[/quote]
يعني حضرتك قصدك ان الانوس اثبت منهاحتي عند سرعة 180وعربية حضرتك موديل كام والشكل الجديد والقديم ياريت حضرتك توضح النقاط دية وشكرا ليك

[mostafabakry]

السلام عليكم و رحمة الله و بركاتة

الأخ الفاضل أهلا و مرحبا بك في منتدي نايل موتورز - قسم رينو

العبدلله من مالكي اللوجان ال 7 راكب و قبل ما اشتريها كنت بحاول زيك كدا ان الاقي حد معاه العربية و يقولي رأية و حكمة علي العربية الجديدة علي السوق المصري , الكلام دا كان من شهر 10- 2008 و طبعا انا ملقتش المعلومات اللي كنت محتاجها بسبب قلة انتشار العربية و بدأت ابحث علي النت و اتفرجت علي فيديوهات علي اليوتيوب للعربية و للريفيوهات عليها عالنت و الحمدلله بعد تفكير كتير قررت اغامر و اشتري العربية دي و اكون من اوائل الناس اللي بتشتريها
عموما عشان ما اطولش عليك انا هقولك باختصار تجربتي مع العربية من وقت شرائها في اواخر يناير 2009 و حتي الآن بعد استخدام حوالي 6500 كم
العربية دي اختيار رائع للناس اللي بتدور علي عربية عائلية 7 افراد وفيها الإمكانيات اللي اغلبنا بيحتاجها زي التكييف و الباور الخ .....

1- العربية عفشتها ممتازة و ناعمة و مالعربية مرتفعة عن الأرض و طبعا ما بتحكش في المطبات العالية اللي منتشرة كل شوارع مصر انا سافرت بيها في مرة و كان معايا حوالي 9 افراد او اكتر و عديت علي مطبات و الحمد لله ما حكتش نهائي و اتزانها عالطريق جيد جدا لغاية 140 - 150 بعد كدا العربية بتخف شويه ودا بعد تجربتها لغاية 170 كم/س و كنت وحدي بالعربية

2- العربية دي بتنزل بموتورين الأول 1600 سي سي 8 صباب 90 حصان و التاني 1600 سي سي 16 صباب 110 حصان طبعا انا اشتريت اللي بموتور 110 حصان لأنه اقوي بس للأسف ما نزلش منها غير الهاف اوبشن اللي من غير زجاج كهرباء و لا ريموت ولا فوج لايت ولا كمبيوتر رحلات
بس ما كانش ينفع اشتري اللي بموتور 90 حصان عشان الكماليات دي لأن الأداء هو الأهم و دا كان نفس رأي الإخوة هنا في المنتدي ساعتها
و طبعا اداء موتور العربية جيد جدا بالنسبة للسحب وهي لما بتكون بحمولة 7 راكب السحب بتأثر بسيط جدا
التكييف بيأثر علي سحب العربية في الغيار الأول و التاني بعد كدا ما بتحسوش

3- العربية تصميمها مريح جدا وواسعد بطريقة غريبة مش ممكن تتوقعها إلا لما تركب العربية و تشوفها من الداخل و انا بتكلم علي ال 7 راكب لأني كل اللي شاف العربية من الخارج قالي ان ال 2 راكب اللي ورا خالص اكيد مذنوقين جدا و طبعا بعد ما ركبوا ورا اتفاجؤا بالمساحة المتوفرة للركاب حتي طول 2 متر !!!! و ممكن تشيل 3 افراد من الحجم المتوسط

العربية مش فخمة و لا حاجة من جوا بسيطة و عادية بس عملية بمعني ان تكييفها جيد جدا بالنسبة لي و بيصل لكل الركاب حتي الخلفيين لأنفيه فتحة لتمرير هواء التكييف اسفل المقاعد الوسطي
الكاسيت عادي مش سي دي و دي مش فارقه معيا لأني بشغل ال ام بي ثري
السماعاد عددها 2 بس في الأبواب الأمامية و بتكون 4 سماعات في الفول اوبشن

4- سعر العربية انا شايف انه كويس بالنسبة لل 7 راكب لأنك لو شفت اي ماركة تاني بنفس المواصفات هتلاقيها اغلي و يمكن تكون بجودة و امكانيات اقل في الموتور زي التيوتا افانزا اللي ما حدش شكر فيها في المنتدي هنا و انتشارها قليل جدا جدا بالرغم من وجودها من فترة مش قليلة
يعني اللوجان ال 7 راكب ال 110 حصان نص كماليات 91900 جنيه انا شايف انه سعر معقول

5- التوكيل انا لسه ما اقدرش احكم عليه بس انت بتتكلم عن شركة يملكها محمد نصير من رجال الأعمال التقال جدا في بلدنا دا غير ان كل الناس بتشكر في التوكيل و بتقول انه محترم جدا في التعامل مع عملائه

