رحله البحث عن المتاعب ( رينو المقطم)توبه!

[Ahmed Selim]

أحنا هنا عشان نفيد و نستفيد........هل معنى ذلك أننا لا نضحك !!!!!!

فعلاً قلة حجة.....

[human]

ازيك يا جميل اخبارك ايه
انت زعقت فيهم قلتلهم ايه و كمان ياريت تعرفنى ايه نوع الشكوى عشان اعمل شكوى انا كمان
بصراحه نفسى اكلمهم و قلهم اللى فى نفسى
مستنى ردك

حبيبى و زميل رحله الشقاء و الضنا
انا كلمت الكول سنتر و حجزت معاد فى العبور و قلتلها عندى شكوى من فرع المقطم
قالتلى حاضر هحولك و حولتنى بس رجعت قالتلى هما فى بريك كلمهم الساعه 2
كلمتهم و حولتنى على حد قالوا انه مدير الصيانه فى الفرع قلتله اللى حصل معايا و اللطعه و التخبط فى الكشف و انى شاكك فيهم و ازاى فيه ناس مغيره المقابض و محدش غيرلى
بصراحه صبيت عليه جام غضبى
الراجل مشكور اعتذر عن التخبط و قاللى تعالى المقطم قلتله لأ هروح العبور قاللى مافيش مشكله و قاللى كل اللى عايزه قلهم عليه و لو فيه حاجه مش عاجباك كلمنى
قلتله حاضر و بس كده - الراجل كان زوق و متفاهم لأقصى درجه و قلتله بصراحه انا حسيت لوقت وانا هناك انى بيتنصب عليا

المهم هروح الاربع ان شاء الله



على فكره انا بقالى شويه كتير مش بخش على المنتدى و شئ عجيب لما ارجع اشارك برضه الاقى نفس المناقشات العقيمه و التى لا فائده مرجوه منها حول رينو و التوكيل و هو حلو ولا مش حلو و الفل احلى ولا الياسمين نفس الكلام اللى مكتوب فى المناقشات ديه قريته من شهور قبل كده من نفس الاشخاص المهاجمين و المدافعين هو الموضوع هيفضل كده ولا ايه؟

[chato_eg]

ما تزعلش يا أبو عبد الله.....و بعدين إنت عارف إن أعضاء القسم يعرفوا بعض على المستوى الشخصى كويس ( على سبيل المثال بص على كلام أيمن فى الموضوع ده مين معاه ميجان نبيتى و ساكن فى مجوعة 26 بالرحاب؟ )....

من ناحية تانية لو فى شبهة تريقة زى ما بتقول....اعتبره يا أخى رد فعل أقل من الطبيعى على إشارات و اتهامات ضمنية بالتواطؤ مع التوكيل على حساب المنتدى و أعضاءه...

و حقيقى من غير تحيز...شاركى و أحمد عبد المقصود كانوا هادئين جدا -ربنا يديمها نعمة - و شاركى فضل عدم المشاركة علشان هو عارف الكلام اللى أنا بأعتبره جارح...

علشان كده أنا اتكلمت بلهجة حادة فى المشاركة رقم 84 بشكل أنا مش متعود عليه ...بس المهم نفى تهمة و دفاع عن الحق و رفع ظلم...

لو كان حد قاصد يتريق على كلامك أو آرائك كان اختار إحدى الجمل الخاصة بك أو آرائك المناهضة للتوكيلات عموما و رأيك فى المغالاة فى تقدير الماركة و التوكيل من ناحيتنا...لكن الكلام كان أقل رد فعل من بشر يتم إلصاق تهمة به و ده حصل فى أكثر من مناسبة مش فى الموضوع ده تحديدا

حاجة أخيرة كان نفسى أقولها لك من زمان و جايز تععتبر خروج عن الموضوع ...
الميجان أى نعم بتحب الصيانة الدورية و شأنها فى ذلك شأن أى عربية بل أى آلة...لو أهملت صيانتها هتتأثر بالسلب....

