Clio Hatchback

[medo_sirion]

السلام عليكم
الاخوة الاعزاء

انا امامى حاليا رينو هاتش بالك 2001 عاملة 219 اللف ك
صاحبها هيغرلها طرمبة البنزين والاقصدام الامامى بتعها اتسرق بالنمرة فهيجيب واحد وفنوس امامى لمين ورفرف امامى لمين والشنطة مخبوطة حاجة بسيطة فهيغير الشنطة كمان كل دة هوة اللى هيعملوا قبل ماستلمها منة ورخصتها فيها سنتين والعربية فبريكة برة وجوة

وهوة كان طالب فيها 25 الف ج بعد تغير كل دة

فياريت ياجماعة حد يقولى هل السعر دة مناسب ولا لا

[medo_sirion]

ياجماعة ردوا عليا بصراحة العربية عجبانى بس مستنيكوا تقولولى اعمل اية

ومستنى استاذ شارك

[عمرو عمارة]

الأفضل الإبتعاد عنها لسببين :

1-220 ألف كم كتير قوي وممكن تبتدي تتعبك مستقبلاً لأنك متعرفش إذا كان صاحبها مهتم بصيانتها وبيصرف عليها كويس

2-لو العربية الي إنت بتكلم عليها 1200 سي سي يبقى هاتكون 65 حصان 8 صباب (هتلاقي مكتوب على الباكتة الي في الباب 1.2 مش 16v )..... ومع الـ220 ألف كم الي مشيتهم يبقى إنت بتكلم في موتور ضعيف جداً

[momo10000]

بس يا عمرو لو حيصرف عليها 5000 جنية ... تبقي صفقة رابحة بجميع المقاييس ... ولا اية راي الوحووووش ؟؟؟؟

[ضيف]

الحاجات اللي صاحب العربية ناوي يغيرها (فانوس,اكصدام,رفرف,شنطة) أصلي (سواء شركة أو استعمال الخارج) , و لاّ ناوي على تايواني و ما شابه ؟

[عمرو عمارة]

أيمن باشا.....لو العربية دي موتورها كان 16 صباب ممكن أجبها بالسعر ده وأسقطلها نفس الموتور جديد إستيراد وأصرف عليها شوية وأخليها تحفة.....إنما المشكلة إن موتورها أصلاً ضعيف جداً

[Amr_Moh]

بصراحة أخاف أجيب عربية ماشية 220 ألف حتى لو كاريرا مش كليو

[chato_eg]

بصراحة أخاف أجيب عربية ماشية 220 ألف حتى لو كاريرا مش كليو

لاحظ إن صاحبها طالب 25 ألف جنيه ...إيه تانى ممكن يكون ماشى حتى 100 ألف كم بالسعر ده ؟؟

[medo_sirion]

الف شكر على الردود الحلوة من الناس الحلوة دية
على فكرة انا ضيف شرف عليكوا من Daihatsu
بس اعجابى بالعربية هوة اللى شدنى اوى
على العموم هشوف موضوع الصباب دة
غير كدة سبب ان صاحبها عامل بيها كلوهات زيادة دة كان بسبب سفرة الكتيييييير اوى
وغير كدة نزل المركز اللى بعد كوبرى المطار واشترى الحاجات من هناك