بخصوص علبه البيئه (الكتلايزر)

[tamer_samy]

السلام عليكم يا احمل وحوش في الدنيا



انا عندي علبه البيئه ضربت قدر الله و ما شاء فعل الحمد لله علي كل شي
المهم انا عندي سؤال لحضراتكم
اغيرها استيراد او الغيها خالص
انا عارف ان لو لغيتها خالص صوت العربيه هيعلي شويه بس هو هيكون عالي اوي و لا حاجه بسيطه
انا مش متخيل صوتها هيبقي وحش و لا ايه
بعدين لو استيراد مش هتبقي مضمونه
انا محتار جدا العربيه عندي عمله صوت شخلله مضايقني

[Ahmed Selim]

فداك يا حاج تامر....

بص هو الحلين أصعب من بعض بس أنا لو فى مكانك هختار أنى أغيرها و أمرى الى الله لكذا سبب
1- مش بستريح لو عارف ان فى حاجة مش صح فى العربية.....حتى لو حاجة تافهة
2- الصوت قد يكون مش عالى قوى بس أعتقد مع الوقت مش هيبقى ظريف.
3- البيئة مش ناقصة تلوث.....و ده كلام بجد مش تهريج......

شوف مومو عنده حد يعرف يجيبها أستيراد و عليها ضمان شوية كويسين ولا أيه ؟

[tamer_samy]

شكرا يا احمد علي سرعه الرد

هو انا كنت كلمت ايمن و قاللي هيشوف و يرد علي
بس اكيد اتشغل في دخله رمضان

[Ahmed Selim]

زن عليه عشان أيمن أكتر واحد بيهنج فى الوحوش.....بس لما أشوفه

بقاله 4 شهور بيقول أن اللابتوب بايظ و بيتصلح.........أيه لابتوب جملى ؟؟؟

[tamer_samy]

ماشي اقوم اكلمه دلوقتي

[mohamed1979]

هاتها يا باشا استيراد من الحرفين
كانت باظت عندى فى السيفيا و جبتها استيراد و قعدت معايا سنتين شغاله زى الفل لغايه مابعت العربيه
و اوعى تفكر تلغيها علشان عملت كده و كان صوت العربيه لا يطاق

[tamer_samy]

شكرا يا محمد باشا علي مرورك و ردك علي

انا هحاول اجيبها استيراد ان شاء الله
بس كنت عاوز اشوف حد يكون لاغيها وجرب الصوت

[akmal_hamdi]

فى ناس لاغيها بس ميزتها الوحيده سحب العربيه بيفرق جامد جدا جدا و عيبها الصوت العالى جدا جدا زى عربيه 128 شكمنها مخروم بس خلى بالك شكمان الميجان كلو رباط بمسامير مفهوش لحام خالص و هو 3 اجزاء فلو جربت تلحم الشكمان و ترجعها تانى كلو هيبوظ وهتجيب واحد كامل برقم (بمبلغ)

[Mohd_Adel_Amin]

ازيك يا تامر باشا كل سنة وانتا طيب ..
انا كنت لغيتها في الميجان 1 وعلى ما اتذكر ان عمرو عمارة لغاها في الكليو , وعيوب انك تلغيها الصوت مش مناسب بتاتا للميجان يعني لو فاتح الشباك هتتضايق من صوت عربيتك وغير ان العادم ريحته بتكون اسوأ يعني لو راكن في جراش او حاجة مقفولة وشغلت العربية هتشم ريحة مش ظريفة , موضوع السحب بصراحة افضل بس اعتقد انه ميستاهلش التضحية وخصوصا للأسباب اللي احمد عبد المقصود قالها ,
توكل على الله وشوف واحدة استعمال وكان الله في العون .

[عمرو عمارة]

أنا لغيها في الكليو بصراحة لأني إتعكيت فيها

في الأول قولت لازم أجيب واحدة إستيراد عشان أحافظ على العربية والكلام ده كله.....طبهاً بالسؤال عليها إستيراد مش موجودة خالص وكل الناس قالت ممكن تركب بتاعت الدايو......رحت لمحل شكمانات كبير في الحرفيين (الله يسامحه)ركبلي علبة إستيراد بتاعت الدايو ودفعت 500جم وقبل ما يركبها قالي خد بالك إن العلب الإستيراد ملهاش ضمان....ومشيت والدنيا زي الفل.....تاني يوم العلبة ضربت وسمعت شخاليل....روحت لاغي العلبة وركبت ماسورة مباشرة للعلبة الوسطى
السحب فرق كتيير جداً وأيضاً إستهلاك البنزين......الصوت مش عالي للدرجة وبتسمعه بعد ما تعدي 4 في الـrpm كأنك مركب فلتر رياضي ( يمكن عشان الموتور بتاعي صغير )

لو هتجيب علبة إستيراد لازم يكون واحد أمين ومعرفة عشان مشكلة الضمان دي

كان الله في عونك

[medohai510]

السلام عليكم،،،
أنا كمان لغيها زي الأخ عمرو عمارة تماماً والصراحة الصوت عالي شوية بخاصة في الجراج والأماكن المغلقة أما مسألة السحب لا أعتقد أنة فرق كثيراً.
في رأيي المتواضع أنك تركب ماسورة الأن لأنها بتركب بمسامير من الأتجاهين وسهل فكها وتركيبها لكن خذ بالك لازم تكون ملحومة كويس يعني ميكونش فية تنفيس أو أي حاجة ولو لم يعجبك الصوت والكلام هذا أبحث عن واحدة أستيراد مضمونة وركبها، والله الموفق

[tamer_samy]

اشكر كل الاخوه الوحوش اللي ردوا علي و جزاكم الله خيرا

انا بحاول اكلم ايمن و ربنا يكرم ان شاء الله
هو مكنتش حابب موضوع ان انا الغيها بس قولت اشوف رأيكم
طبعا العلبه الجديده هتبقي حلوه جدا بس سعرها وحش جدا 6000 جندي حرام

بالنسبه لصوت الشكمان بتاع ال128 لما كانت معايا كنت شايل العلبتين هو كان حلو علي ال128و كان مزعج جدا
بس علي الميجان اعتقد انه هيكون مش ظريف بالمره

[ramy_gamal]

هى لو اتلغت استهلاك البنزين هيقل كتير؟؟؟؟؟؟؟؟؟؟؟؟؟؟؟؟؟؟؟؟

[Ahmed Selim]

أعتقد يزيد مش يقل

[ramy_gamal]

انا اول مرة اعرف موضوع علبه البيئه دى بس اعتقد انها مهمه مش اى حاجة