فى ناس بقى بتعمل الصيانة فى EIM و فى ناس بتروح ل French Motors و فى ناس بتروح للميكانيكيون العرب و أنا عن نفسى عارف إن محمد مصطفى عمره ما عتب برجله باب التوكيل و عربيته ما شاء الله معدية ال 100 ألف كيلو و ماشية معاه كويس و مش راضى يغيرها إلا لما يلاقى حاجة تستاهل إنه يسيب عربيته علشانها ربنا يحفظها له...

يعنى خلاصة القول إن فعلا ممكن تعيش حياتك مع الميجان بره التوكيل و تقضيها استيراد من الحرفيين و تايوانى من شارع دمشق و هتمشى كويس...كل ما فى الأمر إن فيها شوية تطكنولوجيا متقدمة صيانتها بتحتاج تأهيل فنى...دى حاجة مش تعيب فى العربية أبدا..و مش ذنب رينو إن الماركة مش منتشرة و الأشخاص المؤهلين قليلين جدا....و فى الحالات القليلة دى ممكن تروح مراكز الخدمة المعنمدة مش مغامرة و لا حجة...بس الإنسان بطبعه بيحب يلعب على ال safe Side و بلاش تجارب فى الحاجات الدقيقة دى و إدى العيش لخبازه..خصوصا إن مش كل 20 ألف كيلو مثلا حاجة زى دى بتحصل...

[M.Moustafa]

ابو عبد الله انا هضيف على كلام هاني حاجات بسيطة من واقع تجربة شخصية ليا انا، انا اشتريت العربية من السعودية وقعدت بيها سنتين هناك عمري ما قريت عنها كلمة واحده والسنتين كانت صيانتها كلها في التوكيل هناك ومدير الصيانة هناك كان ولا زال صاحبي وكل اللي في التوكيل هناك من اول مهندس الاستقبال لحد جوا عارفني وانا الوحيد اللي كنت بروح اعمل صيانه بدون ميعاد وعايز اقولك ان اذا كانت رينو هنا كويسه عشان سمعة توكيلها فرينو في السعودية ما بتبعش بسبب توكيلها

ومع ذلك انا عمري ما اشتكيت منهم بالعكس كانو بيعملولي حاجات كتيره جدا جدا وما يحاسبونيش عليها احدها بس على سبيل المثال لا الحصر اني عامل صيانة الستين وانا ماشي على 54 الف كيلو هناك صفو زيت الفتيس بالكامل ونضفو المجرى كلها وحطو الزيت الاصلي وده كله ببلاش، المثال التاني اني المراية اللي في النص عندي تعتيم ذاتي ودي مش مرايتي الاصلية لان مراتي الاصلية كانت عادية وهما غيروهالي في التوكيل ببلاش، موتور المروحة عندي متغير عشان يزود كفاءة التكييف ببلاش ده ما اتعملش للناس كلها وهما بيعاملو الناس كلها هناك كويس وكان بيتعملي انا حاجات مخصوص مش عشان مستنين مني حاجة لكن هما شافو واحد مداوم على الصيانة عندهم وبقى ليا علاقات كويسة معاهم ولو في حاجة عملوها ما عجبتنيش باخدها بصدر رحب وبيرجعلي ده بحاجات انا مش متوقعها.

ونفس الموضوع حصلي هنا في فرنش موتورز انا لما نزلت شوارع مصر العظيمة اللي عمري ما اشتكيت من الجنوط تنت الجنوط بتاعتي بالاضافة ان المقصين اللي قدام كانو محتاجين تغيير وغيرتهم على حسابي.

ايه رايك اني غيرت المقصين دول مرتين بعد كده وعلى حساب التوكيل مع ان ممكن يقولي ببساطة ده عيب سواق والله ما حصل.

القصد من ده كله ان كل واحد بيحكي ايه الحاجات الكويسة اللي بتم معاه في التوكيل وبيحكو برضه ايه الوحش ومحدش فينا بيرضى بالوحش بس مش معنى ان واحد اتعملو حاجة زياده ان هوا متفق مع التوكيل او بيحسن في صورته عشان يعملو الحاجة دي ببلاش لا هيا زي ما عبد المقصود قال هوا علاقته بالناس هناك كويسه ومداوم على الصيانة فبيمسكو في عميلهم ده لسببين:

اولا عشان يكمل صيانة عندهم
ثانيا عشان لما يحب يغير عربيته يجيب برضه رينو ما يقعدش يلعن في اليوم اللي اشتراها فيه

