استشارة من اصحاب الميجان

[chato_eg]

لو عيب صناعة...هل هو حالة فردية ( حالتين فرديتين علشان موضوع النكتة القديمة )...أم هى دفعة معينة ؟؟؟
لو كانت حالة جماعية و لو فى دفعة ما أو مجموعة ما من السيارات...كان زمان رينو سحبتها من زمان...و يا إما صلحتها يا إما استبدلتها فورا...يا إما بدلت العربيات بغيرها لو لزم الأمر....
إذا كانت دى سلوكياتهم فى أشياء أبسط زى البطارية و كويل و software بتاع فتيس فيه نتشة...مش معقول يسيبوا حاجة فى الخطورة دى...
غالبا إهمال فى الصيانة أو عدم دقة فى التصليح...أو حالة فردية لسيارة من وسط آلاف السيارات...
ربنا لطيف بعباده..تصور لو كان الوضع ده على طريق سريع و لو لا فى موقف طارىء...

[farahat]

وحوش المنتدى الكرام ، وحشني كتيير جداً ، كل سنة و انتم طيبين
من زمان و أنا وحشني المواضيع الجدلية دي ، لدرجة إن احنا كنا ابتدينا ننسى الميجان و مشاكلها و عيوب الصناعة إلي فيها ، مش كدة ولا إيه يا شباب

تعالوا نفكر كدة مع بعض في موضوع الدركسيون دة ، قفشة دركسيون دي حاجة من اتنين يا إما steering wheel lock (إلي هو المسوجر بتاع الدركسيون ) ، يكون قفل منه لنفسه نتيجة عيب فيه أو في وحدة الكنترول بتاعته (لأن في الميجان المسوجر دة كهربة مش مكانيكي )، و دة مش بيفتح غير لما الواحد يدخل الكارت و يدوس start و الإموبليزر هو إلي بيفتحه لو الكارت سليم ، و بيقفل فقط لما تدوس stop ، يبقى لو هي كدة ، كان كل المطلوب يجربه سحبنا إنه يبطل العربية و يشغلها تاني و كان هيسمع صوت القفل شغال ولا لأ .

السبب التاني إلي ممكن أفكر فيه إن يكون موتور الباور الكهرباء شغال على الفاضي ، و يكون جاب أخر المشوار من أي من الناحيتين و مكمل عشان كدة صاحبنا مش قادر يرجعه تاني، يعني يكون الموتور وصل العجل أخر يمين و عايز يكمل تاني يمين و صاحب العربية بيرجع شمال بس مش قادر يلف عكس الموتور (و إن كان دة من المستحيل لأسباب فنية كتيرة ، بس أنا هفترض إن وحدة الكنترول حصل فيها مجموعة من الاعطال مع بعض مش واحدة فقط و في تزامن رهيب أدى إلى إن الوضع يبقى كدة ، و إن كان دة مستحيل عملياً )، في الحالة دي كان هيسمع صوت موتور البور شغال على الفاضي و برضه كان هيبطل العربية .

هي دي الحاجات الإلكترونية إلي موجودة على نظام التوجيه أو الدركسيون ، بس أنا عندي سؤال هنا يا شباب ... هو احنا ليه على طول فكرنا في الحاجات الإلكترونية أو السوفتوير ؟؟؟! مش غريبة دي ؟! ، أنا بحكم شغلي دي أول حاجات بتيجي في بالي لأن هو د إلي أنا بفكر فيه طول النهار (ذي لو سألت حد شغال في بنك مثلاً هو أنا ليه مش عرف اشتري الحاجة الفلانية ، هيقولك على طول أكيد الحساب بتاعك فيه مشكلة أو الكارت بتاعك مش شغال ، و مش هيفكر أبداً إن يمكن الحاجة دي مش للبيع أصلاً عشان كدة أنا مش عارف اشتريها )

