اعملوها وحسوا بالفارق....

[hazemawad]

الساده الاعضاء الاعزاء...
هيه نصيحه الى اللى بيحبوا يجربوا ومعلومه معاها للى بيحب يعرف....


لكن الاول: انتوا بتظبطوا التاكيهات على كام وكل قد ايه ؟؟!!
هاتكلم على اللى انا ماشى بيه وما ليش دعوه بغيرى وفى الاخر دى عربيتى وانا حر فيها..
التعليمات بتاعة المصنع بتقول ظبط السحب - عادم بيكون على البارد 18 - 20 على التوالى وانا بصراحه مش مقتنع بيها وباظبط بنفسى على 15 - 15 والفيلر يادوب بيعدى على الشعره والكلام ده على فترة شهرين او تلاته حسب مشاويرى ومش هاتكلم على السحب او الحراره او الاستهلاك ولكن هاتكلم على نعومة الصوت و الاحساس انك راكب عربيه مالهاش صوت ...( اللهم الا من صوت بلية شجرة الفتيس اللى اخدت عليها ومش متضرر منها واللى مش عاجبه يسد ودنه لا مؤخذه... )
مع العلم ان الكاربيراتير الاصلى مش اللى فى العربيه ولكن الحمد لله على كل حال وراضى وقانع
وكان مع وجود الكاربيراتير الاصلى ابو 2 باب كان الفرق اوضح واقوى فى اداء الماتور على الطريق بس الحمد لله
اللى هايظبط يقول ظهر الفارق ومستنى الردود بتاعتكم .....

[kaza]

ضبط خلوص التاكيهات علي قيم اقل من الموصي بة من قبل الصانع ضربة حظ ليس اكتر وخطير جدا علي المحرك لانة وان كان بيهدي صوت الموتور جدا لاكن بيحرق الصبابات وقواعدها وبيهرب كبس غرف الاحتراق والمشكلة بتكون اكبر علي صباب العادم لتعرضة الدائم لمتوسط حرارة 500-800 درجة والتي بتكون ناتجة عن حريق الشحنة وبالتالي يتمدد ويضعف احكام اغلاق غر فة الحريق وبالتالي يضعف الاداء كل العربية ما تسخن وممكن علي المدي البعيد يقفش صباب ويكسر التاكية بسبب حريق زيت التزييت المار في دليل الصباب وتصمغهه وبالتالي هيتسبب في تغيير الصباب ودليلة وخرط الكرسي علي اقل تقدير بل ممكن يتطرف معاك الموضوع والمكبس يخبط الصباب القافش وبالتالي يتكسر التاج ويتني الصباب

[hazemawad]

كلامك سليم 100% ومافيهوش غلطه اقدر اراجعك فيها.....
ولكن انا ظبطت على 15 سحب عادم والماكينه لا بتهرب كبس ولا فيه عندى ترزيعه على التاكيه والصباب والبستم مخاصمين بعض والحمد لله والكبس زى الفل و الاستجابه للامبليه بقت اعلى والعزم زاد و السحب بقى اعلى والاستهلاك قل الثلث والماكينه بقت غير ...
اما كون اللى حصل ضربة حظ زى ما انت قولت فده العنصر اللى عمرى ماتعاملت معاه فى حياتى وشغلى ....
الرجاء مراجعة جميع منشوراتى السابقة على النايل موتورز لن تجد فيه كلام عن ضربة الحظ ابدا بل هى خبرة شغل ايد و خساره واصلاح لا حصر لها
شرفت بمرور سيادتكم الكريم استاذ Kaza

[hazemawad]

معلش نسيت اقولك ان انا معدل فى الوش ومعلى نسبة الانضغاط

[hazemawad]

استاذ خالد نسيت اقولك برضو ان الوش عندنا فى الداتشا عامل 350 جنيه وطقم البستم بشنبره بشميزه 800 جنيه تركى و 1200 فرنساوى والجوان 20 وانا اللى بفك وبجمع على ايدى

[hazemawad]

الادمن المحترم
بعد التحيه
من الملاحظ ان العضوKaza وبعد متابعة اشتراكاته وردوده داخل المنتدى وجد انه عادة ما يستخدم الردود الحاده ذات الطابع الشخصى الهجومى وفرض رأيه بالاسلوب الحاد والمستهزئ وغير اللائق
وبعد ما اتحفنى هذا العضو المحترم برده الذى سطح فيه من منشورى وادعى على بأوصاف لم اقبلها لا وصفا او تشبيها ولا موضوعا...
فرجاء حظر التعليق لهذا العضو المحترم على مواضيعى لاننى لم اجد اى سعة صدر فى اسلوب طرحه ولا عرضه لرأيه ولم استرح لوجوده فى موضوعى المطروح واعتقد ان هناك من شاركونى فى هذا الرأى حين تتبعت مساره داخل مواضيع واقسام المنتدى المختلفة من باقى الاعضاء ....
وهناك الكثير من التحذيرات للسيد العضو المحترم من قبل الادمن 7 وحثه لعدم استخدام الاسلوب الهجومى فى التعليق وعدم الشخصنه فى الردود وهو ما اطالب به تجاه العضو Kaza وازيد بحظره عن التعليق فى مواضيعى
ولكم جزيل الشكر