وهما بيحكو اللي حصل معاهم وبالعكس كمان بيحاولو انهم لو في ايدهم حاجة يعملوها يكلمو مهندس التوكيل بناءا على العلاقة الكويسة معاه عشان يساعد زمايله في المنتدى، واعتقد يا ابو عبد الله انك برضه ليك اتصالات بوكيل ديهاتسو وممكن يكون ليك اولوية او حتى معاملة افضل محدش ساعتها هيقولك طيب ما انت بتتكلم عن توكيل دايهاتسو كويس عشان بيعاملوك كويس وهتزعل لو حد قال كلمة زي كده.

انا عارف اني طولت عليك بس ارجو انك تقبل كلامي بصدر رحب

[أبو عبدالله]

وهما بيحكو اللي حصل معاهم وبالعكس كمان بيحاولو انهم لو في ايدهم حاجة يعملوها يكلمو مهندس التوكيل بناءا على العلاقة الكويسة معاه عشان يساعد زمايله في المنتدى، واعتقد يا ابو عبد الله انك برضه ليك اتصالات بوكيل ديهاتسو وممكن يكون ليك اولوية او حتى معاملة افضل محدش ساعتها هيقولك طيب ما انت بتتكلم عن توكيل دايهاتسو كويس عشان بيعاملوك كويس وهتزعل لو حد قال كلمة زي كده.

المشكلة فعلا ان ده مش مجال حوارنا اساسا
وعالعموم انا كلامي كله وانا عارف ان توكيل دايهاتسو عارفيني
بس على فكره انا اعرف رياسات وليس الأفراد اللي بتعامل معاهم تحت
وعلشان كده بيتعملي زي ما بيتعمل للناس
ولكن ممكن يكون الفرق اني بعرف اجيب حقي ازاي لو لقيت حاجه مش عاجباني
وده اللي بنحاول نخلي التوكيلات تعمله لكل الناس
والكلام بتاعي يعم كل التوكيلات علشان محدش يقولي اني هزعل لما حد يقولي كده
انا كلامي واضح جدا اني بقصد كل التوكيلات
وبرضه مش معنى كلامي ان مش ممكن انه يكون فيه ناس داخل التوكيل بتعامل الناس كويس لا ده حال مصر كلها مش توكيلات السيارات بس ان فيه الحلو والوحش
بس حلو عالطول صعب تلاقيه وده مقصدي في الكلام كله
ولكن مش عارف الأخوة اللي مسكوا في جزء من الكلام وبنوا عليها مشاركات كبيره
مع اني لم اقله
لأن في الاساس انا بتكلم للراجل صاحب الموضوع علشان افهمه ان في اي مكان في وحش وحلو
وممكن مره تروح تتشال على الراس ومره ممكن تروح تحس انك دخلت اسوأ مكان في الدنيا

هيا دي فكرتي ورايي وانا وضحته عشان ملقيش كلام مزايد على كلامي
لأني بصراحه مش هكتر في الكلام علشان ملقيش حد يرمي كلام مالوش اي لازمه غير انه يستفز الواحد ولا ينظر ان زي ما هو شايف ان كلامنا عقيم
انا احنا برضه شايفين ان كلامه مثيل لكلامنا في العقم بل اكثر من ذلك
مع الفارق ان احنا بنتكلم في مشكلة وبنحاول نوضح الأمور عنها
و انها مشكلة موجوده في اي حته مهما كان اداؤها في الخدمة بتاعتها
وان مشاركته لا تزيد عن انها استفزازية

فانا اللي اعرفه ان مشاركة مش عاجباني بدل ما استفز صاحبها وابقى شاركت مثله في وجود مشاركات عقيمه
اني اعمل تقرير بها لو فيها شئ مخالف
او اني لا اشارك في الرد على العقم بعقم مثله
واكون بذلك مشارك فيه في نفس الوقت الذي احارب قائله
والمثل بيقول اللي بيته من زجاج ............

وشكرا

[Ahmed Selim]

مش عارف أذا كان كلام موجه ليا صراحة ولا ضمناً.......و مش هقدر أرد عليه إلا فى حالة أن يكون موجهة ليا صراحة و ليس بطريقة التورية........