6 - المشاكل في العربية حتي الآن و بعد استخدام 6500 كم هتلاقيهم في قسم هنا بعنوان رعشة بسيطة في الدبرياج في بداية الحركة و المرايا اليمين فيها مشكلة في ظبطها
و اانا رحت لمركز الخدمة المعتمد عندنا في الأقصر و المرايا قالولي عنغيرها في الضمان و الصوت اللي في الدبرياج قاللولي لسه مش واضح و خليه مع صيانة ال 10000 كم نراجع علي كل الأجزاء دي ممكن يكون تربيط و لا حاجة لو حسيت انه زاد قبل ميعاد الصيانة تعالا و نشوفه

7- المعرض اللي بتبيعها بجانب التوكيل اللي هو

1- الشركة المصرية العالمية للسيارات Eim و سعر العربية عندهم كالتالي
90 حصان فول اوبشن 98900 جنيه
90 حصان هاف اوبشن 86000 جنيه
110 حصان هاف اوبشن 91900 جنيه

2- شركة عربيات في المهندسين بجوار مسجد الحامدية الشاذلية و دي موزع معتمد للوكيل و فعلا ناس محترمين جدا و اسعارهم احسن من التوكيل بمبلغ مش قليل بالإضافة انهم كانوا منزلين شويه كماليات علي العربية اللي بموتور 110 حصان ( جنوط اسبور + حساسات ركن + كاسيت سي دي + شاشة ديقيدي + عوارض تحميل سقفي ) و بسعر 90000 جنيه

انا اشتريت العربية من التوكيل نفسه بعد ما كنت حاجز في شركة عربيات و كنت هقسط مع بنك اسمه المؤسسة العربية المصرفية بس الحمدلله طلب التقسيط اترفض من البنك و انا اصلا ما كنتش مرتاح للتقسيط عن طريق البنك و قسطت العربية مع التوكيل نفسة تقسيط مباشر بدون بنوك و الفائدة 10 % علي 24 شهر مع دفع 50% مقدم
طبعا سعر الفائدة عالي شوية و متعب جدا علي 24 شهر بس الحمدلله ما عملتش حاجة فيه شبه التحريم ( الربا ) لو كنت تعاملت مع البنك

عموما انا تحت امر حضرتك في اي استفسار تاني

[momom]

اتزان الربية مقبول جدا بس مش في مستوي اتزان الدايو لانوس
بس انا جبت بيها ال 180 وكنت متحكم فيها كويس .
يعني بنسبة لية انا اتزان العربية مقبول جدا

الانوس انسيابية اكتر منها بمعني ان الهواء بيثبت السيارة علي السرعة دي والمناورة بيها اسهل من اللوجان تمام
العربية بتعتي مديل السنة دي 2009
انا مستلم العربية من 3 اسابيع بس
وهية خمسة راكب بس بس واحد قريبي جايب ال7 راكب
وبيقو ل انها عربية كويسة جدا بالنسبة لسعرها


بالنسبة للبنزين ال80 دبعا مش جربتة علي العربية
لان مكتوب علي غطاء التنك
91 92 95
مااشي

[mizamega]

ايوة يعني المغربي ولا التانية

[elnopy]

يعني عامله ايه في استهلاك البنزين بتعمل كام كيلو في الصفيحه

[aladinmehanny]

الاخ مصطفى
شكرا جدا لردك بس انا كنت عايزك تقوللى رأيك فى تقفيل العربية علشان شفتها و حسيت انها مش بس رومانى دى يمكن اقل من الروسى و شزف سيادتك الموضوع ده

http://www.nilemotors.net/Nile/showthread.php?t=72958

لأن الحاجات دى قلقتنى عموما من العربية
و جزاك الله خيرا

[bishoy02010]

استهلاك البنزين عامل إيه ؟؟؟؟؟؟؟؟؟؟

[ROUMA]

لى سؤال عن اللوجان المغربى يا ريت حد يفيدنى عن أسعار قطع غيارها فى السوق المصريه ومدى توافرها (5 راكب مش ال7)

[ضيف]

لى سؤال عن اللوجان المغربى يا ريت حد يفيدنى عن أسعار قطع غيارها فى السوق المصريه ومدى توافرها (5 راكب مش ال7)

برجاء مراجعة المواضيع المثبتة/كل ما تريد معرفته عن اللوجان

[momom]

ايوة يعني المغربي ولا التانية

لا هية تقفيل روماني

يعني عامله ايه في استهلاك البنزين بتعمل كام كيلو في الصفيحه

حوالي 345 كيلو للصفيحة
لانها استهلكت معايا في ال100 كيلو 5 لتر

[amr123]

استاذ momom لخص لحضرتك المفيد
استهلاك البنزين فى السيدان فى المتوسط من 6.9 الى 7.6 لتر لكل 100 كم

بس يا ستاذ momom الرينو ملوش صيانة 1000 الى اعرفه انها كل 5000