[hugan]

بصراحه في البوست بتاعك الراجل لم يقل شيء يمسك باحراج او تسفيه
مناقشته كانت موضوعيه بدون تجريح

[kaza]

الادمن المحترم
بعد التحيه
من الملاحظ ان العضوkaza وبعد متابعة اشتراكاته وردوده داخل المنتدى وجد انه عادة ما يستخدم الردود الحاده ذات الطابع الشخصى الهجومى وفرض رأيه بالاسلوب الحاد والمستهزئ وغير اللائق
وبعد ما اتحفنى هذا العضو المحترم برده الذى سطح فيه من منشورى وادعى على بأوصاف لم اقبلها لا وصفا او تشبيها ولا موضوعا...
فرجاء حظر التعليق لهذا العضو المحترم على مواضيعى لاننى لم اجد اى سعة صدر فى اسلوب طرحه ولا عرضه لرأيه ولم استرح لوجوده فى موضوعى المطروح واعتقد ان هناك من شاركونى فى هذا الرأى حين تتبعت مساره داخل مواضيع واقسام المنتدى المختلفة من باقى الاعضاء ....
وهناك الكثير من التحذيرات للسيد العضو المحترم من قبل الادمن 7 وحثه لعدم استخدام الاسلوب الهجومى فى التعليق وعدم الشخصنه فى الردود وهو ما اطالب به تجاه العضو kaza وازيد بحظره عن التعليق فى مواضيعى
ولكم جزيل الشكر

ايه الكلام الكبير دة يا استاذ حازم ....مستهزئ وحاد وهجومي وفرض وادعاء اوصاف كمان ....انا عملتلك حاجة لا سمح الله ....لو حضرتك متابع فعلا مقالاتي ومشاركاتي هتجد اني حاد فعلا بس مع الفتي والادعاء لان للاسف واكرر للاسف المنتدي تعرض لحملة كبيرة من تفريغ عقول ومهارات وخبرات عريقة بسبب توافه واكبر التوافهه كان قسم احوال الشارع المصري والعصابة اللي كانت مطلوقة فية
لكن لما بتتكلم في محر كات وسيارات بارفع ليك القبعة واحطك كمان علي راسي
يااستاذنا كويس انك بتعمل كل حاجة بايديك وان الموتور عدلتة كمان وزودت انضغاطة بس عملت دة ازاي من غير ما تقرب غرفة الحريق بالصبابات للبساتم وبتقول ان الصبابات والبستم مخاصمين بعض ؟؟؟ راجع اللي كتبتة وياريت تقولي ازاي
الحاجة التانية ما تحكمش علي ان السلندرات محكمة غير يقياس الكبس بعد مشوار وفك البوجيهات وتركب العداد مكانهم وتدور بالمارش وشوف القراءة تصاعدية ولا بتنزل وثابتة بين السلندرات ولا لا وعموما الخلوص اللي تم اعتمادة من الصانع للموتور بيكون الاصلح بعد تجارب في جميع درجات الحرارة والرطوبة والاجهاد للمحرك للحصول علي اقصي مواصفات ممكن اعتمادة الاداء من حلالها دي كل الحكاية
علشان كدة لما قلتلك ضربة حظ ان ممكن ما ذكرت ينفع معاك لكن مش هينفع مع حد تاني ولكل قاعدة شواذ
عموما شكرا علي وصفك الجميل لي ودون سابق معرفة وتقبل مروري سلام

[mohsen128]

حازم باشا فعلا يوم مكنت عندك وظبط التكهاب فعلا معرفتش عربيتي وكان اي حد يركب معايا العربية بيحس بفرق في هدواء صوت الماتور ، بس للاسف بعد ما عملت الوش والميكانيكي ظبط التكهيات رجع صوتها على تاني .
معلومة بس عن حازم للناس الي متعرفوش حازم عمره مبيجرب او يغامر في عربيت حد واي حاجه بيقولها في المنتدي او يعملها في عربيت حد بيكون متاكد من نتجتها ومبيسبش حاجه للحظ .

[hazemawad]

محسن بك الف شكر ليك على تعليقك الداعم ده وانا والله ماكنتش ناوى اعلق على البوست ده نهائى ولكن انا دخلت مخصوص عشان اقدم لك الشكر والعرفان ليك على تعليقك الجميل ده...

[كرم الحمصي]

يا عم حازم . كبر دماغك
وكل سنه وانت طيب ورمضان كريم

[hazemawad]

الله اكرم يا عم كرم كل سنه وانتم كلكم طيبين وبصحه وسعاده