لله در من قال " لو سكت من لا يعلم لسقط الخلاف "

[CryptonX]

علي فكرة انا عرفت ايه هو اكبر عيب في الرينو و الميجان .. ده عيب قاتل فعلا !

الكلام عليها كتيييييييييييييييييييييييييييييييييييييييييييييييي يييييييييييييييييييييييييييييييييييييييييييييييييي ييييييييييييييير !ّ

انا يعني لو بفكر اشتريها حخبي عليكم ! و لو مش حشتريها حخبي عليكم و لو كارها برده حخبي عليكم و لو حاببها حخبي عليكم d:

مهاجمين او مدافعين !

ياجدعان دي شوية معدن فرنسي علي عجل تركي .. عربية بفلوس زي اي عربية تانية .. ليها عيوبها و مميزاتها ! لا هي تحفة التحلف و لا هي سيارة بالسوء ده!

دنا زهقتلكم والله :) و كلامي موجه لكله !

[human]

لو كلمتهم ابقى قوللى عملت ايه و ياريت اشوفك الاربع فى العبور
انا حاجز 8.30

ممكن الادمن يشيل المشاركات اللى مالهاش علاقه بالموضوع عشان تعم الفائده من الموضوع المطروح بدل ما الواحد يفتح يلاقى 10 صفحات 80% منهم خناقه موجوده فى كل مواضيع فيها كلمه رينو

حاجه تزهق فعلا

[Ahmed Selim]

دنا زهقتلكم والله

و مين سمعك

بس قولى يا كريم......هو انت ممكن تسكت عادى لو حد بيشكك فى صدق كلامك ؟؟؟

[human]

كبر دماغك يا احمد
ما هو الموال ده من ايام شاركى نفس الكلام برضه
بجد شئ مستفذ

يا ريت الكلام اللى بره الموضوع يتشال عشان اللى جى يقرا الموضوع يستفيد
و ممكن يتعمل موضوع منفصل للمباحثات الثأريه النوويه حول مدى صدق الوحوش و النسبه اللى بياخدوها من التوكيل عشان يبعتوا الاعضاء ( كلام يكسف بجد)

المهم شيلوا الكلام البعيد عن الموضوع

و انا اخر مره فاكر انهم كانوا طلبوا من الاخ الكريم انه مايعلقش فى رينو عشان بيعمل استفزازات ز الناس بتضايق
هو المنتدى لغى الطلب ده ولا خلاص شاركى مش موجود ولا ايه الموضوع؟!!

المهم اللى عنده المقابض الداخليه مقشره ممكن يغيرها اى وقت فى التوكيل طالما فى الضمان

و انا بحب رينو حتى لو التوكيل وحش

[Ahmed Selim]

و انا بحب رينو حتى لو التوكيل وحش

هههههه حلوة دى

[HassanEissa]

اعتذر للجميع عن عدم سرعة ردى
[quote]

ان بقه هقولك ليه
لأن دول من نايل موتورز وكلامهم له وقع هنا
وده شئ مش لرينو بس
ولكن لكل التوكيلات اللي بتابع المنتدى
والأمثلة كتير
ان اللي بيبقى جديد هنا ويقرا الكلام ويروح هناك مش بيلاقي الكلام اللي بيتقال هنا بالحرف
وممكن يدفع فلوس في حاجات ناس هنا عملتها ببلاش علشان معروفين للتوكيل

احنا اكبر من ان احنا نصدق الكلام ده بالطرقة دي
احنا بنحاول نفيد الناس بأي طريقة ولكن التوكيلات واي توكيل بينظر لمصلحته اولا طبعا

لو اخونا اللي بيشتكي ده كان واحد من المعروفين لدى التوكيل كان الموضوع هيبقى احلى من كده وكان زمانه فرحان جدا مش زعلان بالمنظر ده

وده برضه حاجه في كل التوكيلات مش رينو فقط

فبلاش نصدق كل حاجه بتتقال وناخدها على محمل ان التوكيل خايف على كل الناس
لا
التوكيل بيخاف على مصلحته اولا وده حق شرعي له وانا لا الومه ولكن اللوم ان الناس ممكن تتخيل عكس ذلك او الناس اللي شغاله هناك رايقين ومش عايشين داخل بلدنا مصر