معلش اعذروني بس الموضوع دة لفت نظري جداً ، ليه محدش فينا خالص فكر في الحاجات المكانيكية ، مع إن دي هي الاكتر في أي عربية ،
تعالوا نفكر كام سبب مكانيكي ممكن يعمل إلي حصل دة :
- علبة الدركسيون دي إتفورت قبل كدة عشان كانت بتخبط ولا حاجة و اتعمل لها حشو ، بس إتكبست زيادة و حصل فيها مشكلة جوة (فبره إتحركت أو اتكسرت جوة )
- كاوتش الشحم إلي على علبة الدركسيون اتقطع و دخل رايش أو حاجة ناشفة على الجريدة المسننة و مع الوقت جت تحت الترس و خلته ميلفش
- بيضة دركسيون بايظة و ناشفة و حد بتاع عفشة قرص عليها عشان يربط عفشته، و نتيجة القرص الزيادة البيضة دي قفشت.
- مساعد إنكسر أو سوستة و خلت ناحية من الناحيتين مش عارفة تلف

أنا عارف إن دي حاجات صعبة و مش بتحصل كل يوم ولا حتى كل سنة ، و لكن كلها ممكنة ، و إحتمال حدوثها هو نفس إحتمال حدوث عطل في وحدة تحكم ، انما ليه على طول رحنا على فكرة إن الموضوع أكيد إلكتروني أو سوفتوير ؟!!
واضح إن احنا بقينا موسوسين زيادة عن اللزوم ، و مش عارف ليه عندي إحساس إن في يوم من الايام هيبقى كل الناس لما تحس إن في حاجة مش مظبوطة في العربية هتفرمت و تنزل سيستم من الاول ،الكلام دة مش تريقة لأن الحاجات دي بتنتشر شوية شوية و هنلاقي ناس بتعمل كدة فعلاً خلال كام سنة ، بس المفاجأة بقى إن الناس هتكتشف إن مش هو دة الحل و هنرجع تاني نفكر في الميكانيكا بس بعد ما نكون إتفرجنا شوية و إتسلينا.

[Col. Eng. Khaled]

بارك الله فيك يا باشمهندس فرحات و كل سنة و الوحوش و المنتدى طيبين

يبقى التوكيل لما يأكد على إلغاء الضمان في حال عدم عمل الصيانات المدفوعة و (المجانية) يبقى عنده حق ، للوقوف أولا بأول على

حالة العربية و في النهاية لراحة مالك العربية .

[chato_eg]

كل سنة و إنت طيب م/ فرحات...و تسلم إيدك على التحليل ...

صحيح الميجان خسرتك...لكن الحمد لله الوحوش كسبوك

و نلقاك على خير فى المقابلة القادمة

[Ahmed Selim]

الكبير كبير برضه............ :)

[Amr_Moh]

مفيش كلام تاني يتقال

[د.محمود صلاح]

باشمهندس فرحات , الله يفتح عليك ,

العضو الفاضر أبو آسر ياريت حصرتك كنت كملت مع صاحب الميجان للآخر عشان الموضوع هنا يبقى متكامل بدل ماإحنا عمالين نضرب أخماسا فى أسداس

[Ahmed Selim]

باشمهندس فرحات , الله يفتح عليك ,

العضو الفاضر أبو آسر ياريت حصرتك كنت كملت مع صاحب الميجان للآخر عشان الموضوع هنا يبقى متكامل بدل ماإحنا عمالين نضرب أخماسا فى أسداس

أو يجيب رقم تليفونه عشان نطمن عليه :)

عموماً أنا هحاول أسأل فى التوكيل بعد العيد إن شاء الله.........لعل و عسى يكون راح التوكيل أو يكونو عارفين أيه سبب حاجة زى دى.