أولا : انا مكنتش عاوز الموضوع يطول عن كده انا قولت رأيى فى التوكيل و خلاص
ثانيا : أقسم بالله انى معرفش حد فى التوكيل على الناحيه الشخصيه .
ثالثا : انا مبكدبش فى كلامى انا فقط بانقل صورة حيه للى حصالى من باب الدردشه فقط لاغير
( و بصراحه انا شايف ان الى انا بكتبه عن الى بيحصل معايه من التوكيل مالوش لزمة غير انى بيتلمح انى كداب او بألف ) so انا مش هكتب تانى فى المواضيع دى
رابعا : معروف للتوكيل ازاى و انا مرحتش و مختطش عتبة التوكيل غير خمس مرات فقط

على العموم انا شايف ان الموضوع مبقاش لوه لزمه و انا مش هبص فيه تانى ..... و بكرر اسفى لصاحب الموضوع على المشاكل الى حصلتله و بقوله احتسب عند الله

و رد اخير لكل الناس

موضوع ان الكلام عن رينو و حلوتها كتير اوى فى المنتدى مش بس علشان العربيه حلو فعلا
و لكن علشان ترابط عائلة رينو القوووووى الى بخلينا كل يوم ندخل على المنتدى و نكلم بعض على اللى بيحصلنا
و انا دخلت بقية الأقسام فى المنتدى ( واقصد الاقسام المتخصصه فى انواع السيارات ) و لقيت ...... صحراء

.....و على فكره انا كنت بتعامل فى عربيتى القديمه الانوس مع توكيل ابو غالى و كان برضه مريحنى .
و لكن بصراحة الى بيخلينى اكتب عن رينو ان العربيه نفسها انا مبسوط بيها

[chato_eg]

بسيطة يا جماعة...حصل خيير...و الحمد لله إن التوكيل هيراجع شغله تانى و هيريح الناس ( طارق عمر و Lion999 ) إللى کانت زعلانة منه فى اليوم إياه...و دى أجمل حاجة فى التوكيل..عدم الإصرار على الغلط و المكابرة...
غلطنا...عادى...بشر..بس مافيش غطرسة و لا غلاسة على الزبون...على الأقل على مستوى الإدارة و السياسة العليا..
حتى و إن موظف كسل أو غلس أو قصر بأى شكل و زعل العميل منه...لازم فى حد كبير بينهى الموضوع بشكل منصف...

[أبو عبدالله]

[QUOTE=HassanEissa;965154]اعتذر للجميع عن عدم سرعة ردى

أولا : انا مكنتش عاوز الموضوع يطول عن كده انا قولت رأيى فى التوكيل و خلاص
ثانيا : أقسم بالله انى معرفش حد فى التوكيل على الناحيه الشخصيه .
ثالثا : انا مبكدبش فى كلامى انا فقط بانقل صورة حيه للى حصالى من باب الدردشه فقط لاغير
( و بصراحه انا شايف ان الى انا بكتبه عن الى بيحصل معايه من التوكيل مالوش لزمة غير انى بيتلمح انى كداب او بألف ) so انا مش هكتب تانى فى المواضيع دى
رابعا : معروف للتوكيل ازاى و انا مرحتش و مختطش عتبة التوكيل غير خمس مرات فقط

على العموم انا شايف ان الموضوع مبقاش لوه لزمه و انا مش هبص فيه تانى ..... و بكرر اسفى لصاحب الموضوع على المشاكل الى حصلتله و بقوله احتسب عند الله

و رد اخير لكل الناس

موضوع ان الكلام عن رينو و حلوتها كتير اوى فى المنتدى مش بس علشان العربيه حلو فعلا
و لكن علشان ترابط عائلة رينو القوووووى الى بخلينا كل يوم ندخل على المنتدى و نكلم بعض على اللى بيحصلنا
و انا دخلت بقية الأقسام فى المنتدى ( واقصد الاقسام المتخصصه فى انواع السيارات ) و لقيت ...... صحراء

.....و على فكره انا كنت بتعامل فى عربيتى القديمه الانوس مع توكيل ابو غالى و كان برضه مريحنى .
و لكن بصراحة الى بيخلينى اكتب عن رينو ان العربيه نفسها انا مبسوط بيها

انا هرد على حضرتك لعدة اساب أولها ان حضرتك لم تحول الكلام الى شخصنه او تهكم او سخرية
ثانيا ان حضرتك اخدت فكره من كلام غيري وليس كلامي اني بكدب حضرتك وهذا لم يحدث
ولكن انا بتكلم بطريقة لو الأخوة اللي قاعدين يزودوا مشاركات في الفاضي وخلاص وبعدين يقولولك حذف المشاركات وهما كانوا اول مشاركاتهم في الموضوع تعليق على كلام الأخرين وبعدين يقولولك المشاركات اللي خارج الموضوع تتحذف كانوا قرأوا كلامي الأول كويس بدل ما هما بيرددوا كلام وخلاص وخلو حضرتك او غيرك يردوا عليا على اني قولت كلام لم اقله

اخي الكريم انا قلت

ان بقه هقولك ليه
لأن دول من نايل موتورز وكلامهم له وقع هنا
وده شئ مش لرينو بس
ولكن لكل التوكيلات اللي بتابع المنتدى
والأمثلة كتير
ان اللي بيبقى جديد هنا ويقرا الكلام ويروح هناك مش بيلاقي الكلام اللي بيتقال هنا بالحرف
وممكن يدفع فلوس في حاجات ناس هنا عملتها ببلاش علشان معروفين للتوكيل

احنا اكبر من ان احنا نصدق الكلام ده بالطرقة دي
احنا بنحاول نفيد الناس بأي طريقة ولكن التوكيلات واي توكيل بينظر لمصلحته اولا طبعا

لو اخونا اللي بيشتكي ده كان واحد من المعروفين لدى التوكيل كان الموضوع هيبقى احلى من كده وكان زمانه فرحان جدا مش زعلان بالمنظر ده

وده برضه حاجه في كل التوكيلات مش رينو فقط

فبلاش نصدق كل حاجه بتتقال وناخدها على محمل ان التوكيل خايف على كل الناس
لا
التوكيل بيخاف على مصلحته اولا وده حق شرعي له وانا لا الومه ولكن اللوم ان الناس ممكن تتخيل عكس ذلك او الناس اللي شغاله هناك رايقين ومش عايشين داخل بلدنا مصر

كلامي واضح اني لا انكر ان التوكيل كويس ولا اقول انه سئ ولكن كل كلامي من الأول ان الناس لما بتقرا الكلام هنا بتروح تفتكر انهم رايحين مكان مفيهوش خطأ وده اللي واضح من كلامي
يعني سواء المكان جيد او سئ فهناك خطأ
وسبق وقولت الكلام ده في مشاركة سابقة اهه هنا

وده اللي بنحاول نخلي التوكيلات تعمله لكل الناس
والكلام بتاعي يعم كل التوكيلات علشان محدش يقولي اني هزعل لما حد يقولي كده
انا كلامي واضح جدا اني بقصد كل التوكيلات
وبرضه مش معنى كلامي ان مش ممكن انه يكون فيه ناس داخل التوكيل بتعامل الناس كويس لا ده حال مصر كلها مش توكيلات السيارات بس ان فيه الحلو والوحش
بس حلو عالطول صعب تلاقيه وده مقصدي في الكلام كله
ولكن مش عارف الأخوة اللي مسكوا في جزء من الكلام وبنوا عليها مشاركات كبيره
مع اني لم اقله
لأن في الاساس انا بتكلم للراجل صاحب الموضوع علشان افهمه ان في اي مكان في وحش وحلو
وممكن مره تروح تتشال على الراس ومره ممكن تروح تحس انك دخلت اسوأ مكان في الدنيا

انا بقه مش فاهم ولا عارف اللي بيتكلموا بيردوا على مين في كلامهم ده
حسبي الله ونعم الوكيل