[د.محمود صلاح]

تبقى كفيت و أوفيت

[Ahmed Selim]

ربنا يكرم إن شاء الله

[triton]

كبير يا بش مهندس فرحات ... كالمعتاد

[أشرف العدوي]

هي حاجة حصلت قدامي و كانت العربية دايرة و العجل معوج ( علشان الراجل بعد ما طلع من الملف جه يعدل الدركسيون ما عدلش )
المهم انا بصراحة ما وقفتش كتير علشان ما اعمل ش زحمة على الكوبري لان واضح ان كان في سواق تاكسي واقف بيساعدة


انا بس ليه ملاحظة و مش عارف إذا كان ليها دخل في مشكلة الراجل ده و لا لاء

الي عارف الكوبري ده ( هو كوبري معدني ) و عبارة عن الواح صاج متسفلتة
الفواصل بين الواح الصاج عالية شوية ( هي بالطول مش بالعرض )
مرة كنت ماشي عادي على الكوبري ده و في الملف الملعون ده مشيت بالعجلة الي ناحيتي على حافة الفاصل ده
الفاصل دخل جوة نقشة الكاوتش وبقت العربية كأنها ماشية على شريط قطر لقيتها بتلف مع الفواصل و مالهاش دعوة بيا خالص و كنت هتقلب يوميها
ممكن ده يكون جزء من مشكلة الراجل ده و الله اعلم

بس و الله انا ما كنتش قاصد اطلع اشاعة
و لما حصلي الموقف بتاع الفاصل و افتكرته دلوقتي قولت ربما يكون ده السبب

ده ردي في اشعات عن الميجان الحلقة الخامسة
انا للأسف ما تابعتش رد في الموضوع من زمان علشان انا للاسف مش معايا ميجان
و للأستاذ محمود صلاح و الاستاذ احمد عبد المقصود
ما كانش ينفع اخد رقم تليفون صاحب العربية ( مش عارف انا شايفها مش منطقية ان اطلب منه رقم التليفون اصل مش كل واحد عربيته عطلانة لسبب ما اقف اخد رقم تليفونة علشان اديه لبقية الناس تتطمن عليه لو انتوا شايفينها منطقية يبقى انا فيا حاجة غلط )
و الكوبري كان زحمة علشان كدة ما وقفتش معاه كتير لان كان في سواق تاكس واقفله فعلاً و انا اصلاً ما افهمش في الميكانيكا و لا الكهرباء بتاعة اي عربية

[elshinawy80]

انا اؤيد كلام استاذ احمد عبد المقصود جدا
تلميذ و بتعلم يا باشا

[Ahmed Selim]

ده ردي في اشعات عن الميجان الحلقة الخامسة
انا للأسف ما تابعتش رد في الموضوع من زمان علشان انا للاسف مش معايا ميجان
و للأستاذ محمود صلاح و الاستاذ احمد عبد المقصود
ما كانش ينفع اخد رقم تليفون صاحب العربية ( مش عارف انا شايفها مش منطقية ان اطلب منه رقم التليفون اصل مش كل واحد عربيته عطلانة لسبب ما اقف اخد رقم تليفونة علشان اديه لبقية الناس تتطمن عليه لو انتوا شايفينها منطقية يبقى انا فيا حاجة غلط )
و الكوبري كان زحمة علشان كدة ما وقفتش معاه كتير لان كان في سواق تاكس واقفله فعلاً و انا اصلاً ما افهمش في الميكانيكا و لا الكهرباء بتاعة اي عربية

يا باشا مفيش مشكلة خالص...........أنت شفت حاجة و حكيت عليك و محدش بيكدبك أعوذ بالله
أحنا بس كنا بنحاول نعرف سبب اللى حصل.......و أنا نسيت بصراحة أكلم الناس اللى أعرفهم فى التوكيل بس إن شاء الله أكلمهم قريب و أعرف أسباب حاجة زى دى ممكن تكون أيه.

انا اؤيد كلام استاذ احمد عبد المقصود جدا
تلميذ و بتعلم يا باشا

يا باشا العفو