يبق في النهاية اخي الكريم كل كلامي يتلخص في الأتي :
1- ان التوكيل مهما كان جيد جدا فهناك اكيد حالات ممكن متخدشي حقها وتروح وترجع من التوكيل وهيا حسه ان اتنصب عليها كمان وممكن ميكنش حصل ولكن دي سنة الحياة
2- ان انا لم اقول ان التوكيل جيد او وحش لأن ده مش موضوعنا وانا لم اتكلم في هذا
انا كلامي كله واضح انه على كل التوكيلات لأن العنصر البشري واحد في مصر ولازم تلاقي اللي مش في دماغه او اللي عاوز يكروت لأن دي سنه عندنا في مصر
وعلى العكس ايضا اكيد ممكن تلاقي الكويس واللي بيخدم هناك ايضا
3- سؤال اخير لو كان اخونا الفاضل هو شاركي او اي احد من المعروفين هناك لدى التوكيل كان اتعمل معاه ايه ؟؟؟؟؟
هل كان هيخرج من التوكيل زي اخونا صاحب الموضوع كده بالمنظر ده ؟؟؟
طبعا اجابتي لا طبعا مكنش هيحصل معاه كده
طيب السبب انهم معروفين
وهو ده اللي بتكلم فيه من الصبح والأخوة بيحاول جاهدين انهم يتكلموا في اي حاجه يردوا بها عليا سواء قلتها او مقلتهاش لدرجة انهم بيردوا على حاجات من خيالهم وانا لم اتكلم فيها من الأساس

ان المسألة مش مشألة انهم واخدين فلوس وهذا لم اقله ولم اشر اليه
ولكن كلامي ان الواحد لما بيبقى معروف لهم مش هيحصلوا كده
وده فعلا اللي حصل وبيحصل

انا مش فاهم اللي مموتين نفسهم في الدفاع بيتكلموا في ايه اصلا
وانا مش فاهم اللي دخل في الموضوع في نصه وحشر نفسه وتكلم في اشياء لم تقال اساس وافتكر انه بيقول الحق
وفي النهاية الأخ الفاضل يقولك لو سكت من لا يعلم لسقط الخلاف
ده فعلا لأن لو اللي دخل في الموضوع ولم يعلق على كلام غيره ورد على اشياء لم تقال اساسا فعلا مكنش اخد من وقتنا ومجهودنا ان احن نوضح للناس الكلام اكتر من مره
علشان ملقيش واحد في يوم من الأيام يقولي انت قولت كذا وكذا لنه شاف واحد بيرد عليا بكلام لم اقله

وشكرا
وانا كده وضحت وجهة نظري وياريت محدش يزايد على كلامي وياخد بوصية اخونا الفاضل لو سكت من لا يعلم لسقط الخلاف
وانا والحمد لله لم اتكلم في شئ لا اعلم لأني لم اتكلم في تفاصيل سيارة ولكن تكلمت عن توكيلات مصر عموما وما مريت به ورايته في تجارب الأخرين
وبما ان الناس بتطالب برحابة الصدر وعدم تكذيب احد فانا بأطالبهم بذلك في كلامي وتجاربي
وربنا يعينا ويصلح حالنا جميعا

[human]

ولكن انا بتكلم بطريقة لو الأخوة اللي قاعدين يزودوا مشاركات في الفاضي وخلاص وبعدين يقولولك حذف المشاركات وهما كانوا اول مشاركاتهم في الموضوع تعليق على كلام الأخرين وبعدين يقولولك المشاركات اللي خارج الموضوع تتحذف كانوا قرأوا كلامي الأول كويس بدل ما هما بيرددوا كلام وخلاص وخلو حضرتك او غيرك يردوا عليا على اني قولت كلام لم اقله


انا بقه مش فاهم ولا عارف اللي بيتكلموا بيردوا على مين في كلامهم ده
حسبي الله ونعم الوكيل


وانا كده وضحت وجهة نظري وياريت محدش يزايد على كلامي وياخد بوصية اخونا الفاضل لو سكت من لا يعلم لسقط الخلاف
وانا والحمد لله لم اتكلم في شئ لا اعلم لأني لم اتكلم في تفاصيل سيارة ولكن تكلمت عن توكيلات مصر عموما وما مريت به ورايته في تجارب الأخرين
وبما ان الناس بتطالب برحابة الصدر وعدم تكذيب احد فانا بأطالبهم بذلك في كلامي وتجاربي
وربنا يعينا ويصلح حالنا جميعا

اول الكلام انا اللى طالبت المشاركات تتحذف اللى مالهاش علاقه بالموضوع فالكلام اللى انت كاتبه فى الجزء الاول انا شايفه مباشر ليا
هو حضرتك عايز ايه؟
انا عايز اعرف السبب من مشاركتك فى منتدى رينو هو مش ملكى و طبعا كل واحد حر بس انا نفسى افهم حضرتك ليه مصر انك تستفز الناس؟!!

حضرتك بتتكلم عن وجهه نظرك العامه حول التوكيل فى مصر
صاحب الموضوع باعت عنده مشكله محدده و بيسأل اخواته الوحوحوش من مالكى و متعاملى مع توكيل رينو
لو كان عايز يسأل حد تانى ماكانش جه هنا
حضرتك مشاركاتك فى الموضوع الهدف منها ايه؟!!
انا مشاركاتى فى الموضوع ده واضحه و كل واحده بتحدد حاجه مع التوكيل او استيائى من تدخل حضرتك الدائم فى كل ما يخص هذا المنتدى لتحيل الحوار الى دفاع و هجوم مقيت

حضرتك مش حاسس ان الناس متضايقه منك و بتبقى متضايقه كل مره بتدخل فيها هنا من غير ما تضيف حاجه او تفيد حد

قللى على موضوع لرينو واحد دخلته عشان تفيد اى حد- انا عارف انك ساعدت ناس قبل كده بس مش هنا
طيب حضرتك زى مانا شايف مشغول و بتعتذر عن التأخير فى الرد
طيب ماتوفر وقتك و بلاش مناقشات مقيته حول موضوع لن يفيد صاحب الموضوع؟! مش كده برده؟

"انا بقه مش فاهم ولا عارف اللي بيتكلموا بيردوا على مين في كلامهم ده
حسبي الله ونعم الوكيل "

طيب ماتقول حضرتك بترد برضه على مين بالظبط عشان ؟ ولا ده مش هينفع؟ انا مش فاهم كيف تنادى بأن يظهروا ما يبطنون وانت مش بتتعامل بالطريقه اللى بتطالب بيها؟!!

"وانا كده وضحت وجهة نظري وياريت محدش يزايد على كلامي وياخد بوصية اخونا الفاضل لو سكت من لا يعلم لسقط الخلاف "

و النصيحه ديه بقدمهالك عشان انت نفسك بتقول ماتعرفش عن توكيل رينو طيب ماتسيب الناس اللى بتتعامل واللى بتعرف تتكلم بدل ما حضرتك عمال تزود مشاركات لا تفيد صاحب الموضوع فى شئ

-----
و ده للأداره
-----
انا كنت عايز اكتب معاناتى مع التوكيل فى نفس يوم صاحب الموضوع بس تدخل الاخ الكريم تسبب فى حجوبى عن كتابه الموضوع كامل من حيث المشاكل حتى تحل المشكله حتى لا اعطيه زريعه لكى يتهكم او يتدخل فى مالا يعلمه و يصر على تعكير المناقشات و تحويلها الى مناقشات جانبيه بدل ما يكون التعاون لوجود حل بجد يعنى كنت قلقان اقول التكييف فيه مشكله يقول تكييف الميجان ضعيف و نخش فى مناقشه اتقالت ميت مره ده على سبيل المثال و ليس الحصر
انا بقالى اكتر من شهر مش بشارك فى المنتدى و لما رجعت عشان اشارك الوحوش تجربه سيئه الاقى برضه نفس المهاترات من هجوم يشنه الاخ الكريم و دفاع من الاخوه الكرام
يعنى انا مش فاهم هو المنتدى مافيش غير رينو اللى كل موضوع لازم يتحول لمهاترات كده؟؟
فيه حل ولا مافيش الموضوع هيفضل كده؟؟؟

يعنى هو بعيدا عن تشخيص الموضوع اكتر من اللى انا قلته بس لو نحط الموضوع فى معلومات اوليه هنلاقى التالى
1- بوست فى رينو عن السياره او عن التوكيل او عطل
2- الاخ الكريم يتدخل فيما لا يفيد احد من الملاك
3- الموضوع يتحول لمهاترات

الحال ده بقى مستمر يا ريت يكون فيه حل
-----



و شكرا